San̄a Kpere Abasi

Ke Ini Jehovah Eketịn̄de nte Imọ Itiede

Exodus 34:6, 7

AFO ọkpọdọhọ ke Abasi etie didie—oro edi, mme edu esie ye nte enye esinamde n̄kpọ? Kere nte ekpekemede ndibụp Abasi mban̄a nte enye etiede onyụn̄ akpan̄ utọn̄ nte enye asiande fi mme edu esie. Prọfet Moses ama enyene utọ ifet oro. Imokop inemesịt sia ẹma ẹnọ enye odudu spirit ada ewet se iketịbede.

Moses ama eben̄e Jehovah ke Obot Sinai ete: “Mbọk wụt mi ubọn̄ fo.” (Exodus 33:18) Ke ndan̄nsiere, ẹma ẹnọ enye ifet ndikụt ubọn̄ Abasi.a Moses iketịn̄ke ofụri se enye okokụtde ke ubọn̄ ubọn̄ n̄kukụt oro. Edi enye ama ewet n̄kpọ oro ekenen̄erede enyene ufọn akan—oro edi, se Abasi eketịn̄de. Ẹyak idụn̄ọde se Jehovah eketịn̄de, emi ẹwetde ke Exodus 34:6, 7.

Akpa n̄kpọ emi Jehovah eketịn̄de aban̄a idemesie edi ke imọ idi “Abasi mbọm, ye mfọn.” (Ufan̄ikọ 6) Eyen ukpepn̄kpọ Bible kiet ọkọdọhọ ke ikọ Hebrew oro ẹkabarede “mbọm” owụt nte Abasi “enyenede esịtmbọm, nte emi ete enyenede aban̄a nditọ esie.” Ikọ oro ẹkabarede “mfọn” enyene ebuana ye ikọ edinam oro “owụtde owo emi esịt esie ọdọhọde enye anam n̄kpọ ọnọ owo oro odude ke unana.” Ana in̄wan̄-in̄wan̄ ke Jehovah oyom nnyịn ifiọk ke imọ imesise iban̄a mme andituak ibuot nnọ imọ nte emi ete ye eka ẹsidade ata ima ẹnọ se nditọ mmọ ẹyomde.—Psalm 103:8, 13.

Ekem, Jehovah ete ke imọ imenyene “anyan ime.” (Ufan̄ikọ 6) Enye isisọpke iyat esịt ye mme asan̄autom esie eke isọn̄. Edi enye esime ime ye mmọ, ọyọ unana-mfọnmma mmọ, onyụn̄ ọnọ mmọ ini ndikpụhọde usụn̄ uwem mmọ.—2 Peter 3:9.

Abasi aka iso ọdọhọ ke imọ ‘imawak ima ye akpanikọ.’ (Ufan̄ikọ 6) Ima m̀mê ima nsọn̄ọnda edi akpan edu oro Jehovah adade ọsọn̄ọ n̄kpet n̄kpet itie ebuana emi mîkemeke ndikpu ye ikọt esie. (Deuteronomy 7:9) Akpanikọ n̄ko oto Jehovah. Enye ikemeke ndibian̄a owo, owo inyụn̄ ikemeke ndibian̄a enye. Sia enye edide “Abasi akpanikọ,” nnyịn imekeme ndinen̄ede mbuọt idem ke kpukpru se enye etịn̄de, emi esịnede se enye ọn̄wọn̄ọde ndinam ke ini iso.—Psalm 31:5.

Ata akpan n̄kpọ en̄wen oro Jehovah oyomde nnyịn ifiọk iban̄a imọ edi ke imọ imesifen “mme ukwan̄-n̄kpọ, ye ndudue.” (Ufan̄ikọ 7) Enye “ama ndidahado” nnọ mme anamidiọk oro ẹkabarede esịt. (Psalm 86:5) Edi Jehovah isidaha idiọkido didie didie. Enye ọdọhọ ke imọ “iyakke mbon-isop ẹbọhọ.” (Ufan̄ikọ 7) Edisana Abasi emi ekpede edinen ikpe iditreke ndinọ mbon oro ẹkoide-koi ẹnam idiọkn̄kpọ ufen. Ebebịghi awawara mmọ ẹyebọ utịp idiọkn̄kpọ mmọ.

Se Jehovah etịn̄de aban̄a edu esie owụt in̄wan̄-in̄wan̄ ke enye oyom nnyịn ifiọk imọ inyụn̄ ifiọk mme edu imọ ye nte imọ isinamde n̄kpọ. Nte idọn̄ke fi ndinen̄ede n̄kpep mban̄a nti edu esie?

[Ikọ Idakisọn̄]