Mme N̄wed Emi Ẹsiakde ke N̄wed Mbono Esop Uwem ye Utom Nnyịn
MAY 3-9
MME AKPAN N̄KPỌ KE IKỌ ABASI | NUMBERS 27-29
Yom N̄kpọuto ke Ikọ Abasi
it-2-E 528 ¶5
Uwa
Edin̄wọn̄ uwa. Ẹma ẹsiwa edin̄wọn̄ uwa ke ini ẹwade ediwak uwa eken, akpan akpan ke nditọ Israel ẹma ẹkesịm Isọn̄ Un̄wọn̄ọ. (Nu 15:2, 5, 8-10) Nte ẹkesiwade edin̄wọn̄ uwa ekedi nditọhọ wine (“ọkpọsọn̄ mmịn”) nduọk ke itieuwa. (Nu 28:7, 14; men Ex 30:9 ye Nu 15:10 domo.) Apostle Paul ọkọdọhọ mme Christian ke Philippi ete: “Ọkpọkọm ẹn̄wan̄wan̄a mi ẹduọk nte edin̄wọn̄ uwa ke enyọn̄ uwa ye utom emi mbuọtidem esịnde mbufo ẹnam ẹnọ mme owo, mmokop idatesịt.” Se enye eketịn̄de emi ọkọwọrọ ke esịt ekenenem enye ndinam n̄kpọ nnọ nditọete esie. (Php 2:17) Esisịt ini mbemiso Paul akakpade, enye ama ewet leta ọnọ Timothy ete: “Ẹn̄wan̄wan̄a mi ẹduọk nte edin̄wọn̄ uwa, ini ndisana mi nyak onyụn̄ ekpere.”—2Ti 4:6.
MAY 10-16
MME AKPAN N̄KPỌ KE IKỌ ABASI | NUMBERS 30-31
“Nam Se Afo Akakan̄ade”
it-2-E 1162
Akan̄a
Ẹkesinam ke Imaesịt, Edi Owo Ama Akan̄a Ana Osio. Owo ikesinyịkke-nyịk owo akan̄a akan̄a. Edi ibet Abasi ọkọdọhọ owo ama akan̄a n̄kpọ, ke ana enye osio. Ntak edi oro Bible ọdọhọde ke owo ama akan̄a akan̄a, ke enye “ọbọp idemesie.” Oro ọkọwọrọ ke owo emi etrede ndinam se enye akakan̄ade odot n̄kpa. (Nu 30:2; se n̄ko Ro 1:31, 32.) Sia edide owo ekeme ndikpa edieke enye mîsioho akan̄a esie, Bible ọdọhọ owo okûsọsọp ukan̄a akan̄a, edi yak enye etịm ekere m̀mê enye eyekeme ndinam se enye oyomde ndikan̄a. Ibet ọkọdọhọ ete: “Edieke afo akan̄ade akan̄a ọnọ Jehovah . . . , Jehovah Abasi fo [iditreke] ndiyom enye ke ubọk fo, emi oyonyụn̄ akabade edi idiọkn̄kpọ ọnọ fi. Edi edieke etrede ndikan̄a akan̄a, emi ididịghe idiọkn̄kpọ inọ fi.”—De 23:21, 22.
it-2-E 1162
Akan̄a
Akan̄a edi san̄asan̄a un̄wọn̄ọ emi owo ọn̄wọn̄ọde ọnọ Abasi ndinam n̄kpọ, ndinọ enye n̄kpọ, ndinam utom nnọ enye, mîdịghe ndibet ndusụk n̄kpọ ọkpọkọm n̄kpọ oro idiọkke. Owo ekesibiere ke idemesie ndikan̄a akan̄a. Sia akan̄a ekedide san̄asan̄a un̄wọn̄ọ, owo ndikan̄a akan̄a okonyụn̄ etie nte enye ndida un̄wọn̄ọ. Ndusụk ini, akan̄a ye un̄wọn̄ọ ẹkeme ndiwọrọ ukem n̄kpọ ke Bible. (Nu 30:2; Mt 5:33) Ndikan̄a akan̄a ọwọrọ owo nditịn̄ se enye aduakde ndinam, ke ini ndida un̄wọn̄ọ ọwọrọde owo nditomo enyịn̄ Abasi m̀mê akwa owo ndiwụt ke se imọ itịn̄de edi akpanikọ mîdịghe ke iyanam se imọ itịn̄de. Ẹma ẹsiwak ndida un̄wọn̄ọ ke ini ẹnamde ediomi.—Ge 26:28; 31:44, 53.
