Mme Christian Ẹdide Ntiense Ẹnọ Itie Edikara Abasi
“Mbufo ẹka ẹketan̄a mme utịbe edinam Esie, emi okokotde mbufo osio ke ekịm, esịn ke utịbe un̄wana Esie.”—1 PETER 2:9.
1. Nso enyene-uforo ikọ ntiense ke ẹkenọ ẹban̄a Jehovah mbemiso eyo mme Christian?
MBEMISO eyo mme Christian, anyan udịm mme ntiense ẹma ẹnọ ikọ ntiense uko uko nte ke Jehovah edi ata Abasi. (Mme Hebrew 11:4–12:1) Ye ọkpọsọn̄ mbuọtidem, mmọ ẹma ẹnịm mme mbet Jehovah ye unana ndịk ẹnyụn̄ ẹsịn ndikan̄ mbuọtidem ke n̄kpọ aban̄ade utuakibuot. Mmọ ẹma ẹnọ okopodudu ikọ ntiense ẹban̄a itie edikara ofụri ekondo Jehovah.—Psalm 18:21-23; 47:1, 2.
2. (a) Anie edi n̄kponn̄kan Ntiense Jehovah? (b) Anie akada itie idụt Israel nte ntiense Jehovah? Nnyịn isan̄a didie ifiọk?
2 Akpatre ye n̄kponn̄kan ntiense oro okodude mbemiso eyo mme Christian ekedi John Baptist. (Matthew 11:11) Enye ama enyene ifet nditọt mban̄a edidi Enyeemi Ẹkemekde, ndien enye ama emen Jesus owụt nte Messiah oro ẹken̄wọn̄ọde. (John 1:29-34) Jesus edi n̄kponn̄kan Ntiense Jehovah, “ata ntiense akpanikọ.” (Ediyarade 3:14) Sia Israel eke obụk ekesịnde Jesus, Jehovah ama esịn mmọ onyụn̄ emek obufa idụt, kpa Israel eke spirit Abasi, ndidi ntiense esie. (Isaiah 42:8-12; John 1:11, 12; Galatia 6:16) Peter ama okot oto prọfesi aban̄ade Israel onyụn̄ owụt ete ke enye aban̄a “Israel Abasi,” kpa esop Christian, ke ini enye ọkọdọhọde ete: “Mbufo ẹdi ubon eke ẹmekde, ẹdi mme oku edidem, ẹdi edisana obio, ẹdi ikọt eke Abasi onịmde ọnọ Idemesie, man mbufo ẹka ẹketan̄a mme utịbe edinam Esie, emi okokotde mbufo osio ke ekịm, esịn ke utịbe un̄wana Esie.”—1 Peter 2:9; Exodus 19:5, 6; Isaiah 43:21; 60:2.
3. Nso idi akpan utom Israel Abasi ye eke “akwa otuowo”?
3 Mme ikọ Peter ẹwụt ẹte ke akpan utom Israel Abasi edi ndinọ an̄wan̄wa ikọ ntiense mban̄a ubọn̄ Jehovah. Ke eyo nnyịn “akwa otuowo” eke mme ntiense ẹmi n̄ko ẹnọde Abasi ubọn̄ an̄wan̄wa ẹdiana ye idụt eke spirit emi. Mmọ ẹfiori ke ọkpọsọn̄ uyo man kpukpru owo ẹkop ete: “Yak edinyan̄a enyene Abasi nnyịn emi etiede ke ebekpo, onyụn̄ enyene Eyenerọn̄.” (Ediyarade 7:9, 10; Isaiah 60:8-10) Didie ke Israel Abasi ye mme nsan̄a esie ẹkeme ndiyọhọ utom unọ ikọ ntiense mmọ? Ebe ke mbuọtidem ye n̄kopitem mmọ.
