Nte Afo Ọkpọkọfiọk Messiah?
JESUS CHRIST ama abiat isua ita ye ubak ọkwọrọ Ikọ Abasi ke otu nditọ Israel. Edi ke ini utom ukwọrọikọ esie ke isọn̄ ekesịmde utịt, n̄wakn̄kan ke otu mbon eyo esie ẹma ẹsịn enye nte Messiah, m̀mê “Enyeoro Ẹyetde Aran” oro Abasi ọkọn̄wọn̄ọde. Ntak-a?
Bible an̄wam nnyịn ndidiọn̄ọ ediwak ntak oro ẹkenamde mme Jew akpa isua ikie ẹtre ndinyịme Jesus nte Messiah. Ita ke otu ntak ẹmi ẹkpan ediwak owo ndinyịme idaha Jesus eke eyomfịn nte Edidem Messiah oro akarade.
“Nnyịn Iyom Ite Afo Owụt Nnyịn Idiọn̄ọ”
Ntak kiet oro akanamde mme Jew akpa isua ikie ẹtre ndidiọn̄ọ Messiah ekedi editre oro mmọ ẹketrede ndinyịme mme idiọn̄ọ N̄wed Abasi oro ẹkenyande ubọk ẹwụt itie esie nte Messiah. Ke idaha kiet, mme owo oro ẹkekpan̄de utọn̄ ẹnọ Jesus ẹma ẹyom ẹte enye anam idiọn̄ọ ndiwụt ke imọ ikoto Abasi. Ke uwụtn̄kpọ, Matthew 12:38 ọtọt ete ke ndusụk mme scribe ye mme Pharisee ẹma ẹdọhọ ẹte: “Andikpep, nnyịn iyom ite Afo owụt nnyịn idiọn̄ọ.” Nte Jesus ikowụtke-wụt mmọ mme idiọn̄ọ? Nte ededi enye ama owụt.
Etisịm ini oro Jesus ama ananam ediwak utịben̄kpọ. Enye ama anam mmọn̄ akabade edi wine, ama ọkọk eyen oro okoyomde ndikpa, ama ọkọk eka an̄wan Peter oro ọkọdọn̄ọde, ama anam akpamfia asana, ama anam eren emi ọkọdọn̄ọde akpauben̄ asan̄a, ama anam eren oro ọkọdọn̄ọde ke isua 38 afiak okop nsọn̄idem, ama anam ubọk eren oro akakpade akabade ọfọn, ama anam ediwak owo ẹbọhọ ikpọ udọn̄ọ mmọ, ama ọkọk ofụn akwa owoekọn̄ kiet, ama anam eyen ebeakpa kiet afiak odu uwem, ama onyụn̄ ọkọk eren oro ekedide nnan ye imụm. Mme utịben̄kpọ ẹmi ẹketịbe ke Cana, Capernaum, Jerusalem, ye Nain. Akan oro, mbụk ẹban̄ade mme utọ utịben̄kpọ ẹmi ẹma ẹsuana ke ofụri Judea ye n̄kann̄kụk idụt oro.—John 2:1-12; 4:46-54; Matthew 8:14-17; 8:1-4; 9:1-8; John 5:1-9; Matthew 12:9-14; Mark 3:7-12; Luke 7:1-10; 7:11-17; Matthew 12:22.
Nte an̄wan̄ade, mme idiọn̄ọ ikananake ndiwụt nte ke Jesus ekedi Messiah. Okposụkedi enye akanamde ata ediwak idiọn̄ọ ke iso mme owo oro, mmọ ikọbuọtke idem ke enye. Mbon oro ẹkekụtde uyarade nte ke Abasi okosio Jesus ọdọn̄ edi oro mîkenyịmeke enye nte Messiah ẹkedi nnan ke n̄kan̄ eke spirit. Esịt mmọ ama ọsọn̄ akpanikọ ikonyụn̄ ikemeke ndibe ndụk.—John 12:37-41.
