Mateo

Herodeba Jesuɗebema ũrĩna

Marco 6:14-29; Luca 9:7-9

14 Maʉ̃ ewariɗe Herodera Galilea druaɗebema boro basía.* Maʉ̃ Herodeba ũrĩsia Jesura trʉ̃ ɓʉga ɓʉda. 2 Maʉ̃ carea idjiare ɓeaa jarasia:

–¡Mʉ̃maarã Borocuebari Juaʉ̃ ʉ̃rẽbaɗada jãwã ɓʉa! Maʉ̃ bẽrã jũma ne ununacara poya o ɓʉa.–

3 14:3-4 Herodeba mãwã jarasia Juaʉ̃ra beabiɗa bẽrã. Maʉ̃gʉra nãwã ɓasia: Herodeba ara idji djaba Pelipe quima Herodía abadada edasia. Baribʉrʉ Juaʉ̃ba idjía jarabadjia: “Bʉ djaba quimada eroɓacara ɓʉa.”* Maʉ̃ carea Herodeba Juaʉ̃ra jidapeɗa preso ɓʉbada deɗe carenaba jʉ̃ ɓʉsia. 4 – 5 Juaʉ̃ra beabi quĩrĩã ɓasia baribʉrʉ puruda waya ɓaɗa bẽrã poya oẽ́ ɓasia. Puruba crĩcha ɓasia Juaʉ̃ra Ãcõrẽneba beɗeabarida.

6 Herode toɗa ewari ɓʉsriɗa o panʉne Herodía cauda jũmarã quĩrãpita bairasia. Maʉ̃ba Herodera bio ɓʉsriɗasia. 7 Maʉ̃ carea maʉ̃ awẽrãa wãrãneba jarasia ne baridua idjia iwiɗibʉrʉda diaida. 8 Maʉ̃ne dji papaba idji caua nãwã iwiɗibisia:

–Mʉ̃́a epeɗecoɗe Borocuebari Juaʉ̃ boroda diadua.–

9 Mãwã iwiɗisiɗe Herodera sopuasia. Baribʉrʉ jũma idji ume ne co duanʉ quĩrãpita wãrãneba jaraɗa bẽrã Herodía cauba iwiɗiɗara obisia. 10 Ara maʉ̃da Juaʉ̃ra preso ɓʉbada deɗe ɓʉda oɓʉá tʉbisia. 11 Juaʉ̃ borora epeɗecoɗe enenapeɗa Herodía caua diasiɗaa. Maʉ̃be dji cauba dji papaa diasia. 12 Mãwãnacarea Juaʉ̃ ume nĩbapeɗaɗaba idji cacuara edaɗapeɗa tʉɓarisiɗaa. Maʉ̃be Jesua jaraɗe wãsiɗaa.

Jesuba mil juesuma auɗu ne cobigaɗa

Marco 6:30-44; Luca 9:10-17; Juaʉ̃ 6:1-14

13 Jesuba Juaʉ̃ jaiɗaɗa ũrĩsiɗe iduɓa jãbaɗe ẽberã neẽ́maa wãbʉrʉ basía. Baribʉrʉ ẽberãrãba idji sãmaa wãbʉrʉda cawasiɗaɗe puruzabemada jĩrũba araa wãsiɗaa. 14 Jesura jãbaɗeba drua ɓadobʉrʉɗe maʉ̃ ẽberãrã zocãrã duanʉda unusia. Ãdjirãra mĩã djuburi ununa bẽrã dji cacua biẽ́ queɗeada biabicuasia. 15 Queuboɗo bẽrã idji ume nĩbabadarãra idjimaa wãnapeɗa jarasiɗaa:

–Nama ẽberãra caita neẽ́a. Maʉ̃ awara queubʉrʉa. Ẽberãrãa jaradua puru ɓeaɗe coɗira nẽdoɗe wãnamãrẽã.–

