Exodo

Jũma umaquĩrã warra dji nabemarãda Ãcõrẽa diaɗida panʉa

13 Maʉ̃be Ãcõrẽba Moisea jarasia:

2 –Israelerãba ãdji umaquĩrã warra dji nabemarãda, ãdji animarã dji umaquĩrã naãrã topeɗaɗa siɗa mʉ̃́a jũma diaɗida panʉa. Jũma maʉ̃gʉrãra mʉ̃rea.–

3 Maʉ̃be Moiseba israelerãa jarasia:

–Naʉ̃ ewarira quĩrãnebaɗadua Ãcõrẽba idji ʉɓʉaɗeba bãrãra Egiptoɗe nezoca ɓeaɗada ẽdrʉ edaɗa bẽrã. Poaza ara naʉ̃ ewari quĩrãca bãrãba paʉ̃ ẽsãbari bara ɓʉda cocara panʉa bãrã Egiptoɗeba ẽdrʉpeɗaɗara quĩrãnebaɗi carea. 4 Iɗi naʉ̃ jeɗeco Abib abadaɗe bãrãra Egiptoɗeba ẽdrʉbʉdaa. 5 Ãcõrẽba bãrãra Canaaʉ̃ druaɗaa edeya. Maʉ̃ druaɗe baridua ne upeɗaɗara bia zaubaria. Mama cananeorãda, hititarãda, amorreorãda, heveorãda, idjaɓa jebuseorã siɗa duanʉa. Baribʉrʉ Ãcõrẽba bãrã drõã naẽnabemarãa wãrãneba jarasia maʉ̃ druara bãrãa diaida. Jãma jũẽpeɗaɗacarea poaza naʉ̃ jeɗecoɗe bãrãba naʉ̃ quĩrãca oɗida panʉa bãrã Egiptoɗeba ẽdrʉpeɗaɗa ewarida quĩrãnebaɗi carea. 6 13:6-7 Siete ewari bãrãba paʉ̃ dji ẽsãbari neẽ́ ɓʉda coɗida panʉa. Maʉ̃ siete ewariɗe paʉ̃ ẽsãbarira ni maãrĩ biɗa bãrã druaɗe eroɓeaɗiẽ́ panʉa. Jĩrũarebema ewariɗe Ãcõrẽa bia beɗeaɗi carea bãrãra ãbaa dji jʉreɗida panʉa. 7 – 8 Mãwã o panʉne bãrã warrarãa nãwã jaraɗida panʉa: “Dadjirãba nãwã o panʉa Ãcõrẽba dadji israelerãra Egiptoɗeba ẽdrʉ edaɗa quĩrãnebaɗi carea.”

9 Naʉ̃ ewari obadara bãrã jʉwaɗe wa dratuɗe sẽyã quĩrãca ɓʉa. Maʉ̃ba quĩrãnebabi ɓaya bãrãba Ãcõrẽ leyra jaradia pananida panʉda idji ʉɓʉaɗeba dadji israelerãra Egiptoɗeba ẽdrʉ edaɗa bẽrã. 10 Maʉ̃ carea poaza ara naʉ̃ ewari quĩrãca bãrãba maʉ̃ ewari dromada o pananida panʉa.

