Mateo
11 Jesuba idji ume nĩbabadarã doce panʉ́a mãwã jaraɗacarea mamaʉba puruza jaradiaɗe wãsia.
Jesuba Borocuebari Juaʉ̃nebema jaraɗa
2 Borocuebari Juaʉ̃ preso ɓasiɗe ũrĩsia Ãcõrẽba ẽdrʉ edabari diai jaraɗaba o ɓʉɗebemada. Maʉ̃ carea idji ume nĩbabadarãda umé diabuesia Jesua nãwã iwiɗiɗamãrẽã:
3 –¿Bʉra dji zeida ɓaɗaca, wa dewarada jʉ̃ãnida panʉ?–
4 Jesuba ãdjía nãwã panusia:
–Bãrãba unu panʉda idjaɓa ũrĩ panʉda Juaʉ̃a jaraɗe wãnadua. 5 Dauɓerrea ɓeaɗaba unu panʉa, jĩrũ biẽ́ ɓeaɗara bia nĩnaa, aiɗa bara ɓeaɗara biasiɗaa, cʉwʉrʉ qui ɓeaɗaba ũrĩ panʉa, idjaɓa beupeɗaɗara ʉ̃rẽbacuasiɗaa. Maʉ̃ awara ne neẽ́ queɗeaba beɗea bia Ãcõrẽba carebaiɗebemada ũrĩ panʉa.* 6 Mʉ̃ igaraẽ́ ĩjã ɓʉra bio bia ɓaya.–
7 Juaʉ̃ba diabueɗarã wãpeɗaɗacarea Jesuba arima duanʉ́a Juaʉ̃nebemada beɗeasia:
–Ẽjũã põãsa ewaraga ɓʉɗaa bãrãba Juaʉ̃ acʉɗe wãsiɗaɗe ¿cãrẽda ununida crĩchasiɗa? ¿Nãũrãba cha ureurea eronũmʉda ununida crĩchasiɗaca? 8 Mãwã crĩchaɗaẽ́ basía. Maʉ̃da ¿cãrẽda ununida crĩchasiɗa? ¿Ẽberã bio djio ɓʉda ununida crĩchasiɗaca? Mãwãẽ́a; dji bio djio ɓeara ẽberãrã bororã deɗe panabadaa. 9 Maʉ̃da ¿cãrẽda ununida crĩchasiɗa? ¿Ãcõrẽneba beɗeabarida ununida crĩchasiɗaca? Mãẽ, Ãcõrẽneba beɗeabarida acʉɗe wãsiɗaa. Juaʉ̃ra Ãcõrẽneba beɗeabari dji dromaa. 10 Idjiɗebemada Ãcõrẽ Beɗeaɗe nãwã ɓʉ́ ɓʉa:
Beɗea jarabarida mʉ̃a bʉ na diabueya bʉ o jarimãrẽã.*
11 Mʉ̃a wãrã arada jaraya: naʉ̃ ẽjũãne ni aɓaʉda Juaʉ̃ cãyãbara dji dromaara ɓʉẽ́a.* Baribʉrʉ Ãcõrẽ puruɗebema dji eɗaara quiruda idji cãyãbara dji dromaara ɓʉa.
12 Borocuebari Juaʉ̃ba jaradia ɓeɗaɗeba ʉ̃taa Ãcõrẽ puruɗebemarãra bia mĩga panʉa. Ẽberã cadjiruarãba ãdjira biẽ́ o quĩrĩã panʉa.* 13 Ãcõrẽneba beɗeabadarãba, Moise biɗa Ãcõrẽba ẽberãrã pe eroɓaiɗebemada beɗeabadjiɗaa aɓa Borocuebari Juaʉ̃ ewariɗaa. 14 Ãdjia jarasiɗaa Elía quĩrãca ɓʉda aɓa naãrã zeida. Bãrãba cawa quĩrĩã panʉbʉrʉ, Juaʉ̃ra maʉ̃ ẽberã zeida ɓaɗaa.* 15 Dji cʉwʉrʉ bara ɓʉba quĩrãcuita ũrĩdua.
16 Iɗibema ẽberãrãnebemada mʉ̃a ¿sãwã jarai? Puruɗe warrarã jemene panʉne nãwã ijarabada quĩrãca panʉa:
17 Daiba chiru zasiɗaɗe bãrãra cariɗaẽ́ basía.
Sopuaɗebema trʉ̃ãbi trʉ̃ãsiɗaɗe bãrãra jĩãnaẽ́ basía.
