Akpanikọ Aban̄ade Mme Angel

Ndikabade mmehe ye owo esiwak ndisịne edifiọk n̄kpọ mban̄a ubon owo oro. Ukem oro ke edi ye edidi ndifiọk Jehovah Abasi. Abuana n̄kpọ akan ikpîkpu edidiọn̄ọ enyịn̄ esie. Ana nnyịn n̄ko idifiọk n̄kpọ iban̄a “ubon” esie eke heaven. (Men Ephesus 3:14, 15 domo.) Bible okot mme angel “nditọ” Abasi. (Job 1:6) Ke ikerede iban̄a akpan utom mmọ ke Bible, nnyịn ikpenyene ndiyom ndifiọk n̄kpọ efen efen mban̄a mmọ man idiọn̄ọ itie oro mmọ ẹnyenede ke uduak Abasi.

OBUFA n̄kaowo ke asiaha edi. Ikụreke ke ediwak owo ndidọhọ ke imonịm mme angel ke akpanikọ; ibat owo oro ẹkade-kaiso ndikọri ke ẹdọhọ ke mmọ ẹtụk uwem mmimọ ke ndusụk usụn̄. Ke ini ẹkebụpde mbon America 500 ẹte, “Ndi akanam mbufo ẹmekere ke mme angel ẹnyene itie ke uwem mbufo?” ekpere ndidi mbahade kiet ke itie ita ẹkebọrọ ih. Ke edide n̄kpọ n̄kpaidem n̄ko edi ibat mme uyen ẹmi ẹdọhọde ke imonịm mme angel ke akpanikọ—nte ekemde ye ndụn̄ọde kiet ẹkenamde ke United States, n̄kem n̄kem mbahade 76 eke ikie! Nte an̄wan̄ade, mme owo ẹnyene udọn̄ ke mme angel. Edi didie ke ekikere eke ndondo emi aban̄ade mme angel asan̄a ekekem ye akpanikọ Bible?

Ndisụhọde Odudu Utom Emi Satan Anamde

Ke ini itịn̄de iban̄a mme angel, nnyịn ikpenyeneke ndifụmi ndiọi angel, mme edibotn̄kpọ eke heaven ẹmi Bible ọdọhọde nte ẹkesọn̄de ibuot ye Abasi. Akpa ke otu mmọemi edi Satan. Ọwọrọetop n̄wed kiet ẹkotde Ask Your Angel ọnọ ekikere nte ke Satan akam edi “ubak Abasi” emi an̄wamde ndinam “esịp eke spirit” mme owo ẹsọn̄ idem ebe ke n̄kaiso idomo. Ewetn̄wed oro ọdọhọ ete, kpa ye “ima ima uduak” Satan, ke ofụri ediwak isua ikie ẹmi ẹdiọn̄ọ enye ke ndudue ye n̄kpọ emi edide idiọkn̄kpọ. Mmọ ẹdian do ẹte ke Satan ye Jesus, “ke adan̄aemi mînamke kiet eken ekem ata nnennen, ẹnyene ukem uduak ke nsụhọde n̄kaha, ẹdi mme akpan ubak ukem owo kiet.” Ẹmi ẹdi mme ikọ ẹkpade owo idem, edi nso ke Bible ọdọhọ?

Bible anam an̄wan̄a nte ke Satan idịghe “ubak Abasi” edi edi asua Abasi. (Luke 10:18, 19; Rome 16:20) Enye ọsọn̄ ibuot ye itie edikara Jehovah ndien ọsọsọn̄ mme uduak esie kaban̄a mme owo ndidi “ima ima.” Enye ke isọn̄esịt an̄wan̄a iyatesịt esie ofụk mme asan̄autom Abasi eke isọn̄. Enye odori mmọ ikọ uwemeyo ye okoneyo!a (Ediyarade 12:10, 12, 15-17) Uduak Satan edi ndibiat mmọ inamke n̄kpọ m̀mê nso ke edikpa. Enye ndikọsọn̄ esịt n̄kọbọ edinen owo oro Job ama ayarade edu unana esịtmbọm esie kaban̄a ndutụhọ owo.—Job 1:13-19; 2:7, 8.