Mme Nsunsu Ntiense
4. Ntak emi mme Jew eke eyo Jesus ẹkedide mme nsunsu ntiense?
4 Mbuọtidem ye n̄kopitem abuana edida mme edumbet Abasi ndu uwem. Ẹkụt nte emi edide akpan n̄kpọ ke se Jesus eketịn̄de aban̄a mme adaiso ido ukpono mme Jew eke eyo esie. Mmọemi “ẹtie ke itie Moses” nte mme andikpep Ibet. Mmọ ẹma ẹkam ẹnọ mme isụn̄utom ẹkenam mbon oro mînịmke ke akpanikọ ẹkabade esịt. Edi, Jesus ama ọdọhọ mmọ ete: “Mbufo ẹkanarede inyan̄ ye obot, ete inam kpa owo kiet okpono Abasi ke ido mbufo; ndien ke enye ama akabade etie ntem, mbufo ẹnam enye edi eyen [Gehenna, NW] utịm ikaba akan idem mbufo.” Mbon ido ukpono ẹmi ẹkedi mme nsunsu ntiense—mbon n̄kohodeidem, mbubịk, ye mbon unana ima. (Matthew 23:1-12, 15) Ini kiet Jesus ama ọdọhọ ndusụk mme Jew ete: “Mbufo ẹdi nditọ ete mbufo, kpa Satan, ẹnyụn̄ ẹyom ndinam obukpo udọn̄ ete mbufo.” Ntak emi enye eketịn̄de utọ n̄kpọ oro aban̄a mme andibuana ke idụt oro Abasi ekemekde? Koro mmọ mîkokopke ikọ n̄kponn̄kan Ntiense Jehovah.—John 8:41, 44, 47.
5. Nnyịn isan̄a didie ifiọk ite ke Christendom ọnọ nsunsu ikọ ntiense aban̄a Abasi?
5 Ke ukem usụn̄ oro, ke ediwak isua ikie ọtọn̄ọde ke ini Jesus, ediwak miliọn owo ke mme itie ikie ke Christendom ẹdọhọ nte idide mme mbet esie. Nte ededi, mmọ inamke uduak Abasi ndien ke ntre Jesus inọhọ mmọ unyịme. (Matthew 7:21-23; 1 Corinth 13:1-3) Christendom ọnọ mme isụn̄utom ẹwọrọ, emi ediwak ke otu ẹmi nte eyịghe mîdụhe ẹnyenede esịt akpanikọ. Edi, mmọ ẹkpep mme owo ndituak ibuot nnọ Adiana-Ita abasi emi ọfọpde mme anamidiọk ke ikan̄ hell, ndien ata ediwak ke otu mbon oro mmọ ẹnamde ẹkabade esịt ẹwụt esisịt uyarade edidi mme Christian. Ke uwụtn̄kpọ, idụt Rwanda ke Africa edi an̄wautom emi on̄wụmde mfri ọnọ mme isụn̄utom Roman Catholic. Edi, mbon Catholic ke Rwanda ẹma ẹbuana ke ofụri esịt ke ekọn̄ ekpụk eke ndondo emi ke idụt oro. Mbun̄wụm otode an̄wautom isụn̄utom oro owụt ete ke enye ikọbọhọ ata ikọ ntiense Christian ito Christendom.—Matthew 7:15-20.
Ndida Mme Edumbet Abasi Ndu Uwem
6. Ke mme usụn̄ ewe ke eti eduuwem edi akpan ubak ikpehe edinọ ikọ ntiense?
6 Idiọk eduuwem mbon oro ẹdọhọde nte idide mme Christian ada esuene ọsọk “usụn̄ akpanikọ.” (2 Peter 2:2) Ata Christian odu uwem nte ekemde ye mme edumbet Abasi. Enye iyịpke inọ, isụho nsu, ibian̄ake abian̄a m̀mê ndinam oburobụt ido. (Rome 2:22) Enye ke akpanikọ iwotke mbọhọidụn̄ esie. Mme ebe Christian ẹse ẹban̄a ubon mmọ ke ima ima usụn̄. Ibanndọ ke ukpono ẹnọ edise enyịn oro ibetedem. Mme ete ye eka ẹnọ nditọ mmọ ukpep ndien ke ntre ẹdi se ẹtịmde idem ndidi ikpọ owo Christian oro ẹbiomde mbiomo. (Ephesus 5:21–6:4) Edi akpanikọ, kpukpru nnyịn idi mme anana mfọnmma inyụn̄ inanam ndudue. Edi ata Christian okpokpono mme edumbet Bible onyụn̄ esịn ofụri ukeme ndida mmọ nsịn ke edinam. Emi edi se mbon en̄wen ẹsikụtde onyụn̄ esinọ eti ikọ ntiense. Ndusụk ini, mbon oro ke mbemiso ẹkebiọn̄ọde akpanikọ ẹma ẹkụt eti eduuwem Christian ẹnyụn̄ ẹdi se ẹdụride ẹda.—1 Peter 2:12, 15; 3:1.
