Hecho

Jesuba Ãcõrẽ Jaure diai jaraɗa

1 1:1-2 Teopilo, naãrã mʉ̃a cartaɗe bʉ itea jũma ɓʉ́ diabuesia Jesuba o ɓaɗaɗebemada, idjia jaradia ɓaɗa siɗa aɓa Ãcõrẽba bajãnaa edebʉrʉɗaa. Waɗi bajãnaa wãi naẽna idjia diabuei carea edaɗarãa Ãcõrẽ Jaureɗeba jaradiasia cãrẽda oɗida panʉda. 2 –

3 Jesu beuɗacarea ãdjirãa ara idjida ɓarima zocãrã unubisia cawaɗamãrẽã idjira wãrãda ʉ̃rẽbasida. Cuarenta ewari mãwã osia. Maʉ̃ne ãdjirãa jaradiabadjia sãwã Ãcõrẽba idji ĩjã ɓeara bia pe eroɓʉda. 4 Ewari aɓa Jesu ãdjirã ume ɓasiɗe nãwã jarasia:

–Jerusaleʉ̃ puruɗeba ãyã wãrãnadua. Nama jʉ̃ãnadua aɓa dadjirã Zezaba idji Jaure diai jaraɗa diabʉrʉɗaa.* Maʉ̃nebemada mʉ̃a bãrãa naẽna jarasia. 5 Wãrãda Juaʉ̃ba ẽberãrãra baidoba borocuesia, baribʉrʉ dãrãẽ́ne Ãcõrẽba idji Jaureda bãrãa diaya.–*

6 Maʉ̃be Jesu ume ãbaa duanʉba idjía iwiɗisiɗaa:

–Dai Boro, ¿iɗibʉrʉ bʉa dadji Israel purura djãrã jʉwaeɗabemada ẽdrʉ ɓʉpeɗa dji boroda ɓeica?–

7 Jesuba panusia:

–Mãwãi ewarira bãrãba cawaɗiẽ́ panʉa. Aɓabe mʉ̃ Zezabʉrʉ cawa ɓʉa maʉ̃ ewarira ɓʉɗa bẽrã. 8 Baribʉrʉ Ãcõrẽ Jaure bãrã ume ɓaɗe zebʉrʉɗe bãrãba idji ʉɓʉada edaɗia. Maʉ̃ba bãrãba Jerusaleʉ̃ne, jũma Judea druaɗe, Samaria druaɗe, drua tʉmʉara ɓeaɗe biɗa mʉ̃nebemada beɗeaɗia.–

9 Jesuba mãwã jaraɗacarea jũmarãba acʉ duanʉne ʉ̃taa jira wãsia. Maʉ̃ne jʉ̃rãrãba idjira ãnã edaɗa bẽrã waa ununaẽ́ basía. 10 Waɗibiɗa Jesu ʉ̃taa wãnamaa acʉ duanʉne cawaẽ́ne ãdjirã caita ẽberãda umé odjasiɗaa. Ãdjia cacuaɗe jʉ̃ panʉra totroa ɓasia. 11 Maʉ̃ ẽberãba nãwã jarasiɗaa:

–Achirã Galileaɗebema, ¿cãrẽ cãrẽã bajãnaa acʉ panʉ? Jesu bãrã ume ɓaɗa bajãnaa wãnara wayacusa zeya idji bajãnaa wãna quĩrãca.–*

Matía edapeɗaɗa

12 Maʉ̃be Jesuba diabueɗarãra Olivo eyaɗeba Jerusaleʉ̃naa jẽda wãsiɗaa. Maʉ̃ eyara Jerusaleʉ̃ caita ɓʉa. Dji tʉmʉara judiorã ʉ̃nãũbada ewariɗe wãbada quĩrãca ɓʉa. 13 Jerusaleʉ̃ne jũẽnapeɗa ʉ̃tʉarebema dejãne ãdji cãĩbadamaa wãsiɗaa. Ãdjirãra naʉ̃gʉrã basía: Pedro, Juaʉ̃, Santiago, Andre, Pelipe, Tomá, Bartolomé, Mateo, Alpeo warra Santiago, Simoʉ̃ Celote, idjaɓa Santiago warra Juda.* 14 Jũma ãdjirãra Jesu djabarã ume, idji papa Maria ume, dewara wẽrãrã ume biɗa ãbaa dji jʉrebadjiɗaa Ãcõrẽa iwiɗiɗi carea.

