Marco

Jesu beaɗi carea crĩcha jʉrʉ panana

Mateo 26:1-5; Luca 22:1-2; Juaʉ̃ 11:45-53

14 Ewari umé babʉrʉɗe judiorãba Egiptoɗeba ẽdrʉpeɗaɗa quĩrãnebabada ewarida oɗi basía. Maʉ̃ ewari dromane paʉ̃ ẽsãbari neẽ́ ɓʉda cobadaa. Maʉ̃ne sacerdote bororãba, judiorã ley jaradiabadarã ume crĩcha jʉrʉ panasiɗaa Jesura chupea jidaɗapeɗa beabiɗi carea. 2 Baribʉrʉ jarasiɗaa:

–Ewari dromane jidaɗaẽ́a ẽberãrã quĩrũbucarãnamãrẽã.–

Wẽrãba nardo quera Jesu boro ʉ̃rʉ̃ weaɗa

Mateo 26:6-13; Juaʉ̃ 12:1-8

3 Maʉ̃ ewariɗe Jesura Betania puruɗe Simoʉ̃ aiɗa bara ɓaɗa deɗe ɓasia. Ne co chũmʉne wẽrãda idjimaa zesia. Maʉ̃ wẽrãba boteya alabastro mõgara oɗada enesia. Boteyara nardo quera idji awa ɓʉba bira ɓasia. Maʉ̃ nardo querara bio nẽbʉa ɓasia. Maʉ̃ne wẽrãba dji boteya ochiruda ɓʉapeɗa querara Jesu boro ʉ̃rʉ̃ weasia. 4 Maʉ̃ carea ʉ̃cʉrʉ arima duanʉda quĩrũnapeɗa ãduɓa jarasiɗaa:

–¿Cãrẽ cãrẽã jãʉ̃ querara weatasi? 5 Nẽdobueɗabara poa aɓa trajabʉrʉɗe edabari quĩrãca edacasia. Maʉ̃ parataba ne neẽ́ queɗeara carebacasia.–

Maʉ̃ wẽrãra bia quẽãsiɗaa. 6 Baribʉrʉ Jesuba jarasia:

–Idu ɓʉɗadua. ¿Cãrẽ cãrẽã idjira quẽã panʉ? Idjia mʉ̃ jãwã oɗara bia ɓasia. 7 Ne neẽ́ queɗeara ewariza bãrã tãẽna panania; bãrãba quĩrĩãbʉdaɗe poya ãdjirãra carebaɗida panʉa. Baribʉrʉ mʉ̃ra bãrã ume ewariza ɓaẽ́a. 8 Naʉ̃ wẽrãba ariɗe osia. Dãrãẽ́ne mʉ̃ra beupeɗa tʉɓariɗia. Idjia mʉ̃ra maʉ̃ carea queraba pãsia. 9 Wãrã arada mʉ̃a jaraya: jũma naʉ̃ ẽjũãne beɗea bia mʉ̃nebema jaradiabʉdama naʉ̃ wẽrãba oɗara nẽbʉrʉɗia idji siɗa quĩrãnebaɗamãrẽã.–

Judaba Jesu jidabi carea crĩchaɗa

Mateo 26:14-16; Luca 22:3-6

10 Juda Iscarioteda Jesuba doce edaɗaɗebema basía. Maʉ̃ Judara sacerdote bororãmaa wãsia Jesu jidabi carea. 11 Maʉ̃ ũrĩsiɗaɗe ãdjirãra ɓʉsriɗaɗapeɗa Judaa paratada diaɗiaɗa asiɗaa. Ara maʉ̃da Judaba jʉrʉbadjia sãwã Jesura jidabida.