7. Edi akpan n̄kpọ didie mme Christian ndima kiet eken?
7 Jesus ama owụt akpan ikpehe edu Christian ke ini enye ọkọdọhọde ete: “Mbufo ẹma ẹma kiet eken, kpukpru owo ẹyeda oro ẹfiọk ẹte mbufo ẹdi mbet Mi.” (John 13:35) Edu ẹdade ẹdiọn̄ọ ererimbot Satan edi “ukwan̄ido ye oburobụt ido ye idiọk mbumek ye udu; ẹyọhọ ye ufụp, ye obom, ye utọk, ye n̄kari, ye idiọk esịt mmọ ẹdi mbon nsụkuyo, mbon iban̄a, mbon emi Abasi asuade, mbon emiom, mbon ikponesịt, mbon mbụre, mme ẹtịbi idiọkn̄kpọ, ye mme ọsọn̄ibuot ye ete ye eka.” (Rome 1:29, 30) Ke utọ n̄kann̄kụk emi, esop ofụri ererimbot emi ima edide edu esie edidi okopodudu uyarade nte ke spirit Abasi odu ke edinam—ikọ ntiense oro enyenede uforo. Mme Ntiense Jehovah ẹnam utọ esop oro.—1 Peter 2:17.
Mme Ntiense Ẹdi Nditọ Ukpepn̄kpọ Bible
8, 9. (a) Didie ke edikpep Ibet Abasi ye editie n̄kere enye ọkọsọn̄ọ andiwet psalm idem? (b) Ke mme usụn̄ ewe ke edikpep Bible ye editie n̄kere edisọn̄ọ nnyịn idem ndikaiso nnọ ikọ ntiense?
8 Man okụt unen ke ndinọ eti ikọ ntiense, ana Christian ọfiọk onyụn̄ ama ndinen edumbet Jehovah onyụn̄ enen̄ede asua mbiara ido eke ererimbot emi. (Psalm 97:10) Ererimbot esịn udọn̄ ọnọ mme owo ndikere n̄kpọ ke usụn̄ esie, ndien ekeme ndidi ọkpọsọn̄ n̄kpọ ndin̄wana mbiọn̄ọ edu esie. (Ephesus 2:1-3; 1 John 2:15, 16) Nso ikeme ndin̄wam nnyịn ndimụm nnennen idaha ekikere n̄kama? Edinyene ukpepn̄kpọ Bible oro enyenede uforo kpukpru ini. Andiwet Psalm 119 ama etịn̄ ima oro enye enyenede ọnọ Ibet Jehovah ndien ndien. Enye ama okot onyụn̄ etie ekere enye kpukpru ini, “ofụri usen.” (Psalm 119:92, 93, 97-105) Nte utịp, enye ama ekeme ndiwet ete: “Nsasua nsu, nnyụn̄ nse ke n̄kpọ mbubiam: mmama ido fo.” Akan oro, ntotụn̄ọ ima esie ama onụk enye ndinam n̄kpọ. Enye etịn̄ ete: “Ntoro fi utịm ikatiaba ke usen, mban̄a edinen ikpe fo.”—Psalm 119:163, 164.
