‘Ntem Ke Abasi Akama Nnyịn’
“Edieke Abasi akamade nnyịn ntem nnyịn nde ikpama kiet eken.”—1 JOHN 4:11.
1. Ke March 23 ke utịn ama okosụhọde, ntak emi ediwak miliọn owo ẹdisopde idem ke Ufọkmbono Obio Ubọn̄ ye ke mme itie usop idem efen ke ofụri ererimbot?
KE Sunday, March 23, 1997, ke utịn ama okosụhọde, se ibede owo 13,000,000 ke ofụri ererimbot nte eyịghe mîdụhe ẹyesop idem ke mme Ufọkmbono Obio Ubọn̄ ye ke mme itie usop idem efen ẹmi Mme Ntiense Jehovah ẹsidade ẹnam n̄kpọ. Ntak-a? Koro n̄kponn̄kan ima emi Abasi owụtde ubonowo otụk esịt mmọ. Jesus Christ okowụk ntịn̄enyịn ke akwa uyarade ima Abasi oro, ọdọhọde ete: “Abasi akamama ererimbot ntem, tutu Enye osio ikpọn̄-ikpọn̄ Eyen emi Enye obonde ọnọ, man owo ekededi eke ọbuọtde idem ye Enye okûtak, edi enyene nsinsi uwem.”—John 3:16.
2. Nso mme mbụme ke kpukpru nnyịn ikpobụp idem nnyịn ke usụn̄ oro ọnọde ufọn kaban̄a nte inamde n̄kpọ iban̄a ima Abasi?
2 Nte nnyịn ikerede iban̄a ima oro Abasi owụtde, nnyịn inam ọfọn ndibụp idem nnyịn ite, ‘Ndi mmenen̄ede n̄wụt esịtekọm ke se Abasi anamde? Ndi usụn̄ oro ndade uwem mi nnam n̄kpọ ọnọ uyarade utọ esịtekọm oro?’
“Abasi Edi Ima”
3. (a) Ntak emi ediwụt ima mîdịghe esen esen n̄kpọ inọ Abasi? (b) Didie ke odudu ye ọniọn̄ ẹwụt idem ke mme utom obot esie?
3 Ediwụt ima ke idemesie idịghe n̄kpọ oro ọsọn̄de akaha ke n̄kan̄ Abasi koro “Abasi edi ima.” (1 John 4:8) Ima edi n̄wọrọnda edu esie. Ke ini enye ọkọdiọn̄de isọn̄ ọnọ owo ndidụn̄, enye ndinam mme obot ẹwọrọ ẹda nnyụn̄ nnam mmọn̄ ẹboho ẹdi n̄kpọdiọhọ mmọn̄ ye inyan̄ibom ekedi ndyọ ndyọ usụn̄ ediwụt odudu. (Genesis 1:9, 10) Ke ini Abasi akanamde ndutịm mmọn̄ ye ofụm uwem oro ẹsan̄ade ẹkanade ẹdidu ke edinam, ke ini enye okobotde anana-ibat n̄kpri unam ye nsio nsio eto ndiwọn̄ọde mme mmọn̄ibọk oro isọn̄ enyenede nsịn ke se mme owo ẹkemede ndidia man mmọ ẹdu uwem, ke ini enye akanamde mme n̄kanika esịtidem nnyịn ẹsan̄a ẹkekem ye udomo usen ye ọfiọn̄ ke ekondo Isọn̄, emi ama ayarade akwa ọniọn̄. (Psalm 104:24; Jeremiah 10:12) Edi, uyarade ima Abasi akam edi n̄wọrọnda akan ke n̄kpọ obot oro ẹkụtde ke enyịn.
