Ẹkaiso Ndisan̄a ke Un̄wana ye ima
Mme Akpan N̄kpọ Ẹtode Akpa N̄wed John
JEHOVAH edi Ntọn̄ọ un̄wana ye ima. Ana nnyịn iyom Abasi kaban̄a un̄wana eke spirit. (Psalm 43:3) N̄ko ima esịne ke otu mbun̄wụm edisana spirit esie.—Galatia 5:22, 23.
Ẹneme ẹban̄a un̄wana, ima, ye mme n̄kpọ eken ke akpa n̄wed eke odudu spirit oro apostle John ekewetde, iso-ọfọn ekewetde ke m̀mê ke ekperede Ephesus ke n̄kpọ nte 98 C.E. Akpan ntak oro akanamde ẹwet enye ekedi man ẹkpeme mme Christian ẹsio ke nsọn̄ibuot ẹnyụn̄ ẹn̄wam mmọ ndikaiso nsan̄a ke un̄wana. Sia nnyịn isobode mme n̄kpọ-ata ẹdude ẹnọ ima, mbuọtidem, ye nsọn̄ọnda nnyịn nnọ akpanikọ, edikere mban̄a n̄wed emi ke akpanikọ eyenọ nnyịn ufọn.
‘Ẹsan̄a ke Un̄wana’
John ama anam an̄wan̄a ete ke ana mme anam-akpanikọ Christian ẹsan̄a ke un̄wana. (1Jo 1:1–2:29) Enye ọkọdọhọ ete: “Abasi edi un̄wana, ekịm [ukwan̄n̄kpọ, oburọbụt ido, nsu m̀mê se mîsanake] inyụn̄ idụhe ke enye.” Sia mme Christian oro ẹyetde aran ‘ẹsan̄ade ke un̄wana,’ mmọ ‘ẹmedụk ndụk’ ye Abasi, Christ, ye kiet eken. Ẹma ẹnyụn̄ ẹnam mmọ ẹsana ẹbọhọ idiọkn̄kpọ ebe ke iyịp Jesus.
Edide nnyịn idi mme Christian oro ẹyetde aran ye idotenyịn eke heaven m̀mê nnyịn isak iso ise idotenyịn nsinsi uwem ke isọn̄, nnyịn idikaiso ibọ ufọn ito uwa Jesus n̄kukụre edieke nnyịn imade nditọete nnyịn idịghe ererimbot. Ana nnyịn n̄ko itre ndidi se mbon nsọn̄ibuot ẹkarade, utọ nte “andibiọn̄ọ Christ,” ẹmi ẹkan̄de Ete ye Eyen. Ẹyak nnyịn n̄ko ikûdedei ifre ite ke edi mbon oro ẹsọn̄ọde ẹyịre ke akpanikọ ẹnyụn̄ ẹnamde edinen ido kpọt edidara uwem nsinsi.
Nditọ Abasi Ẹwụt Ima
Ekem John anam ẹdiọn̄ọ nditọ Abasi. (3:1–4:21) N̄kpọ kiet edi-o, mmọ ẹnam se inende. Mmọ n̄ko ẹnịm mbet Jehovah Abasi ‘ke mmọ ndibuọt idem ke enyịn̄ Eyen esie, Jesus Christ, nnyụn̄ mma kiet eken.’
Owo eke enyenede ‘ifiọk Abasi’ ọdiọn̄ọ aban̄a mme uduak Jehovah ye nte enye owụtde ima. Emi ekpenyene ndin̄wam owo oro ndiwụt ima. Ke akpanikọ, “owo eke mîmaha ima ifiọkke Abasi, koro Abasi edi ima.” Ẹma ẹwụt ima Abasi ke ini Abasi “[ok]osiode Eyen Esie ọdọn̄, ete, edidi usio-isop mme idiọkn̄kpọ nnyịn.” Edieke Jehovah akamade nnyịn okosịm udomo oro, nnyịn imenyene mbiomo ndima kiet eken. Ih, owo ekededi oro ọdọhọde ke imama Abasi ana ama n̄ko eyenete esie eke spirit.
Mbuọtidem ‘Akakan Ererimbot’
Ima onụk nditọ Abasi ndinịm mbet esie, edi ebe ke mbuọtidem ke mmọ “ẹkan ererimbot.” (5:1-21) Mbuọtidem nnyịn ke Abasi, Ikọ esie, ye Eyen esie ẹn̄wam nnyịn ‘ndikan ererimbot’ ebe ke ndisịn ukwan̄ ekikere ye mme edu esie ye ke ndinịm mbet Jehovah. Abasi ọmọnọ mbon oro ‘ẹkande ererimbot’ idotenyịn nsinsi uwem onyụn̄ okop akam mmọ oro ẹdude ke n̄kemuyo ye uduak esie. Koro owo ekededi “eke Abasi okobonde” mînamke idiọk, Satan inyụn̄ itụkke utọ owo oro ubọk. Edi mbon oro ẹyetde aran ye mme asan̄autom Jehovah oro ẹnyenede idotenyịn eke isọn̄ ẹkpenyene nditi ẹte ke “ofụri ererimbot onyụn̄ esịne ke ubọk andidiọk.”
[Ekebe/Ndise ke page 29]
Uwa Usio-isop: Jesus “edi usio-isop mme idiọkn̄kpọ nnyịn [mme anditiene enye oro ẹyetde aran], inyụn̄ idịghe eke nnyịn ikpọn̄, edi eke ofụri ererimbot nde,” kpa ubonowo eken. (1 John 2:2) N̄kpa esie ekedi “isop” (Greek, hi·la·smosʹ, owụtde “edisụk owo esịt,” “edisio isop”) edi idịghe ke usụn̄ifiọk eke edisụk Abasi esịt. Utu ke oro, uwa Jesus okosụk, m̀mê okosio usiene ke se mfọnmma unenikpe Abasi oyomde. Didie? Ke ndinọ edinen ye nnennen isọn̄ ndifen idiọkn̄kpọ, man Abasi owụt ete “Imọ idi edinen, inyụn̄ inam ikpe etebe owo [oro adade-da idiọkn̄kpọ amana] eke ọbuọtde idem ke Jesus.” (Rome 3:23-26; 5:12) Ke ndinam usụn̄ odu ọnọ edinọ usiene kaban̄a idiọkn̄kpọ owo, uwa Jesus ama anam emi edi inem inem n̄kpọ m̀mê se inyenede ufọn, man owo oyom onyụn̄ ọbọ edifiak nda nsịn ke eti itie ebuana ye Jehovah. (Ephesus 1:7; Mme Hebrew 2:17) Kpukpru nnyịn ikpowụt esịtkọm didie ntem iban̄a emi!