Nso kaban̄a eyo nnyịn? Ndusụk owo ẹtan̄a ẹte, “Ami nsinịm se n̄kụtde ke enyịn mi kpọt.” Edi ndi oro enen̄ede edi usụn̄ eti ibuot? Prọfesi Bible owụt ete ke ẹma ẹdodori Jesus ke ebekpo nte Edidem eke heaven ke Obio Ubọn̄ Messiah. Sia enyịn mîkwe enye, nnyịn imoyom idiọn̄ọ ndin̄wam nnyịn ndidiọn̄ọ itie ukara esie, emi ekenịmde ntọn̄ọ ukperedem ini idiọk editịm n̄kpọ emi idiọn̄ọ. Nte afo ọmọfiọk idiọn̄ọ oro?—Matthew 24:3.
Nte Bible ọdọhọde, ekọn̄, unyekisọn̄, unana udia, ye ndiọi udọn̄ọ ke anana-mbiet udomo ẹkenịm ntọn̄ọ itie ukara Christ nte Edidem Messiah idiọn̄ọ. Ke “ukperedem ini,” edu ẹnịmde itie ebuana owo idiọn̄ọ ẹdi ibụk, idiọkitọn̄, ye unana ukpan. (2 Timothy 3:1-5; Matthew 24:6, 7; Luke 21:10, 11) Ke ẹsiode uyarade ubatini ẹfep, se iwakde ikan nsio nsio ikpehe 20 eke ukperedem ini ẹnyan ubọk ẹwụt ntọn̄ọ ukara Messiah ke 1914.—Se Enyọn̄-Ukpeme eke March 1, 1993, page 5.
“Mme Ama-Inyene”
Uma-inyene ekedi ntak efen oro akanamde mme Jew ẹsịn Jesus nte Messiah. Edida uforo ke akpan n̄kpọ n̄kaha ama ọbiọn̄ọ ediwak owo nditiene Jesus. Ke uwụtn̄kpọ, ẹkediọn̄ọ mme Pharisee nte “mme ama-inyene.” (Luke 16:14) Da ke uwụtn̄kpọ akparawa ọbọn̄ owo inyene kiet oro akakade ebịne Jesus onyụn̄ obụpde nte ekemede ndinyene nsinsi uwem. “Nịm mbet,” ekedi ibọrọ Jesus. “Mma nnenịm kpukpru n̄kpọ ẹmi: nso isụhọ mi ndinam?” akparawa oro ama obụp, nte an̄wan̄ade ekerede ke ẹma ẹyom ekese efen efen ẹkan edinịm ndusụk ibet. Jesus ama asian enye: “Ka kanyam se enyenede, da nọ mme ubuene, ndien eyenyene inyene ke heaven: nyụn̄ di disan̄a ye Ami.” Nso ifet—ndidi mbet Messiah! Edi ọbọn̄ oro ama ọnyọn̄, ke mfụhọ. Ntak-a? Koro n̄kpọuto isọn̄ ama edi akpan n̄kpọ ọnọ enye akan n̄kpọuto ke heaven.—Matthew 19:16-22.
Idaha ikpụhọkede. Ndikabade ndi ata anditiene Edidem Messiah ọwọrọ ndinịm mme udọn̄ n̄kpọ eke spirit ke akpa nnọ n̄kpọ efen ekededi, esịnede inyene eke isọn̄. Ye owo ekededi oro enyenede edu uma-inyene, emi edi n̄kpọ-ata. Ke uwụtn̄kpọ, n̄wan ye ebe kiet ẹdide isụn̄utom ke idụt N̄kan̄ Edem Usiahautịn kiet ẹma ẹtịn̄ ikọ ẹnọ n̄wan kiet ẹban̄a Bible. Ke ẹnịmde ke akpanikọ ẹte ke enye akpama ndikpep ekese efen efen mban̄a Jehovah Abasi ye Eyen esie, Jesus Christ, n̄wan ye ebe oro ẹma ẹnọ enye Enyọn̄-Ukpeme ye Awake! Didie ke enye akanam n̄kpọ? Enye ama obụp ete: “Ndi mme magazine ẹmi ẹyen̄wam mi ndinyene okụk efen efen?” N̄wan oro ama enyene udọn̄ ke mme n̄kpọ obụkidem akan mme n̄kpọ eke spirit.
