Ndikpep Nte Ẹkpedude Eti Uwem

Ke ini ufọkn̄wed kiet emi enen̄erede ọwọrọ etop ke Canada ẹkekade isan̄, ndusụk nditọ ufọkn̄wed oro ẹma ẹdan̄ eyen ufọkn̄wed mmọ ke n̄kanubọk. Ke n̄kpọ emi ama eketịbe, Leonard Stern ama ewet ke n̄wedmbụk n̄kpọntịbe oro ẹkotde Ottawa Citizen, ete: “Ndidiọn̄ọ n̄wed, ndika eti ufọkn̄wed, ndinyụn̄ nnyene n̄kpọ ikpanke mme uyen ndinam idiọkn̄kpọ.”

Stern ama ewet n̄ko ete: “Se ete ye eka ẹkpedade ke akpan n̄kpọ ẹkan ekpedi ndikpep nditọ mmọ se idide eti ye idiọk. Edi se ikam ibehede ediwak ete ye eka edi nditọ mmọ ndinen̄ede mfiọk n̄wed nnyụn̄ nnyene eti utom man ẹnyene ediwak okụk.”

Imọdiọn̄ọ ke ọfọn ndika n̄wed. Edi ọkpọkọm ufọkn̄wed ọfọn didie, enye ikemeke ndinam owo etre idiọkn̄kpọ. Ntre, m̀mọ̀n̄ ke ikeme ndikpep nte ikpodude eti uwem?

EBIET EMI IKEMEDE NDIKPEP NTE IKPODUDE ETI UWEM

Bible etie nte ukụtiso. Ke ini ikotde Bible, imesikụt ebiet emi nnyịn mînamke ọfọn ye mme edu oro anade ikpụhọde. (James 1:23-25) Edi enyene n̄kpọ en̄wen emi Bible anamde ọnọ nnyịn. Enye esin̄wam nnyịn ikpụhọde nte idude uwem inyụn̄ inyene mme edu emi ẹdinamde idu ke emem ye mme owo, utọ nte eti ido, mfọnido, ime, mfara-ke-idem, ye ima. Bible ọdọhọ ke ima esinen̄ede anam mme owo ẹdiana kiet. (Colossae 3:14) Ntak emi enen̄erede oyom inyene ima? Kop se Bible etịn̄de aban̄a edu emi.

• “Ima enyenyene anyanime onyụn̄ ọfọn ido. Ima ifịbeke ufụp, inamke inua, ikohokede idem, inamke ido eke mîdotke, iyomke ufọn idemesie, isọpke iyatesịt. Ibatke idiọk ibon. Idarake ukwan̄ido, edi adara se idide akpanikọ. Enye ememe kpukpru n̄kpọ, . . . ọyọyọ kpukpru n̄kpọ. Ima idibehe ifep tutu amama.”—1 Corinth 13:4-8.

• “Ima inamke mbọhọidụn̄ esie idiọk.” —Rome 13:10.

• “Akan kpukpru n̄kpọ, ẹnyene ufiop ufiop ima ẹnọ kiet eken, koro ima ofụkde ekese idiọkn̄kpọ.”—1 Peter 4:8.

Esitie fi didie ke idem ke ini odude ye mbon emi ẹmade fi? Ndi isinemke fi? Esinem sia ọmọfiọk ke mmọ ẹyom ufọn fo, ke mmọ idinyụn̄ ikohokoi inam fi ibak.

Ima esinyụn̄ anam mme owo ẹkpụhọde nte ẹdude uwem man ẹnem mbon en̄wen esịt. Ke uwụtn̄kpọ, ke ini ete kiet emi idikotde George ekenyenede eyeyen, enye ama enen̄ede ama eyeyen esie tutu oyom ndisidu ye enye kpukpru ini. Edi sia George ekesin̄wọn̄de sika n̄kpa n̄kpa, ebe eyen esie ikamaha enye esin̄wọn̄ sika ke iso nsekeyen oro. Nso ke George akanam? Okposụkedi emi enye ama ọkọn̄wọn̄ sika ke ofụri isua 50, enye ama etre sika ke ntak eyeyen esie. Omokụt do se ima ekemede ndinam!

Nnyịn isidaha-da ima imana, isikpekpep. Mme ete ye eka ẹsinen̄ede ẹkpep nditọ mmọ nte ẹkpemade mme owo. Mmọ ẹsinọ nditọ mmọ udia ẹnyụn̄ ẹse ẹban̄a mmọ ke ini ẹdade unan m̀mê ẹdọn̄ọde. Nti ete ye eka ẹsineme nneme ye nditọ mmọ ẹnyụn̄ ẹkpep mmọ n̄kpọ. Mmọ ẹsinyụn̄ ẹtụnọ nditọ mmọ, ndien emi esịne ndikpep mmọ se idide eti ye idiọk. Nti ete ye eka ẹsinyụn̄ ẹnịm eti uwụtn̄kpọ ẹnọ nditọ mmọ.

Edi ndusụk ete ye eka isinamke mme n̄kpọ emi ye nditọ mmọ. Ndi oro ọwọrọ ke nditọ mmọ idiwọrọke n̄kpọ? Ihih! Ediwak ikpọ owo, ẹsịnede mbon emi ete ye eka mmọ mîkekpepke mmọ ido, ẹkpụhọde ẹnyụn̄ ẹkabade ẹdi nti owo. Ẹkekere ke ndusụk mmọ idikemeke ndikpụhọke. Iyokop mbụk mmọ ke ibuotikọ oro etienede.