15 Mãwã duanʉne ewari aɓa Pedrora djabarã ẽsi ʉ̃ta nũmesia beɗeai carea. Ãdjirãra ciento veinte panasiɗaca ɓʉa. Maʉ̃ne jarasia:

Djabarã, naẽnaeɗa Ãcõrẽ Jaureba Judaba oiɗebemada Davia ɓʉbisia.* Ãcõrẽ Beɗeaɗe ɓʉ́ ɓʉ quĩrãca wãrãda mãwãida ɓaɗa bẽrã Judaba ẽberãrãda pe edesia Jesu jidaɗamãrẽã. 17 Judara dadjirã quĩrãca Jesuba edaɗa basía. Dadjirãba obadara idjia biɗa o ɓabadjia.–

18 (Judaba Jesu jidabiɗa carea paratada edasia. Maʉ̃ parataba ẽjũãda nẽdosia. Baribʉrʉ ara maʉ̃ ẽjũãne Judara quĩrã eɗaa boroare ɓaesia. Idji ɓira jẽsapeɗa idji jʉ̃sira jũma ẽdrʉsia. 19 Jũma Jerusaleʉ̃nebemarãba maʉ̃ cawasiɗaɗe dji ẽjũãra trʉ̃ ɓʉsiɗaa Aceldama. Maʉ̃ trʉ̃ra ãdji beɗeaɗe jara ɓʉa Oa Ẽjũã.)* 20 Maʉ̃ne Pedroba jarasia:

–Judara mãwãsia Salmo cartaɗe ɓʉ́ ɓʉ quĩrãca:

Idji dera deduma ɓeya. Ni aɓaʉda mama ɓeaɗaẽ́a.*

Idjaɓa jara ɓʉa:

Idjia o ɓaɗara dewaraʉba o ɓeya.*

21 1:21-22 Maʉ̃ bẽrã idji cacuabari bãrãnebemada aɓa dairã ume ɓeida ɓʉa ẽberãrãa jarai carea Jesura wãrãda ʉ̃rẽbasida. Maʉ̃ ẽberãra dadjirã ume ɓaida ɓʉa Juaʉ̃ba dadji Boro Jesu borocueɗaɗeba aɓa Ãcõrẽba Jesu bajãnaa edeɗa ewariɗaa.–

23 Maʉ̃ne ẽberãda umé ɓʉsiɗaa ãdjiɗebemada aɓa edaɗi carea. Aɓa Jose basía. Idjira Barsabá wa Justo abadaa. Dewarabemara Matía basía. 24 1:24-25 Maʉ̃be jũmarãba Ãcõrẽa nãwã iwiɗisiɗaa:

–Dai Boro, Judara bʉa diabueɗada ɓaesia. Idjia oida ɓʉra igarasia idji ɓaida ɓʉmaa wãi carea. Jũmarãba soɗe crĩcha panʉra bʉa cawa ɓʉa. Maʉ̃ bẽrã dairãa cawabidua naʉ̃gʉ ẽberã umébemarã sãʉ̃gʉda edabʉrʉda bʉa diabueɗaba obadara omãrẽã.–

26 Maʉ̃be ne jemenesiɗaa caida ɓei cawaya. Maʉ̃ne Matíadrʉ ɓesia. Ara maʉ̃da idjira Jesuba diabueɗarã once panʉ ume ãbaa ɓesia.