Idatesịt​—Abasi Esinam Nnyịn Ikop Idatesịt

IDỤHE eke mîmaha ndikop idatesịt. Edi anie mîsoboke afanikọn̄ “emi ọsọn̄de ndiyọ” ke mme akpatre usen emi? (2 Tim. 3:1) Ufịk, udọn̄ọ, unana utom, editịmede esịt, ye mme afanikọn̄ eken emi ẹsinamde owo ofụhọ ekeme ndinam ndusụk owo ikopke idatesịt aba. N̄kpọ onyụn̄ ekeme nditịbe nnọ ikọt Abasi tutu anam mmọ ẹkûkop idatesịt aba. Ekpedi ukopke idatesịt aba nte ekesikopde, nso idin̄wam fi afiak okop idatesịt?

Mbemiso ibọrọde mbụme emi, yak ibem iso idiọn̄ọ se ata idatesịt edide ye se in̄wamde ndusụk owo ẹka iso ẹkop idatesịt kpa ye nsio nsio mfịna oro mmọ ẹnyenede. Ekem iyeneme se ikpanamde man esịt adat nnyịn akan nte adatde idahaemi.

NSO IDI IDATESỊT?

N̄kọ ọmọdiọn̄ọ ke owo ekeme ndinam idọkọ edi isụk ikopke idatesịt. Ke uwụtn̄kpọ, owo emi mmịn anamde ekeme ndisak imam afo ekere ke esịt enen̄ede adat enye. Edi enyịn ama atara enye, ukụt esie afiak edi. Kpukpru imam oro enye akasakde do iwọrọke ke esịt akadat enye oro.​—N̄ke 14:13.

Ata idatesịt esito esịt, isikop ata idatesịt ke ini inyenede eti n̄kpọ ye ke ini idoride enyịn ke eti n̄kpọ. Owo emi okopde idatesịt esinenem esịt kpukpru ini, m̀mê n̄kpọ ọfọn m̀mê ifọnke. (1 Thess. 1:6) Owo ekeme ndinyene mfịna edi esịt osụk adadat enye. Ke uwụtn̄kpọ, ẹma ẹmia mme apostle ke ntak emi mmọ ẹkekwọrọde ẹban̄a Christ. Kpa ye oro, ke ini mmọ ẹken̄wọn̄ọde ke Sanhedrin, ‘mmọ ẹma ẹdara koro ẹbatde ẹte mmimọ imodot ndibọ esuene ke ntak enyịn̄ Christ.’ (Utom 5:41) Ndi emi ọwọrọ ke umia oro ekenenem mmọ? Ihih. Mmọ ẹkedat esịt sia mmọ ẹma ẹsọn̄ọ ẹda ẹnam se Jehovah amade.

Owo isidaha-da utọ idatesịt emi imana; inyụn̄ idịghe kpukpru owo ẹsikop utọ idatesịt emi. Nso inam idọhọ ntre? Sia idatesịt edi edu kiet oro edisana spirit esinamde owo enyene. Edisana spirit ekeme ndin̄wam nnyịn ‘imen obufa owo isịne,’ oro edi, inyene nti edu utọ nte idatesịt. (Eph. 4:24; Gal. 5:22) Idinen̄ekede isọn̄ nnyịn ndiyọ mfịna uwem emi edieke esịt esidatde nnyịn.

MBON ORO IKPEKPEBEDE

Idiọkn̄kpọ awak ke ererimbot emi etieti kpa ye oro Jehovah okoyomde n̄kpọ ọfọfọn. Edi ndiọi n̄kpọ oro mme owo ẹnamde ke ererimbot emi inamke Jehovah etre ndikop idatesịt. Ikọ Abasi ọdọhọ ete: “Odudu ye idatesịt ẹnyụn̄ ẹdu ke ebiet esie.” (1 Chron. 16:27) Nti n̄kpọ emi ikọt Jehovah ẹnamde anam ‘esịt adat Jehovah.’​—N̄ke 27:11.

Edieke ikade iso ikop idatesịt kpa ye oro n̄kpọ mîsan̄ake nte ikekerede, ọwọrọ ikpebe Jehovah. Utu ke nditịmede esịt, yak ikam ikere iban̄a nti n̄kpọ oro inyenede idahaemi inyụn̄ inyene ime itie ibet se Abasi edinamde inọ nnyịn ke ini iso.a

Bible etịn̄ n̄ko aban̄a mme owo oro ẹkekade iso ẹkop idatesịt kpa ye oro n̄kpọ mîkasan̄ake nte mmọ ẹkekerede. Abraham ama ọyọ nsio nsio n̄kpọ oro mme owo ẹkenamde enye. (Gen. 12:​10-20; 14:​8-16; 16:​4, 5; 20:​1-18; 21:​8, 9) Kpa ye kpukpru se ẹkenamde Abraham, enye okosụk okokop idatesịt. Nso ikan̄wam enye? Enye ama odori enyịn ndidu uwem ke obufa ererimbot ke ini Messiah edikarade. (Gen. 22:​15-18; Heb. 11:10) Jesus ọkọdọhọ mme Jew ete: “Ete mbufo Abraham ama adara etieti ke idotenyịn edikụt usen mi, ama onyụn̄ okụt onyụn̄ adara.” (John 8:56) Imekeme ndikop idatesịt nte Abraham edieke isitiede ikere se Jehovah aduakde ndinam nnọ nnyịn ke ini iso.​—Rome 8:21.

