Ibuot Duopeta
Akwa Otuowo ke Iso Ebekpo Jehovah
1. (a) Nso ke ana mme asan̄autom Abasi emi ẹkedude uwem mbemiso eyo mme Christian m̀mê 144,000 ẹtabi mbemiso ẹbọde utịp mmọ? (b) Nso idikeme nditịbe nnọ “akwa otu owo” emi ẹdude uwem idahaemi?
MME anam-akpanikọ asan̄autom Abasi, ọtọn̄ọde ke Abel tutu esịm John Andinịm Owo Baptism, ẹma ẹnịm edinam uduak Abasi akpa ke uwem mmọ. Edi, kpukpru mmọ ẹma ẹkpan̄a, ẹbetde ediset ke n̄kpa ndụk uwem ke isọn̄ ke obufa ererimbot Abasi. Ana owo 144,000, emi ẹdikarade ye Christ ke Obio Ubọn̄ Abasi eke heaven ẹkpan̄a n̄ko mbemiso mmọ ẹkemede ndibọ utịp mmọ. Nte ededi, Ediyarade 7:9 owụt ete ke ukperedem ini emi, “akwa otu owo” emi ẹtode ke kpukpru idụt ẹyedu, emi mîditabike n̄kpa edi ẹdikemede ndidu uwem ke nsinsi ke isọn̄. Nte afo emesịne ke otu mmọ?
Ndidiọn̄ọ Akwa Otuowo Oro
2. Nso ikada ikesịm edinyene in̄wan̄-in̄wan̄ ifiọk mban̄a se ẹdade ẹdiọn̄ọ akwa otuowo eke Ediyarade 7:9?
2 Ke isua 1923, mme asan̄autom Jehovah ẹma ẹfiọk ẹte ke “mme erọn̄” eke n̄ke Jesus oro ẹkụtde ke Matthew 25:31-46 ye “mme erọn̄ en̄wen” emi enye eketịn̄de aban̄a nte ẹwetde ke John 10:16 ẹdi mme owo oro ẹdinyenede ifet edidu uwem ke nsinsi ke isọn̄. Ke isua 1931 ẹma ẹkụt mbon oro ẹketịn̄de ẹban̄a ke Ezekiel 9:1-11 nte ẹnịmde idiọn̄ọ ke ọkpọiso mmọ n̄ko nte ẹdide mbon oro ẹnyenede idotenyịn eke isọn̄. Ekem ke isua 1935 ẹma ẹfiọk nte ke akwa otuowo ẹdi ubak erọn̄ en̄wen oro Jesus eketịn̄de aban̄a. Mfịn, akwa otuowo oro ẹnen̄erede ẹma ẹmewak ẹsịm ediwak miliọn.
3. Ntak emi ikọ oro ‘ndida ke iso ebekpo’ mîtịn̄ke iban̄a otu eke heaven?
3 Ke Ediyarade 7:9, owo ikwe akwa otuowo nte ẹdude ke heaven. Iyomke mmọ ẹdu ke heaven man “ẹda ke iso ebekpo” Abasi. Nte an̄wan̄ade, mmọ ẹdu ke iso Abasi. (Psalm 11:4) Ẹwụt nte ke akwa otuowo, “eke baba owo kiet mîkemeke ndibat,” idịghe otu eke heaven ebe ke ndimen ibat esie emi owo mîsiakke ndomo ye se ẹwetde ke Ediyarade 7:4-8 ye Ediyarade 14:1-4. Do ẹwụt nte ke ibat oro ẹmende ke isọn̄ ẹdọk ke heaven edi 144,000.
4. (a) Nso idi “akwa ukụt” oro akwa otuowo ẹbọhọde? (b) Nte ẹwetde ke Ediyarade 7:11, 12, mmanie ẹkụt akwa otuowo ẹnyụn̄ ẹbuana ye mmọ ke utuakibuot?
