Ibuot 8

Odudu Ndinam Mme N̄kpọ Ẹtọn̄ọ Ntak Ẹfọn—Jehovah ‘Anam Kpukpru N̄kpọ Ẹdi Mbufa’

1, 2. Nso ntakurua ke ekpụk ubonowo ẹsobo mfịn, ndien didie ke emi otụk nnyịn?

EKPRI eyen ọduọk mîdịghe abiat n̄kpọmbre oro enye amade onyụn̄ atua eyet tutu enyene mbọm. Uyo eyet oro ọduọ owo esịt! Nte akanam omokụt nte eyenọwọn̄ okopde inemesịt ke ini ete m̀mê eka afiakde ọnọ enye n̄kpọ oro okosopde? Ekeme ndidi ekpri n̄kpọ nnọ ete m̀mê eka ndiyom m̀mê ndidiọn̄ n̄kpọmbre oro. Edi eyen oro enen̄ede okop inemesịt onyụn̄ enen̄ede okop nduaidem. Ẹfiak ẹnọ enye se iketiede nte atak ofụri ofụri!

² Jehovah, akakan Ete, enyene odudu ndifiak nnọ se nditọ esie eke isọn̄ ẹkemede ndikere nte se ima ikatak ofụri ofụri. Nte ededi, nnyịn itịn̄ke iban̄a ikpîkpu n̄kpọmbre. Ke “ndiọk eyo” emi, nnyịn inyene ndisobo ntakurua oro okponde akan oro. (2 Timothy 3:1-5) Etie nte ekese n̄kpọ oro mme owo ẹdade ke n̄kpọuto—ufọkidụn̄, inyene, utom, idem nsọn̄idem—ẹdu ke itiendịk. Nnyịn n̄ko imekeme ndikop mfụhọ ke ini nnyịn ikerede iban̄a nte ẹsobode n̄kann̄kụk ye ntakurua oro etienede edisọhi ediwak orụk odu uwem n̄kpọ mfep. Nte ededi, idụhe se itụkde nnyịn nte n̄kpa owo oro nnyịn imade. Ekikere ntakurua ye unana ukeme ẹkeme ndikan owo ubọk.—2 Samuel 18:33.

3. Nso akama-ndọn̄esịt idotenyịn ke ẹnọ ke Utom 3:21, ndien nso ke Jehovah edida inam enye osu?

³ Edi n̄kpọ ndọn̄esịt didie ntem ndifiọk mban̄a odudu oro Jehovah enyenede ndinam mme n̄kpọ ẹtọn̄ọ ntak ẹfọn! Nte nnyịn idikụtde, se Abasi ekemede ndinọ edinyụn̄ afiakde ọnọ nditọ esie eke isọn̄ ẹwak etieti. Ke akpanikọ, Bible owụt ete ke Jehovah aduak “[ndinam] kpukpru n̄kpọ ẹtọn̄ọ ntak ẹfọn.” (Sịghisịghi ubọkn̄wed edi eke nnyịn; Utom 3:21) Jehovah edida Obio Ubọn̄ Messiah, emi Eyen esie, Jesus Christ, akarade anam emi. Uyarade owụt ete ke Obio Ubọn̄ emi ama ọtọn̄ọ ndikara ke heaven ke 1914.a (Matthew 24:3-14) Nso ke ẹditọn̄ọ ntak inam ọfọn? Ẹyak nnyịn ikere iban̄a ndusụk utịbe utịbe n̄kpọ oro Jehovah anamde ẹtọn̄ọ ntak ẹfọn. Nnyịn imokokụt inyụn̄ ifiọk iban̄a kiet ke otu emi. Mbon eken ẹdida itie ke akamba udomo ke ini iso.

Ndifiak N̄wụk Edisana Utuakibuot

4, 5. Nso iketịbe inọ ikọt Abasi ke isua 607 M.E.N., ndien nso idotenyịn ke Jehovah ọkọnọ mmọ?

⁴ N̄kpọ kiet oro Jehovah afiakde owụk edi edisana utuakibuot. Man ikeme ndifiọk se emi ọwọrọde, ẹyak nnyịn idụn̄ọde mbụk obio ubọn̄ Judah ibio ibio. Ndinam ntre ayanam nnyịn inyene aduai-owo-idem ikike iban̄a nte Jehovah adade odudu unam mme n̄kpọ ẹtọn̄ọ ntak ẹfọn anam n̄kpọ.—Rome 15:4.

