Kpa ye Mme Idomo, Ẹsọn̄ọ Ẹyịre ke Mbuọtidem Mbufo!

“Ẹnịm ẹte edi n̄kpọ ọyọhọ idatesịt, nditọete mi, ke ini nsio nsio idomo ẹsịmde mbufo.”—JAMES 1:2.

1. Ikọt Jehovah ẹnam n̄kpọ ẹnọ enye ke mbuọtidem ye “inemesịt” kpa ye nso?

IKỌT Jehovah ẹnam utom nte Mme Ntiense esie ye mbuọtidem ke enye ye “inemesịt.” (Deuteronomy 28:47; Isaiah 43:10) Mmọ ẹnam emi kpa ye oro ediwak idomo ẹsịmde mmọ. Kpa ye mme nsọn̄ọn̄kpọ, mmọ ẹbọ ndọn̄esịt ẹto mme ikọ ẹmi: “Ẹnịm ẹte edi n̄kpọ ọyọhọ idatesịt, nditọete mi, ke ini nsio nsio idomo ẹsịmde mbufo; ke ẹfiọkde ẹte mbuọtidem mbufo emi ẹma ẹdomo ẹwụt anam ime ọwọrọ.”—James 1:2, 3.

2. Nso ke ẹfiọk ẹban̄a andiwet n̄wed James?

² Mbet oro James, ata eyeneka Jesus Christ, ekewet ikọ emi ke n̄kpọ nte 62 E.N. (Mark 6:3) James ekedi ebiowo ke esop Jerusalem. Ke akpanikọ, enye, Cephas (Peter), ye John ‘ẹketie nte mme adaha’—n̄kpọsọn̄, mme enyene-iwụk andinọ esop ibetedem. (Galatia 2:9) Ke ini ẹkedade eneni aban̄ade edina mbobi ẹdi ke iso “mme apostle ye mbiowo” ke n̄kpọ nte 49 E.N., James ama ọnọ eti ekikere ọkọkọn̄ọde ke N̄wed Abasi oro otu ukara eke akpa isua ikie ekenyịmede.—Utom 15:6-29.

3. Nso ikedi ndusụk mfịna oro mme Christian eke akpa isua ikie ẹkesobode, ndien didie ke nnyịn ikeme ndibọ n̄kponn̄kan ufọn nto leta James?

³ Nte ekpemerọn̄ eke spirit oro ekerede aban̄a, James ‘ama ọdiọn̄ ese n̄kpri ufene iso.’ (Mme N̄ke 27:23) Enye ama ọfiọk ete ke mme Christian ini oro ẹkesak iso ẹse n̄kpọsọn̄ idomo. Ama oyom ẹnen̄ede ekikere ndusụk owo, koro mmọ ẹkewụtde uma ẹnọ mbon inyene. Ye ediwak owo, utuakibuot ekedi n̄kpọ oro ẹnyụn̄ ẹnyenede ndinam. Ndusụk owo ke ẹkeda edeme mmọ oro owo mîkakarake ẹsịn ntịme. Edu ererimbot ke ekenyene mme mbiara utịp, ndien ediwak owo ikenyeneke ime ikonyụn̄ ibọn̄ke akam. Ke akpanikọ, udọn̄ọ eke spirit ama omụm ndusụk Christian. Leta James ama eneme aban̄a mme utọ n̄kpọ oro ke usụn̄ oro ọbọpde-bọp, ndien item esie enyene ufọn mfịn nte ekenyenede ke akpa isua ikie E.N. Nnyịn iyọbọ ufọn akamba akamba edieke nnyịn idade n̄wed emi nte kiet oro ẹkewetde ẹnọ ẹsọk nnyịn san̄asan̄a.a

Ke Ini Nnyịn Isobode Mme Idomo

4. Didie ke nnyịn ikpese mme idomo?

⁴ James owụt nnyịn nte ikpesede mme idomo. (James 1:1-4) Utu ke ndisiak itie ebuana esie ke ubon ye Eyen Abasi, enye ke nsụhọdeidem okot idemesie “owo Abasi ye Ọbọn̄ Jesus Christ.” James ewet n̄wed ọnọ ẹsọk “esien duopeba” eke Israel eke spirit “ẹmi ẹsuanade,” ke akpa ke ntak ukọbọ. (Utom 8:1; 11:19; Galatia 6:16; 1 Peter 1:1) Nte mme Christian, ẹkọbọ nnyịn n̄ko, ndien ‘nsio nsio idomo ẹsịm’ nnyịn. Edi edieke nnyịn itide ite ke ediyọ mme idomo ẹsọn̄ọ mbuọtidem nnyịn, nnyịn ‘iyenịm ite edi n̄kpọ ọyọhọ idatesịt’ ke ini mmọ ẹsịmde nnyịn. Edieke nnyịn imụmde nsọn̄ọnda nnyịn ye Abasi ikama ke mme ini idomo, emi ayada nsinsi inemesịt ọsọk nnyịn.