Ukem n̄wan ye ebe oro ẹma ẹkpep Bible ye akparawa kiet oro ọkọtọn̄ọde ndidụk mme mbonoesop ke Ufọkmbono Obio Ubọn̄. “Abiat idemfo ini,” ete ye eka esie ẹma ẹsian enye. “Akpana afo anam udiana utom ke mbubịteyo onyụn̄ enyene okụk efen efen.” Esidi n̄kpọ mfụhọ didie ntem ke ini mme ete ye eka ẹsịnde udọn̄ ẹnọ nditọ mmọ ndinịm mme n̄kpọ obụkidem ke akpa nnọ edikpep mban̄a Edidem Messiah! N̄ke China kiet ọdọhọ ete: “Ye ofụri inyene esie andikara ikemeke ndidep isua uwem tọsịn duop.”
Ediwak owo ẹmedi ẹdidiọn̄ọ ẹte ke ndikpep n̄kpọ mban̄a nnyụn̄ ntiene Edidem Messiah iyakke ufan̄ odu ọnọ ima okụk. Ntiense Jehovah kiet emi ekenyenede mbubehe idemesie emi adade ediwak okụk edi, ọkọdọhọ ete: “Ndinyene ediwak okụk enem etieti edi idịghe enye edi akpan n̄kpọ. Idịghe okụk anam owo okop inemesịt.” Enye idahaemi edi owo ubon Bethel ke n̄kọk itieutom Watch Tower Society kiet ke Europe.
“Ndịk Mme Jew”
Ndịk owo ekedi ntak efen n̄ko emi akanamde mme Jew inyịmeke Jesus nte Messiah. Ndinyịme itie Messiah esie an̄wan̄wa ọkọwọrọ ndisịn eti enyịn̄ mmọ ke itiendịk. Ye ndusụk owo ekọmurua oro ama okpon akaha. Kere ban̄a Nicodemus, owo esop enyọn̄ mme Jew ẹkekotde Sanhedrin. Ke mme idiọn̄ọ ye mme ukpepn̄kpọ Jesus ẹtụkde, enye ama enyịme ete: “Rabbi, nnyịn imọfiọk ite Afo edi Andikpep emi Abasi osiode ọdọn̄; koro baba owo kiet ikemeke ndinam mme idiọn̄ọ ẹmi Afo ananam, ibọhọke Abasi odu ye enye.” Edi Nicodemus eketiene Jesus ke okoneyo, ndusụk mbak mme Jew eken ẹdikụt enye.—John 3:1, 2.
Ye ediwak owo ẹmi ẹkekopde ikọ Jesus, unyịme owo ekedi akpan n̄kpọ akan eke Abasi. (John 5:44) Ke ini Jesus okodude ke Jerusalem kaban̄a Usọrọ Mme Ataya ke 32 E.N., “akwa nsụk-uyo odu ke otu mme otu owo aban̄a Enye.” (Sịghisịghi ubọkn̄wed edi eke nnyịn.) Baba owo kiet iketịn̄ke n̄kpọ iban̄a Jesus an̄wan̄wa “ọnọ ndịk mme Jew.” (John 7:10-13) Idem ete ye eka eren oro Jesus akanamde okụt usụn̄ ikenyịmeke ndidọhọ ke utịben̄kpọ oro okoto andida ke ibuot Abasi. Mmọ n̄ko ẹma ‘ẹfehe mme Jew.’—John 9:13-23.
Mfịn, ndusụk owo ẹfiọk ẹte ke Jesus idahaemi ke akara nte Edidem Messiah ke heaven, edi mmọ ẹkop ndịk nditịn̄ emi an̄wan̄wa. Ye mmọ ekọmurua editaba idaha mmọ ye mbon efen okpon akaha. Ke Germany, ke uwụtn̄kpọ, Ntiense Jehovah kiet ama enyene nneme Bible ye eren kiet oro ekenyịmede ete: “Se mbufo Mme Ntiense ẹkwọrọde ẹban̄a Bible edi akpanikọ. Edi edieke ami n̄kabarede ndi Ntiense mfịn, etisịm n̄kpọn̄ kpukpru owo ẹyefiọk ẹban̄a oro. Nso ke mmọ ẹdikere ke itieutom, ke mbọhọ, ye ke n̄ka oro ubon mi ye ami idụkde? N̄kemeke ndiyọ oro.”
