Mme Mbụme Ẹtode Mme Andikot

Mme Hebrew 9:16 ọdọhọ ete ke anam-n̄wed adia-akpa enyene ndibemiso n̄kpa mbemiso n̄wed oro enyene odudu. Edi Abasi ama anam obufa ediomi, edi enye ikpaha. Ntre didie ke ufan̄ikọ emi ekeme ndin̄wan̄a nnyịn?

Nnyịn ikot ke Mme Hebrew 9:15-17 ite: “Ke ntak emi Enye [Christ] onyụn̄ edi esịne-ufọt obufa ediomi, man, sia kiet ama akakpa ndifak owo nsio ke mme ndudue eke mmọ ẹkesịnede ke idak akpa ediomi ẹdue, mmọemi ẹkekotde ẹkpebọ un̄wọn̄ọ nsinsi udeme. Koro ọtọ nte n̄wed adia-akpa odude, anam-n̄wed [edide owo] oro enyene ndibemiso n̄kpa. Koro n̄wed adia-akpa ọsọn̄ọde ke adan̄aemi owo ama akpa: akanam nte n̄wed oro enyene odudu, ke adan̄aemi andinam enye [edide owo] odude uwem?”a

Jehovah edi ata Andinam obufa ediomi. Ke Jeremiah 31:31-34, Abasi ama ebemiso etịn̄ san̄asan̄a ete ke imọ iyenam obufa ediomi ye ikọt imọ. Apostle Paul okokot oto itien̄wed Abasi emi ke Mme Hebrew 8:8-13, emi owụtde, ke nditịm ntịn̄, nte ke Paul ama ọdiọn̄ọ ete ke edi Abasi ke idemesie, ọkọtọn̄ọ ediomi emi.

Nte ededi, ke Mme Hebrew ibuot 9, Paul ama akaiso ndineme mban̄a nsio nsio idaha oro Jesus enyenede ke se iban̄ade obufa ediomi. Christ ekedi nte Akwa Oku ediomi emi. Ke n̄kan̄ eken, Jesus ekedi uwa obufa ediomi; “iyịp Christ” ikpọn̄ ekeme ‘ndiyet esịt nnyịn asana ọbọhọ utom n̄kpa.’ Christ n̄ko ekedi Esịne-ufọt ediomi emi, kpa nte Moses ekedide esịne-ufọt Ibet ediomi.—Mme Hebrew 9:11-15.

Paul eketịn̄ ete ke ama oyom owo akpa man ẹsọn̄ọ mme ediomi ke ufọt Abasi ye owo. Ibet ediomi edi uwụtn̄kpọ. Moses ekedi esịne-ufọt esie, enyeemi ekenyenede ndinam ediomi ke ufọt Abasi ye Israel eke obụk. Moses ke ntem ama enyene akpan idaha, okonyụn̄ edi owo emi akanamde n̄kpọ ye nditọ Israel ke ini mmọ ẹkedide ẹdidụk ke ediomi oro. Ntre ẹkeme ndida Moses nte owo emi anamde Ibet ediomi emi ọkọtọn̄ọde ye Jehovah. Edi nte Moses ekenyene ndiduọk iyịp-uwem esie man Ibet ediomi oro enyene odudu? Baba. Utu ke oro ẹkewa mme unam ẹnyụn̄ ẹda iyịp mmọ ẹkpụhọ ye eke Moses.—Mme Hebrew 9:18-22.

Nso kaban̄a obufa ediomi ke ufọt Jehovah ye idụt Israel eke spirit? Jesus Christ ama enyene ubọn̄ ubọn̄ idaha nte esịne-ufọt, kpa Esịne-ufọt ke ufọt Jehovah ye Israel eke spirit. Okposụkedi edide Jehovah ọkọtọn̄ọ ediomi emi, enye owụhọ ke Jesus Christ. Ke ẹsiode enye ndidi Esịne-ufọt esie ẹfep, Jesus ama enyene nnennen ebuana ke obụkidem ye mmọ oro ẹnyenede ndibemiso nda ndisịn ke ediomi emi. (Luke 22:20, 28, 29) Akande oro, enye ama odot ndinọ uwa oro ẹkeyomde ndida nsọn̄ọ ediomi. Uwa emi ikedịghe eke ikpîkpu unam edi ekedi mfọnmma uwem eke owo. Ntre Paul ama ekeme nditịn̄ mban̄a Christ nte andinam obufa ediomi emi edide owo. Ke “Christ . . . [ama ekebe] odụk ke ata heaven, man Enye ada ke iso Abasi kemi kaban̄a nnyịn,” ẹma ẹsọn̄ọ obufa ediomi oro.—Mme Hebrew 9:12-14, 24.

Ke etịn̄de aban̄a Moses ye Jesus nte mme anam-ediomi ẹmi ẹdide owo, Paul ikọnọhọ ekikere ite ke owo mmọ kiet m̀mê eken ọkọtọn̄ọ ediomi oro mîkodụhe kan̄a ke edinam, emi ke akpanikọ edide Abasi akanam. Utu ke oro, owo mbiba ẹmi nte mme esịne-ufọt ẹma ẹbuana ntotụn̄ọ ntotụn̄ọ ke ndinam ediomi emi mîkodụhe kan̄a do. Ndien ke idaha kiet kiet, n̄kpa ama abuana—mme unam ẹdade ẹkpụhọ ke ibuot Moses, ndien Jesus awade iyịp-uwem esie ọnọ mbon oro ẹbuanade ke obufo ediomi.

[Mme Ikọ idakisọn̄]