⁵ Kam kere nte eketiede mme anam-akpanikọ Jew ke idem ke isua 607 M.E.N. ke ini ẹkesobode Jerusalem. Ẹma ẹsobo edima obio mmọ, enyụn̄ ẹwụri mme ibibene esie. Ke akam ọdiọkde akan, ubọn̄ ubọn̄ temple oro Solomon ọkọbọpde, emi ekedide n̄kukụre iwụk ebiet edisana utuakibuot ke ofụri isọn̄, akana ndon. (Psalm 79:1) Ẹma ẹtan̄ mme andibọhọ ẹka ntan̄mfep ke Babylon, ẹyakde obio emana mmọ akabade edi ndon oro ndiọi unan ẹdụn̄de. (Jeremiah 9:11) Ke ekikere owo, eketie nte idotenyịn ama osop ofụri ofụri. (Psalm 137:1) Edi Jehovah, emi ekebemde iso etịn̄ ke anyanini aban̄a nsobo emi, ama ọnọ idotenyịn nte ke ini edinam mme n̄kpọ ẹtọn̄ọ ntak ẹfọn ke ekedi ke iso.

6-8. (a) Ewe ibuotikọ ke ẹtịn̄ ẹban̄a ndien ndien ke uwetn̄kpọ mme prọfet Hebrew, ndien didie ke mme utọ ntịn̄nnịm ikọ oro ẹkenyene akpa edisu? (b) Ke eyomfịn, didie ke ikọt Abasi ẹkụt edisu ntịn̄nnịm ikọ oro aban̄ade edifiak n̄wụk?

⁶ Ke nditịm ntịn̄, edifiak n̄wụk ekedi ibuotikọ oro okodude ndien ndien ke uwetn̄kpọ mme prọfet Hebrew.b Ebede ke mmọ, Jehovah ama ọn̄wọn̄ọ ndinọ mmọ idụt oro ẹfiakde ẹbọp ẹnyụn̄ ẹdụn̄de, isọn̄ oro esehede, oro ọbọhọde ndiọi unam ye mme asua. Enye ama etịn̄ aban̄a idụt mmọ oro ẹfiakde ẹbọp nte ata paradise! (Isaiah 65:25; Ezekiel 34:25; 36:35) Ke akande kpukpru, ẹkenyene ndifiak n̄wụk edisana utuakibuot, ẹkenyụn̄ ẹnyene ndifiak mbọp temple. (Micah 4:1-5) Mme ntịn̄nnịm ikọ emi ẹma ẹnọ mme Jew oro ẹkedude ke ntan̄mfep idotenyịn, an̄wamde mmọ ndiyọ ntan̄mfep isua 70 mmọ ke Babylon.

⁷ Ke akpatre, ini edinam mme n̄kpọ ẹtọn̄ọ ntak ẹfọn ama edisịm. Ke ẹwọrọde ke ufụn ke Babylon, mme Jew ẹma ẹfiak ẹnyọn̄ọ Jerusalem ẹnyụn̄ ẹkefiak ẹbọp temple Jehovah do. (Ezra 1:1, 2) Adan̄a nte mmọ ẹkesọn̄ọde ẹyịre ke utuakibuot akpanikọ, Jehovah ama ọdiọn̄ mmọ onyụn̄ anam isọn̄ mmọ esehe onyụn̄ oforo. Enye ama ekpeme mmọ osio ke ubọk mme asua ye ndiọi unam oro ẹkeyọhọde obio mmọ ke ediwak iduọk isua emi ẹkebede. Anaedi mmọ ẹma ẹnen̄ede ẹkop inemesịt ẹban̄a odudu edifiak nnam n̄kpọ ọfọn oro Jehovah enyenede! Edi mme n̄kpọntịbe oro ẹkedi sụk akpa ibio ibio edisu ntịn̄nnịm ikọ oro aban̄ade edifiak nnam n̄kpọ ọfọn ama. N̄kponn̄kan edisu ekenyene ndidi “ke utịt eyo,” ke eyo nnyịn, ke ini ẹdidoride Adiakpa Edidem David oro ẹken̄wọn̄ọde ke anyanini, ke ebekpo.—Isaiah 2:2-4; 9:6, 7.