4. Ke n̄kpọ obot oro ẹkụtde ke enyịn, nso uyarade ima Abasi ke kpukpru nnyịn ikpokụt inyụn̄ iwụt esịtekọm?
4 Nsịn̄ nnyịn asian nnyịn aban̄a ima Abasi ke ini idomde edinem, ndatndat mfri emi nte an̄wan̄ade owo mîkanamke man enịm uwem kpọt edi n̄ko man ada inemesịt ọsọk nnyịn. Enyịn nnyịn ẹkụt in̄wan̄în̄wan̄ uyarade aban̄ade emi ke akama-n̄kpaidem usoputịn, ikpaenyọn̄ emi ọyọhọde ye ntantaọfiọn̄ ke okoneyo oro an̄wan̄ade, nsio nsio orụk ndiye uduot flawa, idọkọ emi n̄kpri unam ẹnamde, ye ufiop ufiop inua imam mme ufan. Ibuo nnyịn ẹsinam nnyịn ifiọk emi ke ini ikopde inem inem ufuọn̄ flawa ini utọ. Utọn̄ nnyịn ẹsikop enye ke ini ikopde uyom aya, mme ikwọ inuen, ye mme uyo mbonima. Nnyịn imesikop enye ke ini owo ima afatde nnyịn. Ndusụk unam ẹnyene ukeme ndikụt, n̄kop, m̀mê ndin̄wụne mme n̄kpọ oro owo mîkemeke. Edi ubonowo, emi ẹnamde ke mbiet Abasi, enyene ukeme ndifiọk ima Abasi ke usụn̄ oro unam ndomokiet mîkemeke.—Genesis 1:27.
5. Didie ke Jehovah okowụt akpakịp ima ọnọ Adam ye Eve?
5 Ke ini Jehovah Abasi okobotde mme akpa owo, Adam ye Eve, enye ama anam uyarade ima esie akan mmọ okụk. Enye ama ọtọ in̄wan̄, paradise, onyụn̄ anam mme eto eke kpukpru orụk ẹkọri ke esịt esie. Enye ama anam akpa mmọn̄ odu ndibịt enye onyụn̄ anam enye ọyọhọ ye ndiye inuen ye mme unam. Enye ama ọnọ Adam ye Eve ofụri emi nte ebietidụn̄ mmọ. (Genesis 2:8-10, 19) Jehovah akanam n̄kpọ ye mmọ nte nditọ esie, ubak ubon esie eke ofụri ererimbot. (Luke 3:38) Ke ama ọkọnọ Eden nte uwụtn̄kpọ, Ete eke heaven akpa owo iba ẹmi ama ọnọ mmọ ọnọ-uyụhọ utom eke edinam Paradise atara esịm ofụri ererimbot. Ofụri ererimbot ekenyene ndiyọhọ ye nditọ mmọ.—Genesis 1:28.
6. (a) Afo ekere didie aban̄a usụn̄ nsọn̄ibuot oro Adam ye Eve ẹkedade? (b) Nso ikeme ndiwụt nte ke nnyịn imekpep n̄kpọ ito se ikadade itie ke Eden ye nte ke nnyịn imọbọ ufọn ito ifiọk oro?
6 Nte ededi, ikebịghike Adam ye Eve ẹma ẹsobo idomo n̄kopitem, idomo edinam akpanikọ. Ke akpa owo kiet ndien ekem enye eken ẹma ẹkpu ndiwụt esịtekọm nnọ ima oro ẹkewụtde mmọ. Se mmọ ẹkenamde ama enyene ndịk. Ekedi se owo mîkemeke nditịn̄ n̄kpọ n̄nyan̄a idem! Nte utịp, mmọ ẹma ẹtaba itie ebuana mmọ ye Abasi, ẹma ẹsio mmọ ẹfep ke ubon esie, ẹnyụn̄ ẹbịn mmọ ẹsio ke Eden. Nnyịn ke isụk ibọ utịp idiọkn̄kpọ mmọ oro mfịn. (Genesis 2:16, 17; 3:1-6, 16-19, 24; Rome 5:12) Edi nte nnyịn imekpep n̄kpọ ito se iketịbede? Didie ke nnyịn inam n̄kpọ iban̄a ima Abasi? Nte mme ubiere oro nnyịn inamde ke usen ke usen ẹwụt ke nnyịn imowụt esịtekọm iban̄a ima esie?—1 John 5:3.
7. Kpa ye se Adam ye Eve ẹkenamde, didie ke Jehovah okowụt ima ọnọ nditọ mmọ?
7 Idem akwa unana ediwụt esịtekọm oro akpa ete ye eka nnyịn ẹkewụtde ke kpukpru se Abasi akanamde ọnọ mmọ ikefịkke ima emi Abasi ke idemesie ekenyenede inịm. Ke ntak mbọm enyenede ọnọ mme owo ẹmi mîkamanake kan̄a—esịnede nnyịn oro idude uwem mfịn—Abasi ama ayak Adam ye Eve ẹnyene ubon mbemiso mmọ ẹkpade. (Genesis 5:1-5; Matthew 5:44, 45) Ke edide enye ikanamke oro, owo nnyịn ndomokiet ikpakamanake. Ebede ke n̄kaiso ediyarade uduak esie, Jehovah n̄ko ama ọnọ kpukpru nditọ Adam ẹmi ẹdinyenede mbuọtidem isọn̄ ndinyene idotenyịn. (Genesis 3:15; 22:18; Isaiah 9:6, 7) Ndutịm esie ama esịne usụn̄ emi edinamde mme owo ke kpukpru idụt ẹkeme ndifiak nnyene se Adam ọkọduọkde, oro edi, mfọnmma uwem nte mme andibuana oro ẹnyịmede ke ubon ofụri ekondo Abasi. Enye akanam emi ebe ke ndinọ ufak.