4 Ediyarade 7:14 etịn̄ aban̄a akwa otuowo ete: “Mmọ oro ẹdi mmọ emi ẹketode ke akwa ukụt ẹwọn̄ọ.” Mmọ ẹbọhọ ndiọkn̄kan afanikọn̄ oro akanam ubonowo osobode. (Matthew 24:21) Ke ini mmọ ẹtorode Abasi ye Christ ke esịtekọm ẹban̄a edinyan̄a mmọ, kpukpru mme anam-akpanikọ edibotn̄kpọ eke heaven ẹyediana kiet ye mmọ ke ndidọhọ ete: “Amen; yak edidiọn̄, ye ubọn̄, ye ifiọk, ye ekọm, ye ukpono ye odudu, ye ukeme, ẹnyene Abasi nnyịn ke nsinsi-nsinsi. Amen.”—Ediyarade 7:11, 12.
Ndiwụt ke Imodot
5. Didie ke nnyịn ikeme ndibiere se ẹyomde man owo edi ubak akwa otuowo?
5 Ẹdinịm akwa otuowo uwem ẹbe akwa ukụt ke n̄kemuyo ye ndinen idaha Jehovah. Bible etịn̄ in̄wan̄-in̄wan̄ aban̄a mme edu oro ẹnamde ẹdiọn̄ọ mbon oro ẹdinyan̄ade. Ntem, mme andima edinen ido ẹkeme ndinam n̄kpọ idahaemi ye ekikere ndiwụt nte ke mmimọ imodot ndibọhọ. Nso ke ana mmọ emi ẹnam?
6. Ntak emi ẹkemede ndimen akwa otuowo nte enende ndomo ye mme erọn̄?
6 Mme erọn̄ ẹsitie ifụre ifụre ẹnyụn̄ ẹsụk ibuot. Ntre ke ini Jesus ọkọdọhọde ete ke imọ imenyene mme erọn̄ en̄wen oro mîkesịneke ke otu eke heaven oro, enye eketịn̄ aban̄a mme owo oro mîdiyomke ndidu uwem ke nsinsi ke isọn̄ kpọt edi n̄ko ẹdisụkde ibuot ẹnọ mme ukpepn̄kpọ esie. Enye ọkọdọhọ ete: “Mme erọn̄ Mi ẹkop Mi uyo, Ami mmonyụn̄ mfiọk mmọ, mmọ ẹnyụn̄ ẹtiene Mi.” (John 10:16, 27) Mmọ emi ẹdi mme owo oro ẹnen̄erede ẹkpan̄ utọn̄ ndien ke n̄kopitem ẹnamde se Jesus ọdọhọde, ẹkabarede ẹdi mme mbet esie.
7. Nso mme edu ke oyom mme anditiene Jesus ẹkọri?
7 Nso mme edu efen ke ẹdiyom mme anditiene Jesus emi kiet kiet ẹkọri? Ikọ Abasi ọbọrọ ete: “Ẹsio akani owo ẹduọk, emi ekemde ye ido uwem mbufo ke eyo oko, . . . ẹnyụn̄ ẹmen obufa owo ẹsịne, emi ẹbotde ebiet Abasi ke edinen ido ye edisana ido akpanikọ.” (Ephesus 4:22-24) Mmọ ẹkọri mme edu oro ẹtịpde ẹsịn ke edidianakiet mme asan̄autom Abasi—“ima, ye idatesịt, ye emem, ye ime, ye mfọnido, ye eti ido, ye edinam akpanikọ, ye ifụre ifụre ido, ye mfara ke idem.”—Galatia 5:22, 23.