⁸ Esisịt ini ke ẹma ẹkedori Jesus ke ebekpo ke Obio Ubọn̄ eke heaven ke 1914, enye ama ese aban̄a mme udọn̄ n̄kpọ eke spirit mme anam-akpanikọ ikọt Abasi ke isọn̄. Kpa nte Cyrus owo Persia oro ekedide andikan akanamde nsụhọ Jew ẹwọrọ ufụn ke Babylon ke isua 537 M.E.N., Jesus ama osio mme nsụhọ Jew eke spirit—kpa mme anditiene nde ikpat esie—ke odudu Babylon eyomfịn, kpa ukara ererimbot eke nsunsu ido ukpono. (Rome 2:29; Ediyarade 18:1-5) Tọn̄ọde ke 1919 ka iso, ẹma ẹfiak ẹwụk edisana utuakibuot ke nnennen itie esie ke uwem mme ata Christian. (Malachi 3:1-5) Toto ke ini oro, ikọt Jehovah ẹtuak ibuot ẹnọ enye ke temple eke spirit esie—kpa ndutịm Abasi kaban̄a edisana utuakibuot. Ntak emi edide akpan n̄kpọ ọnọ nnyịn mfịn?

Ndinam Mme N̄kpọ Ẹtọn̄ọ Ntak Ẹfọn ke N̄kan̄ eke Spirit—Ntak Edide Akpan N̄kpọ

9. Ke eyo mme apostle ama ekebe, nso ke mme ido ukpono Christendom ẹkenam ye utuakibuot Abasi, edi nso ke Jehovah anam ke eyo nnyịn?

⁹ Kere ban̄a se iketịbede ke ini edem. Edisana spirit ama ọdiọn̄ mme Christian akpa isua ikie ke ediwak usụn̄. Edi Jesus ye mme apostle ẹma ẹbem iso ẹtịn̄ ẹte ke ẹyesabade utuakibuot akpanikọ, ke enye oyonyụn̄ osop. (Matthew 13:24-30; Utom 20:29, 30) Ke eyo mme apostle ama ekebe, Christendom ama edidu. Mme ọkwọrọ ederi esie ẹma ẹnyịme ukpepn̄kpọ ye edinam mme okpono ndem. Mmọ n̄ko ẹma ẹkpere ndinam mme owo ẹkûkeme ndisan̄a n̄kpere Abasi, ẹwụtde enye nte Abasi-Ita-ke-Kiet oro owo mîkemeke ndifiọk ẹnyụn̄ ẹkpepde mme owo ndiyarade idiọkn̄kpọ nnọ mme oku nnyụn̄ mbọn̄ akam nnọ Mary ye nsio nsio “ndisana owo” utu ke ndibọn̄ nnọ Jehovah. Nso ke Jehovah anam idahaemi, ke utọ mbiara oro ama akada itie ke ediwak isua? Ke ererimbot mfịn—kpa ererimbot oro ọyọhọde ye mme nsu ido ukpono, mme ndek ndek edinam unana uten̄e Abasi ẹnyụn̄ ẹsabarede—enye esịbe odụk onyụn̄ afiak owụk edisana utuakibuot! Ye unana editịn̄ ke n̄kponinua, nnyịn imekeme ndidọhọ ke edinam mme n̄kpọ ẹtọn̄ọ ntak ẹfọn edi kiet ke otu ata akpan n̄kpọntịbe oro adade itie ke eyomfịn.

10, 11. (a) Nso ikpehe iba ke paradise eke spirit abuana, ndien didie ke enye otụk fi? (b) Nso orụk owo ke Jehovah atan̄ ọdọn̄ ke paradise eke spirit, ndien nso ke mmọ ẹdinyene ifet ndikụt?

¹⁰ Mmọdo mme ata Christian mfịn ẹdu ke paradise eke spirit. Nso ke paradise emi abuana? Enye abuana ikpehe iba akpan akpan. Akpa edi edisana utuakibuot ata Abasi, kpa Jehovah. Enye ọnọ nnyịn usụn̄ utuakibuot oro mîsan̄ake ye nsu ye abian̄a. Enye ọnọ nnyịn udia eke spirit. Emi anam nnyịn ifiọk Ete nnyịn eke heaven, inem enye esịt, inyụn̄ isan̄a ikpere enye. (John 4:24) Ọyọhọ ikpehe iba ke paradise eke spirit emi abuana mme owo. Nte Isaiah ekebemde iso etịn̄, “ke utịt eyo,” Jehovah ekpep mme andituak ibuot nnọ enye usụn̄ emem. Enye osio ekọn̄ efep ke otu nnyịn. Kpa ye unana mfọnmma nnyịn, enye an̄wam nnyịn ‘ndimen obufa owo nsịne.’ Enye ọdiọn̄ ukeme nnyịn ebe ke edisana spirit, emi anamde nnyịn ision̄o nti mbun̄wụm. (Ephesus 4:22-24; Galatia 5:22, 23) Ke ini afo anamde n̄kpọ ke n̄kemuyo ye spirit Abasi, afo ke akpanikọ odu ke paradise eke spirit.