11 Ãcõrẽba bãrãra cananeorã druaɗaa edepeɗa maʉ̃ druara diaya idjia bãrã drõã naẽnabemarãa, bãrãa biɗa wãrãneba diaida jaraɗa bẽrã. 12 Jãma jũẽpeɗaɗacarea bãrãba jũma bãrã umaquĩrã warra dji nabema tobʉdara, jũma bãrã animarã dji nabema umaquĩrã tobʉda siɗa Ãcõrẽa diaɗida panʉa. Jũma maʉ̃gʉrãra Ãcõrẽnea. 13 Bãrã burro warra dji nabema umaquĩrã tobʉrʉda Ãcõrẽnemĩna, bãrãba maʉ̃ animarãra poya edaɗida panʉa. Edaɗi carea ovejada wa chiwatuda maʉ̃ burro cacuabari Ãcõrẽa babue diaɗida panʉa. Baribʉrʉ maʉ̃ burroda eda quĩrĩãnaẽ́bʉrʉ, bãrãba otapuya beaɗida panʉa. Idjaɓa bãrã umaquĩrã warra dji nabema tobʉdara Ãcõrẽne bẽrã, idji cacuabari ovejada wa chiwatuda Ãcõrẽa babue diaɗida panʉa maʉ̃ warrara zocai ɓemãrẽã. 14 Iɗiba ʉ̃taa bãrã warrarãba iwiɗibʉdaɗe: “¿Cãrẽ cãrẽã jãwã obada?”, bãrãba nãwã panunida panʉa: “Jãwã obadaa Ãcõrẽba idji ʉɓʉaɗeba dadjirãra Egiptoɗe nezoca ɓeaɗada ẽdrʉ edaɗa bẽrã. 15 Maʉ̃ ewariɗe Egiptoɗebema borora so zarea ɓeɗa bẽrã dadjirãra ẽdrʉ ɓʉ quĩrĩãẽ́ basía. Maʉ̃ carea Ãcõrẽba jũma Egiptoɗebema umaquĩrã warra dji nabemarãda quinibisia. Egiptoɗebema animarã warra dji umaquĩrã naãrã topeɗaɗa siɗa quinibisia. Maʉ̃ carea dadjirãba jũma animarã warra dji nabema umaquĩrã tobʉdara Ãcõrẽa babue diabadaa. Baribʉrʉ jũma dadjirã umaquĩrã warra dji nabema tobʉda cacuabari oveja zaqueda Ãcõrẽa babue diabadaa. 16 Mãwã obadara dadji jʉwaɗe wa dratuɗe sẽyã quĩrãca ɓʉa. Maʉ̃ba quĩrãnebabi ɓʉa Ãcõrẽba idji ʉɓʉaɗeba dadjirãra Egiptoɗeba ẽdrʉ edasida.”–

Jʉ̃rãrã ʉ̃tʉba eɗaa drasoa jira ɓaɗa

17 Egiptoɗebema boroba israelerã idu wãbisiɗe Ãcõrẽba ãdjirãra dji caitaara ɓʉ óare edeẽ́ basía, maʉ̃ ora pilisteorã druaɗe wã ɓʉ bẽrã. Ãcõrẽba nãwã crĩchasia: “Israelerã wãbʉdaɗe pilisteorãda ãdji ume djõne zeɗibʉrʉ, Canaaʉ̃ druaɗaa wãni crĩcha eropananara igaraɗapeɗa Egiptoɗaa jẽda wãnia.” 18 Maʉ̃ carea Ãcõrẽba ãdjirãra ẽjũã põãsa ewaraga ɓʉɗe wã ɓʉ óare edesia. Maʉ̃ ora Pusa Purru abadaɗaa wã ɓʉa.*

Egiptoɗeba ẽdrʉsiɗaɗe israelerãra djõne wãbʉda quĩrãca wãsiɗaa. 19 Maʉ̃ne Moiseba Jose querasi ɓʉwʉrʉra edesia Canaaʉ̃ druaɗe tʉɓari carea. Mãwã osia Jose querasiba naẽna israelerãa wãrãneba jarabiɗa bẽrã mãwã oɗamãrẽã.* Jose querasiba nãwã jarasia:

–Wãrãda Ãcõrẽba bãrãra carebaya. Maʉ̃ ewariɗe bãrãba mʉ̃ ɓʉwʉrʉra namaʉba Canaaʉ̃ druaɗaa tʉɓariɗe edeɗadua.–

20 Egiptoɗeba ẽdrʉsiɗaɗe israelerãra naãrã Suco puruɗe jũẽne wãnapeɗa Etaʉ̃ puruɗaa wãsiɗaa. Maʉ̃ purura ẽjũã põãsa ewaraga ɓʉ icawa ɓʉa. Mama ãdji wua dera ocuasiɗaa. 21 Israelerã wãbʉdaɗe Ãcõrẽra ãdji na wãbadjia cawaɗamãrẽã sãma wãnida panʉda. Ãsa idjira jʉ̃rãrã quĩrãca ʉ̃tʉba eɗaa drasoa jira ɓabadjia. Diamasi maʉ̃ jʉ̃rãrãra tʉbʉ quĩrãca uruga jira ɓabadjia ʉ̃naane pananamãrẽã. Mãwã ãsa, diamasi biɗa israelerãra poya wãnida panasiɗaa. 22 Maʉ̃ jʉ̃rãrã ʉ̃tʉba eɗaa drasoa jira ɓʉra ãdjirã umebemada ãyã wãca basía. Ãsa jʉ̃rãrã quĩrãca ɓasia. Diamasira tʉbʉ quĩrãca uruga jira ɓabadjia.