Ntak Ufak-a?
8. Ntak emi Abasi mîkakam iwụkke ite okposụkedi Adam ye Eve ẹnyenede ndikpa, ke nditọ mmọ ekededi ẹmi ẹdikopde item idikpaha?
8 Nte ama enen̄ede oyom ẹkpe ekọmurua ufak ke uduot eke uwem owo? Nte Abasi ikpekekemeke n̄kukụre ndiwụk nte okposụkedi Adam ye Eve ẹkenyenede ndikpa ke ntak nsọn̄ibuot mmọ, kpukpru nditọ mmọ ẹmi ẹdikopde uyo ẹnọ Abasi ẹkeme ndidu uwem ke nsinsi? Ke ẹsede ke idaha ekikere owo emi mîkereke n̄kpọ oyom usụn̄, ekeme nditie nte oro esịne eti ibuot. Nte ededi, Jehovah “amama eti ido ye edinen ikpe.” (Psalm 33:5) Edi n̄kukụre ke Adam ye Eve ẹma ẹkekabade ẹdi mme anamidiọk ke mmọ ẹkenyene nditọ; ntre idụhe owo ndomokiet ke otu nditọ mmọ emi akamanade mfọnmma. (Psalm 51:5) Kpukpru mmọ ẹma ẹda idiọkn̄kpọ ẹmana, ndien utịp idiọkn̄kpọ edi n̄kpa. Ke ekpedide Jehovah ama ofụmi emi, nso orụk uwụtn̄kpọ ke oro ekpekenịm ọnọ mme andibuana ke ubon ofụri ekondo esie? Enye ikofụmike ndinen idaha esie. Enye ama owụt ukpono ọnọ se unenikpe oyomde. Tutu amama idụhe owo ekededi emi nte enende okpokụtde ndudue ọnọ usụn̄ emi Abasi akanamde n̄kpọ ye mme eneni oro ẹkebuanade.—Rome 3:21-23.
9. Nte ekemde ye idaha unenikpe Abasi, nso utọ ufak ke ẹkeyom?
9 Didie, ndien, ke ẹkenam eti isọn̄ odu kaban̄a edinyan̄a nditọ Adam ẹmi ẹdiwụtde ima ima n̄kopitem inọ Jehovah? Edieke akanade mfọnmma owo akpa nte ufak, unenikpe ekenyịme ekọmurua mfọnmma uwem oro ofụk mme idiọkn̄kpọ mbon oro ẹdinyịmede ufak oro ke mbuọtidem. Sia idiọkn̄kpọ owo kiet, Adam, akanamde ofụri ubonowo edi mme anamidiọk, ediduọk iyịp mfọnmma owo en̄wen, edide ekọmurua oro asan̄ade ekekem, ekekeme ndinam udomon̄kpọ unenikpe ada ukem ukem. (1 Timothy 2:5, 6) Edi ke m̀mọ̀n̄ ke ekekeme ndikụt utọ owo oro?
Ekọmurua Oro Okokpon Adan̄a Didie?
10. Ntak emi nditọ Adam mîkekemeke ndinọ ufak oro ẹkeyomde?
10 Ke otu nditọ anamidiọk Adam, idụhe owo ndomokiet emi ekekemede ndinọ se ẹkeyomde man ẹfiak ẹdep idotenyịn uwem oro Adam ọkọduọkde. “Baba owo kiet ikemeke ndifak eyen-ete, inyụn̄ ikemeke ndinọ Abasi n̄kpọ usio-isop esie: (ndien ufak ibuot mmọ ọsọn̄, onyụn̄ etre ke nsinsi:) man enye osụk odu uwem ke nsinsi, okûnyụn̄ okụt mbiara.” (Psalm 49:7-9) Utu ke ndinam ubonowo odu ke idaha unana idotenyịn, Jehovah ke idemesie ke mbọm ama anam ndutịm.