8. Nso ke akwa otuowo ẹdisobo nte mmọ ẹnọde nsụhọ ibetedem?
8 Akwa otuowo ẹnọ ekpri ibat mbon oro ẹnyenede idotenyịn eke heaven ibetedem, emi ẹdade usụn̄ ke utom ukwọrọikọ. (Matthew 24:14; 25:40) Mme erọn̄ en̄wen ẹnọ ibetedem emi, okposụkedi mmọ ẹfiọkde ẹte ke mmimọ iyosobo ubiọn̄ọ koro ke ntọn̄ọ ukperedem ini emi, Christ Jesus ye mme angel esie ẹma ẹsion̄o Satan ye mme demon esie ẹfep ke heaven. Emi ọkọwọrọ “mbọm isọn̄ . . . Koro andidori ikọt Abasi ikọ ama osụhọde etiene mbufo; Enye asan̄a ye akwa ifụtesịt, sia enye ọdiọn̄ọde ete ini imọ edi ibio.” (Ediyarade 12:7-12) Ntem, Satan anam ubiọn̄ọ mme asan̄autom Abasi ọsọn̄ ubọk nte utịt editịm n̄kpọ emi asan̄ade ekpere.
9. Didie ke mme asan̄autom Abasi ẹkụt unen ke ndikwọrọ eti mbụk, ndien ntak-a?
9 Kpa ye ibak ibak ukọbọ, utom ukwọrọikọ ke aka iso ndikọri. Ọtọn̄ọde ke ibat ibat tọsịn mme andikwọrọ Obio Ubọn̄ ke utịt Ekọn̄ Ererimbot I, mmọ idahaemi ẹsịm ediwak miliọn, koro Jehovah ọkọn̄wọn̄ọde ete: “Baba n̄kpọ ekọn̄ kiet eke ẹbotde ẹban̄a fi idikwe unen.” (Isaiah 54:17) Idem andibuana ke akwa esop mme Jew ama ọfiọk ete ke owo ikemeke ndiwụri utom Abasi. Enye ama asian mme Pharisee ke akpa isua ikie aban̄a mme mbet ete: “Ẹsana mmọ ẹyak: koro edieke odu emi m̀mê utom emi otode owo, oyowụre: edi edieke otode Abasi, mbufo idikemeke ndiwụri mmọ; mbak m̀mê mbufo ẹdiyoho idem nte ẹn̄wanade ye Abasi.”—Utom 5:38, 39.
10. (a) Nso ke “idiọn̄ọ oro” ẹnịmde akwa otuowo ọwọrọ? (b) Didie ke mme asan̄autom Abasi ẹnam “uyo . . . otode ke heaven”?
10 Ẹwụt akwa otuowo oro nte mbon oro ẹnịmde idiọn̄ọ ẹnọ ubọhọ. (Ezekiel 9:4-6) “Idiọn̄ọ oro” edi uyarade nte ke mmọ ẹyak idem ẹnọ Jehovah, ẹna baptism nte mme mbet Jesus, ẹnyụn̄ ẹbuana ke ndikọri mbiet edu Christ. Mmọ ẹnam “uyo . . . otode ke heaven” oro etịn̄de aban̄a ukara ofụri ererimbot Satan eke nsunsu ido ukpono ete: “Mbufo ikọt Mi, ẹwọn̄ọ ke esịt, mbak mbufo ẹdibuana ke idiọk-n̄kpọ esie, ẹdinyụn̄ ẹtiene ẹbọ mme ufen esie.”—Ediyarade 18:1-5.
11. Ke ewe akpan usụn̄ ke akwa otuowo ẹwụt ke mmimọ idi mme asan̄autom Jehovah?
11 N̄ko, Jesus ọkọdọhọ mme anditiene enye ete: “Mbufo ẹma ẹma kiet eken, kpukpru owo ẹyeda oro ẹfiọk ẹte mbufo ẹdi mbet Mi.” (John 13:35) Ke edide isio ye oro, mme andibuana ke mme ido ukpono ererimbot emi ẹsiwot mme andibuana efen ke ekọn̄, emi esiwak ndidi n̄kukụre koro mmọ ẹtode isio isio idụt! Ikọ Abasi ọdọhọ ete: “Ẹda emi ẹyarade ẹfiọk nditọ Abasi ye nditọ Satan; baba owo kiet eke mînamke edinen ido idịghe eke Abasi, ndien edi ntre ye owo emi mîmaha eyen-ete esie. . . . Nnyịn ikpama kiet eken; ikûbiet Cain, emi ekedide eke andidiọk, onyụn̄ owotde eyen-ete esie.”—1 John 3:10-12.