5. Nso ke mme idomo nnyịn ẹkeme ndisịne, ndien nso itịbe ke ini nnyịn iyọde mmọ uforo uforo?

⁵ Mme idomo nnyịn ẹsịne mme afanikọn̄ oro ẹsịmde kpukpru owo. Ke uwụtn̄kpọ, unana nsọn̄idem ekeme ndifịna nnyịn. Abasi ikọkke mme udọn̄ọ ke utịbe utịbe usụn̄ idahaemi, edi enye ọbọrọ mme akam oro nnyịn ibọn̄de iyom ọniọn̄ ye ukeme oro oyomde man iyọ udọn̄ọ. (Psalm 41:1-3) Nnyịn n̄ko imọbọ ufen ke ntak edinen ido nte Mme Ntiense Jehovah oro ẹkọbọde. (2 Timothy 3:12; 1 Peter 3:14) Ke ini nnyịn iyọde mme utọ idomo oro uforo uforo, mbuọtidem nnyịn ọwọrọ ada, akabade edi kiet ke otu ‘edu oro ẹdomode ẹwụt.’ Ndien ke ini mbuọtidem nnyịn akande, emi “anam ime ọwọrọ.” Mbuọtidem oro ẹnamde ọsọn̄ idem ebe ke mme idomo ayan̄wam nnyịn ndiyọ mme udomo ke ini iso.

6. Didie ke “ime anam utom esie ama,” ndien nso nti usio-ukot ke ikeme ndinam ke ini idude ke idak idomo?

⁶ “Edi,” James ọdọhọ ete, “yak ime anam utom esie ama.” Edieke nnyịn iyakde ime anam utom esie ama ye unana edidomo nditre enye ke usụn̄ oro mîkemke ye N̄wed Abasi, ime ayanam “utom” ndinam nnyịn idi ọyọhọ ọyọhọ Christian, emi mînanake mbuọtidem. Edi akpanikọ, edieke idomo ayararede ndusụk mmeme, nnyịn ikpenyene ndiyom un̄wam Jehovah ndikan enye. Nso edieke idomo edide idomo ndibuana ke oburobụt ido idan̄? Ẹyak nnyịn ibọn̄ akam iban̄a mfịna oro ndien ekem inam n̄kpọ ke n̄kemuyo ye mme akam nnyịn. Ekeme ndiyom nnyịn ikpụhọ itieutom nnyịn mîdịghe inam n̄kpọ ke usụn̄ efen man imụm nsọn̄ọnda nnyịn ye Abasi ikama.—Genesis 39:7-9; 1 Corinth 10:13.

Ndiyom Ọniọn̄

7. Didie ke ẹkeme ndin̄wam nnyịn ndinam n̄kpọ mban̄a mme idomo?

⁷ James owụt nnyịn se ikpanamde edieke nnyịn mîfiọkke se ikpanamde man ise iban̄a idomo. (James 1:5-8) Jehovah idisueneke nnyịn koro inanade ọniọn̄ inyụn̄ ibọn̄de akam iben̄e enye ke mbuọtidem. Enye ayan̄wam nnyịn ndise idomo oro nte odotde nnyụn̄ nyọ enye. Ebede ke mme ekemmọ andinịm ke akpanikọ m̀mê ke ini ukpepn̄kpọ Bible ẹkeme ndinam nnyịn iti mme itien̄wed Abasi. Mme n̄kpọntịbe oro Abasi ọnọde ndausụn̄ ẹkeme ndin̄wam nnyịn ndikụt se nnyịn ikpanamde. Spirit Abasi ekeme ndida nnyịn usụn̄. (Luke 11:13) Man ibọ mme utọ ufọn oro, nte ido edide ana nnyịn isịk ikpere Abasi ye ikọt esie.—Mme N̄ke 18:1.