9 Ke ukem usụn̄ oro, nnyịn ndikpep Ikọ Abasi ofụri ini nnyụn̄ ntie n̄kere enye eyetụk esịt nnyịn onyụn̄ onụk nnyịn ‘nditoro enye’—nditie ntiense mban̄a Jehovah—kpukpru ini, idem “utịm ikatiaba ke usen.” (Rome 10:10) Ke n̄kemuyo ye emi, andiwet akpa psalm etịn̄ ete ke owo eke etiede ekere mme ikọ Jehovah ofụri ini “ebiet eto eke ẹtọde ke mben akpammọn̄, eke osion̄ode mfri esie ke ekemini; ikọn̄ esie inyụn̄ iken̄eke; ndien kpukpru se enye anamde ọwọrọ usụn̄.” (Psalm 1:3) Apostle Paul n̄ko ama owụt odudu oro Ikọ Abasi enyenede ke ini enye ekewetde: “Kpukpru n̄wed, eke ẹdade odudu Spirit Abasi ẹwet, ẹnyụn̄ ẹdi se ifọnde ndida n̄kpep owo n̄kpọ, nnyụn̄ nsua nnọ owo, nnyụn̄ nnam owo ẹsan̄a nte enende, nnyụn̄ nteme owo edinen ido; man owo Abasi enyene ọyọhọ ifiọk, onyụn̄ eben̄e idem ke kpukpru nde ndinam eti utom ekededi.”—2 Timothy 3:16, 17.
10. Nso ina in̄wan̄în̄wan̄ iban̄a ikọt Jehovah ke ukperedem ini emi?
10 Usọp usọp n̄kọri ke ibat mme ata andituak ibuot ke ọyọhọ isua ikie 20 emi owụt edidiọn̄ Jehovah. Ye unana eyịghe ekededi, nte otu, mmọemi ẹdide mme ntiense mi ke eyomfịn ẹnọ itie edikara Abasi ẹkọri ima ẹnọ ibet Jehovah ke esịt mmọ. Ukem nte andiwet psalm, edemede mmọ ke esịt ndinịm ibet Esie nnyụn̄ ntie ntiense ke edinam akpanikọ “uwemeyo ye okoneyo” mban̄a ubọn̄ Jehovah.—Ediyarade 7:15.
Mme Utịbe Utom Jehovah
11, 12. Nso ke mme utịben̄kpọ oro Jesus ye mme mbet esie ẹkenamde ẹkeyọhọ?
11 Ke akpa isua ikie, edisana spirit ama ọnọ mme anam-akpanikọ Christian ntiense odudu ndinam mme utịben̄kpọ, ẹmi ẹkenọde n̄kpọsọn̄ uyarade nte ke ikọ ntiense mmọ ekedi akpanikọ. Ke ini John Baptist okodude ke ufọk-n̄kpọkọbi, enye ama ọdọn̄ mme mbet ẹkebụp Jesus ẹte: “Nte afo edi Enyeemi enyenede ndidi, m̀mê nnyịn ikpodori enyịn ke owo en̄wen?” Jesus ikọbọrọke ih m̀mê ihih. Utu ke oro, enye ọkọdọhọ: “Ẹka ẹkebụk ẹnọ John n̄kpọ oro mbufo ẹkopde ẹnyụn̄ ẹkụtde: mme nnan ẹkụt usụn̄, mbon mbụn̄ọ ẹsan̄a, ẹnam mbon akpamfia ẹsana, mme inan ẹkop iko, ẹnam mme akpan̄kpa ẹset, ẹnyụn̄ ẹkwọrọ eti mbụk ẹnọ mme ubuene. Ndien ọfọfọn ye owo ekededi eke mîdikwe ntak iduọ ye Ami.” (Matthew 11:3-6) Utịbe utom oro ẹkedi n̄kpọ ntiense ndiwụt John nte ke Jesus ekenen̄ede edi “Enyeemi enyenede ndidi.”—Utom 2:22.
12 Ke ukem usụn̄ oro, ndusụk ke otu mme anditiene Jesus ẹma ẹkọk mbon udọn̄ọ ẹnyụn̄ ẹkam ẹnam mme akpan̄kpa ẹset. (Utom 5:15, 16; 20:9-12) Mme utịben̄kpọ oro ẹketie nte n̄kpọ ntiense ẹtode Abasi ke idemesie ke ufọn mmọ. (Mme Hebrew 2:4) Ndien mme utọ utom oro ẹkewụt ata ọkpọsọn̄ odudu Jehovah. Ke uwụtn̄kpọ, edi akpanikọ nte ke Satan, “ọbọn̄ ererimbot emi,” enyene ukeme ndinam owo akpa. (John 14:30; Mme Hebrew 2:14) Edi ke ini Peter akanamde anam-akpanikọ an̄wan oro Dorcas eset ke n̄kpa, odudu Jehovah kpọt ke enye ekekeme ndida nnam oro, sia edide Enye ikpọn̄ ekeme ndifiak nnọ uwem.—Psalm 16:10; 36:9; Utom 2:25-27; 9:36-43.
