Sei ne cadjiruarã Ãcõrẽba zebisida

Moise idjaɓa Aaroʉ̃ siɗa wãsiɗada acʉɗe Paraoʉ̃da jaraɗi carea beɗea bia Ãcõrẽneda: “Bʉa idu wãbiẽ́bʉrʉ ãyã mʉ̃ puruɗebemada, mãwãra mʉ̃a diabueida pochĩdauda zocãrã”. Jaʉ̃gʉba bio cabadada. Jãʉgʉ pochĩdaurãra zocãrã wãsiɗada deza Egipto puruɗe. Parata bara ɓea deza, ne neẽ́ queɗea deza. Baribʉrʉ ẽjũã Goseʉ̃ jãma panabadjiɗada israelerãra, jãma neẽ́ basida jaʉ̃ pochĩdaurã. Naʉ̃gʉ quĩmãrẽbema Ãcõrẽba ne cadjirua diabueɗara, Egipto puruɗaa zesiɗada ne biaẽ́ oɗi carea. Baribʉrʉ jãʉ̃ animarãrãba ne cadjirua oɗaẽ́ basida Israel puruɗera. Paraoʉ̃ba jarasida Moisea: “Ididua Jeowaa ãyã ɓʉmãrẽã jãʉ̃ animarãra, mãwãnacarea ãyã wãnida ãdjirãra”. Baribʉrʉ Jeowaba ãyã ɓʉsida, mãwãnacarea idjia ĩjãẽ́ basida. ¿Ewari aɓaʉɗe Paraoʉ̃ba idu ɓʉida Israelitarãra wãbiɗamãrẽã?.

Mãwãnacarea Jeowaba jarasida: “Ãyã ɓʉẽ́bʉrʉ mʉ̃ puruɗebemada animarãra jũma quinibida”. Jaʉ̃ ewariɗe mãwãsida Jeowaba jaraɗa quĩrãca. Animarã Egiptoɗebemarã jũma quinisiɗada. Baribʉrʉ Paraoʉ̃ba ĩjãẽ́ basida Jeowa beɗeara. Idjia mãsa ne cadjirua osida. Baribʉrʉ Jeowaba bio wagasida israelerãra, ni aɓaʉ animarãra beuɗaẽ́ basida.

Mãʉ̃ bʉrʉ Jeowaba diabuesida Moisera wãyã acʉɗe wãmãrẽã Paraoʉ̃nea, itabarra porada jãmãposida. Mãʉ̃ bʉrʉ jãʉ̃ porara ẽberãrã Egiptoɗemerã ʉ̃rʉ ɓaesida idjaɓa ãdji animarã siɗa. Jãʉ̃gʉba ãdji cacuarã bio poasiɗada chãdara. Mãwãmĩna Paraoʉ̃ waɗi idji sora cadjirua ɓasida.

Jeowaba wãya diabuesida Moisera acʉɗe jaramãrẽã Paraoʉ̃ra. Idjia idisida: “¿Bʉa waɗi ãyã ẽdrʉ ɓʉẽ́da mʉ̃ purura? Nurẽma Jeowaba cueda hielo quĩrãca jurrubiya idjaɓa baada, tʉbʉ quĩrãca uruabiya”. Egipto purura bio djuburiasiɗada. Bacururã jũma básida chirua siɗa. Mãwãmĩna israelerãra Jeowaba wãyã wagasida. Maʉ̃ bʉrʉ Paraoʉ̃ba jarasida: “Jeowa naʉ̃da jõsira, bãrãra poya wãnida”. Baribʉrʉ idjia wãyã sewada jarasida”.

Mãʉ̃ bʉrʉ Moiseba jarasida: “Ara maʉ̃da aɗichichiba jũma coɗida chirua ɓedara cueba jũma jõnaɗebema”. Zocãrã aɗichichirãba jũma cosiɗada bacuru queɗuara. ¿Bʉmaarã Paraoʉ̃ba awara quĩcha ɓesida?

Wãya Jeowaba jarasida Moisea: “Jʉwada ʉ̃taa wadua bajãnaa”. Ara maʉ̃ bajãra pãĩsosua nũmesida. Egiptoɗebemarãba poya ununaẽ́ basida ewari ũbea, ʉ̃naara ununaca basida. Aɓabe israelerãbʉrʉ ʉ̃naara unubadjiɗaa.

Paraoʉ̃ba jarasida Moisea: “Poya wãnida. Ameida bʉ animarãra nama. Bãrãdrʉ poya wãnida”. Moiseba panusia: “Edeɗibara dai animarãra diaɗi carea ne biada dadji Ãcõrẽa”. Paraoʉ̃ra bio quĩrũsida. Jĩgua ɓiasida: “Wãdua ãyã. Bʉda wãya zeibʉrʉ, beaida”.