8. Ntak owo emi oyokde mîdibọhọ baba n̄kpọ kiet ito Jehovah?

⁸ Jehovah ọnọ nnyịn ọniọn̄ ndise mban̄a mme idomo edieke nnyịn ikade iso ‘iben̄e ke mbuọtidem, mîyokke.’ Owo emi oyokde “ebiet mbufụt mmọn̄, eke ofụm eberide, emen, otop, ọduọk ko” inyeneke iwụk. Edieke nnyịn inanade iwụk ntre ke n̄kan̄ eke spirit, ‘nnyịn ikpesehe ite ke nnyịn iyọbọ baba n̄kpọ kiet ke ubọk Jehovah.’ Ẹyak nnyịn ikûnyene “esịt iba” ikûdi owo “eke mînyeneke nsọn̄ọnda” ke akam m̀mê ke mme usụn̄ eken. Utu ke oro, ẹyak nnyịn inyene mbuọtidem ke Jehovah, kpa Ebiet emi ọniọn̄ otode.—Mme N̄ke 3:5, 6.

Imọ ye Ubuene Ẹkeme Ndibụre Mbụre

9. Ntak emi nnyịn inyenede ntak mbụre nte mme andituak ibuot nnọ Jehovah?

⁹ Idem ọkpọkọm unana edi kiet ke otu mme idomo nnyịn, ẹyak nnyịn inyene ke ekikere nte ke mme Christian oro ẹdide mbon inyene ye mme ubuene ẹkeme ndibụre mbụre. (James 1:9-11) Mbemiso ẹkabarede ẹdi mme anditiene Jesus, ata ediwak ke otu mbon oro ẹyetde aran ẹkenyene esisịt n̄kpọ ke n̄kan̄ eke obụk ndien ererimbot ekese mmọ ke usụhọde. (1 Corinth 1:26) Edi mmọ ẹkeme ndibụre mbụre mban̄a “akamba itie” mmọ ke idaha mmọ nte mme adiakpa Obio Ubọn̄. (Rome 8:16, 17) Ke edide isio, mme enyene n̄kpọ owo ẹmi ini kiet ẹkekponode ẹdu ke ‘usụhọde itie’ nte mme anditiene Christ ke ntak emi ererimbot esede mmọ ke usụhọde. (John 7:47-52; 12:42, 43) Nte ededi, nte mme asan̄autom Jehovah, kpukpru nnyịn imekeme ndibụre mbụre koro uforo ye n̄kokon̄ idaha eke ererimbot idịghe n̄kpọ ndomokiet ke ndimen ndomo ye uforo eke spirit oro nnyịn inyenede. Ndien nnyịn idat esịt ntem didie nte ke otu nnyịn itie idụhe inọ ntan̄idem ke ntak idaha ke uwem!—Mme N̄ke 10:22; Utom 10:34, 35.

10. Didie ke Christian ekpese inyene eke obụk?

¹⁰ James an̄wam nnyịn ndikụt nte ke uwem nnyịn ikọn̄ọke ke uforo ye unen oro owo okụtde ke ererimbot. Kpa nte uyai flawa mîkemeke ndikpan enye ndikpa ke “ufiop ufiop ofụm,” ntre ke uforo owo inyene mîkemeke ndinam usen uwem esie ọniọn̄. (Psalm 49:6-9; Matthew 6:27) Enye ekeme ndikpa ke adan̄aemi anamde “mbubịne esie,” ndusụk ke mbubehe. Ntem, akpan n̄kpọ edi ‘ndinyene inyene ke n̄kan̄ Abasi’ nnyụn̄ nnam kpukpru se nnyịn ikekeme ndisịn udọn̄ nnọ mme udọn̄ n̄kpọ Obio Ubọn̄.—Luke 12:13-21; Matthew 6:33; 1 Timothy 6:17-19.