11. Ebede ke ewe usụn̄ ke Jehovah ọkọnọ mfọnmma uwem oro ẹkeyomde kaban̄a ufak oro odotde?
11 Jehovah ikọdọn̄ke angel edi isọn̄ edinam nte imakpa ebe ke ndisio ikpọkidem eke owo nnịm ke adan̄aemi akade iso odu uwem nte spirit. Utu ke oro, ebe ke ndinam utịben̄kpọ emi Abasi kpọt, kpa Andibot, ekemede ndinam, enye ama osio odudu uwem ye edu eyen eke heaven esịn ke idịbi an̄wan, Mary eyen Heli an̄wan, eke esien Judah. Anamutom odudu Abasi, edisana spirit esie, ama ekpeme n̄kọri eyen emi ke idịbi eka esie, enye okonyụn̄ amana nte mfọnmma owo. (Luke 1:35; 1 Peter 2:22) Do enyeemi ama enyene ekọmurua oro ẹkeyomde ndinọ ufak oro ediyọhọde se unenikpe Abasi okoyomde ofụri ofụri.—Mme Hebrew 10:5.
12. (a) Ke nso usụn̄ifiọk ke Jesus edi “ikpọn̄-ikpọn̄ edibon Eyen” Abasi? (b) Didie ke Abasi ndikọdọn̄ enyeemi edinọ ufak ọsọn̄ọ ima oro Enye enyenede ọnọ nnyịn?
12 Ewe ke otu akwa udịm nditọ esie eke heaven emi ke Jehovah ọkọnọ utom emi? Ekedi enyeemi ẹtịn̄de ke N̄wed Abasi nte “edibon Eyen Esie kierakiet.” (1 John 4:9) Owo idaha ikọ emi nditịn̄ mban̄a se enye akakabarede edi ke ama akamana nte owo, edi se enye ekedide mbemiso ini oro ke heaven. Enye edi n̄kukụre owo oro Jehovah okobotde nnennen ye unana edidiana kiet ye owo en̄wen ekededi. Enye edi Akpan ke otu kpukpru edibotn̄kpọ. Enye edi enyeemi Abasi akadade ke ndibot kpukpru mme edibotn̄kpọ eken. Mme angel ẹdi nditọ Abasi, kpa nte Adam ekedide eyen Abasi. Edi ẹtịn̄ ẹban̄a Jesus nte enyenede “utọ ubọn̄ emi ikpọn̄ eyen ọbọde ke ubọk ete.” Ẹdọhọ ke enye odu ke “ikpanesịt Ete.” (John 1:14, 18) Itie ebuana esie ye Ete edi enyeoro edide n̄kpet n̄kpet, eke mbuọtidem, ima ima. Enye abuana ke ima oro Ete esie enyenede ọnọ ubonowo. Mme N̄ke 8:30, 31 etịn̄ nte Ete esie ekerede aban̄a Eyen esie ye nte Eyen ekerede aban̄a ubonowo: “N̄konyụn̄ ndi se idatde enye [Jehovah] esịt ofụri usen; ndara ke iso esie kpukpru ini: . . . ndien idatesịt mi [Jesus, Etubom Anamutom Jehovah, kpa mbiet ọniọn̄] odu ke otu nditọ owo.” Ekedi ata ọsọn̄urua Eyen emi ke Abasi ọkọdọn̄ edi isọn̄ edinọ ufak. Ikọ Jesus, ke ntre, enyene se ọwọrọde didie ntem: “Abasi akamama ererimbot ntem, tutu enye osio ikpọn̄-ikpọn̄ Eyen emi Enye obonde ọnọ, man owo ekededi eke ọbuọtde idem ye Enye okûtak, edi enyene nsinsi uwem”!—John 3:16.
13, 14. Nso ke n̄wetnnịm n̄kpọ Bible aban̄ade nte Abraham okodomode ndiwa Isaac an̄wam nnyịn ndiwụt esịtekọm mban̄a se Jehovah akanamde? (1 John 4:10)
13 Man an̄wam nnyịn ndifiọk ke ndusụk udomo se oro ọwọrọde, anyanini mbemiso Jesus ekedide isọn̄, Abasi ama eteme Abraham, ke n̄kpọ nte isua 3,890 ẹmi ẹkebede ete: “Da ndien eyen fo, eyen fo kierakiet, Isaac emi afo amade, ka ke isọn̄ Moriah; nyụn̄ wa enye do ke uwa ke akamba obot kiet eke ndidọhọde fi.” (Genesis 22:1, 2) Abraham ke mbuọtidem ama okop uyo. Nịm idemfo ke itie Abraham. Nso edieke oro ekpekedide eyen fo, n̄kukụre eyen fo emi amade etieti? Nso ekikere ke afo ekpekenyene nte asiakde ifia edifọp uwa oro, anamde isan̄ ediwak usen aka isọn̄ Moriah, onyụn̄ odoride eyen fo ke itieuwa?