¹¹ Jehovah atan̄ mme utọ owo oro enye amade ọdọn̄ ke paradise eke spirit emi—mbon oro ẹmade enye, ẹmade emem, ẹnyụn̄ “ẹkerede ẹban̄a unana mmọ ke n̄kan̄ eke spirit.” (Matthew 5:3, NW) Mme utọ owo oro ẹdi mbon oro ẹdinyenede ifet ndikụt nte ẹdinamde mme n̄kpọ ẹtọn̄ọ ntak ẹfọn oro akam okponde akan—kpa edinam ubonowo ye ofụri isọn̄ ẹtọn̄ọ ntak ẹfọn.

“Sese, Mmanam Kpukpru N̄kpọ Ẹdi Mbufa”

12, 13. (a) Ntak emi anade mme ntịn̄nnịm ikọ ẹban̄ade edinam mme n̄kpọ ẹtọn̄ọ ntak ẹfọn ẹnyene edisu efen efen? (b) Nso idi uduak Jehovah kaban̄a isọn̄ nte ẹketịn̄de ke Eden, ndien ntak emi ọnọde nnyịn idotenyịn kaban̄a ini iso?

¹² Ediwak ntịn̄nnịm ikọ ẹban̄ade edinam mme n̄kpọ ẹtọn̄ọ ntak ẹfọn ẹbuana se ikande sụk edinam mme n̄kpọ ẹtọn̄ọ ntak ẹfọn ke n̄kan̄ eke spirit. Ke uwụtn̄kpọ, Isaiah ama ewet aban̄a ini oro ẹdikọkde mbon udọn̄ọ, mbụn̄ọ, nnan, ye inan udọn̄ọ mmọ, ẹdinyụn̄ ẹmende n̄kpa ke nsinsi. (Isaiah 25:8; 35:1-7) Utọ un̄wọn̄ọ oro ikosụhu ke ata ata usụn̄ ke Israel eset. Ndien okposụkedi nnyịn ikụtde mme un̄wọn̄ọ emi ẹsude ke usụn̄ eke spirit ke eyo nnyịn, eti ntak odu ndinịm ke akpanikọ nte ke enye oyosu ke ọyọhọ udomo ke ata ata usụn̄ ke ini iso. Nnyịn isan̄a didie ifiọk oro?

¹³ Ko ke in̄wan̄ Eden, Jehovah ama anam uduak esie kaban̄a isọn̄ an̄wan̄a: Akana idara idara ekpụk ubonowo oro ẹkopde nsọn̄idem, ẹnyụn̄ ẹdianade kiet ẹdụn̄ ke esịt. Akana eren ye n̄wan oro ẹse ẹban̄a isọn̄ ye kpukpru edibotn̄kpọ esie, ẹnam ofụri isọn̄ akabade edi paradise. (Genesis 1:28) Emi edi ata isio ye se idude idahaemi. Nte ededi, nyene mbuọtidem nte ke mme uduak Jehovah ikemeke ndikpu. (Isaiah 55:10, 11) Jesus, nte Edidem Messiah emi Jehovah emekde ayada Paradise ofụri ekondo emi edi.—Luke 23:43.

14, 15. (a) Didie ke Jehovah edinam “kpukpru n̄kpọ ẹdi mbufa”? (b) Uwem editie didie ke Paradise, ndien ewe ikpehe ke afo enen̄ede ama?