Utu ke ‘ndinyene ukem uduak,’ Satan ye Jesus ẹdu ke ata ntuaha ye kiet eken. Kamse, nte eyịghe mîdụhe edi Satan akanam Herod owụk ewụhọ uwot kpukpru nseknditọ—kpukpru emi ke ukeme ndiwot ekpri eyen oro Jesus! (Matthew 2:16-18) Ndien uyịre uyịre en̄wan Satan ama akaiso tutu ke n̄kpa Jesus. (Luke 4:1-13; John 13:27) Ntem, utu ke ndidi “mme akpan ubak ukem owo kiet,” Jesus ye Satan ẹdi ata isio isio. Prọfesi Bible owụt ete ke usua mmọ edi se owo mîkemeke ndibiọn̄ọ (Genesis 3:15) Nte odotde, edi Jesus emi ẹma ẹkenam ẹset edisobo Satan ke edikem ini Abasi.—Ediyarade 1:18; 20:1, 10.

Ndibọn̄ Akam Nnọ Anie?

Ndusụk mbon oro ẹdade ẹnọ n̄ka mme angel ẹtoro editie n̄kere ye mme usụn̄ unam n̄kpọ eken man ẹnyene nneme ye mme angel. “Owo idifụmike eben̄e ofụri esịt emi ẹnamde man ẹsobo ye owo kiet ekededi ke otu mme andibuana ke ubon enyọn̄,” ntre ke n̄wed kiet ọdọhọ. “Ben̄e ndien ẹyebọrọ fi.” Michael, Gabriel, Uriel, ye Raphael ẹsịne ke otu mme angel ẹmi n̄wed oro otorode ete ẹka ẹbịne.b

Nte ededi, Jesus ekekpep mme anditiene enye ndibọn̄ akam nnọ Abasi, idịghe mme angel. (Matthew 6:9, 10) Ukem ntre, Paul ama ewet ete: “Ke kpukpru n̄kpọ, ẹsan̄a ye akam ye n̄kpeubọk ye ekọm, ẹsian Abasi se mbufo ẹyomde.” (Philippi 4:6, sịghisịghi ubọkn̄wed edi eke nnyịn.) Ke akam mmọ, ke ntre, mme Christian ibọn̄ke akam inọ owo ekededi ibọhọke Jehovah, ndien mmọ ẹnam oro ke enyịn̄ Jesus Christ.c—John 14:6, 13, 14.

Ndi Mme Angel Ẹdi eke Ofụri Ido Ukpono?

Nte Eileen Elias Freeman, emi adade usụn̄ ke AngelWatch Network, ọdọhọde, “mme angel ẹkan kpukpru ido ukpono, kpukpru ukpepn̄kpọ akwaifiọk, kpukpru se ẹnịmde ke akpanikọ. Ke akpanikọ, mme angel nte nnyịn ifiọkde inyeneke ido ukpono.”

Nte ededi, Bible anam an̄wan̄a ete ke mme anam-akpanikọ angel ẹnyene ido ukpono; mmọ ẹtuak ibuot ẹnọ ata Abasi, Jehovah, emi mîyọhọ ndomoidem otode mme abasi eken. (Deuteronomy 5:6, 7; Ediyarade 7:11) Ntem, utọ angel oro ọkọdọhọ apostle John ke imọ idi “ekemmọ asan̄autom” ke otu mmọemi ẹnịmde mme ewụhọ Abasi. (Ediyarade 19:10, NW) Idụhe ebiet ndomokiet ke Bible emi nnyịn ikotde iban̄a mme anam-akpanikọ angel nte ẹdude ke orụk utuakibuot efen. Mmọ ẹnọ Jehovah san̄asan̄a utuakibuot.—Exodus 20:4, 5.

“Ete Nsu”

Ediwak n̄kpọntịbe oro ẹdọhọde nte edide edisobo ye mme angel ẹbuana ẹdinyene nneme ye mme akpan̄kpa. “Eketie mi ke idem nte ke eyeneka ete mi ama okụt usụn̄ ndinyene nneme ye ami nnyụn̄ nnam mi mfiọk nte ke imọ ima ikop inemesịt ke akpatre,” ntre ke n̄wan kiet emi ekerede Elise eketịn̄ ke enye ama ọkọbọ se enye ekekerede ke edi idiọn̄ọ. Ukem ntre Terri ama eti edima ufan emi akakpade. Enye ọdọhọ ete: “Urua kiet ke ẹma ẹkebụk . . . , enye ama edi ebịne mi ke idaha oro n̄kekerede ke edi ndap. Enye ama ọdọhọ n̄kûfụhọ mban̄a edikpọn̄ oro imọ ikpọn̄de, koro imọ idude ke inemesịt ye ke emem.”