14 Ntak emi ete m̀mê eka okopde mbọm enyenede utọ ekikere oro? Genesis 1:27 ọdọhọ ete ke Abasi okobot owo ke mbiet Esie. Ekikere ima ye mbọm oro inyenede owụt ke esisịt udomo ima ye mbọm oro Jehovah enyenede. Ke eke Abraham, Abasi ama esịbe odụk, mbak ẹkûda Isaac ẹnam uwa. (Genesis 22:12, 13; Mme Hebrew 11:17-19) Nte ededi, ke idaha esie, Jehovah iketreke ndinọ ufak oro, okposụkedi oro akakpade enye ye Eyen esie ekese. Se ẹkenamde ikedịghe ke ntak mbiomo ekededi ke n̄kan̄ Abasi, edi, utu ke oro, ekedi ediwụt n̄wọrọnda mfọnido oro owo mîdotke. Nte nnyịn imenen̄ede iwụt esịtekọm iban̄a enye?—Mme Hebrew 2:9.
Se Emi Anamde Odu
15. Didie ke ufak oro otụk mme owo idem ke editịm n̄kpọ emi odude kemi?
15 Ima ima ndutịm oro Abasi akanamde enyene ọkpọsọn̄ odudu ke uwem mbon oro ẹnyịmede enye ke mbuọtidem. Mmọ ke akpa ẹma ẹdianade ẹkpọn̄ Abasi ke ntak idiọkn̄kpọ. Mmọ ẹkedi, kpa nte Ikọ esie ọdọhọde, ‘mme asua ke esịt ke edinam idiọk-n̄kpọ.’ (Colossae 1:21-23) Edi mmọ ẹma ‘ẹkabade ẹtie ke emem ye Abasi ebe ke n̄kpa Eyen esie.’ (Rome 5:8-10) Ke ẹkpụhọrede usụn̄uwem mmọ ẹnyụn̄ ẹnyịmede edifen nnọ oro Abasi anamde odu ọnọ mbon oro ẹbuọtde idem ke uwa Christ, ẹda edisana ubieresịt ẹfọn mmọ mfọn.—Mme Hebrew 9:14; 1 Peter 3:21.
16. Mme edidiọn̄ ewe ke ẹnọ ekpri otuerọn̄ ke ntak mbuọtidem emi mmọ ẹnyenede ke ufak oro?
16 Jehovah ọmọnọ ibat ibat ke otu ẹmi, ekpri otuerọn̄, mfọn oro owo mîdotke ndibuana ye Eyen esie ke Obio Ubọn̄ heaven, ye uduak ndisu akpa uduak Abasi kaban̄a isọn̄. (Luke 12:32) Ẹda mmọemi ẹto “kpukpru esien, ye usem, ye obio, ye idụt . . . [ndidi] Obio Ubọn̄ ye mme oku ẹnọ Abasi: mmọ ẹyenyụn̄ ẹda ubọn̄ ke isọn̄.” (Ediyarade 5:9, 10) Apostle Paul ama ewet ọnọ mmọemi ete: “Mbufo ẹkọbọ spirit eke enyenede mmọ ẹmi ẹdade ẹsịn ke ubon Abasi, emi anamde nnyịn ikot Abasi ite, Abba, Ete. Spirit ke Idem Esie etiene spirit nnyịn edi ntiense ete, nnyịn idi nditọ Abasi. Edi edieke nnyịn idide nditọ, imonyụn̄ inyene udeme ke se ẹnịmde ẹnọ nditọ; imenyene udeme ke se Abasi onịmde; imasan̄a ye Christ inyene udeme.” (Rome 8:15-17) Ke ndidi se Abasi adade enyene nte nditọ esie, ẹnọ mmọ ọsọn̄urua itie ebuana oro Adam ọkọduọkde; edi ẹyenọ nditọ ẹmi mme udiana ifetutom ndinam utom—n̄kpọ emi akananam Adam mîkenyeneke. Eyịghe idụhe apostle John ọkọdọhọde ete: “Ẹse utọ akwa ima emi Ete ọkọnọde nnyịn, ete nnyịn ikpekere nditọ Abasi”! (1 John 3:1) Abasi iwụtke utọ mbon oro ima edumbet (a·gaʹpe) kpọt edi n̄ko ima iman (phi·liʹa), emi edide edu mbọbọ oro odude ke ufọt ata ufan.—John 16:27.
