Naʉ̃ carta jõnacare jãma jara ɓʉmae
1. Cãrẽda Babilonia puru Droma
¿Cãrẽã jara panʉda “Babilonia puru Droma” jũma religioʉ̃ sewaida ɓeara quĩrãca ɓʉda? (Apocalipsi 17:5). Acʉɗida beɗea ũbea:
Jũma naʉ̃ ẽjũãne ɓʉda. Bibliaba jara ɓʉda idjira chũmʉma bʉa “puruzabemada” idjaɓa “druazabema”, maʉ̃ puruɗebema “boroba druazabema bororãda idji jʉwaeɗa eroɓʉa” (Apocalipsi 17:15, 18).
Idjira druazabema boroẽ́a idjaɓa naʉ̃ ẽjũãnebema ne nẽdobuebadarãẽ́a. Ãcõrẽ Beɗea jara ɓʉ quĩrãca. “dji boro ẽjũãne ɓeara” idjaɓa “ẽberãrã ne nẽdobuebadara” zocai panʉda idjira jõbʉrʉmisa (Apocalipsi 18:9, 15).
Idjia oɗaɗeba biẽ́ jara panʉda Ãcõrẽnebema. Idjira wẽrã auɗu ɓʉda ẽjũãne boroɗebemarame ãbaa nĩba ɓʉda carebaɗamãrẽã idjira (Apocalipsi 17:1, 2). Idjia cũrũga ɓʉda ẽberãrã naʉ̃ ẽjũãnebemada, idjiɗeba zocãrã ẽberãrã beu panʉda (Apocalipsi 18:23, 24).
Wãya unuida beɗea 13, dji número 6
2. ¿Sãʉ̃bebʉrʉ jũẽi basida Ãcõrẽba ẽdrʉ edabari?
Bibliaba jarasida Ãcõrẽba ẽdrʉ edabari jũẽi naẽna domia 69 mãwãi basía (Ledua Daniel 9:25).
¿Sãʉ̃bebʉrʉ mãwãsida domia 69ɗe? Dji poa 455 D.E.N. Jãʉ̃ ewariɗe, dji boro Nehemiaba Jerusaleʉ̃ma wãsia ara oi carea (Daniel 9:25; Nehemia 2:1, 5-8).
¿Jũmasã droasida domia 69 ɓasiɗe? Ãcõrẽneba beɗeabadarãba ɓʉɗara jara ɓʉda ewari aɓara poaga aɓa ɓʉ quĩrãca ɓʉda (Numero 14:34; Ezequiel 4:6). Maʉ̃ careabʉrʉ aɓa domia 7 poaga aɓa ɓʉ quĩrãca ɓʉda. Maʉ̃nebʉrʉ 69 domia Ãcõrẽneba beɗeabadarãba ɓʉɗara 483 poaga ɓʉda (jãʉ̃ra jara quĩrĩã ɓʉda 69 domia multiplicado por 7 ewari).
¿Sãʉ̃be jõsida 69 domia? 455ɗeba D.E.N. aɓa 29ɗe D.E. 483 poaga ɓasidaa. Jãʉ̃ poa 29ɗe Jesura borocuesida Ãcõrẽba ẽdrʉ edabari ɓai carea (Luca 3:1, 2, 21, 22).
Wãya unuida beɗea 15, dji número 5
3. Nẽãrã diabadarãba obadara dadji oaɗebemada
Nẽãrã diabadarãba ne zocãrã obadada dadji oaɗeba. Ʉ̃cʉrʉba diabadada oada dewara ẽberãrã diaɗamãrẽã idjaɓa ãdjia diabadada ãdji operabʉdaɗe ara ãdji carea. Critianorã wãrã araba jãʉ̃gʉra oɗacada (Deuteronomio 15:23).
