Hecho

Pedroba djabarã Jerusaleʉ̃nebemarãa beɗeaɗa

11 Mãwãnacarea Jesuba diabueɗarãba, dewara djabarã Judea druaɗe ɓea biɗa ũrĩsiɗaa judiorãẽ́ba Ãcõrẽ beɗeara ĩjãsiɗada. 2 Maʉ̃ carea Pedro Jerusaleʉ̃naa wãsiɗe ʉ̃cʉrʉ djabarã judiorãba idjira biẽ́ jarasiɗaa. 3 Nãwã jarasiɗaa:

–¿Cãrẽ cãrẽã bʉra judiorãẽ́ deɗe eɗa wãpeɗa ãdji ume ne co ɓasi?–

4 Maʉ̃ne Pedroba idji mãwãnada ãdjirãa jũma nẽbʉrʉsia.

5 –Jope puruɗe ɓasiɗe mʉ̃a Ãcõrẽa iwiɗi ɓasia. Maʉ̃ne cãĩmocara quĩrãca boroɓa waiɓʉa quĩrãca ɓʉda unusia. Maʉ̃ra iquiɗaza jʉ̃caraba jʉ̃ ɓʉda bajãneba eɗaa zepeɗa mʉ̃ma jũẽsia. 6 Mʉ̃a bio acʉsia cãrẽda eɗa ɓʉ cawaya. Maʉ̃ne daupẽbada animarãda, mẽãbema animarãda, ãdji jãne wãbadada, ĩbana ɓea siɗa unusia. 7 Mãwã ɓʉɗe beɗeada ũrĩsia. Maʉ̃ beɗeaba mʉ̃́a jarasia: “Pedro, piradrʉdua. Beapeɗa codua.” 8 Baribʉrʉ mʉ̃a jarasia: “Mʉ̃a coẽ́a, mʉ̃ Boro. Dairãba cocara panʉda wa bʉ quĩrãpita mititia ɓʉda mʉ̃a cocaa.” 9 Maʉ̃ne bajãneba beɗeaba mʉ̃́a jarasia: “Bãrãba coɗamãrẽã Ãcõrẽba bia ɓʉɗara mititia ɓʉaɗa arãdua.” 10 Mãwã beɗeabʉrʉda mʉ̃a ɓarima ũbea ũrĩsia. Maʉ̃be boroɓara wayacusa bajãnaa wãsia.

11 Mãwã ɓʉɗe ẽberãda ũbea mʉ̃ ɓʉ deɗe jũẽsiɗaa. Ãdji boroba Cesarea puruɗeba mʉ̃maa diabuesia. 12 Ãcõrẽ Jaureba mʉ̃ra ãdji ume biẽ́ crĩchaẽ́ wãbisia. Cesareaɗe jũẽnapeɗa dairãra ãdji boro deɗe eɗaa wãsiɗaa. Naʉ̃ sei djabarãda mʉ̃ ume panasiɗaa. 13 Maʉ̃ ẽberãba daia nẽbʉrʉsia bajãnebema nezocada idji deɗe nũmʉda unusida. Maʉ̃gʉba idjía jarasia: “Jope puruɗaa ẽberãrãda diabuedua Simoʉ̃ Pedro abadada jʉrʉɗe wãnamãrẽã. 14 Idjia jaraya sãwãbʉrʉ Ãcõrẽba bʉra, bʉ deɗebemarã siɗa ẽdrʉ edaida.”

15 Mʉ̃a maʉ̃nebema beɗea nũmʉne Ãcõrẽ Jaurera ãdjirãmaa zesia dadjirãmaa naãrã zeɗa quĩrãca.* 16 Maʉ̃ne dadjirã Boroba jaraɗara mʉ̃a quĩrãnebasia: “Wãrãda Juaʉ̃ba ẽberãrãra baidoba borocuesia, baribʉrʉ Ãcõrẽba bãrãa idji Jaureda diaya.”* 17 Dadji Boro Jesucritoda ĩjã panʉ bẽrã Ãcõrẽba dadjirãa idji Jaureda diasia. Idji Jaureda ãdjirãa biɗa diaɗa bẽrã ¿mʉ̃a sãwã idjia oɗaɗebemada biẽ́ jarai?–

