BEƊEA 3

Adaʉ̃ba Evamerãba ĩjãnaẽ́ basída Ãcõrẽba jaraɗara

Evaba Adaʉ̃a neta diapeɗa, Adaʉ̃ba jida eroɓʉda neta idji jʉwaɗe

Ewari aɓaʉɗe Eva idjiduɓa ɓasida, maʉ̃ne damada beɗeasia idjía. Idisida: “¿Wãrãda Ãcõrẽba cobicada neta ni aɓaʉ bacuruɗebemara? Evaba panusida: “Poya coɗida netara. Baribʉrʉ aɓa ɓʉɗebemara poya coɗaiẽ́da panʉda. Coɗibʉrʉ, beuɗida”. Damaba jarasia: “Mãwãẽ́a, bãrãba coɗibʉrʉ barãra Ãcõrẽ quĩrãca pananida”. ¿Damaba wãrãda jarasida? Mãwãẽ́a. Jãʉ̃ra sewa ɓasida. Baribʉrʉ Evaba ĩjãsida. Neta unubʉrʉza mãsa co quĩrĩãsida. Idjia copeɗa dji quimaa diasida. Mãwãmĩna Adaʉ̃ba cawa ɓasida. Baribʉrʉ idjia cosida.

Adaʉ̃ra Evame Edeʉ̃ puruɗeba ãyã jʉretacuapeɗa Jeowaba ɓʉsia umé angelerãda eɗa wãbadamae. Idjaɓa ɓʉsia neco urua ɓʉda, iduɓa pʉrrʉga jira ɓʉda

Ewari aɓaʉɗe Jeowara beɗeasida Adaʉ̃ idjaɓa Evame. Idisida: “¿Cãrẽã bãrãba ĩjãnaẽ́ basída?”. Evaba jarasida: “Damaba jaraɗada ĩjãsida”. Adaʉ̃ba jarasida: “Evaba jãwã jarasida”. Adaʉ̃ba Evamerãba ĩjãnaẽ́ ɓaɗa bẽrã Jeowaba ãyã jʉretabuesida ẽjũã quĩrãwãrẽãne pananada. ¿Cãrẽda osida Jeowaba? Ẽjũã quĩrãwãrẽãne jẽda wãrãnamãrẽã, Jeowaba ɓʉsida umé angelerãda eɗa wãbadamae. Idjaɓa neco urua ɓʉda, iduɓa pʉrrʉga jira ɓʉda ẽberãrãa jiruãbẽrã zerãɗãmãrẽã.

¿Caiba beɗeabisida damara? Aɓa angel dji cadjiruaba beɗeabisida damara. Ununaca quĩrĩã ɓasida Evara. Jãʉ̃gʉ angel trʉ̃ jarabada Satana Diauru. Dãrãẽ́ne Jeowaba jõbida Satanara ne cadjirua orãnamãrẽã, idjaɓa cũrũgarãmãrẽã ẽberãrãa.

“Diaurua [...] Idjira naãrãeɗaʉba mĩã beabaria. Wãrãneba ɓacaa idjaɓa wãrã beɗeara jaracaa. Sewa obaria sewaiɗa ɓʉ bẽrã idjaɓa sewa zeza bẽrã” (Juaʉ̃ 8:44).