Yom N̄kpọuto ke Ikọ Abasi
it-2-E 28 ¶1
Jephthah
Ete ye eka ẹma ẹnyene unen ndinọ eyen mmọ okodu ke ufọk Jehovah anam n̄kpọ Abasi ke ofụri uwem esie. Ke uwụtn̄kpọ, mbemiso Samuel amanade, Hannah eka esie ama ọn̄wọn̄ọ ndinọ enye okodu ke tent utuakibuot anam n̄kpọ Abasi. Elkanah emi ekedide ebe Hannah ama enyịme akan̄a emi Hannah akanamde mi. Ndondo oro ẹkesiode Samuel ke eba, Hannah ama emen enye aka tent utuakibuot. Hannah ama emen unam aka ndiwa nnọ Jehovah ini enye emende Samuel aka ufọk Jehovah. (1Sa 1:11, 22-28; 2:11) Samson edi eyen en̄wen emi ẹkeyakde ẹnọ Abasi man anam n̄kpọ Esie nte Nazirite.—Jg 13:2-5, 11-14; kot Nu 30:3-5, 16 man okụt unen emi ete ekenyenede ndisọn̄ọ m̀mê ndibiat akan̄a emi eyen esie an̄wan akakan̄ade.
MAY 17-23
MME AKPAN N̄KPỌ KE IKỌ ABASI | NUMBERS 32-33
“Mbufo Ẹnyene Ndibịn Kpukpru Mme Andidụn̄ Isọn̄ Oro Mfep”
it-1-E 404 ¶2
Canaan
Joshua “ikosioho baba ikọ kiet ifep ke otu kpukpru se Jehovah okowụkde Moses” aban̄a ndisobo mbon Canaan mfep. (Jos 11:15) Edi nditọ Israel ikosoboke mbon Canaan ofụri ofụri nte Joshua ọkọdọhọde mmọ ẹnam, ndien emi ama anam isọn̄ mmọ edehe. Nditọ Israel ndikayak mbon Canaan ẹka iso ẹdụn̄ ye mmọ ama ada mfịna ọsọk mmọ, ndien emi ama anam ata ediwak mmọ ẹkpan̄a nte ini akade. Ibat nditọ Israel oro ẹkekpan̄ade ama awak akan ibat ofụri mbon Canaan oro ẹkpekekpade ekpedi nditọ Israel ẹma ẹsobo mmọ ẹfep nte Jehovah ọkọdọhọde. N̄ko, mbon Canaan ẹma ẹnam ubiatibet, oburobụt ido, ye ukpono ndem enen̄ede omụm isọn̄ ke Israel. (Nu 33:55, 56; Jg 2:1-3, 11-23; Ps 106:34-43) Jehovah ama ọdọdọhọ nditọ Israel ke imọ isikpe edinen ikpe kpukpru ini, ntre ke edieke mmọ ẹdụkde ediomi ye mbon Canaan, ẹdọde nditọ mmọ, ẹtienede mmọ ẹdu etịme etịme uwem, ẹnyụn̄ ẹdide ẹkpono imọ ẹkpono abasi mbon Canaan, ke imọ iditreke ndimen ufen mbon Canaan ndori mmọ ke idem nnyụn̄ nsobo mmọ mfep ke isọn̄ mmọ.—Ex 23:32, 33; 34:12-17; Le 18:26-30; De 7:2-5, 25, 26.
Yom N̄kpọuto ke Ikọ Abasi
it-1-E 359 ¶2
Adan̄a
Ke ẹma ẹkesịn afia ẹnyụn̄ ẹdiọn̄ọ ebiet emi ẹkpedemede ẹnọ esien kiet kiet, akana ẹbiere nte isọn̄ oro ẹdinọde esien kiet kiet edikponde iketre. Ibat owo emi ẹdude ke esien kiet kiet ke ẹkesida ẹdiọn̄ọ nte isọn̄ mmọ okpokponde eketre. Abasi ọkọdọhọ ete: “Mbufo ẹnyene ndisịn afia ndeme isọn̄ oro nda ke idem mbufo ke ubon ke ubon. Ẹnam udeme mmọ eke ẹwakde okpon, ẹnyụn̄ ẹnam udeme mmọ eke mîwakke ekpri. Ebiet emi afia owụtde, do edidi udeme mmọ.” (Nu 33:54) Ebiet ekededi emi afia ọduọde ọnọ esien kiet kiet ke ẹkesinọ mmọ, edi ẹma ẹsisịbe isọn̄ emi ẹkenọde esien kiet ẹdian ẹnọ esien en̄wen etiene nte mmọ ẹwakde m̀mê ẹkpride. Ntak edi oro ẹkesịbede isọn̄ esien Judah ẹnọ esien Simeon ke ini ẹkekụtde ke isọn̄ nditọ Judah okpon akaha.—Jos 19:9.