Baribʉrʉ dadjirãba ne zocãrã poya oɗida. Maʉ̃ne jaraɗida, dadjirãba poya oɗibara panʉda dadji oa nẽãrã diabadarãba poya edaida acʉmãrẽã dadjirãba cãrẽba dadji cacua caya ɓaida wa cãrẽnebemada eroɓʉda, jãʉ̃ra poya oɗida; idjaɓa poya oɗida hemodiálisis, hemodilución, wa tratamientora máquinaneba cardiopulmonar idjaɓa wãya eroɓai carea célula. Critiano aɓa aɓa jaraida ɓʉa cãrẽda o quĩrĩã ɓʉda nẽãrã diabadarãba oɗi carea. Nẽãrã diabadarãba ne awara awara poya oɗida, maʉ̃ne jarai naẽna cãrẽda o quĩrĩã ɓʉda ãdjirãba terapia wa nẽãrã oɗi carea, critianoba bio cawaida ɓʉa cãrẽda oida ɓʉa. Bio quĩrãcuita acʉida araarebema idi ɓʉra:
¿Cãrẽda mãwãida mʉ̃ oada mʉ̃ cacuaɗebema dãrã ãĩ ɓʉibʉrʉ? ¿Mʉ̃ quĩcha jipa ɓaida mʉ̃a quĩcha ɓʉ bẽrã jãʉ̃gʉ oara waɗi mʉ̃reda, maʉ̃ carea “[erozoabiẽ́da] ẽjũãnaa”? (Deuteronomio 12:23, 24).
¿Cãrẽda mãwãida dadjirã operabʉdaɗe wa nẽãrã diabadarãba awara ɓʉɗapeɗa oara wãya dadji cacuaɗe ɓʉɗi carea? ¿Mʉ̃ quĩchara jipa ɓaida Ãcõrẽba o ɓʉ quĩrãca o ɓaera, wa mʉ̃a poya oida nẽãrã diabadarãba jara panʉra?
Wãya unuida beɗea 39, dji número 3
4. Dji quimaa amebʉrʉɗe
Ãcõrẽ Beɗeaba ebuɗa jara ɓʉda ẽberãba amaiẽ́da ɓʉ dji quimara, idjaɓa dewara quimara poya edaẽ́da (1 Corinto 7:10, 11). Baribʉrʉ ʉ̃cʉrʉ critianorãba eɗauɗe quĩcha ɓabadjiɗada biara ɓʉda ameida idji quimaa.
Ne diacada dji cuariara quĩrĩẽ́ ɓaera: Dji quimaba ne diacabʉrʉ ãdjia quĩrĩã pananara maʉ̃ bʉrʉ dji cuariara biẽ́ pananida (1 Timoteo 5:8).
Ẽberãba dji quimada warrarã siɗa bio puo ɓaibʉrʉ: Jãʉ̃ quimaba idji cuariada djuburia eroɓaibʉrʉ ewari aɓaʉɗe poya beaida ãdjirãa (Galata 5:19-21).
Ẽberãba dji quimada jaraibʉrʉ ĩjãẽ́da Jeowaɗera: Jãʉ̃ quimaba jaraibʉrʉ Ãcõrẽme caita ɓarãmãrẽã (Hecho 5:29).
5. Piestara idjaɓa ewari dromara
Critianorãba piesta cadjiruara Jeowaba quĩrĩãcara oɗacada. Baribʉrʉ critiano aɓa aɓa jaraida ɓʉa cãrẽda o quĩrĩã ɓʉda idjaɓa quĩchaida ɓʉa cãrẽda poya oida jãʉ̃ ewari dromara zebʉrʉɗe. Acʉɗida ʉ̃cʉrʉ ejemplora:
Ʉ̃cʉrʉba jaraibʉrʉ jãʉ̃ piestaɗe bio capipia wãdua. Bʉa aɓabe bʉrʉ poya jaraida, “Bia ɓʉaɗa”. Jãʉ̃ ẽberãba mãsa cawa quĩrĩã ɓʉbʉrʉ, bʉa poya jaraida idjía cãrẽã jãʉ̃ piesta ocada.
Bʉ quimara Beɗea ɓea Jeowaɗebemaẽ́a, maʉ̃ carea idjia bʉ́a jaraida idjime wãida idji cuariamaa pʉrrʉai carea ewari dromane. Bʉ quĩchamaarã jãʉ̃ra bia ɓʉbʉrʉ, bʉa bʉ quimaa poya jaraida bʉa wãida; baribʉrʉ ebuɗa poya jaraida jãʉ̃ ne coida jãʉ̃ piesta cadjirua carea o panʉbʉrʉ bʉra poya eda ɓaẽ́da.
Traju djibariba bʉ́a dia quĩrĩã ɓʉda parata piesta navidad carea. ¿Bʉa jidaida ɓʉda wa jidaẽ́da? Bʉa bio quĩchaida ɓʉa jidai carea wa jidaẽ́ carea. Quĩchadua, ¿dji traju djibariba dia ɓʉda jãʉ̃ parata bʉa bia traja ɓʉ bẽrã wa jãʉ̃ piesta obada bẽrã?
