1 Samuel

Pilisteorãba Ãcõrẽ baurude jẽda diabuepeɗaɗa

6 Pilisteorãba Ãcõrẽ baurudera ãdji druaɗe siete jeɗeco eropanasiɗaa. 2 Maʉ̃be Dagoʉ̃ sacerdoterãda, dau ẽsã unubadarã siɗa ãbaa trʉ̃cuaɗapeɗa iwiɗisiɗaa:

–¿Ãcõrẽ baurudera sãwã oɗi? Daia jaraɗadua sãwã waya idji ɓaɗamaa diabueɗida.–

3 Ãdjirãba panusiɗaa:

–Bãrãba israelerã Ãcõrẽ baurudera jẽda diabueɗibʉrʉ ara jãwã diabuerãnadua. Ãtebʉrʉ Ãcõrẽa ne diabueɗida panʉa bãrãba idji baurude nama eropanana carea. Mãwãbʉrʉ bãrãba cawaɗia cãrẽ cãrẽã Ãcõrẽba bãrãra bio biẽ́ o ɓʉda. Maʉ̃ awara cacua biacuaɗia.–

4 6:4-5 Pilisteorãba iwiɗisiɗaa:

–Mãẽteara ¿cãrẽda idjía diabueɗi?–

Ãdjirãba panusiɗaa:

–Bãrã bororãra juesuma panʉ bẽrã nãwã oɗida panʉa: oroda edaɗapeɗa bãrã cacuaɗe zarega odjacuaɗa quĩrãca juesuma oɗadua. Maʉ̃ awara dadji drua ãrĩ ɓʉ churi quĩrãca juesuma oɗadua. Maʉ̃gʉra israelerã Ãcõrẽa diabueɗadua bãrãra, bãrã bororã siɗa bia mĩga panʉ bẽrã. Mãwã bãrãba unubiɗia idjida waya panʉda. Ãĩbẽrã idjia dadjirãra, dadji ãcõrẽ ɓeada, idjaɓa dadji ẽjũã siɗa waa biẽ́ oẽ́sicada. 6 ¿Cãrẽ cãrẽã bãrãra egiptorã ãdji boro siɗa so zarea panana quĩrãca so zarea panʉ? Ãcõrẽ baurudera jẽda diabueɗadua. Ãcõrẽba egiptorã bio cawa osiɗe ¿ãdjirãba israelerãra idu wãbisiɗaẽ́ca?

7 Maʉ̃ bẽrã carreta djiwiɗida obiɗadua. Idjaɓa paca warra bara panʉda umé edaɗadua. Maʉ̃ pacara waɗi carreta erreɓariɗacada ɓeaɗida panʉa. Ãdjira carretaɗaa jʉ̃ nũmʉnadua baribʉrʉ dji warrara ãdji ume idu wãbirãnadua; ãtebʉrʉ corraɗe ɓʉɗadua. 8 Maʉ̃be Ãcõrẽ baurudera carretaɗe coɓʉɗadua. Maʉ̃ orrocawa dewara baurudeda coɓʉɗadua. Maʉ̃ne eɗa bãrãba oro ocuaɗara ɓʉɗadua. Maʉ̃ra Ãcõrẽa diabueɗadua idji baurude eropanana carea. Maʉ̃bebʉrʉ pacaa carretara idu edebiɗadua.

9 Baribʉrʉ naʉ̃gʉda quĩrãcuitaɗadua: pacaba carretara israelerã puru Bet-semeɗaa edeɗibʉrʉ, wãrãda Ãcõrẽba dadjirãra biẽ́ eroɓasia. Mamaa edeɗaẽ́bʉrʉ dadjirãba cawaɗia idjia dadjirãra jãwã oẽ́ ɓasida; ãtebʉrʉ ara jãwã biẽ́ panesiɗaa.–

