Beri Edem Ke Ukeme Oro Abasi Ọnọde
Mme Akpan N̄kpọ Ẹtode Udiana N̄wed Timothy
JEHOVAH esinọ mme asan̄autom esie odudu ndiyọ mme idomo ye ukọbọ. Ndien Timothy ye mme Christian eken ẹkeyom ukeme oro Abasi ọnọde didie ntem! Ikan̄ ama ata Rome ke 64 C.E., ndien ete ete ikọ ọkọdọhọ ke Edidem Nero ekedi ntak. Man anyan̄a idemesie, enye ama ọduọhọ mme Christian, ndien emi nte an̄wan̄ade ama osụn̄ọ ke akwa ukọbọ. Anaedi ke ini oro (n̄kpọ nte 65 C.E.), ẹma ẹfiak ẹsịn apostle Paul ke ufọk-n̄kpọkọbi ke Rome. Okposụkedi akasakde iso ese n̄kpa, enye ke ini oro ama ewet udiana n̄wed esie ọnọ ẹsọk Timothy.
N̄wed emi Paul ekewetde ama otịm Timothy idem ndibiọn̄ọ mbon nsọn̄ibuot nnyụn̄ nsọn̄ọ nda ke ini ukọbọ. Emi ama esịn udọn̄ ọnọ enye ndinam n̄kọri ke n̄kan̄ eke spirit onyụn̄ etịn̄ aban̄a mme idaha Paul ke ufọk-n̄kpọkọbi. N̄wed emi n̄kọ an̄wam mme andikot ndiberi edem ke ukeme oro Abasi ọnọde.
Biom Ukụt Nyụn̄ Nda Nsụkesịt Nọ Ukpep
Nte mme anditan̄a eti mbụk, Abasi esinọ nnyịn ukeme man iyọ ukọbọ. (2Ti 1:1-18) Paul akananam ifreke Timothy ke akam esie, enye ama onyụn̄ eti mbuọtidem esie oro mîsan̄ake ye mbubịk. Abasi ikonọhọ Timothy ‘edu ufep, edi eke odudu, ima, ye eti ekikere.’ (NW) Ntre enye okûkop bụt ke ndinọ ikọ ntiense nnyụn̄ mbiom ukụt kaban̄a eti mbụk. Ẹma ẹkpak enye n̄ko ‘ndisọn̄ọ mmụm nti ikọ n̄kama’ emi okokopde ke inua Paul, kpa nte nnyịn ikpotịmde isọn̄ọ iyịri ke ata akpanikọ Christian okposụkedi mbon eken ẹwọn̄ọrede ẹkpọn̄ enye.
Ẹkenyene ndiyak n̄kpọ ẹmi Paul ekekpepde nnọ mbon akpanikọ emi ẹdikpepde mmọ en̄wen. (2:1-26) Ẹma ẹkpak Timothy ndidi eti owoekọn̄ Christ, emi anamde akpanikọ ke ini obiomde ukụt. Paul ke idemesie ama okụt ukụt ke ufọk-n̄kpọkọbi ke ntak edikwọrọ eti mbụk. Enye ama esịn udọn̄ ọnọ Timothy ete esịn ifịk owụt Abasi idem ete idi anamutom eke ẹdomode ẹfiọk, efepde idem ke ikpîkpu ndutịn̄ ẹmi ẹbiatde se idide edisana. Ẹma ẹnyụn̄ ẹdọhọ enye ete ke ana ofụn Ọbọn̄ ada nsụkesịt ọnọ mmọ en̄wen ukpep.
Kwọrọ Ikọ!