Paul ye Silas ikefreke mme n̄kpọ oro Jehovah ọkọn̄wọn̄ọde ukem nte Abraham mîkefreke. Mmọ ẹma ẹnen̄ede ẹbuọt idem ye Jehovah, ẹnyụn̄ ẹka iso ẹkop idatesịt kpa ye nsio nsio afanikọn̄ oro ẹkesịmde mmọ. Ke uwụtn̄kpọ, enyene ini emi ẹketịmde Paul ye Silas n̄kpa n̄kpa ẹnyụn̄ ẹtopde mmọ ẹdọn̄ ke ufọk-n̄kpọkọbi, edi ke ufọt okoneyo mmọ ẹma ẹsịne do ‘ẹbọn̄ akam ẹnyụn̄ ẹkwọ ikwọ ẹtoro Abasi.’ (Utom 16:​23-25) Nso ikanam mmọ ẹdat esịt ntre? Mmọ ẹma ẹti se Jehovah ọn̄wọn̄ọde ndinam nnọ mmọ. Mmọ ẹma ẹfiọk n̄ko ke ntak emi mmimọ idide mbet Christ anam ẹkọbọ mmimọ. Imekeme ndikop idatesịt nte Paul ye Silas edieke isitide ufọn oro nnyịn ndisọn̄ọ nda nnam n̄kpọ Jehovah edidade idi.​—Phil. 1:​12-14.

Ediwak nditọete nnyịn mfịn ẹka iso ẹkop idatesịt kpa ye nsio nsio afanikọn̄ emi ẹsịmde mmọ. Ke uwụtn̄kpọ, ke November 2013, ata idiọk oyobio emi ẹkotde Typhoon Haiyan ama abiat n̄kpọ etieti ke Philippines. Ubon Mme Ntiense Jehovah emi oyobio oro okowụride ufọk mmọ ama ebe 1000. Oyobio oro ama owụri ufọk Brọda George ke obio Tacloban. Enye ọdọhọ ete: “Nditọete ẹka iso ndikop inemesịt kpa ye ofụri se iketịbede oro. Inua ikemeke nditịn̄ nte esịt adatde nnyịn.” Edieke isitiede ikere se Jehovah anamde ọnọ nnyịn, iyaka iso ikop idatesịt ini ekededi emi inyenede mfịna. Nso idi n̄kpọ en̄wen emi Jehovah ọnọde nnyịn man ika iso ikop idatesịt?

SE ISINAMDE ESỊT ADAT NNYỊN

Idụhe se idatde nnyịn esịt nte nnyịn ndidi ufan Jehovah. Imọdiọn̄ọ Andikara ofụri ekondo. Enye edi Abasi nnyịn, Ete nnyịn, ye Ufan nnyịn!​—Ps. 71:​17, 18.

Enem nnyịn n̄ko nte Jehovah ọnọde nnyịn uwem onyụn̄ anamde ikeme ndikop inem uwem. (Eccl. 3:​12, 13) Imọfiọk ntak emi Jehovah okobotde nnyịn ye nte enye oyomde nnyịn idu uwem sia nnyịn itiehe nte mme unam, Jehovah onyụn̄ odụri nnyịn adian idem. (Col. 1:​9, 10) Ntem nnyịn idụhe uwem nte imade-ma, imonyụn̄ idori enyịn ke ini iso ọyọfọn. Edi ata ediwak owo ke ererimbot emi ifiọkke ntak emi Jehovah okobotde nnyịn ye se enye aduakde ndinam. Oro akanam Paul ewet ete: “‘Enyịn ikekwe, utọn̄ ikonyụn̄ ikopke, owo ikonyụn̄ ikereke ke esịt esie iban̄a mme n̄kpọ emi Abasi eketịmde ọnọ mmọ eke ẹmade enye.’ Koro edi nnyịn ke Abasi akayarade mmọ ọnọ ebe ke spirit esie.” (1 Cor. 2:​9, 10) Nnyịn ndifiọk ntak emi Jehovah okobotde nnyịn ye se enye aduakde ndinam anam esịt adat nnyịn.

