EDI EYO ESIERE URUA N̄KPỌ ỌDỌK NSO KE IKPANAM?
Da Uwem Nte Okụtde
Urua n̄kpọ ama ọdọk sụn̄sụn̄ sụn̄sụn̄, ekeme nditie nnyịn nte inyeneke se itịbede, akpan akpan ekpedi okụk ke odụk nnyịn ubọk akan nte ekedide. Edi, urua n̄kpọ ama ọdọk ntịme ntịme edi okụk idụkke nnyịn ubọk ikan nte ekesidụkde, esịt ekeme nditịmede nnyịn, ibuot onyụn̄ oyon̄ nnyịn, akpan akpan ekpedi imenyene ubon oro anade ise iban̄a.
Nnyịn ikemeke nditre urua n̄kpọ ndidọk. Edi, edieke idade uwem nte ikụtde, oro ekeme ndin̄wam nnyịn.
NTAK EDIDE AKPAN N̄KPỌ
Edieke owo ọdiọn̄ọde ke inyeneke se imọ ikemede ndinam mban̄a urua n̄kpọ ndidọk, ekeme ndimem enye utom ndinam mme n̄kpọ emi:
Nditre nditịmede esịt. Edieke esịt anade owo sụn̄, enye eyekere n̄kpọ ọfọn onyụn̄ ebiere n̄kpọ ọfọn.
Ndifep mme ido oro mîfọnke. Ke uwụtn̄kpọ, idifọnke owo etre ndikpe mme n̄kpọ oro akpanade enye ekpe mîdịghe abiat okụk ntịme ntịme.
Nditre nditọhọ ye mbonubon esie ke ntak okụk.
Ndidiọn̄ọ mme n̄kpọ oro enye akpanamde man enyene se oyomde, ndien emi ekeme ndisịne ndikpụhọde mme n̄kpọ oro enye enen̄erede oyom nnyụn̄ nsio urua ke nte enye abiatde okụk.
SE EKEMEDE NDINAM
Nyịme ndikpụhọde ntiene nte n̄kpọ etiede. Ke ini urua n̄kpọ ọdọkde ntịme ntime, ọkpọfọn osụhọde ubọk nte abiatde okuk, edieke ekemede. Ndusụk owo ẹsidomo ndidu uwem nte imọ owo ke ini edide mmọ idikemeke ndidu uwem oro nsịm utịt. Ndidu utọ uwem oro etie nte ndidi mmọn̄ ke ọtọ edi owo ke ọwọk ebịne! Ayakak enye. Edieke edide emenyene ubon, ekeme ndidi emekere n̄ko nte edisan̄ade ise iban̄a mmọ—ntre ke akpana edi! Edi kûfre ke se mbonubon fo ẹnen̄erede ẹyom edi afo ndima mmọ nnyụn̄ nnyene ini ndu ye mmọ. Se idide akpan n̄kpọ ikan edi oro.
Owo ndidomo ndidu uwo-uwo uwem ke ini edide ubọk esie isịmeke etie nte ndidi mmọn̄ ke ọtọ edi, enye ke ọwọk ebịne