¹⁴ Kere nte okpokụtde ofụri isọn̄ akabarede edi Paradise! Jehovah etịn̄ aban̄a ini oro ete: “Sese, mmanam kpukpru n̄kpọ ẹdi mbufa.” (Ediyarade 21:5) Kere se oro ediwọrọde. Ke ini Jehovah adade odudu nsobo esie anam n̄kpọ ama ye idiọk akani editịm n̄kpọ emi, se idisụhọde edidi “obufa enyọn̄ ye obufa isọn̄.” Emi ọwọrọ ete ke obufa ukara eyetie ke heaven akara obufa n̄kaowo oro ẹmade Jehovah ẹnyụn̄ ẹnamde uduak esie. (2 Peter 3:13) Ẹyekọbi Satan ye mme demon esie. (Ediyarade 20:3) Emi edidi akpa ini ke ediwak tọsịn isua oro ubonowo edibọhọde mbiara ye usua usua idiọk odudu oro. Nte eyịghe mîdụhe, ubọhọ emi oyokpon etieti.

¹⁵ Ke akpatre, nnyịn iyekeme ndise mban̄a ediye ekondo emi nte ẹkeyomde nnyịn inam ke editọn̄ọ. Isọn̄ enyene oto-obot odudu edifiak ndiọn̄ idemesie. Mme n̄kpọdiọhọ mmọn̄ oro ẹsabarede ẹkeme ndifiak nsana ke idemmọ edieke ẹsiode se isabarede mmọ ẹfep; n̄kann̄kụk oro ekọn̄ abiatde ekeme ndifiak nye edieke mme ekọn̄ oro ẹtrede. Nso n̄kpọ inemesịt ke edidi ntem ndinam utom ke usụn̄ oro odude ke n̄kemuyo ye isọn̄, in̄wamde ndinam enye akabade edi itie nduọkodudu oro ebietde in̄wan̄esa, Eden ofụri ererimbot oro ọyọhọde ye anana-ibat uduot uwem! Utu ke ndisọhi nsio nsio uduot unam ye eto mfep ntịme ntịme, owo oyodu ke emem ye akpaimọ edibotn̄kpọ ke isọn̄. Idem nditọwọn̄ idifeheke ndiọi unam.—Isaiah 9:6, 7; 11:1-9.

16. Ke Paradise, ndinam nso ọtọn̄ọ ntak ọfọn editụk mme anam-akpanikọ kiet kiet?

¹⁶ Nnyịn n̄ko iyafiak inyene ọkpọkpọ nsọn̄idem. Ke Armageddon ebede, mme andibọhọ ẹyekụt utịbe ukọkudọn̄ọ ke ofụri ekondo. Nte enye akanamde ke ini okodude ke isọn̄, Jesus ayada odudu emi Abasi ọnọde enye anam mme nnan ẹkụt usụn̄, mme inan ẹkop ikọ, mbụn̄ọ ye mbon n̄kpọnnam ẹkop nsọn̄idem. (Matthew 15:30) Mbonusọn̄ ẹyekop idatesịt ke ndifiak n̄kop odudu ye nsọn̄idem nte ke ini uyen. (Job 33:25) N̄n̄wen̄wịne ikpọkidem ididụhe aba, ukot eyenen̄ede mme owo, ndien mme esịp ẹyefiak ẹkop odudu. Kpukpru mme anam-akpanikọ ubonowo ẹyekụt nte odudu idiọkn̄kpọ ye unana mfọnmma ẹsụhọrede ubọk sụn̄sụn̄, ẹbede ẹfep fapfap. Nnyịn iyenen̄ede ikọm Jehovah Abasi ke utịbe utịbe odudu esie ndinam ẹfiak ẹkop nsọn̄idem! Ẹyak nnyịn idahaemi iwụk ntịn̄enyịn ke ata akpan inem inem ikpehe kiet aban̄ade aduai-owo-idem ini emi ẹdinamde mme n̄kpọ ẹtọn̄ọ ntak ẹfọn.

Edinam Mme Akpan̄kpa Ẹfiak Ẹdidu Uwem

17, 18. (a) Ntak emi Jesus akasuade ọnọ mme Sadducee? (b) Nso ikanam Elijah eben̄e Jehovah ete anam owo eset ke n̄kpa?

¹⁷ Ke akpa isua ikie E.N., ndusụk adaiso ido ukpono, ẹkotde mme Sadducee, ikenịmke ediset ke n̄kpa ke akpanikọ. Jesus ama asua ọnọ mmọ ete: “Mbufo ẹmedue, koro mbufo mîfiọkke n̄wed Abasi ye odudu Abasi.” (Matthew 22:29) Ih, N̄wed Abasi ayarade nte ke Jehovah enyene utọ odudu oro ndifiak nnọ uwem. Didie ke edi ntre?