13. (a) Ke mme usụn̄ ewe ke mme utịben̄kpọ Bible ẹsụk ẹtie ntiense ẹban̄a odudu Jehovah? (b) Didie ke edisu mme prọfesi enyene akpan udeme ke ndiwụt itie Jehovah nte Abasi?
13 Mfịn, mme utịbe utom oro idụhe aba. Ẹma ẹyọhọ uduak mmọ. (1 Corinth 13:8) Edi, nnyịn ke isụk inyene mbụk mmọ ke Bible, ẹmi ediwak mbon oro ẹkekụtde ẹsọn̄ọde. Ke ini mme Christian mfịn ẹdụride ntịn̄enyịn ẹwụt mme mbụk eset ẹmi, mme utom oro ẹsụk ẹnọnọ ikọ ntiense ẹban̄a odudu Jehovah. (1 Corinth 15:3-6) Adianade do, ko-o ke eyo Isaiah, Jehovah ama anyan ubọk owụt nnennen prọfesi nte n̄wọrọnda uyarade nte ke Imọ idi ata Abasi. (Isaiah 46:8-11) Ediwak prọfesi Bible oro ẹtode Abasi ẹsu mfịn—ediwak ke otu mmọ ke idem esop Christian. (Isaiah 60:8-10; Daniel 12:6-12; Malachi 3:17, 18; Matthew 24:9; Ediyarade 11:1-13) Adianade ye ediwụt nte ke nnyịn idu uwem ke “ukperedem ini,” mme prọfesi ẹmi ndisu ẹwụt unen oro Jehovah enyenede nte ata Abasi kierakiet.—2 Timothy 3:1.
14. Ke mme usụn̄ ewe ke mbụk Mme Ntiense Jehovah eyomfịn edi okopodudu ikọ ntiense nte ke Jehovah edi Ọbọn̄ Andikara?
14 Ke akpatre, Jehovah osụk ananam ikpọ n̄kpọ, mme utịbe n̄kpọ, ọnọ ikọt esie. Un̄wana akpanikọ Bible oro akade-kaiso atara oto ndausụn̄ spirit Jehovah. (Psalm 86:10; Ediyarade 4:5, 6) Mme n̄wọrọnda mbụk n̄kọri oro ẹtọtde ke ofụri ererimbot ẹdi uyarade nte ke Jehovah ke ‘anam enye awara ke ekemini esie.’ (Isaiah 60:22) Ke ini ndot ndot ukọbọ otịbede ke nsio nsio idụt ke ukperedem ini emi, ikọt Jehovah ẹkeme ndiyọ uko uko ke ntak ọnọ-nsọn̄idem ibetedem oro otode edisana spirit. (Psalm 18:1, 2, 17, 18; 2 Corinth 1:8-10) Ih, mbụk Mme Ntiense Jehovah eke eyomfịn ke idemesie edi okopodudu ntiense nte ke Jehovah edi Ọbọn̄ Andikara.—Zechariah 4:6.