JUNE 7-13
MME AKPAN N̄KPỌ KE IKỌ ABASI | DEUTERONOMY 3-4
“Ibet Jehovah Ọfọn Onyụn̄ Enen”
it-2-E 1140 ¶5
ifiọk
Edieke owo esịnde idem ekpep Ikọ Abasi onyụn̄ anamde se enye ekpepde, enye eyenyene ikike akan mme andikpep esie onyụn̄ enyene ifiọk akan mbon emi ẹsọn̄ọde enye. (Ps 119:99, 100, 130; men Lu 2:46, 47 domo.) Se inamde edi ntre edi ke mme ewụhọ ye ubiereikpe emi Abasi ekpepde owo esinam owo enyene ifiọk ye ọniọn̄. Ntem, edieke nditọ Israel ẹkpekenamde se Abasi ekpepde mmọ, oro akpakanam mme idụt oro ẹkekande mmọ ẹkụk ẹkụt ke mmọ ẹdi “mbon ọniọn̄ ye mbon ifiọk.” (De 4:5-8; Ps 111:7, 8, 10; men 1Nd 2:3 domo.) Owo emi enyenede ifiọk ọdiọn̄ọ ke ifọnke ndibiat ibet Abasi. Ke ini enye oyomde ndinam n̄kpọ, enye esikere m̀mê Abasi ayama se imọ iyomde ndinam oro onyụn̄ eben̄e Abasi an̄wam imọ inam nnennen n̄kpọ. (Ps 119:169) Enye esiyak ikọ Abasi osụhọde odụk enye esịt (Mt 13:19-23), ewet enye ke ọwọn̄esịt esie (N̄ke 3:3-6; 7:1-4), onyụn̄ asua “kpukpru usụn̄ nsu” (Ps 119:104). Eyen Abasi ama anam kpukpru emi ini enye okodude ke isọn̄, ntak edi oro enye ekenyịmede ndikpa ke eto ndutụhọ sia ọdiọn̄ọde ke oro ayanam prọfesi Bible osu.—Mt 26:51-54.
JUNE 28–JULY 4
MME AKPAN N̄KPỌ KE IKỌ ABASI | DEUTERONOMY 9-10
Yom N̄kpọuto ke Ikọ Abasi
it-1-E 103
Nditọ Anak
Nditọ Anak ẹma ẹkponi etieti ẹnyụn̄ ẹnen̄ede ẹniọn̄. Mmọ ẹkedụn̄ ke n̄kan̄ Canaan emi eketiede obot obot ye ke ndusụk itie emi ẹkekperede esụk, akpan akpan ke usụk usụk Canaan. Enyene ini emi ikpọ owo Anak ita emi ẹkekerede Ahiman, Sheshai, ye Talmai, ẹkedụn̄de ke Hebron. (Nu 13:22) Akpa itie emi nditọ Israel 12 oro ẹkekade ndiyep Isọn̄ Un̄wọn̄ọ ẹkekụtde nditọ Anak ekedi ke Hebron. Owo 10 ke otu mbon uyep oro ẹma ẹdinọ nditọ Israel eken idiọk etop ẹte ke nditọ Anak ẹto ubon mme Nephilim emi ẹkedude uwem mbemiso Ukwọ eyo Noah, ẹnyụn̄ ẹdọhọ ke mmimọ iketie nte “ataktak” ke enyịn mmọ. (Nu 13:28-33; De 1:28) Sia nditọ Anak ẹkedide ata nnyan owo, ẹma ẹsimen mbon Emim ye mbon Rephaim emi ẹkenen̄erede ẹniọn̄ ẹnyụn̄ ẹkponi ẹdomo ye mmọ. Nditọ Anak ẹma ẹnen̄ede ẹnyene odudu, ntak edi oro ẹkesitopde n̄ke ẹte: “Anie ekeme ndisọn̄ọ nda ke iso nditọ Anak?”—De 2:10, 11, 20, 21; 9:1-3.