Jesuba doce edaɗarã ume ne coɗa

Mateo 26:17-29; Luca 22:7-23; Juaʉ̃ 13:21-30; 1 Corinto 11:23-26

12 Paʉ̃ ẽsãbari neẽ́ ɓʉ cobada ewarida jũẽsia. Domia aɓa mãwã cobadjiɗaa. Dji nabema ewariɗe judiorãba Egiptoɗeba ẽdrʉpeɗaɗa quĩrãnebaɗi carea oveja zaqueda beaɗapeɗa cobadaa. Maʉ̃ne Jesu ume nĩbabadarãba idjía iwiɗisiɗaa:

–¿Bʉa sãma quĩrĩã ɓʉ daiba Egiptoɗeba ẽdrʉpeɗaɗa quĩrãnebaɗi carea cobadara oɗe wãnida?–

13 Maʉ̃ne Jesuba idji ume nĩbabadarãda umé trʉ̃peɗa nãwã jarasia:

–Jerusaleʉ̃ puruɗaa wãnadua. Jãma bãrãba ununia umaquĩrãba zocoda eronĩda. Idji caiɗu wãnadua. 14 Idji eɗa wãbʉrʉma dji de djibaría jaraɗadua: “Dadjirãa Jaradiabariba naʉ̃da iwiɗibisia: mʉ̃a, mʉ̃ ume nĩbabadarã biɗa Egiptoɗeba ẽdrʉpeɗaɗa quĩrãnebaɗi carea cobadara ¿sãma coɗi?” 15 Maʉ̃ de djibariba ʉ̃taarebema dejã waiɓʉada jũma biya o nũmʉda acʉbiya. Mama ne cobadara dadjirã itea oɗadua.–

16 Ara maʉ̃da Jesu ume nĩbabadara Jerusaleʉ̃ puruɗaa umé wãsiɗaa. Wãbʉdaɗe Jesuba ãdjía jaraɗa quĩrãca unusiɗaa. Maʉ̃be Egiptoɗeba ẽdrʉpeɗaɗa quĩrãnebaɗi carea cobadara osiɗaa.

17 Queuɗacarea Jesura, idjia edaɗa doce panʉ ume jũẽsiɗaa. 18 Ne co chũpanʉne Jesuba jarasia:

–Wãrã arada mʉ̃a jaraya: aɓa mʉ̃ ume ne co ɓʉba mʉ̃ra jidabiya.–

19 Maʉ̃ carea ãdjira sopua panesiɗaa. Ara maʉ̃da aɓa aɓa Jesua iwiɗisiɗaa:

–¿Mʉ̃a mãwã oica?–

20 Jesuba jarasia:

–Aɓa bãrã doceɗebemaba jidabiya. Idjia biɗa aɓari epeɗecoɗe paʉ̃da su co ɓʉa. 21 Wãrãda mʉ̃, Naʉ̃ Djara Edaɗara beuida ɓʉa Ãcõrẽ Beɗeaɗe ɓʉ́ ɓʉ quĩrãca.* ¡Baribʉrʉ mʉ̃ jidabi ẽberãra bio mĩã djuburi ɓʉa! Idjira topeɗaɗaẽ́bara biara ɓacasia.–

22 Waɗi ne co duanʉne Jesuba paʉ̃da jʉwaɗe edapeɗa Ãcõrẽa bia jarasia. Maʉ̃be cõrãcuapeɗa ãdjía diabʉrʉɗe nãwã jarasia:

–Coɗadua. Naʉ̃gʉra mʉ̃ cacuaa.–

23 Maʉ̃be uva ɓada edapeɗa Ãcõrẽa bia ɓʉaɗa asia. Maʉ̃ uva ɓara ãdjirãza diasia. Jũmarãba dosiɗaa. 24 Maʉ̃ne Jesuba jarasia:

–Naʉ̃gʉra mʉ̃ oa erozoabʉrʉ́a. Mʉ̃ oaɗeba Ãcõrẽba zocãrã ume beɗea djiwiɗida ɓʉbʉrʉa.* 25 Wãrã arada mʉ̃a jaraya: uva ɓara waa doẽ́a aɓa Ãcõrẽba jũma idji ẽberãrã pe eroɓebʉrʉɗaa. Maʉ̃bebʉrʉ mʉ̃a bãrã ume uva ɓada wayacusa doya.–*

Pedroba Jesu igaraẽ́ana aɗa

Mateo 26:30-35; Luca 22:31-34; Juaʉ̃ 13:36-38

26 Maʉ̃be Ãcõrẽ Beɗeaɗebemada trʉ̃ãnapeɗa Olivo eyaɗaa wãsiɗaa.* 27 Wãbʉdaɗe Jesuba jarasia:

–Naʉ̃ diamasi jũma bãrãba mʉ̃ra igaraɗia. Ãcõrẽ Beɗeaɗe nãwã ɓʉ́ ɓʉa: “Mʉ̃a oveja wagabarira beabʉrʉɗe dji ovejara jãrãzoaɗia.”* 28 Baribʉrʉ mʉ̃ra ʉ̃rẽbapeɗa bãrã na wãya Galilea druaɗaa.–