12. Ke akwa ukụt, didie ke Jehovah edinam n̄kpọ ye mme “eto” ido ukpono emi ẹsion̄ode idiọk mfri?
12 Jesus ọkọdọhọ ete: “Kpukpru eti eto ẹn̄wụm eti mfri; edi mbiara eto on̄wụm idiọk mfri. Eti eto ikemeke ndin̄wụm idiọk mfri, mbiara eto inyụn̄ ikemeke ndin̄wụm eti mfri. Ẹkpi kpukpru eto eke mîn̄wụmke eti mfri ẹduọk, ẹmen, ẹtop, ẹsịn ke ikan̄. Ntre ke mbufo ẹdida mfri mmọ ẹfiọk mmọ.” (Matthew 7:17-20) Mfri oro mme ido ukpono ererimbot emi ẹsion̄ode anam ẹdiọn̄ọ mmọ nte mme mbiara “eto,” emi Jehovah edisobode ifep ke mîbịghike, ke akwa ukụt.—Ediyarade 17:16.
13. Didie ke akwa otuowo ẹwụt ẹte ke mmimọ ‘ida ke iso ebekpo’ Jehovah ke edidianakiet?
13 Ediyarade 7:9-15 odụri ntịn̄enyịn owụt mme n̄kpọ oro ẹdade ẹsịm edinịm akwa otuowo uwem. Ẹwụt mmọ nte “ẹdade ke iso ebekpo” Jehovah ke edidianakiet, ẹnọde itie edikara ofụri ekondo esie ibetedem. Mmọ ‘ẹmeyet ọfọn̄idem mmọ ẹnam afia ke iyịp Eyen-erọn̄,’ owụtde ete ke mmọ ẹnyịme uwa Jesus kaban̄a usio-isop idiọkn̄kpọ. (John 1:29) Mmọ ẹmeyak idemmọ ẹnọ Abasi ẹmenyụn̄ ẹwụt emi ebe ke ndibụhọ ke mmọn̄. Ntre mmọ ẹnyene edisana idaha ke iso Abasi, emi mfia ọfọn̄idem ẹdade ẹban̄a, ẹnyụn̄ ẹnam “n̄kpọ” ẹnọ enye “uwemeyo ye okoneyo.” Nte mme usụn̄ ẹdu emi afo ekemede ndinam uwem fo odu ke n̄kemuyo ata ọyọhọ ọyọhọ ye se ẹtịn̄de ẹban̄a mi?
Mme Ufọn Idahaemi
14. Nso idi ndusụk ke otu n̄wọrọnda ufọn oro mme asan̄autom Jehovah ẹnyenede idem idahaemi?
14 Eyedi afo omokụt mme n̄wọrọnda ufọn emi mbon oro ẹnamde n̄kpọ ẹnọ Jehovah ẹnyenede idem idahaemi. Nte uwụtn̄kpọ, ke ini afo ekekpepde n̄kpọ aban̄a ndinen uduak Jehovah, afo ama ọfiọk ete ke nyayama idotenyịn odu ke ini iso. Ntre idahaemi afo emenyene ata uduak ke uwem—ndinam n̄kpọ nnọ ata Abasi ye idara idara idotenyịn nsinsi uwem ke paradise isọn̄. Ih, Edidem Jesus Christ ‘ayada akwa otu owo aka ke idịm mmọn̄ uwem.’—Ediyarade 7:17.
15. Didie ke Mme Ntiense Jehovah ẹbọ ufọn ke ndisọn̄ọ nyịre ke mme edumbet Bible ke mme n̄kpọ ẹban̄ade ukaraidem ye ido uwem?