18 Iɗibemarãra ara maʉ̃ quĩrãca panʉa. Borocuebari Juaʉ̃ba ne coca ewarida obadjia idjaɓa ne aseada doca basía. Mãwãmĩna ẽberãrãba jarabadjiɗaa idjira jai bara ɓʉda. 19 Maʉ̃be mʉ̃, Naʉ̃ Djara Edaɗaba ne jũmada cobaria idjaɓa ne jũmada dobaria. Baribʉrʉ ãdjirãba jarabadaa mʉ̃ra ne coya ɓʉda, itua awua ɓʉda. Maʉ̃ awara jarabadaa mʉ̃ra cadjirua obadarã ume, Romanebema boro itea parata jʉrʉ pebadarã ume biɗa nĩbabarida. Baribʉrʉ cawa panʉa Ãcõrẽ necawaara jipa ɓʉda idji ĩjã panʉba jipa obada bẽrã.–
Jesuba idji ĩjãẽ́ ɓea puru quẽãna
20 Maʉ̃be Jesuba ʉ̃cʉrʉ puruda quẽãsia. Maʉ̃gʉrã puruɗe idjia ne ununacada biara oɗamĩna ãdjia cadjiruada igaraɗaẽ́ basía. 21 Nãwã jarasia:
–¡Coraziʉ̃nebemarãra, Betsaidaɗebemarã siɗa mĩã djuburi ɓeaa Ãcõrẽba cawa oi bẽrã! Mʉ̃a ne ununaca bãrã tãẽna oɗara Tiroɗe, Sidoʉ̃ne biɗa oɗabara, maʉ̃ puruɗebemarãba isabe cadjiruada igaraɗapeɗa Ãcõrẽda ĩjãcasiɗaa.* Maʉ̃ carea sopuaɗebema jʉ̃badara jʉ̃casiɗaa idjaɓa tʉbʉ poraɗe chũpanecasiɗaa. 22 Baribʉrʉ mʉ̃a bãrãa jaraya: Ãcõrẽba jũmarã cawa oi ewariɗe Tiroɗebemarã idjaɓa Sidoʉ̃nebemarã cãyãbara bãrãra wetara cawa oya.
23 ¿Capernauʉ̃nebemarãra bajãnaa wãnica? ¡Wãnaẽ́a! ¡Ãcõrẽba bãrãra beuɗarã panabadamaa ɓatabueya!* Mʉ̃a ne ununaca bãrã tãẽna oɗara Sodoma puruɗe oɗabara, jãʉ̃ purura waɗibiɗa ɓacasia.* 24 Baribʉrʉ mʉ̃a jaraya: Ãcõrẽba jũmarã cawa oi ewariɗe Sodomanebemarã cãyãbara bãrãra wetara cawa oya.–
Jesu ĩjã ɓea ʉ̃nãũninebema
25 Maʉ̃ ewariɗe Jesuba jarasia:
–Zeza, bʉra bajãnebema Boroa idjaɓa naʉ̃ ẽjũãnebema Boroa. Bʉa ne adua ɓeaa mʉ̃a jaradiaɗara cawabiɗa bẽrã mʉ̃a bʉra bia jaraya. Ne cawa ɓeaa bʉa cawabiẽ́ basía. 26 Mãẽ, Zeza, bʉa mãwã o quĩrĩãsia.
27 Mʉ̃ Zezaba mʉ̃́a ara idjiɗebemada jũma cawabisia. Ni aɓaʉba adua panʉa mʉ̃, dji Warrara sãwã ɓʉda; aɓa mʉ̃ Zezabʉrʉ cawa ɓʉa. Ara maʉ̃ quĩrãca ni aɓaʉba adua panʉa mʉ̃ Zezara sãwã ɓʉda; aɓabe mʉ̃, dji Warrabʉrʉ cawa ɓʉa. Mʉ̃a aɓaʉa mʉ̃ Zezada cawabisira, maʉ̃ ẽberã biɗa cawaya.
28 Ne jũmaneba sẽ panʉbʉrʉ, mʉ̃maa zeɗadua. Mʉ̃a bãrãra ʉ̃nãũbiya.* 29 Idu mʉ̃́a jipa pe edebiɗadua. Mʉ̃neba cawa wãnadua. Mʉ̃a jũma droabaria idjaɓa soɗeba djãrã cãyãbara dji dromaara ɓʉda crĩchacaa. Mʉ̃maa zeɗibʉrʉ bãrãra wãrãda ʉ̃nãũnia. 30 Mʉ̃a jaradia ɓʉra zareaẽ́ ɓʉa. Mʉ̃a obi ɓʉ siɗa oicha ɓʉa.–