Ekebe Mbụme

◼ Anie ekpewet n̄kpọ ọyọhọ n̄kpri ekebe eben̄e oro ẹsidude ke ndusụk edem n̄wed nnyịn ye ke ikpehe Intanet nnyịn?

Mme n̄wed nnyịn ẹsiwak ndinyene n̄kpri ekebe ke edem mmọ oro ẹkemede ndiwet n̄kpọ nyọhọ nnọ ẹsọk n̄kọk itieutom nyom n̄wed m̀mê ndọhọ Mme Ntiense Jehovah ẹdi ẹdise owo. Ke adianade do, ẹkeme ndida ikpehe Intanet nnyịn www.watchtower.org nsịn eben̄e nyom ukpepn̄kpọ Bible. Mme ndutịm emi ẹn̄wam ediwak owo ẹkpep akpanikọ. Nte ededi, mfịna esidemede ke ini mme asuanetop ẹdade ndutịm emi ẹdọhọ ẹnọ n̄wed ẹsọk iman mmimọ m̀mê ẹdọhọ Mme Ntiense Jehovah ẹka ẹkese mmọ.

Ndusụk mbon oro n̄kọk itieutom esinọde n̄wed ẹsọk ke ini mmọ mîkọdọhọke ẹnọ ẹsọk mmimọ isikopke inemesịt, ẹkerede ke ido ukpono nnyịn afafịna mmimọ onyụn̄ esịn enyịn̄ mmimọ ke otu mbon oro mmọ ẹsinọde n̄wed ẹsọk. Mme asuanetop oro ẹkedọhọde ẹka ẹkese owo oro mîkedịghe enye ọkọdọhọ ẹdi ẹdise imọ ẹsidia bụt ke ini owo oro mînọhọ mmọ iso. Mmọdo, mbon oro ẹnyenede udọn̄ ẹkpeda ikpehe Intanet nnyịn m̀mê n̄kpri ekebe oro ẹdude ke ndusụk edem n̄wed nnyịn ẹsịn eben̄e, ikpedịghe mme asuanetop ẹda mmọ ẹsịn eben̄e ke ibuot mbon en̄wen. N̄kọk itieutom idinamke n̄kpọ iban̄a eben̄e oro asuanetop esịnde ke ibuot owo en̄wen.

Didie ndien ke ikeme ndin̄wam iman m̀mê ufan nnyịn ke n̄kan̄ eke spirit? Edieke afo edimade enye ọbọ n̄wed, ntak emi afo ke idemfo mûnọhọ ẹsọk enye nte enọ? Edieke enye enyenede udọn̄ onyụn̄ amade kiet ke otu Mme Ntiense Jehovah edi edise imọ edi afo ufiọkke nte okposobode mbiowo esop n̄kann̄kụk, do afo ekpenyene ndiwet n̄kpọ nyọhọ babru Please Follow Up (S-43) nyak nnọ ewetn̄wed esop mbufo emi edidụn̄ọrede se afo ewetde onyụn̄ ọnọ enye ẹsọk n̄kọk itieutom. Nte ededi, edieke owo oro enyenede udọn̄ do odude ke ufọk-n̄kpọkọbi, ebiet oro ẹsidọn̄de mbon oro ẹdade ibọk m̀mê n̄kpọsọn̄ mmịn ke idiọk usụn̄, m̀mê ke ufọkibọk, kûnyene nneme ye n̄kọk itieutom ke ibuot esie. Utu ke oro afo emekeme ndisịn udọn̄ nnọ enye enyene nneme ye nditọete oro ẹsidide ebiet emi mîdịghe ọdọhọ enye ewet ọkpọkpọ leta ọnọ ẹsọk n̄kọk itieutom.