15 Utịbe utịbe ufọn emi akwa otuowo ẹnyenede edi ima, edidianakiet, ye n̄kemuyo emi ẹkụtde ke otu mme asan̄autom Jehovah ke ofụri isọn̄. Sia kpukpru nnyịn idiade ukem udia eke spirit, kpukpru nnyịn inịm ukem mbet ye mme edumbet oro ẹkụtde ke Ikọ Abasi. Ntak edi oro mme ekikere ukaraidem m̀mê eke idụt mîbahakede nnyịn. N̄ko, nnyịn isọn̄ọ inyene mme n̄kokon̄ idaha ido uwem emi Abasi oyomde oto ikọt esie. (1 Corinth 6:9-11) Ntem, utu ke ndisobo en̄wan, unana edidianakiet, ye oburobụt ido emi ọyọhọde ke ererimbot, ikọt Jehovah ẹnyene se ẹkemede ndikot paradise eke spirit. Tịm fiọk nte ẹtịn̄de ẹban̄a emi ke Isaiah 65:13, 14.
16. Kpa ye mme mfịna oro ẹdide ọsọ n̄kpọ ke uwem, nso idotenyịn ke akwa otuowo ẹnyene?
16 Baba, mme asan̄autom Jehovah idịghe mfọnmma owo. Ndien mme mfịna oro ẹdide ọsọ n̄kpọ ke uwem ererimbot emi ẹsitụk mmọ, utọ nte edisobo nsọn̄ọn̄kpọ m̀mê ndikabade ndi mbon unọmọ oro mîduehe ke mme ekọn̄ eke mme idụt. Mmọ n̄ko ẹsobo udọn̄ọ, ndutụhọ, ye n̄kpa. Edi mmọ ẹnyene mbuọtidem nte ke obufa ererimbot, Abasi “ọyọkwọhọde kpukpru mmọn̄eyet ke enyịn mmọ efep. N̄kpa idinyụn̄ idụhe aba; eseme ye ntuan̄a ye ubiak idinyụn̄ idụhe aba.”—Ediyarade 21:4.
17. Inamke n̄kpọ m̀mê nso ikeme nditịbe nnọ nnyịn idahaemi, nso utịbe utịbe ini iso idu inọ mbon oro ẹkponode ata Abasi?
17 Idem edieke afo akpade idahaemi ke ntak usọn̄, udọn̄ọ, mbabuat n̄kpọntịbe, m̀mê ukọbọ, Jehovah ayanam fi eset edidu uwem ke Paradise. (Utom 24:15) Adan̄aoro afo ayaka iso ndidia udia eke spirit ke Tọsịn Isua Ukara Christ. Ima oro afo enyenede ọnọ Abasi oyotụn̄ọ nte afo okụtde mme uduak esie ẹnen̄erede ẹsu. Ndien mme edidiọn̄ eke obụk oro Jehovah edinọde adan̄aoro ayaka iso ndinam ima oro afo enyenede ọnọ enye okpon. (Isaiah 25:6-9) Nso utịbe utịbe ini iso odu ntem ọnọ ikọt Abasi!
Nneme Ndụn̄ọde
• Nso n̄wọrọnda n̄kpọntịbe ke Bible abuan akwa otuowo?
• Nso ke ana nnyịn inam idahaemi edieke nnyịn inen̄erede iyom ndisịne ke otu akwa otuowo oro ẹkụtde mfọn Abasi?
• Didie ke mme edidiọn̄ oro akwa otuowo ẹnyenede idahaemi ẹdinyụn̄ ẹnyenede ke mîbịghike ke obufa ererimbot Abasi ẹdi akpan n̄kpọ ẹnọ fi?
[Ndise ke page 123]
Ediwak miliọn akwa otuowo ẹtuak ibuot ẹnọ ata Abasi ke edidianakiet