10 Ara maʉ̃da mãwã osiɗaa. Paca warra bara panʉda umé edaɗapeɗa carretaɗaa jʉ̃siɗaa. Dji warrara corraɗe ɓʉsiɗaa. 11 Maʉ̃be Ãcõrẽ baurudera carretaɗe coɓʉɗapeɗa dewara baurudeda orrocawa ɓʉsiɗaa. Maʉ̃ne eɗa churi oro ocuaɗara, ãdji cacuaɗe zarega odjacuaɗa quĩrãca oɗa siɗa ɓʉsiɗaa. 12 Paca quenabuesiɗaɗe jipa Bet-semenaa ɓia wãsiɗaa, ni maãrĩ biɗa o ãyã wãnaẽ́ basía. Maʉ̃ne pilisteorã dji droma ɓeara caiɗu acʉɗe wãsiɗaa aɓa Bet-seme daucha.

13 Maʉ̃ ewariɗe israelerã Bet-semeɗebemaba ãdji trigoda jeweɗaɗe ewa duanasia. Maʉ̃ne cawaẽ́ne pacaba dji carretara Ãcõrẽ baurude bara erreɓari enebʉdada unusiɗaa. Maʉ̃ carea bio ɓʉsriɗasiɗaa. 14 6:14-15 Dji carreta Bet-seme druaɗe jũẽsiɗe pacara nũpanesiɗaa ẽberã Josue abada ẽjũãne, mõgara waiɓʉa coɓʉ caita. Mama levitarãba Ãcõrẽ baurudera, oro ocuaɗa bara ɓʉ baurude siɗa edaɗapeɗa maʉ̃ mõgara waiɓʉa ʉ̃rʉ̃ coɓʉsiɗaa. Maʉ̃ne ẽberãrãba carretara ẽgaweɗapeɗa tʉbʉda cajẽrãsiɗaa. Maʉ̃be pacara, dewara animarã siɗa Ãcõrẽa babue diasiɗaa. 16 Pilisteorã bororã juesuma panʉba maʉ̃da ununapeɗa Ecroʉ̃naa jẽda wãsiɗaa.

17 Pilisteorãba ãdji cacuaɗe zarega odjacuaɗa quĩrãca oroɗeda oɗapeɗa Ãcõrẽ baurude eropanana carea Asdo puruba, Gaza puruba, Ascaloʉ̃ puruba, Gat puruba, Ecroʉ̃ puru biɗa Ãcõrẽa aɓa aɓa diasiɗaa. 18 Maʉ̃ awara pilisteorã boro juesuma panʉba dewara puru ɓeada ãdjirã jʉwaeɗa eropanasiɗaa. Puruza churi quĩrãca oro oɗada aɓa diasiɗaa. Ʉ̃cʉrʉ purura mõgaraba jũrã ca ɓeasia idjaɓa ʉ̃cʉrʉ ara jãwã ɓeasia. Maʉ̃ purura ɓeasia pilisteo druaɗeba aɓa mõgara waiɓʉa coɓʉma. Maʉ̃ mõgarara waɗibiɗa Josue Bet-Semeɗebema ẽjũãne ɓʉa israelerãba Ãcõrẽ baurudera ʉ̃rʉ̃ coɓʉpeɗaɗama.

19 Ãcõrẽba israelerã Bet-semeɗebemara setenta quinibisia idji baurudeɗe eɗa acʉpeɗaɗa carea.* Maʉ̃ne purura bio jĩãsia Ãcõrẽba zocãrã quinibiɗa bẽrã. 20 Maʉ̃ carea jarasiɗaa:

–Ãcõrẽra jipa ɓʉ bẽrã ¿caida idji quĩrãpita poya ɓai? Naʉ̃ baurudera ãyã diabueɗida panʉa baribʉrʉ ¿cairãmaa diabueɗi?–

21 Maʉ̃ carea Quiriat-jeariʉ̃ puruɗaa ʉ̃cʉrʉ diabuesiɗaa nãwã jaraɗamãrẽã:

–Pilisteorãba Ãcõrẽ baurudera waya jẽda diabuesiɗaa. Maʉ̃ bẽrã jʉrʉɗe zeɗadua.–