Ọfọfọn Ọnọ Mbon Oro Ẹyọde Idomo

11. Nso idi idotenyịn mbon oro ẹsọn̄ọde ẹyịre ke mbuọtidem ke ẹsobode idomo?

¹¹ Imọ m̀mê ubuene, nnyịn ikeme ndikop inemesịt n̄kukụre edieke nnyịn iyọde mme idomo. (James 1:12-15) Edieke nnyịn iyọde mme idomo ye mbuọtidem oro n̄kpọ mîsehekede, ẹkeme ndidọhọ ke ọfọfọn ọnọ nnyịn, koro idatesịt odu ke ndinam se inende ke enyịn Abasi. Ebede ke ndisọn̄ọ mmụm mbuọtidem mmọ n̄kama tutu esịm n̄kpa, mme Christian oro ẹbonde ke spirit ẹbọ “anyanya uwem,” oro mîkemeke ndikpa ke heaven. (Ediyarade 2:10; 1 Corinth 15:50) Edieke nnyịn inyenede idotenyịn eke isọn̄ inyụn̄ imụmde mbuọtidem nnyịn ikama ke Abasi, nnyịn imekeme ndidori enyịn ndinyene nsinsi uwem ke paradise isọn̄. (Luke 23:43; Rome 6:23) Jehovah ọfọn ntem didie ye kpukpru mbon oro ẹbuọtde idem ke enye!

12. Ke ini isobode afanikọn̄, ntak emi nnyịn mîkpọdọhọke: ‘Abasi odomo mi’?

¹² Nte Jehovah ke idemesie ekeme ndida afanikọn̄ ndomo nnyịn nse? Baba, nnyịn ikpenyeneke ndidọhọ: ‘Abasi odomo mi.’ Jehovah idomoke ndinam nnyịn inam idiọkn̄kpọ edi oyokụt ete iman̄wam nnyịn onyụn̄ ọnọ nnyịn ukeme oro iyomde man iyọ mme idomo edieke nnyịn isọn̄ọde ida ke mbuọtidem. (Philippi 4:13) Abasi edi edisana, ntre enye inịmke nnyịn ke mme idaha oro edinamde ukeme nnyịn ndibiọn̄ọ edinam idiọkn̄kpọ emem. Edieke nnyịn isịnde idem nnyịn ke idaha oro edehede inyụn̄ inamde ndusụk idiọkn̄kpọ, nnyịn ikpenyeneke ndiduọhọ enye, “koro idomo iduọ ikemeke ndisịm Abasi, Enye ke Idemesie inyụn̄ idomoke owo man enye ọduọ.” Okposụkedi Jehovah ekemede ndiyak idomo esịm nnyịn man otụnọ nnyịn ke ufọn nnyịn, enye idaha idiọkn̄kpọ idomo nnyịn ise ye idiọk uduak. (Mme Hebrew 12:7-11) Satan ekeme ndidomo nnyịn ndinam idiọkn̄kpọ, edi Abasi ekeme ndinyan̄a nnyịn nsio andidiọk oro ke ubọk.—Matthew 6:13.

13. Nso ikeme nditịbe edieke nnyịn mîsịnke idiọk udọn̄?

¹³ Oyom nnyịn isịn idem ke edibọn̄ akam koro idaha oro odude ekeme ndidemede idiọk udọn̄ oro ekemede ndinam nnyịn inam idiọkn̄kpọ. James ọdọhọ ete: “Idomo iduọ esịm kpukpru owo ke adan̄aemi idiọk udọn̄ atapde enye odụri.” Nnyịn ikemeke ndiduọhọ Abasi mban̄a idiọkn̄kpọ nnyịn edieke nnyịn iyakde esịt nnyịn owụhọ ke idiọk udọn̄. Edieke nnyịn mîbiatke idiọk udọn̄ ifep, ‘enye oyoyomo,’ ọkọri ke esịt, onyụn̄ “aman idiọkn̄kpọ.” Ke ini ẹnamde idiọkn̄kpọ, enye “osion̄o n̄kpa.” Nte an̄wan̄ade, oyom nnyịn ikpeme esịt nnyịn inyụn̄ ibiọn̄ọ mme udọn̄ idiọkn̄kpọ. (Mme N̄ke 4:23) Ẹma ẹdụri Cain utọn̄ ẹte ke idiọkn̄kpọ ọmọn̄ akan enye ubọk, edi enye ikọbiọn̄ọke. (Genesis 4:4-8) Ntre, ndien, nso edieke nnyịn itọn̄ọde ndidụk usụn̄ uwem oro mîkemke ye N̄wed Abasi? Ke akpanikọ nnyịn ikpenyene ndiwụt esịtekọm edieke mbiowo Christian ẹdomode ndinen̄ede nnyịn mbak nnyịn idinam idiọkn̄kpọ ndian Abasi.—Galatia 6:1.

