Die ne cadjirua Ãcõrẽba zebisia

Moiseba jarasida Paraoʉ̃a: “Wa mʉ̃me ununaẽ́da”. Baribʉrʉ wãi naẽna idjia jarasida: “Bʉ warrarã nabema ariquẽtra beuida idjaɓa dji warrarã iwina Egiptoɗebemara ẽberãra jũma quininia”.

Jeowaba jarasida israelitarãra: “Ne biada coɗadua. Beaɗapeɗa oveja zaqueda jãʉ̃gʉ oaba soaɗida jũãtrʉbari deza”. Ara jãʉ̃ quĩrãca jarasida: “Dji ne djãrãra báɗapeɗa coɗida idjaɓa paʉ̃da ẽsãbari neẽ́a ɓʉme coɗida. Mãwãnacare ne coɗapeɗa, cacuaɗe jʉ̃nida, jĩrũne jʉ̃bada siɗa. Dau ʉɓʉa pananida. Jãʉ̃gʉ diamasi wãnida”. Ãdjirã bio ɓʉrsiɗasiɗada.

Ariquẽtra angel Jeowaɗebemaba wãsida deza Egiptoɗe. Jãʉ̃gʉ diamasi idjia dji de soaẽ́ ɓʉra oaba jãʉ̃gʉ warra dji nabemarã quinisiɗada baribʉrʉ jãʉ̃gʉ de oaba soa ɓeara angelba ne cadjirua oẽ́ basída. Jũma cuariara Egiptoɗebema parata bara bea, parata neẽ́ bea; jãʉ̃gʉnera warrarã nabema quinisida. Ni aɓaʉ warrarãda israeleɗera beuɗaẽ́ ɓasida. Dji warra nabema Paraoʉ̃ne beusida. Idjia wa droaẽ́ basida, maʉ̃ bʉrʉ idjia jarasida Moisea, Aaroʉ̃ siɗa: “Ãyã wãnadua nama pananara. Ãyã wãnadua dji iwiɗiɗe bãrã Ãcõrẽa idjaɓa ede wãnadua bãrã animarã siɗa”.

Jãʉ̃ jeɗeco diamasi israelerãba wãsiɗada ãyã dji cuariarãme. Zocãrã panasiɗada. Idjaɓa zocãrã israelerãẽ́ ɓeada wãsiɗada ãdjirãme dji iwiɗiɗi carea Jeowaa.

Quĩrãnebaɗi carea Jeowaba ẽdrʉbiɗa ãdjirãra Egiptoɗebemara, israelerãba jãʉ̃ ewariɗe abarida cosiɗada poagaza. Jãʉ̃gʉ ne cosiɗada trʉ̃ jarabadaa Pascua.