Edi Bible ọdọhọ ete ke mme akpan̄kpa “ifiọkke baba n̄kpọ kiet.” (Ecclesiastes 9:5) Enye n̄ko ọdọhọ ete ke ini owo akpade, “ke kpasụk usen oro mme uduak esie ẹtak.” (Psalm 146:4) Nte ededi, Satan edi “ete nsu.” (John 8:44) Enye edi owo emi ọkọtọn̄ọde nsu oro nte ke ukpọn̄ owo esika iso odu uwem ke ẹma ẹkekpa. (Men Ezekiel 18:4 domo.) Ediwak owo mfịn ẹnịm emi ke akpanikọ, emi ekemde ye uduak Satan, koro enye anam ufọn ndinyene mbuọtidem ke ediset ke n̄kpa idụhe—kpa akpan ukpepn̄kpọ Ido Ukpono Christ. (John 5:28, 29) Ntre, ediyom ntọt nto mme akpan̄kpa m̀mê ndinam etie nte ẹbọ etop ẹto mmọ edi kpa ikpehe n̄ka mme angel en̄wen emi mînyeneke unyịme Abasi.

Usụn̄ Ndisịm Mme Angel m̀mê Mme Demon?

Ekese n̄ka mme angel eke ndondo emi ẹsisịn idem ke ndedịbe odudu. Kere ban̄a ifiọk n̄kpọntịbe Marcia. Enye ọdọhọ ete: “Ọtọn̄ọde ke September tutu osịm December 1986, mma ntọn̄ọ ndibọ mme etop nto ‘mbon ẹmi ẹkande odudu owo.’ Mma nsikụt mme ekpo nnyụn̄ ndaba ndiọi ndap mban̄a ‘uwem ini edem.’ Mma nsisobo ye mme ufan ẹmi ẹkekpan̄ade nnyụn̄ nnyene ediwak ifiọk n̄kpọntịbe eken ẹban̄ade obio mme spirit ẹmi ẹkenamde mfiọk mme n̄kpọ mban̄a mme owo ẹmi ẹdide akpa edisobo ekedi oro. Ẹma ẹdiọn̄ mi n̄ko ye enọ uwet n̄kpọ ye edibọ mme etop nto obio spirit. Ndusụk owo ẹmi akananam mmesoboke nte ẹdude uwem ke isọn̄ ẹma ẹsinọ mi etop nda nsọk mbon en̄wen.”

Edi ọsọ n̄kpọ ndida ubreidiọn̄ nte usụn̄ “ndinyene nneme” ye mme angel. N̄wed kiet esịn udọn̄ in̄wan̄în̄wan̄ ọnọ mme andikot enye ẹte ẹda mme itiat mfọni, mme kad ubreidiọn̄, okụk I Ching, idiọn̄ ekaubọk, ye edisiak ntantaọfiọn̄. Mme ewetn̄wed oro ẹwet ẹte: “Yak udọn̄ esịtidem fo ada fi usụn̄ aka nnennen itie idiọn̄, nyụn̄ nịm ke akpanikọ nte ke angel eyesobo fi do.”

Nte ededi, nte ekemde ye Bible, se ededi oro ‘osobode fi do’ ke akpanikọ idịghe kiet ke otu mme angel Abasi. Ntak-a? Koro ubreidiọn̄ atuaha in̄wan̄în̄wan̄ ye Abasi, ndien mme ata andituak ibuot—ke heaven ye ke isọn̄—inyeneke n̄kpọ ndomokiet ndinam ye oro. Kamse, ke Israel ubreidiọn̄ ekedi idiọkn̄kpọ adade n̄kpa edi! Ibet ọkọdọhọ ete: “Jehovah [ese] kpukpru mmọ eke ẹnamde n̄kpọ ẹmi ke mbubiam.”—Deuteronomy 13:1-5; 18:10-12.

“Angel Un̄wana”

Ikpanaha akpa nnyịn idem nte ke Devil ekeme ndinam ubreidiọn̄ etie nte se inọde ufọn, idem etie nte oto mme angel. Bible ọdọhọ ete ke Satan “ke oforo angel un̄wana.” (2 Corinth 11:14) Enye ekeme nditịbi mme utịbe utịbe n̄kpọntịbe edi ndien ekem anam mmọ ẹsu, anamde mme andida nse ẹkere ke n̄kpọntịbe emi oto Abasi. (Men Matthew 7:21-23; 2 Thessalonica 2:9-12 domo.) Edi kpukpru utom Satan—inamke n̄kpọ m̀mê mmọ ẹtie nte ẹfọnde m̀mê ẹdiọkde adan̄a didie—ẹnyene kiet ke otu uduak iba: ndiwọn̄ọde mme owo n̄kpọn̄ Jehovah m̀mê ndinam ikike mmọ okịm mbak ‘un̄wana gospel ubọn̄ Christ edisem ọnọ mmọ.’ (2 Corinth 4:3, 4) Akpatre usụn̄ abian̄a emi esiwak ndinyene uforo n̄kan.