Abasi—Ebiet Nti N̄kpọ Otode

14. Ke nso usụn̄ifiọk ke ẹkeme ndidọhọ ke mme enọ Abasi ẹdi “enọ eke ẹfọnde ẹma”?

¹⁴ Nnyịn ikpenyene nditi nte ke Jehovah edi Ebiet, idịghe eke mme idomo, edi eke nti n̄kpọ ẹtode. (James 1:16-18) James okot mme ekemmọ andinịm ke akpanikọ “ndima nditọete mi” onyụn̄ owụt ete ke Abasi edi Andinọ ‘kpukpru nti enọ ye enọ eke ẹfọnde ẹma.’ Mme enọ eke spirit ye eke obụk ẹtode Jehovah ẹdi ‘nti,’ m̀mê ọyọhọ ọyọhọ, baba n̄kpọ kiet inanake. Mmọ ẹto “ke enyọn̄,” ẹto ebietidụn̄ Abasi ke mme heaven. (1 Ndidem 8:39) Jehovah edi “Ete mme un̄wana”—utịn, ọfiọn̄, ye mme ntantaọfiọn̄. Enye n̄ko ọnọ nnyịn un̄wana eke spirit ye akpanikọ. (Psalm 43:3; Jeremiah 31:35; 2 Corinth 4:6) Ke mîbietke utịn emi esinamde mme mbukpọn̄ ẹkpụhọde nte enye asan̄ade ndien esịm n̄kon̄n̄kan idaha n̄kukụre ke ufọt uwemeyo, Abasi odu ke n̄kon̄n̄kan idaha esie kpukpru ini ọnọde nti n̄kpọ. Enye iditreke-tre nditịm nnyịn idem ndisobo mme idomo edieke nnyịn idade mme n̄kpọ oro enye ọnọde nnyịn ke n̄kan̄ eke spirit ebe ke Ikọ esie ye “asan̄autom oro anamde akpanikọ, onyụn̄ enyenede ọniọn̄” inam n̄kpọ ọyọhọ ọyọhọ.—Matthew 24:45.

15. Ewe edi kiet ke otu mfọnn̄kan enọ Jehovah?

¹⁵ Nso idi kiet ke otu mfọnn̄kan enọ Abasi? Edision̄o nditọ eke spirit ndi ebe ke edisana spirit, anamde emi ke ebuana ye eti mbụk, m̀mê “ikọ akpanikọ.” Mbon oro ẹmanade ke spirit ẹdi “ndusụk akpa mbun̄wụm,” ẹmekde ẹsion̄o ke otu ubonowo man ẹdi “Obio Ubọn̄ ye mme oku” eke heaven. (Ediyarade 5:10; Ephesus 1:13, 14) Ekeme ndidi James ekekere aban̄a akpa mbun̄wụm barley oro ẹkesinọde ke Nisan 16, emi ekedide usen oro Jesus ekesetde ke n̄kpa, ye edinọ eboho uyo wheat iba ke usen Pentecost, emi ẹken̄wan̄ade edisana spirit ẹduọk. (Leviticus 23:4-11, 15-17) Ke idaha oro, Jesus edidi akpa mbun̄wụm ndien mme nsan̄a ada udeme ye enye ẹdi “ndusụk akpa mbun̄wụm.” Nso edieke nnyịn inyenede idotenyịn eke isọn̄? Nte ededi, ndinyene enye ke ekikere ayan̄wam nnyịn ndisọn̄ọ nyịre ke mbuọtidem nnyịn ke Andinọ ‘kpukpru nti enọ,’ emi anamde ẹkeme ndinyene nsinsi uwem ke idak ukara Obio Ubọn̄.