Eti Mbụk Oro Ẹnyenede Ndikwọrọ
15. Nso ntatara ikọ ntiense ke esop Christian ekenyene ndinọ?
15 Jehovah ekemek Israel nte ntiense esie ọnọ mme idụt. (Isaiah 43:10) Nte ededi, ibat ibat nditọ Israel kpọt ke Abasi ọkọdọn̄ ẹkekwọrọ ikọ ẹnọ mbon oro mîkedịghe nditọ Israel, ndien emi akawak ndidi man ẹtọt ubiereikpe Jehovah. (Jeremiah 1:5; Jonah 1:1, 2) Edi, mme prọfesi ke N̄wed Abasi Usem Hebrew ẹwụt ẹte ke usen kiet Jehovah eyewọn̄ọde ntịn̄enyịn esie ọnọ mme idụt ke usụn̄ oro okponde, ndien enye anam emi ebe ke Israel Abasi eke spirit. (Isaiah 2:2-4; 62:2) Mbemiso ọdọkde aka heaven, Jesus ama ọnọ mme mbet esie ewụhọ ete: “Mbufo ẹka ẹkenam kpukpru mme idụt ẹdi mbet Mi.” (Matthew 28:19) Ke adan̄aemi Jesus okowụkde ntịn̄enyịn ke “nsomo erọn̄ ufọk Israel,” enye ama ọdọn̄ mme anditiene enye ete ẹka “kpukpru mme idụt,” idem “tutu [ẹsịm] utịt ererimbot.” (Matthew 15:24; Utom 1:8) Akana ofụri ubonowo okop ikọ ntiense mme Christian.
16. Nso utom ke esop Christian eke akpa isua ikie akanam, ndien ke nso udomo?
16 Paul ama owụt ete ke emi ama enen̄ede an̄wan̄a imọ. Ke isua 61 E.N., enye ama ọdọhọ ete ke eti mbụk ama ‘on̄wụm mfri onyụn̄ ọdọdiọn̄ ọkọri ke ofụri ererimbot.’ Eti mbụk emi iketreke ye idụt kiet m̀mê otu kiet kpọt, utọ nte eke mbon oro ẹsịnde idem ke “edituak ibuot nnọ mme angel.” Utu ke oro, ‘ẹma ẹkwọrọ enye ẹnọ kpukpru owo ke idak ikpaenyọn̄’ an̄wan̄wa. (Colossae 1:6, 23; 2:13, 14, 16-18) Ntem, Israel Abasi ke akpa isua ikie ama ọyọhọ utom esie eke ‘editan̄a mme utịbe edinam Abasi, emi okokotde mmọ osio ke ekịm, esịn ke utịbe un̄wana Esie.’
17. Didie ke Matthew 24:14 akaiso ndisu ke ntatara usụn̄?
17 Edi, utom ukwọrọikọ eke akpa isua ikie oro ekedi n̄kukụre ntabinse kaban̄a se ẹdinamde ke ukperedem ini. Ke enyenede ini nnyịn akpan akpan ke ekikere, Jesus ama ọdọhọ ete: “Ẹyenyụn̄ ẹkwọrọ gospel Ubọn̄ Abasi emi ke ofụri ekondo nte ntiense ẹnọ kpukpru mme idụt, ndien adan̄aoro ke utịt eyedi.” (Matthew 24:14; Mark 13:10) Nte prọfesi emi osu? Ke akpanikọ, enye omosu. Ọtọn̄ọde ke ekpri ntọn̄ọ ke 1919, edikwọrọ eti mbụk atara idahaemi osịm mme idụt 230. Ẹkop ikọ ntiense ke ata mbịtmbịt Edem Edere ye ke mme ikpehe oro ẹnen̄erede ẹfiop. Ẹnọ ikọ ntiense ẹkanade ikpọ ikpehe isọn̄, ndien ẹdụn̄ọde ẹyom mme nsannsan isuo man ẹnam mme andidụn̄ ẹbọ ikọ ntiense. Idem ke idak ọkpọsọn̄ ndutịme, utọ nte ekọn̄ ke Bosnia ye Herzegovina, ẹkaiso ndikwọrọ eti mbụk. Nte ekedide ke akpa isua ikie, ikọ ntiense on̄wụm mfri “ke ofụri ererimbot.” Eti mbụk emi edi se ‘ẹkwọrọde ẹnọ kpukpru owo ke idak ikpaenyọn̄’ an̄wan̄wa. Ye nso utịp? Akpa, ẹtan̄ nsụhọ Israel Abasi “ke kpukpru esien, ye usem, ye obio, ye idụt” ẹbok ọtọkiet. Udiana, ẹma ẹtọn̄ọ nditan̄ “akwa otuowo” ẹtode “kpukpru obio ye esien ye idụt ye usem” ndidọn̄. (Ediyarade 5:9; 7:9) Matthew 24:14 akaiso ndisu ke ntatara usụn̄.
