Mateo

Ne cobada waiɓʉaɗeba ne jara ɓʉ

Luca 14:15-24

22 Jesuba wayacusa sacerdote bororãa, judiorã dji dromarã biɗa dewara ne jara ɓʉɗeba jarasia:

2 –Ãcõrẽba ẽberãrã pe eroɓʉra naʉ̃ quĩrãca ɓʉa: ẽberãrã boroda ɓasia. Idji warrada quima edabʉrʉ bẽrã ɓʉsriɗa ne cobada waiɓʉada obisia. 3 Idji nezocarãda wãbisia idjia jʉreɗarã trʉ̃namãrẽã. Baribʉrʉ ze quĩrĩãnaẽ́ basía.

4 Maʉ̃be dewara nezocarã wãbibʉrʉɗe nãwã jarasia: “Mʉ̃a jʉreɗarãa jaraɗadua pacada, dewara animarã boreguea ɓea siɗa beapeɗa coɗira jũma o eroɓʉda. Ãdjirãa jaraɗadua jũma wi nũmʉ bẽrã mʉ̃ warra quima edabʉrʉ carea ɓʉsriɗa ne coɗimaa zeɗamãrẽã.” 5 Baribʉrʉ idjia jʉreɗarãba ĩjãnaẽ́ basía. Aɓaʉda idji ẽjũã acʉɗe wãsia. Dewarada idji ne nẽdobuebarimaa wãsia. 6 Ʉ̃cʉrʉba dji boro nezocarãra jidaɗapeɗa puoɗapeɗa beasiɗaa. 7 Maʉ̃ carea dji borora bio quĩrũsia. Idji sordaorãda wãbigapeɗa maʉ̃ mĩã beapeɗaɗara quenanapeɗa ãdji purura babuesiɗaa.

8 Mãwãnacarea dji boroba idji nezocarãa jarasia: “Mʉ̃ warra quima edabʉrʉ carea ɓʉsriɗa coɗira jũma wisia baribʉrʉ mʉ̃a jʉreɗarãra nama panani carea bia pananaẽ́ basía. 9 Maʉ̃ carea dewara ẽberãrãda o ɓeaza jʉrʉɗe wãnadua. Bãrãba unubʉdarãa jaraɗadua mʉ̃ warra quima edabʉrʉ carea ɓʉsriɗa ne coɗimaa zeɗamãrẽã.” 10 Ara maʉ̃da idji nezocarãra o ɓeaza wãsiɗaa. Ẽberãrã dji biarãda, dji cadjiruarã siɗa zocãrã jʉresiɗaa. Mãwã de dromara ẽberãrãba bira nũmesia.

11 Dji boroba jʉrebiɗarã acʉɗe wãsiɗe ẽberãda aɓa unusia djio quima edabʉda ewariɗe jʉ̃badara jʉ̃ẽ́ ɓʉda. 12 Dji boroba maʉ̃ ẽberãa iwiɗisia: “Ache, bʉra ¿sãwã nama eɗa ze ɓʉ djio jʉ̃ẽ́ ɓʉda?” Dji ẽberãra chupea ɓesia. 13 Maʉ̃ne dji boroba idji nezocarãa jarasia: “Naʉ̃ ẽberã jʉwara, jĩrũ siɗa cabʉraɗapeɗa dajadaa pãĩmane ɓatabueɗadua. Mama ɓeara aujĩã panania idjaɓa puaba quiɗa ĩchia panania.” 14 Ãcõrẽba zocãrã trʉ̃ ɓʉa, mãwãmĩna zocãrãẽ́be edaya.–

¿Romanebema boro itea parata jʉrʉ pebʉdaɗe diaɗida panʉca?

Marco 12:13-17; Luca 20:20-26

15 Mãwãnacarea pariseorãra beɗea ausiɗaa Jesu biẽ́ beɗeabiɗi carea. 16 Maʉ̃ carea pariseorãba ãdji ume nĩbabadarãda, Herodeare ɓea siɗa Jesumaa diabuesiɗaa. Maʉ̃gʉrãba Jesua jarasiɗaa:

–Jaradiabari, daiba cawa panʉa bʉra ẽberã jipa ɓʉda. Bʉa wãrã beɗea Ãcõrẽ oɗebemada jũmarãa jaradiabaria. Ni aɓaʉda biara unuca bẽrã ni aɓaʉba bʉ́a awara crĩchabiɗacaa. 17 Mãẽteara naʉ̃gʉɗebemada sãwã crĩcha ɓʉda dairãa jaradua. Romanebema boro itea parata jʉrʉ pebʉdaza ¿dadji judiorãba diaɗida bia ɓʉca wa biẽ́ ɓʉ?–

18 Idji biẽ́ oɗi carea mãwã panʉra Jesuba cawa ɓasia. Maʉ̃ bẽrã jarasia:

–Bãrã dji biaca ɓearã, ¿cãrẽ cãrẽã mʉ̃ra biẽ́ beɗeabi quĩrĩã panʉ? 19 Parata pichi dadjia diabadada aɓa acʉbiɗadua.–

Ara maʉ̃da parata pichida aɓa acʉbisiɗaa.* 20 Jesuba acʉpeɗa iwiɗisia:

–¿Cai quĩrãdarrada naʉ̃ parataɗe ɓʉ? ¿Cai trʉ̃da ɓʉ?–

21 Ãdjia panusiɗaa:

–Romanebema boroɗeda.–

Maʉ̃be Jesuba jarasia:

–Mãwã baibʉrʉ Romanebema boroɗera Romanebema boroa diaɗadua, idjaɓa Ãcõrẽnera Ãcõrẽa diaɗadua.–

