Romano

Pauloba naʉ̃ cartaɗe jĩrũare ɓʉɗa

16 Mʉ̃a bãrãa dadjirã djabawẽrã Pebeda bia jaraya. Idjira Cencrea puruɗe djabarã carebabaría.* 2 Dadjirã Boro trʉ̃neba bia edaɗadua Ãcõrẽ ẽberãrãba oɗida panʉ quĩrãca. Idjia ẽberãrãda zocãrã carebasia. Mʉ̃ siɗa bio carebasia. Maʉ̃ bẽrã ne jũmaneba idjira carebaɗadua.

3 Djabawẽrã Priscilaa, djaba Aquilaa biɗa jaraɗadua mʉ̃a quĩrĩã ɓʉda ãdjira bia pananida. Ãdjia mʉ̃ quĩrãca aɓarica Jesucrito trajura o panʉa. 4 Ãdjira mʉ̃ carebaɗi carea minijĩchiaɗe panasiɗaa. Mʉ̃a, jũma djabarã judiorãẽ́ biɗa ãdjía bia ɓʉaɗa abadaa. 5 Idjaɓa djabarã ãdji deɗe dji jʉrebadarãa jaraɗadua mʉ̃a quĩrĩã ɓʉda ãdjirãra bia duananida. Mʉ̃ djaba bio quĩrĩã ɓʉ Epenetoa aɓari quĩrãca jaraɗadua. Acaya druaɗe idjiabʉrʉ naãrã Jesucritora ĩjãsia. 6 Djabawẽrã Mariaa jaraɗadua mʉ̃a quĩrĩã ɓʉda idjira bia ɓaida. Idjia bãrãra bio careba ɓʉa. 7 Mʉ̃ djabarã judiorã Andronicoa, Juniaa biɗa aɓari quĩrãca jaraɗadua. Ãdjira mʉ̃ ume ãbaa preso panasiɗaa. Ãdjiɗebemada Jesuba diabueɗarãba bia crĩcha panʉa. Mʉ̃a Crito ĩjãi naẽna ãdjia ĩjãsiɗaa.

8 Mʉ̃ djaba Ampliatoa jaraɗadua mʉ̃a quĩrĩã ɓʉda idjira bia ɓaida. Dadjirã Boro Jesucritoɗeba idjira bio quĩrĩã ɓʉa. 9 Djaba Urbanoa jaraɗadua mʉ̃a quĩrĩã ɓʉda idjira bia ɓaida. Idjia dai ume ãbaa Jesucritoɗebemada jaradia ɓʉa. Djaba Estaquía biɗa aɓarica jaraɗadua. Idji siɗa mʉ̃a quĩrĩã ɓʉa. 10 Djaba Apelea jaraɗadua mʉ̃a quĩrĩã ɓʉda idjira bia ɓaida. Idjia unubisia Critora wãrãda ĩjã ɓʉda. Jũma Aristobulo ẽberãrãa biɗa aɓari quĩrãca jaraɗadua. 11 Mʉ̃ djaba judio Herodioʉ̃a jaraɗadua mʉ̃a quĩrĩã ɓʉda idjira bia ɓaida. Narciso ẽberãrã dadjirã Boro ĩjã ɓeaa jaraɗadua mʉ̃a quĩrĩã ɓʉda ãdjirãra bia duananida. 12 Djabawẽrã Tripenaa, Triposaa biɗa jaraɗadua mʉ̃a quĩrĩã ɓʉda ãdjira bia pananida. Ãdjia dadjirã Boro itea bia o panʉa. Idjaɓa djabawẽrã Persidáa aɓarica jaraɗadua. Idjia biɗa dadjirã Boro itea bia o ɓʉa. 13 Djaba Rupo dadjirã Boroba edaɗaa, idji papaa biɗa jaraɗadua mʉ̃a quĩrĩã ɓʉda ãdjira bia pananida. Idji papara mʉ̃ papaca ɓʉa. 14 Djaba Asincritoa, Plegontea, Hermaa, Patrobáa, Hermea, idjaɓa djabarã ãdjirã ume duanʉ́a biɗa jaraɗadua mʉ̃a quĩrĩã ɓʉda ãdjirãra bia duananida. 15 Idjaɓa djaba Pilologoa, Juliaa, Olimpaa, Nereóa, idji djabawẽrãa, idjaɓa jũma Ãcõrẽ ẽberãrã ãdjirã ume duanʉ́a biɗa jaraɗadua mʉ̃a quĩrĩã ɓʉda ãdjirãra bia duananida. 16 Wãrã quĩrĩãneba dji bia edaɗadua.* Jũma Crito ẽberãrãba quĩrĩã panʉa bãrãra bia duananida.

