Mme N̄wed Emi Ẹsiakde ke N̄wed Mbono Esop Uwem ye Utom Nnyịn
MAY 6-12
it-1-E 724-725
Ndiyọ N̄kpọ
Ọfọn n̄ko ika iso ikere iban̄a idotenyịn oro mme Christian ẹnyenede, oro edi, ndidu uwem ke nsinsi ke ererimbot emi idiọkn̄kpọ mîdụhe. Ọkpọkọm mbon emi ẹkọbọde nnyịn ẹwowot nnyịn, imenịm ke iyodu uwem ke nsinsi. (Ro 5:4, 5; 1Th 1:3; Edi 2:10) Edieke ẹmende ufen oro ibọde idahaemi ẹdomo ye mme edidiọn̄ oro idinyenede ke ini Abasi osude kpukpru se enye ọn̄wọn̄ọde, iyokụt ke ufen emi idịghe n̄kpọ ndomokiet. (Ro 8:18-25) Ọkpọkọm ufen oro ibọde idahaemi okpon didie, enye edi ‘ke ibio ini onyụn̄ efefere’ sia idibịghike nte nsinsi uwem oro ididude. (2Co 4:16-18) Edieke owo akade iso enyene idotenyịn onyụn̄ etide ke ufen oro imọ ibọde edi ke ibio ini, enye idikpaha mba ndinam se inende, idinyụn̄ ikpọn̄ke Jehovah Abasi.
MAY 20-26
it-2-E 177
Ntịminua
“Edisana Ntịminua.” Mme Christian ke eyo mme apostle ẹma ẹsida “edisana ntịminua” (Ro 16:16; 1Co 16:20; 2Co 13:12; 1Th 5:26) m̀mê “ima ima ntịminua” ẹkọm kiet eken (1Pe 5:14), ndien etie nte iban ẹkesitịm iban inua, irenowo ẹnyụn̄ ẹtịm irenowo inua. Etie nte mme Hebrew ke eset ẹkesikọm kiet eken ntre n̄ko. Kpa ye oro Bible mîtịn̄ke ediwak n̄kpọ iban̄a n̄kpọ emi, etie nte “edisana ntịminua” m̀mê “ima ima ntịminua” okowụt ke mme Christian eyo mme apostle ẹnen̄ede ẹma kiet eken ẹnyụn̄ ẹdiana kiet.—Joh 13:34, 35.
MAY 27–JUNE 2
it-1-E 880
Galatia, Leta Oro Ẹwetde Ẹnọ Mbon Galatia
Paul ndikọdọhọ “O mme anana-ibuot mbon Galatia” iwọrọke ke enye eketịn̄ aban̄a sụk mbon Celt emi ẹkedụn̄de ke n̄kan̄ edem edere Galatia. (Ga 3:1) Utu ke oro, Paul eketịn̄ aban̄a ndusụk owo ke esop emi ẹkekpebede mme Jew oro ẹkedụn̄de ye mmọ. Mme Jew emi ẹma ẹsisọn̄ọ ẹyịre ẹte ẹnịm Ibet Moses ẹnyụn̄ ẹdomo ndida oro n̄wụt ke mmimọ idi ndinen owo utu ke ndinịm ke mbuọtidem emi obufa ediomi anamde owo enyene anam owo edi edinen. (2:15–3:14; 4:9, 10) Mbon emi ẹkedude ke “mme esop ke Galatia,” (1:2) oro Paul ekewetde leta ọnọ ẹkedi mme Jew ye mme Gentile, ndien ndusụk mme Gentile emi ikanaha mbobi. Mbon Celt ẹma ẹdu n̄ko ke esop oro. (Ut 13:14, 43; 16:1; Ga 5:2) Ẹkekot kpukpru mmọ mbon Galatia sia mmọ ẹkedụn̄ ke Galatia. Nte Paul eketịn̄de ikọ owụt ke enye ekewet n̄kpọ emi ọnọ mbon oro enye ekemehede, emi ẹkedụn̄de ke n̄kan̄ edem usụk Galatia, idịghe mbon oro enye mîkọdiọn̄ọke, emi ẹkedụn̄de ke n̄kan̄ edem edere, sia etie nte akanam enye ikaha n̄kan̄ oro.