Nso idi ntak ndịk owo? Ntan̄idem, ima ediwọrọ etop ke otu ubon ye mme ufan, ndịk edidi se ẹdade ẹnam n̄kpọ imam ẹnyụn̄ ẹsuenede, editịmede esịt mban̄a edidi isio ye n̄wakn̄kan owo. Mme utọ ekikere oro ẹdi udomo ọnọ mbon oro ẹtọn̄ọde ndikpep Bible ye Mme Ntiense Jehovah. Ke uwụtn̄kpọ, n̄kaiferi kiet ama okop nduaidem ndikpep n̄kpọ mban̄a Paradise oro Obio Ubọn̄ Messiah ediwụkde ke isọn̄ ke idak itie ukara Jesus Christ. Edi enye ekedi ata enek unek disco, ndien ndịk owo ama akpan enye nditịn̄ nnọ mbon efen mban̄a idotenyịn emi. Ke akpatre, enye ama ada uko nditịn̄ ikọ ifụre ifụre mban̄a Bible. Mme ufan disco esie ẹma ẹsọn enye, edi ebe esie ye ete ye eka esie ẹma ẹwụt udọn̄. N̄wan emi ye eka esie ke akpatre ẹma ẹna baptism, ndien ebe esie ye ete esie ẹma ẹtọn̄ọ ndikpep Bible. Nso utịp ke ndikan ndịk owo!
Nte Afo Emenen̄ede Ọfiọk Messiah?
Ke ini Jesus okoyomde ndikpa ke eto ndutụhọ, ndusụk mbet esie ẹma ẹdu. Mmọ ẹma ẹfiọk enye nte Messiah oro ẹkebemde iso ẹtịn̄ ẹban̄a. Mme andikara mme Jew ẹma ẹdu n̄ko, ẹmi, yak idọhọ ntre, ẹkesụk ẹyomde idiọn̄ọ. “Yak Enye anyan̄a Idem Esie, edieke Enye edide Christ [m̀mê Messiah] Abasi, emi Abasi ekemekde.” (Luke 23:35) Nte mmọ iditreke ndibụp nyom idiọn̄ọ? Jesus ama anam ediwak idiọn̄ọ. Adianade do, emana, utom, ikpe, ediwot, ye ediset ke n̄kpa esie ẹma ẹsu ediwak prọfesi N̄wed Abasi Usem Hebrew.—Se “All Scripture Is Inspired of God and Beneficial,” emi Watchtower Bible and Tract Society of New York, Inc., emịn̄de, page 343-344.
Mme andisan̄a mbe ẹma ẹsụn̄i Jesus, sia ẹma ẹkesịn uyarade itie Messiah esie. (Matthew 27:39, 40) Mbonekọn̄ ke ima inyene ẹma ẹdeme edisịnen̄kpọ Jesus ke otu idemmọ, ẹsịnde afia ẹban̄a ekpri ọfọn̄idem esie. (John 19:23, 24) Ndịk owo ekedi ntak ke ndusụk idaha. Ke uwụtn̄kpọ, kere ban̄a Joseph owo Arimathea, owo Sanhedrin. Enye ekedi “mbet Jesus, edi edi mbet ke ndịbe ọnọ ndịk mme Jew.” Ke Messiah ama akakpa, Joseph ye Nicodemus ẹma ẹse ẹban̄a okpo Jesus. Joseph ke ntem ama akan ndịk owo esie.—John 19:38-40.
Edieke afo okodude uwem ke akpa isua ikie, nte afo ọkpọkọfiọk Jesus nte Messiah? Ndinam ntre okpokoyom ete afo enyịme uyarade N̄wed Abasi, esịn ekikere uma-inyene, onyụn̄ etre ndiyak idem nnọ ndịk owo. Ke ukperedem ini emi, owo nnyịn kiet kiet ekpenyene ndibụp idemesie ete, ‘Nte ami mmọfiọk Jesus idahaemi nte Edidem Messiah eke heaven?’ Ibịghike enye edise aban̄a mbubehe isọn̄. Ke ini oro etịbede, ndi afo oyodu ke otu mbon oro ẹnen̄erede ẹfiọk Jesus Christ nte Messiah oro ẹken̄wọn̄ọde?
[Mme ndise ke page 28]
Kûdede ufụmi uyarade oro nte ke Jesus edi Edidem Messiah
[Ndise ke page 31]
Ndikpep n̄kpọ mban̄a Messiah esiwak ndiwọrọ ndikan edifehe ndịk mban̄a se mbon en̄wen ẹkemede nditịn̄