18. Nso idi ndusụk n̄kpọ oro ẹnamde ebe ke edikwọrọ eti mbụk ke ofụri ererimbot?
18 Edikwọrọ eti mbụk ke ofụri ererimbot an̄wam ndisọn̄ọ nte ke Jesus ndidu ke ubọn̄ esie ama ọtọtọn̄ọ. (Matthew 24:3) N̄ko-n̄ko, enye edi akpan usụn̄ emi ẹdade ẹdọk “mbun̄wụm isọn̄,” sia enye owụtde mme owo n̄kukụre ata idotenyịn ubonowo, kpa Obio Ubọn̄ Jehovah. (Ediyarade 14:15, 16) Sia edide mme ata Christian ikpọn̄ ẹbuana ke edikwọrọ eti mbụk, akpan utom emi an̄wam ndifiọk mme ata Christian ye mme nsunsu Christian. (Malachi 3:18) Ndinam n̄kpọ ke utọ usụn̄ emi osụn̄ọ ke edinyan̄a ọnọ mbon oro ẹkwọrọde ikọ ye mbon oro ẹkopde n̄ko. (1 Timothy 4:16) Ke edide akpan n̄kpọ akan, edikwọrọ eti mbụk ada itoro ye ukpono ọsọk Jehovah Abasi, kpa enyeemi ọkọnọde ewụhọ ete ẹnam enye, emi ọnọde mbon oro ẹnamde enye ibetedem, emi onyụn̄ anamde enye on̄wụm mfri.—2 Corinth 4:7.
19. Nso ubiere ke ẹsịn udọn̄ ẹnọ kpukpru Christian ndinyene nte mmọ idụkde obufa isua utom?
19 Eyịghe idụhe ekedemerede apostle Paul ke esịt ndidọhọ: “Idifọnke-fọn inọ mi edieke mmen̄kwọrọke gospel.” (1 Corinth 9:16) Mme Christian ẹnyene ukem ekikere oro mfịn. Edi akwa ifet ye akwa mbiomo ndidi “mme anamutom Abasi,” ẹmi ẹnamde un̄wana akpanikọ ayama ke ekịm ererimbot emi. (1 Corinth 3:9; Isaiah 60:2, 3) Utom emi ekenyenede ekpri ntọn̄ọ ke 1919 osịm udomo oro akpade owo idem idahaemi. Se ikperede ndisịm miliọn Christian ition ke ẹnọ ikọ ntiense ẹban̄a itie edikara Abasi nte mmọ ẹbiatde se iwakde ikan biliọn hour kiet ke isua ndida etop edinyan̄a nsọk mbon en̄wen. Nso n̄kpọ idatesịt ke edi ntem ndinyene udeme ke utom edinam enyịn̄ Jehovah asana! Nte nnyịn idụkde isua utom 1996, ẹyak nnyịn ibiere ke nnyịn iditekke ke ifịk. Utu ke oro, nnyịn iyetịm inọ n̄kpan̄utọn̄ ke mme ikọ ẹmi Paul ekewetde ọnọ ẹsọk Timothy ikan nte akanam inọde: “Kwọrọ ikọ Abasi; sịn ifịk nam emi.” (2 Timothy 4:2) Nte nnyịn inamde ntre, nnyịn ibọn̄ akam ke ofụri esịt ite Jehovah akaiso ọdiọn̄ ukeme nnyịn.
Nte Afo Emeti?
◻ Anie akada itie Israel nte “ntiense” Jehovah ọnọ mme idụt?
◻ Didie ke eduuwem Christian etịp n̄kpọ esịn ke edinọ ikọ ntiense?
◻ Ntak emi edikpep Bible ye editie n̄kere enye edide akpan n̄kpọ ọnọ Christian Ntiense?
◻ Ke nso usụn̄ ke mbụk Mme Ntiense Jehovah eyomfịn ọnọ uyarade nte ke Jehovah edi ata Abasi?
◻ Nso ke ẹnam ebe ke edikwọrọ eti mbụk?
[Mme ndise ke page 15]
Utu ke ndibọbiọn̄ọ, ẹkwọrọ eti mbụk idahaemi “ẹnọ kpukpru owo ke idak ikpaenyọn̄”