Kere ban̄a mbụk Bible oro aban̄ade eyenan̄wan kiet ke akpa isua ikie. Idiọn̄ esie ama esikọ ediwak okụk ọnọ mme eteufọk esie. Ke ediwak usen enye ama etiene mme mbet, ofioride ete: “Mmọ ẹmi ẹdi ikọt Abasi Andikon̄-n̄kan, ẹmi ẹkwọrọde usụn̄ edinyan̄a ẹnọ mbufo.” Ikọ esie ẹkedi akpanikọ. Edi, mbụk oro asian nnyịn nte ke enye ikenyeneke angel, edi ekenyene “spirit idiọn̄.” Ekem, Paul ama “ọwọn̄ọde ọdọhọ spirit oro ete, Mmowụk fi ke enyịn̄ Jesus Christ nte ọwọrọ enye ke idem. Ndien spirit ọwọrọ kpa ke ini oro.”—Utom 16:16-18.

Ntak Paul ekebịnde spirit emi? Kamse, enye ama anam mme eteufọk eyenan̄wan emi ekenyenede demon mi ẹnyene ediwak okụk. Ye mme odudu oro ẹkande eke owo, eyedi eyenan̄wan oro ama esisian mme ọtọin̄wan̄ ini nditọ n̄kpọ, n̄kaiferi iban ini ndidọ ndọ, mme ọdọk isọn̄ nyom n̄kpọuto ebiet ndikụt gold. Kamse, spirit emi ama akam onụk eyenan̄wan emi nditịn̄ ndusụk ikọ akpanikọ, otorode mme mbet an̄wan̄wa!

Edi, enye ekedi “spirit idiọn̄.” Ke ntre, enye ikenyeneke unen ndomokiet nditan̄a mban̄a Jehovah ye ndutịm esie kaban̄a edinyan̄a. Ikọ itoro esie, iso-ọfọn eketịn̄de man anam ẹnịm idiọn̄ eyenan̄wan emi ke akpanikọ, ama ọwọn̄ọde ntịn̄enyịn mme andida nse ọkpọn̄ mme ata anditiene Christ. Ye eti ntak, Paul ama odụri mbon Corinth utọn̄ ete: “Mbufo ikemeke nditiene ndia n̄kpọ ke okpokoro Ọbọn̄, nnyụn̄ ndia ke okpokoro mme demon.” (1 Corinth 10:21) Idịghe n̄kpọ n̄kpaidem, mme Christian akpa isua ikie ẹma ẹbiat kpukpru n̄wed mmọ oro ẹkenyenede n̄kpọ ndinam ye ubreidiọn̄.—Utom 19:19.

‘Angel Emi Efede ke Ufọt Enyọn̄’

Nte nnyịn ima ikokụt, Bible ayarade ekese n̄ka angel eke ndondo emi nte otịmde enyene ebuana ye Asua Abasi, Satan kpa Devil. Ndi emi ọwọrọ nte ke ndisana angel inyeneke ebuana ke mme mbubehe owo? Ke edide isio ye oro, mmọ ke ẹnam okopodudu utom idahaemi ke isọn̄. Nso idi oro? Man ibọrọ, nnyịn inyene ndise n̄wed Ediyarade eke Bible. Ẹsiak mme angel ekese ini ke n̄wed emi ẹkan nte ẹsiakde ke n̄wed efen ekededi ke Bible.

Ke Ediyarade 14:6, 7, nnyịn ikot n̄wetnnịm n̄kpọ apostle John aban̄ade ntịn̄nnịm n̄kukụt emi enye ọkọbọde ete: “N̄kụt angel en̄wen efefe ke ufọt enyọn̄, emi enyenede nsinsi gospel ete ikwọrọ inọ mmọ ẹmi ẹdụn̄de ke isọn̄, ye kpukpru idụt ye esien ye usem ye obio; ndien enye ọdọhọ ke ọkpọsọn̄ uyo ete, Mbufo eten̄e Abasi, ẹnyụn̄ ẹnọ Enye ubọn̄; koro ekem ini ikpe Esie; ẹnyụn̄ ẹtuak ibuot ẹnọ Enye emi okobotde enyọn̄ ye isọn̄ ye inyan̄ ye idịm mmọn̄.”