¹⁸ Kere se iketịbede ke eyo Elijah. Ebeakpa kiet akakama okpo n̄kukụre eyen esie ke ubọk. Anaedi emi ama enen̄ede otụk Prọfet Elijah, emi okodụn̄de do ke ekpri ibio ini nte esenowo ebeakpa oro. Ke mbemiso, enye ama an̄wam eyen emi osio ke biọn̄. Anaedi Elijah ama enen̄ede ama ekpri eyen emi. Eka eyen oro ama enen̄ede ofụhọ. Eyen emi ekedi n̄kukụre owo oro enye akadade eti ebe esie oro ama akakpa. Ekeme ndidi enye ama odori enyịn ke eyen emi edise aban̄a imọ ke ini usọn̄. Ibuot ama oyon̄ ebeakpa oro, anamde enye ekere ke imọ ikọbọ ufen ke idiọkn̄kpọ oro imọ ikanamde ke ini edem. Elijah ikenemke esịt nditie n̄kụt utọ n̄kpọ mmọn̄eyet eke okponde ntre. Enye ama adaha sụn̄sụn̄ ọbọ okpo eyen emi ke ikpanesịt eka esie, emen enye ọdọk aka ubet esie, onyụn̄ ekeben̄e Jehovah Abasi ete afiak esịn ukpọn̄, m̀mê uwem, eyen oro.—1 Ndidem 17:8-21.

19, 20. (a) Didie ke Abraham okowụt ke imọ imenyene mbuọtidem ke odudu Jehovah ndifiak nnọ uwem, ndien nso ikedi isọn̄ utọ mbuọtidem oro? (b) Didie ke Jehovah ọkọnọ mbuọtidem Elijah utịp?

¹⁹ Elijah ikedịghe akpa owo oro ekenịmde ediset ke n̄kpa ke akpanikọ. Ediwak isua ikie ke mbemiso, Abraham ama enịm ke akpanikọ nte ke Jehovah enyene utọ odudu oro ndifiak nnọ uwem—ndien enye ama enyene eti ntak ndinịm oro. Ke ini Abraham ekedide isua 100 ke emana Sarah onyụn̄ edide isua 90, Jehovah ama anam ukeme unyene nditọ mmọ oro ama akakpa afiak enyene uwem, anamde Sarah ke utịbe utịbe usụn̄ ekeme ndiman eyeneren. (Genesis 17:17; 21:2, 3) Ekem, ke eyen oro ama okokpon, Jehovah ama ọdọhọ Abraham awa eyen esie. Abraham ama owụt mbuọtidem, ọfiọkde ete ke Jehovah ekeme ndifiak nnam edima eyen imọ Isaac edidu uwem. (Mme Hebrew 11:17-19) Utọ ọkpọsọn̄ mbuọtidem oro ekeme ndinam an̄wan̄a ntak emi Abraham, mbemiso ọdọkde obot oro aka ndiwa Isaac, ọkọsọn̄ọde etịn̄ ọnọ mme asan̄autom esie ete ke imọ ye Isaac iyafiak isan̄a kiet inyọn̄ idi.—Genesis 22:5.

²⁰ Jehovah ama enịm Isaac uwem, ke ntre ikoyomke ẹnam enye eset ini oro. Nte ededi, ke n̄kan̄ eke Elijah, eyen ebeakpa oro ama akpakpa—edi ikebịghike. Jehovah ama ọnọ mbuọtidem prọfet emi utịp ebe ke ndinam eyen oro eset! Elijah ama ayak eyen oro ndien ọnọ eka esie, onyụn̄ etịn̄ ikọ emi owo mîkemeke ndifre ete: “Sese, eyen fo ke odu uwem”!—1 Ndidem 17:22-24.

21, 22. (a) Nso ikedi uduak ediset ke n̄kpa oro ẹwetde ke N̄wed Abasi? (b) Ke Paradise, owo ifan̄ ke ẹdinam ẹset, ndien anie edinam oro?

²¹ Ntem ke akpa ini ke mbụk Bible, nnyịn imokụt nte Jehovah adade odudu esie afiak ọnọ uwem. Nte ini akakade, Jehovah ama ọnọ n̄ko Elisha, Jesus, Paul, ye Peter odudu ndinam mme akpan̄kpa ẹfiak ẹdidu uwem. Nte ededi, mbon oro ẹkenamde ẹset ẹma ẹfiak ẹkpan̄a. Kpa ye oro, mme utọ mbụk Bible oro ẹnọ nnyịn utịbe utịbe idotenyịn ẹban̄a se iditịbede ke ini iso.