Di “Anam Ikọ”

16. Ntak emi nnyịn ikpenyenede ‘ndisọp n̄kop ikọ edi isọpke itịn̄ ikọ’?

¹⁶ Edide nnyịn ke isobo mme idomo mbuọtidem nnyịn idahaemi m̀mê isoboke, ana nnyịn idi “mme anam ikọ.” (James 1:19-25) Oyom nnyịn ‘isọp ndikop’ ikọ Abasi, idide mme okopitem oro inamde-nam enye. (John 8:47) Ke n̄kan̄ eken, ẹyak nnyịn ‘ikûsọp nditịn̄ ikọ,’ itịmde ikere mme ikọ oro iyomde nditịn̄. (Mme N̄ke 15:28; 16:23) Ekeme ndidi James eteme ete nnyịn ikûsọp ndidọhọ ke mme idomo nnyịn ẹto Abasi. Ẹteme nnyịn n̄ko ẹte ‘ikûsọp ndiyat esịt; koro iyatesịt owo mîwọrọke edinen ido Abasi.’ Edieke se owo etịn̄de ayatde nnyịn esịt, ẹyak nnyịn ‘ikûsọp ndinam n̄kpọ’ man otodo ifep ibọrọ oro edide edisio usiene. (Ephesus 4:26, 27) Edu iyatesịt oro ekemede ndida mfịna nsọk nnyịn onyụn̄ akabarede edi idomo ọnọ mbon efen ikemeke ndision̄o mbun̄wụm oro mbuọtidem nnyịn ke edinen ido Abasi oyomde oto nnyịn. Akande oro, edieke nnyịn inyenede “akwa asian,” nnyịn ‘idisọpke ndiyat esịt,’ ndien nditọete nnyịn iren ye iban ẹyesịk ẹkpere nnyịn.—Mme N̄ke 14:29.

17. Nso isụn̄ọ ito edisio idiọkn̄kpọ mfep ke esịt ye ekikere?

¹⁷ Oyom nnyịn ke akpanikọ iduọn̄ọ “kpukpru ndek ndek ido”—kpukpru n̄kpọ oro ẹyatde Abasi esịt ẹnyụn̄ ẹdemerede iyatesịt. Akan oro, ana nnyịn iduọn̄ọ “nyọhọ nsụhọ udu.” Kpukpru nnyịn ikpenyene ndisio mbubiam ido eke obụk m̀mê eke spirit ekededi mfep ke uwem nnyịn. (2 Corinth 7:1; 1 Peter 1:14-16; 1 John 1:9) Edisio idiọkn̄kpọ mfep ke esịt ye ekikere nnyịn an̄wam nnyịn ‘ndibọ ikọ akpanikọ emi ẹtọde ke esịt nnyịn ke ododop.’ (Utom 17:11, 12) Inamke n̄kpọ m̀mê nnyịn idi mme Christian ebịghi adan̄a didie, ana nnyịn ika iso iyak ẹtọ akpanikọ N̄wed Abasi efen efen ke esịt nnyịn. Ntak-a? Koro ebede ke spirit Abasi, ikọ oro ẹtọde osion̄o “obufa owo” oro esịmde edinyan̄a.—Ephesus 4:20-24.

18. Didie ke owo emi edide sụk andikokop ikọ okpụhọde ye owo emi edide n̄ko andinanam enye?

¹⁸ Didie ke nnyịn iwụt ite ke ikọ oro edi ndausụn̄ nnyịn? Ebe ke ndidi mme okopitem ‘mme anam ikọ idịghe mme andikokop ikpọn̄îkpọn̄.’ (Luke 11:28) “Mme anam ikọ” ẹnyene mbuọtidem oro osion̄ode mme utọ utom nte nsịnifịk ke utom ukwọrọikọ Christian ye edibuana kpukpru ini ke mme mbonoesop ikọt Abasi. (Rome 10:14, 15; Mme Hebrew 10:24, 25) Andikokop ikpọn̄îkpọn̄ “ebiet owo eke esede obot iso esie ke ukụtiso.” Enye ese, ekem adaha ndien efre aban̄a se ekemede ndiyom enye anam man enen̄ede nte enye etiede. Nte “mme anam ikọ,” nnyịn imetịn̄ enyịn ikpep inyụn̄ inam “ata edifọn ibet Abasi,” emi esịnede kpukpru n̄kpọ oro enye oyomde oto nnyịn. Ifụre oro nnyịn ke ntem inyenede edi ata isio ye edidụk ufụn nnọ idiọkn̄kpọ ye n̄kpa, koro enye adade esịm uwem. Ntre, ẹyak nnyịn ‘iwụk enyịn ise ata edifọn ibet,’ idụn̄ọrede inyụn̄ inamde enye kpukpru ini. Ndien kam kere! Nte ‘mme anam utom, idịghe mme andikokop ẹmi ẹfrede,’ nnyịn imenyene idatesịt emi osụn̄ọde oto mfọn Abasi.—Psalm 19:7-11.