Edi Jehovah anam ata akamba n̄kpọ en̄wen ọnọ nnyịn. Enem nnyịn ke Jehovah ekeme ndifen idiọkn̄kpọ nnyịn. (1 John 2:12) Ke ntak emi Abasi atuade nnyịn mbọm, imenen̄ede inịm ke enye ọyọsọp ndinam isọn̄ emi edi Paradise. (Rome 12:12) Jehovah onyụn̄ ọnọ nnyịn ediwak nti ufan emi idianade kiet ikpono enye idahaemi. (Ps. 133:1) Bible ọdọhọ ke Jehovah ke ekpeme nnyịn mbak Satan ye mme demon esie ẹdinam nnyịn n̄kpọ. (Ps. 91:11) Esịt eyenen̄ede adat nnyịn edieke itiede ikere kpukpru se Jehovah anamde ọnọ nnyịn emi.​—Phil. 4:4.

SE AKPANAMDE MAN ỌDỌDIỌN̄ OKOP IDATESỊT

Ndi owo ekeme ndidat esịt n̄kan nte enye esidatde? Jesus ọkọdọhọ ete: “Ntịn̄ mme n̄kpọ emi nnọ mbufo, man idatesịt mi okpodu ke esịt mbufo, ẹkpenyụn̄ ẹnam idatesịt mbufo ọyọhọ.” (John 15:11) Ndi emi iwụtke ke imekeme ndikop idatesịt n̄kan nte ikesikopde? Imekeme ndimen idatesịt ndomo ye ikan̄. Edieke oyomde ikan̄ etetịm asak, ana aka iso ọdọn̄ ifia. Ukem ntre, ana aka iso anam mme n̄kpọ oro ẹdinamde fi enyene spirit Abasi. Ti ke edisana spirit esinam owo okop idatesịt. Ntre, edieke oyomde ndikop idatesịt n̄kan nte esikopde, ka iso ben̄e Jehovah ọnọ fi edisana spirit esie. Ana onyụn̄ aka iso etie ekere se afo okotde ke Bible sia ẹkeda edisana spirit ẹwet.​—Ps. 1:​1, 2; Luke 11:13.

N̄kpọ en̄wen emi edinamde fi ọdọdiọn̄ okop idatesịt edi ndinam se Jehovah amade. (Ps. 35:27; 112:1) Ntak idọhọde ntre? Sia Jehovah okobot nnyịn man inịm ibet esie. Ntak edi oro Bible ọdọhọde ete: “Bak ata Abasi nyụn̄ nịm mme ibet esie. Koro ofụri mbiomo emi owo enyenede edi emi.” (Eccl. 12:13) Oro ọwọrọ ke Jehovah okobot nnyịn man inịm ibet esie. Inua ikemeke nditịn̄ nte esịt esidatde nnyịn ke ini inamde se Jehovah amade.b

UFỌN ORO IDIBỌDE EDIEKE ISIKOPDE IDATESỊT

Iyọbọ ediwak ufọn edieke ikade iso ndikop idatesịt. Ke uwụtn̄kpọ, iyọdọdiọn̄ inam esịt Jehovah Abasi adat edieke ikade iso inam n̄kpọ esie inamke n̄kpọ m̀mê nso iwọrọ nnyịn. (Deut. 16:15; 1 Thess. 5:​16-18) Iyoyụhọ ye se inyenede, inyụn inyịme ndiyak n̄kpọ atak nnyịn ke ntak Obio Ubọn̄ Abasi. (Matt. 13:44) Ke ini ikụtde ufọn oro ibọde ke ntak oro ikenyịmede ndiyak n̄kpọ atak nnyịn, esịt ọyọdọdiọn̄ adat nnyịn. Iyanam mbon oro ẹdude ye nnyịn ẹkop idatesịt n̄ko edieke esịt adatde nnyịn.​—Utom 20:35; Phil. 1:​3-5.

Ete kiet emi esinamde ndụn̄ọde ke ufọkn̄wed ntaifiọk ke Nebraska ke United States aban̄a se owo akpanamde man idem ọsọn̄ enye ekewet ete: “Ekeme ndidi udûnyeneke ndusụk udọn̄ọ ke ini iso edieke afo esikopde idatesịt idahaemi onyụn̄ oyụhọde ye se afo enyenede.” Ukem se Bible etịn̄de edi oro ke Mme N̄ke 17:22. Itie oro ọdọhọ ke “esịt eke adarade ọkọk ubiak.” Omokụt do ke idem ekeme ndisọn̄ fi edieke afo esikopde idatesịt.

Ndiben̄e Jehovah ọnọ nnyịn edisana spirit esie, ndikpep Bible, nnyụn̄ ntie n̄kere se ikpepde ayan̄wam nnyịn idọdiọn̄ ikop idatesịt kpa ye oro uwem ọsọn̄de ntem. Esịt ọyọdọdiọn̄ adat nnyịn n̄ko edieke itiede ikere se Jehovah anamde ọnọ nnyịn idahaemi, ikpebede mbon oro ẹkebuọtde idem ye enye, inyụn̄ idomode ukeme inam se enye amade. Edieke inamde kpukpru emi, ikọ Psalm 64:10 oyosu nnyịn ke idem. Itie oro ọdọhọ ete: “Edinen owo ayadara ke Jehovah onyụn̄ ada enye ke ebiet ubọhọ.”