Ndi Ama Ọfiọk?

Nso utọ n̄kpọisan̄ ke eunuch emi ekedide owo Ethiopia do ekesịne ini Philip okosobode ye enye?

KE USEM emi ẹkedade ẹwet mbụk oro, ikọ oro ẹkabarede nte “chariot” ke Edikabade Eke Obufa Ererimbot iban̄ake utọ n̄kpọisan̄ kiet, awak utọ. (Utom 8:28, 29, 38) Edi etie nte n̄kpọisan̄ emi owo Ethiopia oro ekesịnede ama okpon akan ekpri chariot ekọn̄ m̀mê eke mbuba itọk. Se ndusụk se inamde idọhọ ntre mi.

Owo Ethiopia oro ekedi akwa owo ke ukara ndien ebiet emi enye okotode edika Jerusalem ama oyom usụn̄ etieti. Enye ekedi “akamba owo emi odude ke idak Candace ọbọn̄ an̄wan Ethiopia, onyụn̄ [ese] aban̄a ofụri inyene n̄wan emi.” (Utom 8:27) Ebiet emi idiọn̄ọde nte Sudan ye ata usụk usụk Egypt mfịn ẹkesịne ẹnọ Ethiopia ke ata eset. Itiehe nte n̄kpọisan̄ emi ekemende owo Ethiopia oro aka Jerusalem akafiak emen enye ọnyọn̄, anaedi enye ama onyụn̄ akama mbiomo awak ke utọ anyan isan̄ oro. Kiet ke otu n̄kpọisan̄ emi ekesimende mme akaisan̄ ke eyo mme apostle ekesidi ukpatn̄kpọ emi ekenyenede ikpat inan̄ ye ọkọm. N̄wed kiet emi ekerede Acts​—An Exegetical Commentary ọdọhọ ke “utọ n̄kpọisan̄ oro ama okpon ekem se ẹdọn̄de mme ekpat ye n̄kpọ en̄wen, anam isan̄ enen̄ede enem owo ke idem, ndien ke anaedi ama esinyụn̄ edi se ẹdade ẹka ebiet emi oyomde usụn̄.”

Owo Ethiopia oro okokot n̄wed ini Philip okosobode ye enye. Mbụk emi odude ke Utom 8:30 ọdọhọ ete: “Philip efehe ekesịm onyụn̄ okop nte [eunuch oro] okotde n̄wed prọfet Isaiah uyo ọwọrọ.” Ukpatn̄kpọ emi ẹkesidade ẹka isan̄ ikesinen̄ekede isọp uwat ntre. Enye oro akanam eunuch oro ekeme ndisịne do n̄kot n̄wed, onyụn̄ anam Philip ekeme ndifehe ke ukot n̄kesịm ukpatn̄kpọ oro.

Owo Ethiopia oro ama “ekpe Philip ubọk ete ọdọk editie ye imọ.” (Utom 8:31) Ke chariot emi ẹkesidade ẹka mbuba itọk, mme andiwat ẹkesidada. Edi ke ukpatn̄kpọ emi ẹkesidade ẹka isan̄, anaedi itie ama odu se eunuch oro ye Philip ẹsụhọrede ẹtie.

Ke ntak se ikụtde ke n̄wed Utom ibuot 8 emi Abasi ọkọnọde spirit esie ẹwet ye se ikụtde ke mbụkeset, mme ndise eunuch emi ekedide owo Ethiopia do, emi ẹdrọde ke mme n̄wed nnyịn ndondo emi ẹwụt nte enye esịnede ke n̄kpọisan̄ emi okponde akan chariot ekọn̄ m̀mê eke mbuba itọk.