Mbụme Oro Mme Andikot Ẹbụpde

Ndi Ẹda Odudu Abasi Ẹnam Kpukpru Utịbe Utịbe Ukọkudọn̄ọ?

Edi akpanikọ ke Jehovah Abasi enyene odudu ndikọk mme owo udọn̄ọ. Onyụn̄ edi akpanikọ ke enye ekeme ndinọ mbon oro ẹtuakde ibuot ẹnọ enye odudu oro. Ke uwụtn̄kpọ, ke eyo mme apostle, edikọk mme owo udọn̄ọ ke utịbe utịbe usụn̄ ekedi kiet ke otu san̄asan̄a enọ edisana spirit. Apostle Paul ewet ete: “Ẹnọ owo kiet kiet uyarade spirit kaban̄a uduak oro enyenede ufọn. Ke uwụtn̄kpọ, ẹnọ owo kiet spirit ikọ ọniọn̄ oto ke spirit, . . . ẹnọ owo en̄wen enọ ukọkudọn̄ọ oto ke spirit kiet oro, . . . ẹnọ owo en̄wen editịn̄ ntịn̄nnịm ikọ, . . . ẹnọ owo en̄wen editịn̄ nsio nsio usem.”—1 Corinth 12:4-11.

Edi Paul ama ewet kpasụk ke leta oro enye ọkọnọde ẹsọk mbon Corinth do ete ke utịbe utịbe enọ edisana spirit Abasi ẹyetre. Enye ọkọdọhọ ete: “Edi edide enọ editịn̄ ntịn̄nnịm ikọ, mmọ ẹyebe ẹfep; edide editịn̄ ikọ ke usem, mmọ ẹyedobo; edide ifiọk, enye eyebe efep.”—1 Corinth 13:8.

Ke n̄kpọ nte tọsịn isua iba emi ẹkebede, Jesus Christ ye mme apostle esie ẹma ẹsikọk mme owo udọn̄ọ ke utịbe utịbe usụn̄. Ke ini ẹketọn̄ọde esop Christian obufa, mme enọ eke spirit, emi esịnede ukeme edikọk mme owo udọn̄ọ, ẹkedi usụn̄ ndinọ Abasi ubọn̄ nnyụn̄ n̄wụt ke Jehovah enyịme onyụn̄ ọdiọn̄ esop Christian oro ẹketọn̄ọde obufa do. Edi ke esop Christian ama ọkọwọrọ ada, m̀mê ke ama ọkọsọn̄ọ ada, owo ikadaha aba san̄asan̄a enọ iwụt ke Abasi enyịme esop emi, utu ke oro, ẹkenyene ndida ata mbuọtidem, idotenyịn, ye ima mfiọk ke Abasi enyịme esop emi. (John 13:35; 1 Corinth 13:13) Ntem, ke n̄kpọ nte isua 100 E.N., Abasi ikọnọhọ mme owo aba ukeme ndikọk udọn̄ọ man owụt ke imọ imenyịme esop oro.a

Edi afo emekeme ndibụp ete, ‘Ntak emi mme owo ẹsidọhọde ke ẹsụk ẹkọkọk udọn̄ọ ke utịbe utịbe usụn̄?’ Ke uwụtn̄kpọ, n̄wedmbụk n̄kpọntịbe kiet etịn̄ aban̄a owo emi ẹdọhọde ke ama ọdọn̄ọ kansa. Enye ama enyene mbufụt ke ibuot, ekpụt, onyụn̄ akam enyene ke esịt ọkpọ. Enye ikenyeneke idotenyịn tutu usen oro enye ọdọhọde ke Abasi “eketịn̄ ikọ” ye imọ. Nte mbụk oro ọdọhọde, ke usen ifan̄ ẹma ẹkebe, kansa esie ama okụre.

Edieke okopde utọ mbụk oro, ntak emi mûbụpke idemfo ute: ‘Ndi mbụk emi edi akpanikọ? Nte n̄wed ufọkibọk odu ndiwụt ke se ẹtịn̄de emi edi akpanikọ? Idem ekpedi etie nte ẹma ẹkọk udọn̄ọ emi, ndi Bible ekpep ke Abasi esinọ odudu ẹda ẹkọk kpukpru udọn̄ọ oro etiede nte ẹkọk ke utịbe utịbe usụn̄?’

Ibọrọ akpatre mbụme emi enen̄ede edi akpan n̄kpọ. Jesus ama odụri mme mbet esie utọn̄ ete: “Ẹkpeme idem ye mme prọfet nsu . . . Ediwak owo ẹyedọhọ mi ke usen oro ẹte, ‘Ọbọn̄, Ọbọn̄, nte nnyịn ikadaha enyịn̄ fo itịn̄ ntịn̄nnịm ikọ, inyụn̄ ida enyịn̄ fo ibịn mme demon iduọn̄ọ, inyụn̄ ida enyịn̄ fo inam ediwak utom odudu [mme utịben̄kpọ]?’ Ndien adan̄aoro nyọdọhọ mmọ nte: Akananam ndiọn̄ọke mbufo! Ẹdianade mi ke idem, mbufo mme abiatibet.”—Matthew 7:15, 21-23.

Emi owụt ke ekeme ndidi inua-okot odudu ukọk udọn̄ọ ke utịbe utịbe usụn̄ itoho Abasi. Oyom inyene nnennen ifiọk Abasi, ida ukeme oro Abasi ọnọde nnyịn ikere n̄kpọ, inyụn̄ ikpep nte ikpọfiọkde mbon oro ẹnamde uduak Abasi, mbak mbon oro ẹdọhọde ke ida enyịn̄ Abasi ikọk udọn̄ọ ẹdibian̄a nnyịn.—Matthew 7:16-19; John 17:3; Rome 12:1, 2.

[Ikọ Idakisọn̄]