29 Maʉ̃ne Pedroba Jesua jarasia:

–Jũmarãba bʉra igaraɗimĩna mʉ̃a igaraẽ́a.–

30 Jesuba Pedroa jarasia:

–Wãrã arada mʉ̃a jaraya: nane diamasi eterre ɓarima umé berui naẽna bʉa ɓarima ũbea mʉ̃ra unucaaɗa aya.–

31 Baribʉrʉ Pedroba wetara jarasia:

–Mʉ̃ beabʉda siɗa bʉra igaraẽ́a.–

Jũmarãba aɓarica jarasiɗaa.

Jesuba Getsemanine Ãcõrẽa iwiɗiɗa

Mateo 26:36-46; Luca 22:39-46

32 Maʉ̃be Getsemani abadama jũẽne wãsiɗaa. Jesuba idji ume nĩbabadarãa jarasia:

–Mʉ̃a Ãcõrẽa iwiɗibʉrʉmisa nama chũpanenadua.–

33 Maʉ̃be Pedroda, Santiagoda, Juaʉ̃ siɗa jĩga edesia. Idji sãwãinebemada jũmawãyã crĩcha ɓʉ bẽrã Jesura bio sopua ɓesia. 34 Maʉ̃ne jarasia:

–Mʉ̃ra sopuaba beubʉrʉ quĩrãca ɓʉa. Nama panenadua. Mʉ̃ daucha zocai pananadua.–

35 Maʉ̃be Jesura wagabe wãpeɗa ɓarru coɓepeɗa Ãcõrẽa iwiɗisia quĩrã awara oi cawaya. 36 Nãwã jarasia:

–Zeza, bʉa ne jũmada poya oida ɓʉa. Mʉ̃ra idu bia mĩgabirãdua. Baribʉrʉ mʉ̃a quĩrĩã ɓʉ quĩrãca orãdua. Odua bʉabʉrʉ quĩrĩã ɓʉ quĩrãca.–

37 Jesu jẽda zebʉrʉɗe unusia ãdjira cãĩ panʉda. Pedroa jarasia:

–Simoʉ̃, bʉra ¿cãrẽ cãrẽã cãĩ ɓʉ? ¿Ni hora aɓa biɗa poya zocai ɓaẽ́ca? 38 Bãrãra dau ʉɓʉa ɓeaɗadua. Ãcõrẽa iwiɗiɗadua mʉ̃ igaraɗa amaaba. Mʉ̃a cawa ɓʉa bãrãba biada o quĩrĩã panʉda. Mãwãmĩna naʉ̃ djaraɗe ʉɓʉaẽ́ panʉa.–

39 Jesura wayacusa wãpeɗa idjia naãrã iwiɗiɗara Ãcõrẽa iwiɗisia. 40 Maʉ̃be idji ume nĩbabadarãmaa zebʉrʉɗe wayacusa cãĩ panʉda unusia. Ãdji daura daupeaba oga cara nũpanasiɗaa. Maʉ̃ne cawaɗaẽ́ basía Jesua sãwã jaraɗida.

41 Ɓarima ũbea mãwã ãdjimaa zebʉrʉɗe Jesuba jarasia:

–Bãrãra ¿waɗibiɗa cãĩ panʉca? ¡Waaẽ́a! Mʉ̃ ewarira jũẽsia. Mʉ̃, Naʉ̃ Djara Edaɗara ẽberã cadjiruarã jʉwaɗe ɓebʉrʉa. 42 Piradrʉɗadua. Wãnia. Jari urua mʉ̃ jidabira.–