22 Maʉ̃ ũrĩbʉdaɗe cawa crĩchaɗaẽ́ basía. Ara maʉ̃da ãyã wãsiɗaa.

Beuɗarã ʉ̃rẽbaɗiɗebema Jesuba jaraɗa

Marco 12:18-27; Luca 20:27-40

23 Ara maʉ̃ ewariɗe ʉ̃cʉrʉ saduceorãda Jesumaa zesiɗaa. Saduceorãba jarabadaa beupeɗaɗara ʉ̃rẽbaɗacada.* Maʉ̃ bẽrã Jesua nãwã jarasiɗaa:

Jaradiabari, Moiseba jarasia ẽberãda warra neẽ́ ɓʉɗe jaiɗaibʉrʉ, idji djababa dji pẽdra wẽrãra edaida ɓʉda dji djaba jaiɗaɗa itea warra unui carea.* 25 Ewari aɓa dairã tãẽna siete djabarãda panasiɗaa. Dji nabemada quima edasia baribʉrʉ warra neẽ́ jaiɗaɗa bẽrã idjiarebemaba dji pẽdra wẽrãra edasia. 26 Baribʉrʉ maʉ̃ siɗa warra neẽ́ jaiɗasia. Idjaɓa dji ũbeabema siɗa aɓari quĩrãca mãwãsia. Jũma maʉ̃ siete panʉra aɓarica mãwãsiɗaa. 27 Mãwãnacarea dji wẽrã siɗa jaiɗasia. 28 Maʉ̃ siete djabarãba aɓari wẽrãda edasiɗaa. Mãwãra ʉ̃rẽbaɗi ewariɗe ¿sãʉ̃gʉba idjira eroɓei?–

29 Maʉ̃ carea Jesuba panusia:

–Bãrãba Ãcõrẽ Beɗeada, idji ʉɓʉa siɗa adua panʉ bẽrã ãĩ crĩcha panʉa. 30 Ũrĩnadua. Ʉ̃rẽbaɗi ewariɗe ẽberãra quima edaɗaẽ́a ni quima diaɗaẽ́a, ãtebʉrʉ Ãcõrẽ bajãnebema nezocarã quĩrãca ɓeaɗia. 31 Ãcõrẽba beupeɗaɗarã ʉ̃rẽbaɗiɗebema jaraɗara ¿bãrãba acʉɗacaca? 32 Nãwã jarasia: “Mʉ̃ra Abrahaʉ̃ Ãcõrẽa, Isa Ãcõrẽa, idjaɓa Jacobo Ãcõrẽa.”* Idjira beu ɓea Ãcõrẽẽ́a, ãtebʉrʉ zocai ɓea Ãcõrẽa.–

33 Jesuba mãwã jaradia ɓʉ ũrĩbʉdaɗe ẽberãrãba cawa crĩchaɗaẽ́ basía.

Ãcõrẽba obi ɓʉ beɗea dji dromaara ɓʉ

Marco 12:28-34

34 Pariseorãba cawasiɗaa Jesuba saduceorãra chupeabisida. Maʉ̃ carea ãdjirãra ãbaa dji jʉreɗapeɗa Jesumaa wãsiɗaa. 35 Aɓa judiorã ley jaradiabari basía.* Maʉ̃gʉba Jesu biẽ́ beɗeabi carea nãwã iwiɗisia:

Jaradiabari, Ãcõrẽba obi ɓʉ beɗeaɗebemara ¿sãʉ̃gʉda dji dromaara ɓʉ?–

37 22:37-38 Jesuba nãwã panusia:

–Dji naãrãbema beɗeaba nãwã jara ɓʉa: “Jũma bʉ soɗeba, jũma bʉ jaureɗeba, idjaɓa jũma bʉ crĩchaɗeba bʉ Boro Ãcõrẽra quĩrĩãdua.”* Ãcõrẽba obi ɓʉ beɗeaɗebemara maʉ̃drʉ dji dromaara ɓʉa. 39 Idjaɓa maʉ̃are ɓʉda aɓari quĩrãca ɓʉa. Maʉ̃gʉba nãwã jara ɓʉa: “Djãrãra quĩrĩãdua ara bʉdji quĩrĩã ɓʉ quĩrãca.”* 40 Maʉ̃ crĩcha droma umé panʉda dadjirãba ĩjã oɗibʉrʉ, jũma Ãcõrẽba Moisea diaɗa leyra idjaɓa Ãcõrẽneba beɗeabadarãba ɓʉpeɗaɗa siɗa oɗia.

Ãcõrẽba ẽdrʉ edabari diai jaraɗara ¿cai warra?

Marco 12:35-37; Luca 20:41-44

41 Pariseorã waɗi arima duanʉne Jesuba ãdjirãa iwiɗisia:

Bãrãmaarã Ãcõrẽba ẽdrʉ edabari diai jaraɗara ¿caiɗeba zei?–

Ãdjirãba panusiɗaa:

–Daviɗeba zeya.–

43 Maʉ̃ne Jesuba iwiɗisia:

–Mãwã baibʉrʉ, Daviba ¿sãwãẽrã Ãcõrẽ Jaureɗeba idjira mʉ̃ Boroaɗa asi? Daviba nãwã jarasia:

44 Dadjirã Boroba mʉ̃ boroa jarasia: mʉ̃ jʉwa araare chũmedua aɓa bʉ ume dji quĩrũrã mʉ̃a bʉ jʉwaeɗa ɓʉbʉrʉɗaa.*

45 Ãcõrẽba ẽdrʉ edabari diai jaraɗada Daviba mʉ̃ Boroaɗa asibʉrʉ, ¿sãwã Davi warra bai?–

46 Maʉ̃ne ni aɓaʉba Jesua poya panunaẽ́ basía. Idjaɓa maʉ̃ ewariɗeba ʉ̃taa idjía iwiɗiɗira wayasiɗaa.