Itien̄wed Abasi emi osio akakan utom emi mme angel ẹnamde mfịn owụt. Mmọ ẹbuana ke utom emi edide akpan n̄kpọ akan—eke editan̄a eti mbụk Obio Ubọn̄ Abasi. Utom emi akanam Jesus ọn̄wọn̄ọ ọnọ mme anditiene enye ete: “Ami ndodu ye mbufo kpukpru ini, tutu osịm utịt ererimbot.” (Matthew 28:18-20) Didie ke Jesus odu ye mme anditiene enye? Usụn̄ kiet edi ndinọ mmọ un̄wam otode mme angel man otodo ẹkeme ndikụre akwa utom emi.

Mme Ntiense Jehovah esibiat se iwakde ikan biliọn hour kiet kpukpru isua ke ndikwọrọ eti mbụk Obio Ubọn̄ Abasi. Ke adan̄aemi ẹnamde utom emi, mmọ ẹkụt uyarade ndausụn̄ otode mme angel. Ke utom ukwọrọikọ mmọ eke enyịnusụn̄ ke enyịnusụn̄, esiwak nditịbe nte ke mmọ ẹsisobo mbon ẹmi ẹkesụk ẹbọn̄de akam ẹyom owo emi edin̄wamde mmimọ ndifiọk mme uduak Abasi. Ndausụn̄ otode mme angel, ọkọrọ ye usio-ukot emi Mme Ntiense ẹnamde ke idemmọ, omosụn̄ọ ke ediwak tọsịn owo ke mme itie ikie ndinyene ifiọk aban̄ade Jehovah kpukpru isua!

Nte afo ke akpan̄ utọn̄ ọnọ angel emi efede ke ufọt enyọn̄? Ke ini emi Mme Ntiense Jehovah ẹwahade, ntak mûnemeke ye mmọ ata ọyọhọ ọyọhọ uban̄a etop mme angel emi?

[Mme Ikọ idakisọn̄]

[Ekebe ke page 8]

MMANIE ẸDI MME ANGEL?

KE EDIDE isio ye se ediwak owo ẹnịmde ke akpanikọ, mme angel idịghe ukpọn̄ ẹmi ẹkewọrọde ke idem mme owo ẹmi ẹkekpan̄ade. Bible etịn̄ in̄wan̄în̄wan̄ ete ke mme akpan̄kpa “ifiọkke baba n̄kpọ kiet.” (Ecclesiastes 9:⁠5) M̀mọ̀n̄, ndien, ke mme angel ẹketo? Bible owụt ete ke Abasi okobot mmọ owo kiet kiet mbemiso ọtọn̄ọde ndinam isọn̄. (Job 38:​4-⁠7) Udomo ubon Abasi eke heaven ekeme ndisịm ediwak miliọn ke mme itie ikie, ndusụk osịmde ediwak biliọn m̀mê awakde akan oro! Ndusụk angel ẹma ẹdiana ye Satan ke nsọn̄ibuot esie.​—⁠Daniel 7:10; Ediyarade 5:⁠11; 12:​7-⁠9.

Sia Jehovah edide Abasi ndutịm, idịghe n̄kpọ n̄kpaidem nte ke akamba ubon eke mme angel esie odu ke ndutịm.​—⁠1 Corinth 14:⁠33.

• Ebeiso ke otu mme angel, ke odudu ye ke ukara, edi akwa angel, Jesus Christ, emi n̄ko ẹkotde Michael. (1 Thessalonica 4:16; Jude 9) Mme seraph, mme cherub, ye mme angel ẹdu ke idak ukara esie.

• Mme seraph ẹnam utom ke ebekpo Abasi. Nte an̄wan̄ade utom mmọ abuana editan̄a edisana idaha Abasi nnyụn̄ nnam ikọt esie ẹsana.​—⁠Isaiah 6:​1-3, 6, 7.

• Ẹkụt mme cherub n̄ko ke iso Jehovah. Mmọ ẹmụm itie ubọn̄ Jehovah ẹkama, nte mme andibiom m̀mê mme andikpeme ebekpo Abasi.​—⁠Psalm 80:1; 99:1; Ezekiel 10:​1, 2.

• Mme angel (ẹmi ọwọrọde “mme asan̄autom”) ẹdi mme isụn̄utom Jehovah. Mmọ ẹnam uduak Abasi, edide enye edi edinyan̄a ikọt Abasi m̀mê edisobo ndiọi owo mfep.​—⁠Genesis 19:​1-⁠26.

[Mme ndise ke page 7]

Nte afo ke akpan̄ utọn̄ ọnọ angel emi efede ke ufọt enyọn̄?