Abuana Ekese Akan Ndidi Mme Ata Andituak Ibuot

19, 20. (a) Nte ekemde ye James 1:26, 27, nso ke edisana utuakibuot oyom oto nnyịn? (b) Ewe edi ndusụk uwụtn̄kpọ utuakibuot eke mîdeheke?

¹⁹ Edieke anade nnyịn inyene mfọn Abasi, oyom nnyịn iti ite ke utuakibuot akpanikọ idịghe n̄kpọ ẹnamde nte ikpîkpu edinam. (James 1:26, 27) Nnyịn imekeme ndikere ke ẹnyịme nnyịn nte ‘mme ata andituak ibuot’ nnọ Jehovah, edi edi nte enye abatde nnyịn owo kiet kiet enen̄ede edi akpan n̄kpọ. (1 Corinth 4:4) Akamba ndudue kiet ekeme ndidi edikpu ‘ndikara edeme.’ Nnyịn ibabian̄a idem nnyịn edieke nnyịn ikerede ke Abasi enem esịt ye utuakibuot nnyịn edieke idọkde mbon en̄wen edidọk, isude nsu, m̀mê idade edeme inam n̄kpọ ke idiọk usụn̄ ke mme afan̄ efen. (Leviticus 19:16; Ephesus 4:25) Ke akpanikọ, nnyịn iyomke “orụk utuakibuot” (NW) nnyịn edi “ikpîkpu” ye se Abasi mînyịmeke ke baba ntak kiet.

²⁰ Okposụkedi James mîsiakke kpukpru ikpehe eke utuakibuot oro asanade, enye etịn̄ ete ke enye esịne “ndisan̄a nse nditọakpa ye mme ebeakpa ke ukụt mmọ.” (Galatia 2:10; 6:10; 1 John 3:18) Esop Christian owụt san̄asan̄a udọn̄ ke ndise mban̄a mme ebeakpa. (Utom 6:1-6; 1 Timothy 5:8-10) Sia Abasi edide Andikpeme ebeakpa ye eyenakpa, ẹyak nnyịn ibere ye Enye ebe ke ndinam se nnyịn ikemede ndin̄wam mmọ ke n̄kan̄ eke spirit ye eke obụk. (Deuteronomy 10:17, 18) Edisana utuakibuot n̄ko ọwọrọ ‘ndikpeme idem ke idiọkn̄kpọ emi odude ke ererimbot,’ kpa ukwan̄ n̄kaowo emi odude ke idak odudu Satan. (John 17:16; 1 John 5:19) Ẹyak nnyịn ke ntre idu uwem ibọhọ edu uwem unana uten̄e Abasi ererimbot emi man otodo nnyịn ikeme ndinọ Jehovah ubọn̄ inyụn̄ inyene ufọn ke utom esie.—2 Timothy 2:20-22.

21. Ke ebuana ye n̄wed James, ewe mme mbụme efen efen ẹdot nnyịn ndikere mban̄a?

²¹ Item James oro nnyịn inemede mi ekpenyene ndin̄wam nnyịn iyọ mme idomo inyụn̄ isọn̄ọ iyịre ke mbuọtidem nnyịn. Enye ekpenyene ndinam esịtekọm nnyịn kaban̄a ima ima Andinọ nti enọ ọkọri. Ndien mme ikọ James ẹn̄wam nnyịn ndinam utuakibuot akpanikọ. Nso efen ke enye odụri ntịn̄enyịn nnyịn owụt? Nso mme usio-ukot efen efen ke nnyịn ikeme ndinam ndiwụt nte ke nnyịn imenyene ata mbuọtidem ke Jehovah?

[Mme Ikọ idakisọn̄]

Didie ke Afo Ọkpọbọrọ?

◻ Nso idin̄wam nnyịn ndiyọ mme idomo?

◻ Kpa ye mme idomo, ntak emi mme Christian ẹkemede ndibụre mbụre?

◻ Didie ke nnyịn ikeme ndidi mme anam ikọ?

◻ Nso ke edisana utuakibuot abuana?

[Ndise ke page 9]

Ke ini osobode idomo, nyene mbuọtidem ke odudu Jehovah ndibọrọ akam

[Mme ndise ke page 10]

“Mme anam ikọ” ke ẹkwọrọ Obio Ubọn̄ Abasi ke ofụri ererimbot