16 Maʉ̃ne Jesuba idji ume nĩbabadarãa jarasia:

–Ãdjirãra wãniẽ́ panʉa. Bãrãbʉrʉ ne cobiɗadua.–

17 Baribʉrʉ ãdjia jarasiɗaa:

–Daiba paʉ̃da juesumabe idjaɓa ɓedada umébe eropanʉa.–

18 Jesuba jarasia:

–Mʉ̃maa enenadua, mãẽteara.–

19 Maʉ̃be ẽberãrãa jarasia põãjãrãne chũpanenamãrẽã. Maʉ̃ paʉ̃ juesuma panʉra, ɓeda umé panʉ siɗa idji jʉwaɗe edapeɗa bajãnaa acʉpeɗa Ãcõrẽa bia jarasia. Maʉ̃be paʉ̃ra cõrãcuapeɗa idji ume nĩbabadarãa diasia jeɗecaɗamãrẽã. 20 Jũmarãda ne coɗapeɗa jãwũãsiɗaa. Dji aɗubaɗada jʉrʉ pesiɗaɗe doce jamara birasiɗaa. 21 Mama ne copeɗaɗara dji umaquĩrã awa mil juesuma panasiɗaca ɓʉa, wẽrãrãda warrarã siɗa juachaɗaẽ́.

Jesu do ʉ̃rʉ̃ nĩbaɗa

Marco 6:45-52; Juaʉ̃ 6:16-21

22 Mãwãnacarea Jesuba idji ume nĩbabadarãra jãbaɗe ɓadobisia idji na quĩrãrã chãnamãrẽã. Maʉ̃ne idjira ɓesia ẽberãrã diguiɗaa wãbigai carea. 23 Jũmarãda wãbigapeɗa iduɓa eyaɗaa Ãcõrẽa iwiɗiɗe wãsia. Queusiɗe iduɓa ɓasia. 24 Maʉ̃misa Jesu ume nĩbabadarãra do quẽsidra panasiɗaa. Maʉ̃ne nãũrãda ãdji nocoareba puá nũmʉ bẽrã baido bogozoaba jãbara jirawe eronũmesia.

25 Ãsaboɗoɗe Jesura do ʉ̃rʉ̃ nĩda ãdjimaa wãsia. 26 Baribʉrʉ idji ume nĩbabadarãba maʉ̃ unusiɗaɗe bio dauperasiɗaa. Ne wayaaba ãdjirãra ɓiasiɗaa:

–¡Bẽwãrãda jãwã nĩa!–

27 Ara maʉ̃da Jesuba jarasia:

–¡Sozarra ɓeaɗadua! Mʉ̃da jãwã ɓʉa. ¡Ne wayarãnadua!–

28 Maʉ̃ne Pedroba idjía jarasia:

–Mʉ̃ Boro, wãrãda bʉda jãwã ɓʉbʉrʉ, mʉ̃ra do ʉ̃rʉ̃ bʉmaa wãbidua.–

29 Ara maʉ̃da Jesuba jarasia:

–¡Zedua!–

Ara maʉ̃da Pedrora jãbaɗeba doeɗa ɓadopeɗa Jesumaa do ʉ̃rʉ̃ wãbʉrʉ basía. 30 Baribʉrʉ Pedroba nãũrã dji cãbãyã puá ɓʉ unusiɗe dauperasia. Maʉ̃ne ta dogo bẽrã ɓiasia:

–¡Mʉ̃ Boro, carebadua!–

31 Ara maʉ̃da Jesuba jʉwaɗe jidapeɗa jarasia:

–Ache, ¿cãrẽ cãrẽã ĩjãẽ́ basi mʉ̃a bʉra do ʉ̃rʉ̃ poya nĩbabida?–

32 Jãbaɗe ɓadosiɗaɗe nãũrãra cãbasia. 33 Maʉ̃be jũma jãbaɗe panʉra Jesu quĩrãpita chĩrãboroɗe copanenapeɗa idjía bia beɗeasiɗaa:

–¡Bʉra wãrãda Ãcõrẽ Warraa!–

Jesuba Genesare druaɗe cacua biẽ́ ɓea biabiɗa

Marco 6:53-56

34 Chã wãnada Genesare druaɗe jũẽsiɗaa. 35 Mamabema ẽberãrãba Jesura cawasiɗaa. Maʉ̃ carea jũma ãdji druaɗe jarabisiɗaa Jesura jũẽsida. Maʉ̃be ẽberãrãba jũma dji cacua biẽ́ ɓeara idjimaa enesiɗaa. 36 Ãdjirãba idjía beɗea djuburiasiɗaa aɓabe idjia cacuaɗe jʉ̃ ɓʉ ida tãbimãrẽã. Jesuba idu tãbiɗa bẽrã jũmaena biacuasiɗaa.