17. (a) Ye kpukpru mbon oro ẹnyenede mbuọtidem ke ufak oro, nso ifet ke ẹnọ? (b) Nso ke “itie eyenisọn̄ emi enyenede ubọn̄ eke nditọ Abasi” ọwọrọ ọnọ mmọ?
17 Ye mmọ eken n̄ko—kpukpru mbon oro ẹwụtde mbuọtidem ke ndutịm oro Abasi ọnọde ke ntatubọk kaban̄a uwem ebe ke Jesus Christ—Jehovah anam ifet eberede ndinyene ọsọn̄urua itie ebuana oro Adam ọkọduọkde. Apostle Paul ama anam an̄wan̄a ete: “Koro ofụri ekondo [edibotn̄kpọ edide owo emi otode Adam] etiede ke ọkpọsọn̄ udọn̄, ebet ini eke ediyararede nditọ Abasi [oro edi, mmọ ẹbet ini emi edikabarede ana ata in̄wan̄în̄wan̄ nte ke nditọ Abasi ẹmi ẹdide mme ada udeme ye Christ ke Obio Ubọn̄ eke heaven ke ẹnam n̄kpọ in̄wan̄în̄wan̄ kaban̄a ubonowo]. Koro ẹkenam ofụri ekondo osụk idem ọnọ ikpîkpu n̄kpọ [mmọ ẹkemana ẹdụk idiọkn̄kpọ ye idotenyịn n̄kpa, usụn̄ ikonyụn̄ idụhe emi mmọ ẹkpenyan̄ade idemmọ], itoho ke edinyịme esịt, edi oto ke Enye emi akanamde enye osụk ntre, ye idotenyịn [emi Abasi ọnọde], ete ke ẹyenyan̄a ekondo ke idemesie nde ẹsio ke itie ufụn mbiara, ẹsịn ke itie eyen-isọn̄ emi enyenede ubọn̄ eke nditọ Abasi.” (Rome 8:19-21) Itie eyenisọn̄ oro ediwọrọ nso? Nte ke ẹma ẹnam mmọ ẹwọrọ ufụn idiọkn̄kpọ ye n̄kpa. Mmọ ẹyenyene mfọnmma ekikere ye ikpọkidem, Paradise nte ebietidụn̄ mmọ, ye nsinsi uwem emi ẹdidarade mfọnmma mmọ ẹdinyụn̄ ẹwụtde esịtekọm oro mmọ ẹnyenede ẹnọ Jehovah, ata Abasi kierakiet. Ndien didie ke ẹkenam kpukpru ẹmi ẹdidu? Ebe ke uwa ufak ikpọn̄îkpọn̄ edibon Eyen Abasi.
18. Ke March 23 ke utịn ama okosụhọde, nso ke nnyịn idinam, ndien ntak?
18 Ke Nisan 14, 33 E.N., ke ubet enyọn̄ kiet ke Jerusalem, Jesus ama enịm Editi n̄kpa esie. Editi n̄kpa esie eke isua ke isua amakabade edi akpan edinam ke uwem kpukpru mme ata Christian. Jesus ke idemesie ama owụk ete: “Ẹnam emi nditi Mi.” (Luke 22:19) Ke 1997 ẹdinịm Editi ke utịn ama okosụhọde ke March 23 (emi edide ini emi Nisan 14 ọtọn̄ọde). Ke usen oro, idụhe n̄kpọ emi ekpedide akpan n̄kpọ akan edidu ke usọrọ Editi emi.
Didie ke Afo Ọkpọbọrọ?
◻ Ke mme usụn̄ ewe ke Abasi owụt akpakịp ima ọnọ ubonowo?
◻ Ntak ẹkeyomde mfọnmma uwem owo man ẹfak nditọ Adam?
◻ Ke nso akwa ekọmurua ke Jehovah ọkọnọ ufak?
◻ Nso ke ufak oro anam odu?
[Ndise ke page 10]
Abasi ama ọnọ ikpọn̄îkpọn̄ edibon Eyen esie