17 Djabarã, mʉ̃a bãrãa beɗea djuburiaya quĩrãcuita ɓeaɗamãrẽã. Ʉ̃cʉrʉba djabarãa awara awara crĩchabibadaa. Bãrãba wãrã beɗea cawapeɗaɗara ãdjirãba quĩrã awara jaradiabadaa. Maʉ̃ ẽberãrã ume ãbaa ɓearãnadua. 18 Ãdjirãba dadjirã Boro Jesucritoba quĩrĩã ɓʉra o panʉẽ́a, ãtebʉrʉ ãdjia quĩrĩã panʉdrʉ o panʉa. Ãdji beɗea biya quiruɗeba dji cũrũgaicha ɓeara cũrũgabadaa.

19 Jũmarãba cawa panʉa bãrãba Ãcõrẽ beɗeara wãrãda ĩjã o panʉda. Maʉ̃ carea mʉ̃ra ɓʉsriɗa ɓʉa. Wãrãda mʉ̃a quĩrĩã ɓʉa bãrãba biada o cawaɗida idjaɓa cadjiruada oɗaẽ́da. 20 Ãcõrẽ dadji necai ɓai diabariba dãrãẽ́ne diaurura poyapeɗa bãrã jʉwaeɗa ɓʉya.* Mʉ̃a quĩrĩã ɓʉa dadjirã Boro Jesucritoba idji biaɗeba bãrãra careba ɓaida.

21 Djaba Timoteo mʉ̃ ume ãbaa jaradia ɓʉba quĩrĩã ɓʉa bãrãra bia duananida. Idjaɓa mʉ̃ djabarã judiorã Lucioba, Jasoʉ̃ba, Sosipatero biɗa quĩrĩã panʉa bãrãra bia duananida.

22 Mʉ̃ra Tercioa. Pauloba mʉ̃́a naʉ̃ cartara ɓʉbi ɓʉa. Dadjirã Boro Jesucritoɗeba mʉ̃a quĩrĩã ɓʉa bãrãra bia duananida.

23 Djaba Gayo biɗa quĩrĩã ɓʉa bãrãra bia duananida. Mʉ̃ra idji deɗe ɓʉa. Djabarã jũmarãda idji deɗe ãbaa dji jʉrebadaa. Naʉ̃ puruɗebema parata wagabari Erastoba, djaba Cuarto biɗa quĩrĩã panʉa bãrãra bia duananida.

24 Mʉ̃a quĩrĩã ɓʉa dadjirã Boro Jesucritoba idji biaɗeba bãrãra careba ɓaida.

Pauloba Ãcõrẽa bia jaraɗa

25 16:25-26 Mʉ̃a beɗea bia Jesucritoɗebemada jaradia ɓabaria. Ara maʉ̃ beɗeaɗeba Ãcõrẽba bãrãra poya carebaya zarea ɓeaɗamãrẽã. Maʉ̃ beɗeara Ãcõrẽba naẽna cawabiẽ́ ɓasia baribʉrʉ iɗira cawabisia. Idjiɗeba beɗeabadarãba maʉ̃ra cartaɗe ɓʉsiɗaa. Ãcõrẽ beucaba mãwã ɓʉbisia druazabemarãba ũrĩnapeɗa Jesucritoda ĩjãnamãrẽã. Ãcõrẽa bia beɗeaɗida panʉa. 27 Idjira aɓabʉrʉ ɓʉa. Ne jũmada cawa ɓʉa. Jesucritoɗeba dadjirãba ewariza idjía bia beɗeaɗida panʉa. Bia ɓʉa mãwã ɓaida.