Ukeme oro Abasi ọnọde edi se ẹyomde man ẹsak iso ẹse mme akpatre usen ẹnyụn̄ ẹsọn̄ọ ẹyịre ke akpanikọ N̄wed Abasi. (3:1-17) Ke otu mbon unana uten̄e Abasi mme owo ẹyedaha ẹda ẹmi ‘ẹtakde ndikpekpep kpukpru ini edi ikemeke ndisịm ifiọk akpanikọ.’ Utọ ‘ndiọi owo ye mbon abian̄a ẹmi ẹyedọdiọn̄ ẹdiọk ẹkaiso, ẹbian̄a owo, owo ẹyenyụn̄ ẹbian̄a mmọ.’ Nte ededi, Timothy ekenyene ‘ndiyịre ke se enye ekekpepde.’ Ntre ye nnyịn, ifiọkde ite ke ‘kpukpru N̄wed, eke ẹdade odudu spirit Abasi ewet, ẹnyụn̄ ẹdi se ifọnde ndida n̄kpep owo n̄kpọ, nsua nnọ owo, nnam owo ẹsan̄a nte enende, nteme owo edinen ido; man owo Abasi enyene ọyọhọ ifiọk, onyụn̄ eben̄e idem ke kpukpru nde ndinam eti utom ekededi.’
Timothy ekenyene ndibiọn̄ọ mbon nsọn̄ibuot nnyụn̄ nnam utom esie mma. (4:1-22) Enye ekekeme ndinam oro ke ‘ndikwọrọ ikọ’ nnyụn̄ nsọn̄ọ nyịre ke enye. Emi ekedi akpan n̄kpọ, sia esop oro okodude ke “ini afanikọn̄” (NW) ke ntak emi ndusụk owo ẹkekpepde nsunsu ukpepn̄kpọ. Mme Ntiense Jehovah n̄ko ẹsọn̄ọ ẹyịre ke Ikọ Abasi kemi, ẹkwọrọde enye usọp usọp ke esop ẹnyụn̄ ẹkwọrọde ẹnọ mme owo ke an̄wa, idem ke mme ini n̄kpọ mîfọnke. Paul ama ‘ọsọn̄ọ omụm mbuọtidem akama,’ okposụkedi ndusụk owo ẹkedianarede ẹkpọn̄ enye. Edi ‘Ọbọn̄ ama ọsọn̄ọ enye esịt [“ọnọ enye odudu,” NW] nditịn̄ ikọ gospel ọyọhọ ọyọhọ.’ Ẹyak nnyịn n̄ko iberi edem ke odudu emi Abasi ọnọde inyụn̄ ikaiso ndikwọrọ eti mbụk.
[Ekebe/Ndise ke page 31]
Eti Owoekọn̄: Paul akakpak Timothy ete: “Tiene mi biom ukụt, nte eti owoekọn̄ Christ Jesus. Baba owo kiet eke akade ekọn̄ idaha idem ikọkọmọ ke mbubehe uwem emi, man enye enem andisịn enyịn̄ esie ke n̄wed mbonekọn̄ esịt.” (2 Timothy 2:3, 4) Owoekọn̄ Rome emi asan̄ade ke ukot ama ‘esibiom ukụt’ ke ini obiomde ndodobi n̄kpọekọn̄, ekụri, akpasa, udia usen ita, ye n̄kpọ eken. (Wars of the Jews Josephus, N̄wed 3, ibuot 5) Enye ikebịneke udori unyamurua, koro oro ikpenemke etubom esie esịt, ndien ẹma ẹsikpep enye okụk oro enye abiatde. Ukem ntre, ẹbuan Christian ndikụt ukụt ye edidi “eti owoekọn̄ Christ.” Okposụkedi enye ekemede ndinam utom idịbi udia man anam mbiomo N̄wed Abasi, inaha enye ayak edisịn idem ke n̄kpọ obụkidem ke usụn̄ oro mîdotke etre enye ndin̄wana en̄wan eke spirit. (1 Thessalonica 2:9) Ndinọ ikọ ntiense ke ufọk ke ufọk, enye akama “ofụt spirit, emi edide ikọ Abasi,” onyụn̄ an̄wam mme owo ndibọhọ ndudue ido ukpono. (Ephesus 6:11-17; John 8:31, 32) Sia uwem odude ke itiendịk, ẹyak kpukpru mbonekọn̄ ẹdide Christian ẹkaiso ndinem Jesus Christ ye Jehovah Abasi esịt ke usụn̄ emi.