Jesu jidapeɗaɗa

Mateo 26:47-56; Luca 22:47-53; Juaʉ̃ 18:2-11

43 Jesu waɗi beɗea ɓʉɗe Judada zesia. Maʉ̃ Judara Jesuba doce edaɗaɗebema basía. Zocãrã ẽberãrãda neco bara, bacuru bara idji ume zesiɗaa. Ãdjirãra sacerdote bororãba, judiorã ley jaradiabadarãba, dji dromarã biɗa diabuepeɗaɗarã basía. 44 Dji jidabiya ɓʉba ãdjía jaraɗoasia sãwã oida Jesuda cawaɗamãrẽã. Nãwã jarasia:

–Mʉ̃a uridarraɗe isõbʉrʉda Jesua. Idjida jidaɗapeɗa bio jʉ̃ edeɗadua.–

45 Maʉ̃be Judara Jesu caita wãpeɗa jarasia:

–¡Jaradiabari, Jaradiabari!–

Mãwã jarapeɗa Jesura uridarraɗe isõsia. 46 Ara maʉ̃da idji ume zepeɗaɗaba Jesura jidasiɗaa. 47 Maʉ̃ carea Jesu ume nĩbabari aɓaʉba idji djõbada necoda ẽũta edapeɗa sacerdote dji droma nezoca cʉwʉrʉda tʉtasia. 48 Maʉ̃ne Jesuba ãdjirãa jarasia:

–Bãrãra ¿cãrẽ cãrẽã neco bara, bacuru bara mʉ̃ra jãwã jidaɗe ze panʉ? ¿Mãwãra mʉ̃ra ẽberã minijĩchiaca? 49 Mʉ̃a ewariza Ãcõrẽ de droma dajada bãrãa jaradia ɓasia. ¿Cãrẽ cãrẽã mʉ̃ra mama jũmarã daiɗe jidaɗaẽ́ basi? Baribʉrʉ nãwã o panʉa Ãcõrẽ Beɗeaɗe ɓʉ́ ɓʉra mãwãida ɓʉ bẽrã.–*

50 Mãwã ɓʉɗe Jesu ume nĩbabadarãba idjira ɓeesiɗaa. Jũmarãda mĩrũ wãbʉrʉsiɗaa. 51 Baribʉrʉ cũdra aɓaʉda Jesu caiɗu wãsia. Maʉ̃ cũdrara boroɓaba ãnẽɓari nĩbasia. Mãwã ɓʉɗe idji siɗa jidasiɗaa. 52 Baribʉrʉ idjia boroɓara wẽãtapeɗa ãcaɗa mĩrũ pira wãsia.

Jesu dji dromarã quĩrãpita ɓaɗa

Mateo 26:57-68; Luca 22:54-71; Juaʉ̃ 18:12-24

53 Maʉ̃be Jesura sacerdote dji dromaara ɓʉma jida edesiɗaa. Mama jũma sacerdote bororãda, judiorã dji dromarãda, judiorã ley jaradiabadarã siɗa ãbaa dji jʉre duanasiɗaa. 54 Maʉ̃ne Pedroba Jesu tʉmʉba ẽpẽ nĩda sacerdote dji droma dema jũẽsia. Dji de auɗu jũrã ca ɓʉɗe eɗa Pedrora Ãcõrẽ de dromanebema zarrarã ume tʉbʉ cã chũmesia.

55 Maʉ̃ne sacerdote bororãba, jũma dji dromarã biɗa ẽberãrãda jʉrʉsiɗaa Jesuɗebemada biẽ́ jaraɗamãrẽã. Idjira nẽbʉraɗe ɓʉɗapeɗa beabiɗida crĩchasiɗaa. Mãwãmĩna Jesu biẽ́ jaraɗida neẽ́ ɓasia. 56 Zocãrãba sewaɗeba Jesura biẽ́ jarasiɗaa, baribʉrʉ ãdjia jarapeɗaɗara aɓari quĩrãca ɓaẽ́ basía. 57 Mãwã panʉne ʉ̃cʉrʉba piradrʉɗapeɗa sewaɗeba jarasiɗaa:

Daiba ũrĩsiɗaa idjia nãwã jarabʉrʉda: “Ẽberãrãba opeɗaɗa Ãcõrẽ de dromada mʉ̃a ãrĩya, baribʉrʉ ewari ũbea babʉrʉɗe mʉ̃a dewarada oya ẽberãrãba oɗaẽ́da.”–*