²² Ke Paradise, Jesus ayanam utom esie nte “ediset ye uwem.” (John 11:25) Enye ayanam anana-ibat miliọn owo ẹset, ọnọde mmọ ifet edidu uwem nsinsi ke Paradise isọn̄. (John 5:28, 29) Kere ban̄a edifiak ndiana kiet emi nte mme ufan ye iman, oro n̄kpa akadian̄arede ke anyanini, ẹfatde kiet eken ẹnyụn̄ ẹnen̄erede ẹkop idatesịt! Ofụri ubonowo ẹyetoro Jehovah ẹban̄a odudu esie ndifiak nnam mme n̄kpọ ẹfọn.

23. Nso ikedi akakan edinam odudu Jehovah, ndien didie ke emi ọsọn̄ọ idotenyịn nnyịn kaban̄a ini iso?

²³ Jehovah ọnọ nsọn̄ọ oro mîkemeke ndikpu nte ke utọ idotenyịn oro edi akpanikọ. Ke ndiwụt odudu esie ke akakan usụn̄, enye ama anam Eyen esie, Jesus, eset ke n̄kpa nte okopodudu edibotn̄kpọ eke spirit, oro Jehovah ikpọn̄ okponde akan. Jesus oro ẹkenamde eset ama owụt ediwak ntiense idem. (1 Corinth 15:5, 6) Utọ uyarade oro ekpenyene ndidi se idem mbon eyịghe mîkemeke ndifan̄a. Jehovah enyene odudu ndifiak nnọ uwem.

24. Ntak emi nnyịn ikemede ndinyene mbuọtidem nte ke Jehovah ayanam mme akpan̄kpa ẹset, ndien nso idotenyịn ke nnyịn owo kiet kiet ikpowụt esịtekọm iban̄a?

²⁴ Jehovah inyeneke sụk odudu edifiak nnam mme akpan̄kpa ẹdidu uwem edi enye n̄ko enyene udọn̄ ndinam oro. Ẹma ẹnọ anam-akpanikọ owo oro Job odudu spirit nditịn̄ nte ke enen̄ede ọdọn̄ Jehovah ndinam mme akpan̄kpa ẹset. (Job 14:15) Nte oro inamke fi asan̄a ekpere Abasi nnyịn, emi enyenede ọkpọsọn̄ udọn̄ ndida odudu edifiak nnam mme n̄kpọ ẹfọn oro enye enyenede nnam n̄kpọ ke utọ ima ima usụn̄ oro? Nte ededi, ti ete, ke ediset ke n̄kpa edi ikpehe kiet kpọt ke akwa utom edifiak nnam mme n̄kpọ ẹfọn oro Jehovah edinamde ke ini iso. Nte afo etịmde asan̄a ekpere enye, ka iso wụt esịtekọm ban̄a ọsọn̄urua idotenyịn oro nte ke afo oyodu do ndikụt Jehovah “[anamde] kpukpru n̄kpọ ẹdi mbufa.”—Ediyarade 21:5.

[Mme Ikọ idakisọn̄]

Mme Mbụme Nditie N̄kere

2 Ndidem 5:1-15 Ke ntak nsụhọdeidem esie, didie ke owo kiet ke ini Bible ọkọbọ ufọn oto odudu oro Jehovah enyenede ndinam mme n̄kpọ ẹtọn̄ọ ntak ẹfọn?

Job 14:12-15 Nso mbuọtidem ke Job ekenyene, ndien didie ke mme ufan̄ikọ emi ẹkeme nditụk idotenyịn nnyịn kaban̄a ini iso?

Psalm 126:1-6 Nso ekikere ke mme Christian ẹkpenyene mfịn ẹban̄a edifiak n̄wụk edisana utuakibuot ye ebuana mmọ ke enye?

Rome 4:16-25 Ntak emi edide akpan n̄kpọ ndinyene mbuọtidem ke odudu Jehovah ndinam mme n̄kpọ ẹtọn̄ọ ntak ẹfọn?

[Ndise ke page 85]

“Sese, eyen fo ke odu uwem”!