18 Jerusaleʉ̃nebema djabarãba maʉ̃ ũrĩsiɗaɗe waa biẽ́ jaraɗaẽ́ basía, ãtebʉrʉ Ãcõrẽa nãwã bia beɗeasiɗaa:

–¡Wãrãda Ãcõrẽba judiorãẽ́ siɗa carebasia ãdji cadjiruara igaraɗapeɗa idjimaa zeɗamãrẽã! ¡Mãwã ewariza idji ume zocai panania!–

Djabarã Antioquía puruɗebema

19 Estebaʉ̃ beapeɗaɗacarea ẽberãrãba Jesu ĩjã ɓea biẽ́ oɗi carea ẽpẽsiɗaa. Maʉ̃ bẽrã zocãrã djabarãra Jerusaleʉ̃neba mĩrũ wãbʉrʉsiɗaa. Ʉ̃cʉrʉra Penicia druaɗaa, Chipre morroɗaa idjaɓa Antioquía puruɗaa biɗa wãsiɗaa. Ãdji wãbʉdaza beɗea Jesuɗebemada aɓabe judiorãa jarabadjiɗaa. 20 Mãwã panʉne ʉ̃cʉrʉ Jesu ĩjã ɓea Chipreɗebemada, Cirene puruɗebema siɗa Antioquíaɗe ɓaɗe wãsiɗaa. Maʉ̃gʉrãba griegorãa biɗa beɗea bia dadji Boro Jesuɗebemada jara panesiɗaa. 21 Dadji Boroba idji ʉɓʉaɗeba ãdjirãra carebasia. Maʉ̃ba ãdjia jara panʉra zocãrãba ĩjãsiɗaa. Ãdjia naẽna ẽpẽ pananada igaraɗapeɗa dadjirã Borora ĩjãsiɗaa.

22 Djabarã Jerusaleʉ̃nebemaba maʉ̃ cawasiɗaɗe Bernabeda Antioquíaɗaa diabuesiɗaa. 23 11:23-24 Maʉ̃ Bernabera ẽberã jipa ɓasia. Jesura bio ĩjã ɓasia; Ãcõrẽ Jaureɗeba ɓasia. Bernabe Antioquíaɗe jũẽsiɗe unusia Ãcõrẽba idji biaɗeba djabarãra careba ɓʉda. Maʉ̃ carea idjira bio ɓʉsriɗasia. Maʉ̃ne idjia jũmarãa jarabadjia dadji Borora soɗeba wãrãda ẽpẽnamãrẽã. Mãwã ɓʉɗe zocãrãba dadjirã Borora ĩjãsiɗaa.

25 Mãwãnacarea Bernabera Tarso puruɗaa Saulo jʉrʉɗe wãsia. Unupeɗa Antioquíaɗaa edesia. 26 Mama djabarã ume poa aɓa dji jʉrebadjiɗaa. Ãdjia zocãrã ẽberãrãa Jesucritoɗebemada jaradiabadjiɗaa. Maʉ̃ Antioquíaɗe ẽberãrãba Jesu ĩjã ɓeara “cristiano” abadjiɗaa. Mamabʉrʉ maʉ̃ trʉ̃ra naãrã odjasia.

27 Maʉ̃ ewariɗe Ãcõrẽneba beɗeabadarãda Jerusaleʉ̃neba Antioquíaɗaa wãsiɗaa. 28 Aɓa Agabo abadada ʉ̃ta nũmepeɗa Ãcõrẽ Jaureɗeba jarasia jũma naʉ̃ ẽjũãne jarrabada zeida. Maʉ̃ jarrabara wãrãda zesia Claudio Romanebema boro basiɗe.* 29 Maʉ̃ carea Jesu ĩjã ɓea Antioquíaɗe duanʉra beɗea ausiɗaa paratada djabarã Judea druaɗe ɓea itea diabueɗi carea. Ãdjiza poya diabʉda quĩrãca diaɗiaɗa asiɗaa. 30 Maʉ̃ parata jʉrʉ pepeɗaɗacarea Bernabeda Saulo siɗa edasiɗaa djabarã bororãmaa edeɗamãrẽã.