59 Mãwãmĩna ãdjiza maʉ̃nebema jarapeɗaɗara quĩrã awara ɓasia. 60 Maʉ̃be sacerdote dji dromaara ɓʉra ẽsi nũmepeɗa Jesua iwiɗisia:

–Naʉ̃gʉrãba bʉra biẽ́ jara panʉa. Ãdjia jara panʉra ¿wãrãca? ¿Bʉa ni cãrẽ siɗa panuẽ́ca?–

61 Jesura chupea ɓesia. Panuẽ́ basía. Mãwã ɓʉɗe sacerdote dji dromaara ɓʉba wayacusa Jesua iwiɗisia:

–¿Bʉra Ãcõrẽba ẽdrʉ edabari diai jaraɗaca? ¿Bʉra dadjia bia jarabada Ãcõrẽ Warraca?–

62 Jesuba panusia:

–Mãẽ, mʉ̃́a. Bãrãba mʉ̃, Naʉ̃ Djara Edaɗara ununia Ãcõrẽ ne jũma poya ɓʉ jʉwa araare chũmʉda idjaɓa jʉ̃rãrãne zebʉrʉda.–*

63 Maʉ̃ne sacerdote dji dromaara ɓʉ quĩrũbʉrʉba idjia jʉ̃ ɓʉra cõãtapeɗa jarasia:

–¿Cãrẽ cãrẽã dewarada jʉrʉɗi idji biẽ́ jaramãrẽã? 64 ¡Bãrãba ũrĩsiɗaa idjia Ãcõrẽda biẽ́ jara ɓʉda! Jãʉ̃be bãrãmaarã ¿idjira sãwã oɗi?–

Maʉ̃ne jũmarãba jarasiɗaa Jesura beɗeaɗe ɓʉ carea beaɗida panʉda.

65 Maʉ̃be ʉ̃cʉrʉba Jesura dau iɗosiɗaa idjaɓa idji quĩrã bʉraɗapeɗa chĩbadjiɗaa. Chĩnapeɗa jarabadjiɗaa:

–¡Ãcõrẽneba jaradua caiba bʉra chĩsida!–

Mãwã duanʉne Ãcõrẽ de dromanebema zarrarãba Jesura jidaɗapeɗa puobadjiɗaa.

Pedroba Jesu unucaaɗa aɗa

Mateo 26:69-75; Luca 22:56-62; Juaʉ̃ 18:15-18, 25-29

66 Pedro maʉ̃ de droma duɗa ɓasiɗe sacerdote droma nezocawẽrãda aɓa zesia. 67 Maʉ̃ wẽrãba idjira tʉbʉ cã chũmʉda unusia. Acʉ nũmepeɗa jarasia:

–Bʉra Jesu Nazareɗebema ume nĩbasia.–

68 Maʉ̃ne Pedroba nãwã mẽrãsia:

–Mʉ̃a jãʉ̃ ẽberãra unucaa. Mʉ̃a adua ɓʉa bʉa cãrẽda jara ɓʉda.–

Mãwã jarapeɗa Pedrora de auɗu jũrã ca ɓʉɗe dji ẽdrʉbadamaa wãsia. Maʉ̃ne eterreda berusia.* 69 Wayacusa nezocawẽrãba Pedrora unupeɗa dji arima duanʉrãa jarasia:

–Za ɓʉda ãdjiɗebemaa.–

70 Pedroba mãwã ũrĩpeɗa wayacusa mẽrãsia. Dãrãẽ́ne arima duanʉba wayacusa Pedroa jarasiɗaa:

–Wãrãda bʉra ãdjiɗebemaa. Bʉra Galileaɗebemada jãwã ɓʉa. Ãdji quĩrãca beɗeabaria.–*

71 Pedroba jarasia:

–¡Mʉ̃a sewada jaraibʉrʉ Ãcõrẽba cawa oya! Wãrãneba jaraya: bãrãba jara panʉ ẽberãra mʉ̃a unucaa.–

72 Mãwã ɓʉɗe eterrera wayacusa berusia. Ara maʉ̃ne Pedroba quĩrãnebasia Jesuba jaraɗara: “Eterrera ɓarima umé berui naẽna bʉa ɓarima ũbea mʉ̃ra unucaaɗa aya.”* Pedroba maʉ̃nebema crĩchabʉrʉɗe dãrã jĩãsia.