Ʉ̃cʉrʉba bʉ́a ne bari dia ɓʉda navidaɗe. Jãʉ̃ ẽberãba poya jaraida bʉ́a: “Mʉ̃a cawa ɓʉda bʉa naʉ̃ piesta oẽ́da, baribʉrʉ mʉ̃a ne bari dia quĩrĩã ɓʉda”. Bʉa poya quĩchaida jãʉ̃ ẽberã aɓabe bʉrʉ aduá ɓʉda. Wa poya quĩchaida, ¿idjia ne bari dia ɓʉbʉrʉ unui carea bʉa cãrẽda o quĩrĩã ɓʉda idjaɓa cawai carea bʉa jãʉ̃ piesta o quĩrĩã ɓʉbʉrʉ? Jũma quĩchapeɗa bʉa poya cawaida jidaida wa jidaẽ́da. Dadjirãba ne baridua o panʉne dadji quĩcha jipa ɓeaɗida panʉa, idjaɓa jãʉ̃gʉba acʉbiɗida bio ĩjãbadaa Jeowaɗera (Hecho 23:1).
Wãya unuida beɗea 44, dji número 1
6. Enfermeda cadjirua jidabi ɓʉda
Bio quĩrĩã panʉ bẽrã ẽberãrãra, dadjirãba quĩrãcuita acʉɗibara enfermeda cadjirua jidabiẽ́ carea. Quĩrãcuita ɓeaɗida panʉa dadji cacua biẽ́ ɓʉbʉrʉ wa quĩcha panʉbʉrʉ jidabi ɓaida enfermeda cadjirua dadji djãrãra. Jãʉ̃ra jãwã o panʉda Ãcõrẽ Beɗeaba jara ɓʉ bẽrã: “Djãrã quĩrĩã ɓʉba [...] ara bʉdji quĩrĩã ɓʉ quĩrãca” (Romano 13:8-10).
¿Naʉ̃gʉ beɗea cãrẽda jara quĩrĩã ɓʉda? Aɓaʉba enfermeda cadjirua eroɓʉbʉrʉ, isõiẽ́bara ɓʉ, ni ɓʉsʉẽ́bara ɓʉ djãrãra, jãʉ̃ enfermeda cadjirua poya jidabi bẽrã. Jãʉ̃ ẽberãda quĩrũẽ́bara dewararãba edecaɗaẽ́ panʉbʉrʉ ãdji deɗe waga quĩrĩã panʉ bẽrã dji cuariara. Idjaɓa borocuei naẽna jãʉ̃ ẽberãda jaraida ɓʉa djabarã wagabadarãa congregacioʉ̃nebemara, jãʉ̃ enfermeda cadjirua jidabiẽ́ carea dewararã borocuebʉdaɗe. Ẽberã quĩcha ɓʉbʉrʉ idjira enfermeda cadjirua poya eroɓaida, mĩã cãĩ naẽna examen oɗida dji nẽãrã diabadarãba acʉɗi carea dji oada cawaɗamãrẽã idjira bia ɓʉda wa biẽ́ ɓʉda. Jãʉ̃da jãwã oibʉrʉ bʉa acʉbiya bio sopua ɓʉda dewara ẽberãrã carea idjaɓa “bãdjiza bia ɓeaɗi carea jʉrʉrãnadua, ãtebʉrʉ jʉrʉɗadua djãrã siɗa bia ɓeaɗamãrẽã” (Pilipo 2:4).
Wãya unuida beɗea 56, dji número 2
7. Ne nẽdo eda panʉne idjaɓa ley quĩrãpita wã panʉne
Dadjirãba negocio o panʉne bio biara ɓʉda jũma quĩcha panʉra ɓʉɗida, jãʉ̃ negocio o panʉmĩna dewara critianome (Jeremías 32:9-12). Eɗauɗe aɓaʉ critianoba poya quĩrũ ɓaida dewara critianome parataɗeba wa dewaraʉɗeba, jãʉ̃ra mãwã panʉne ãdjirãba beɗeaɗida panʉa ãdjirãya ara oɗi carea jãʉ̃ mãwãnara. Eteba beɗeaɗida, necai beɗeaɗida idjaɓa ãdjiduɓa beɗeaɗida.
Baribʉrʉ, ¿cãrẽda oida beɗea dromara eropanʉbʉrʉ, maʉ̃ne jaraɗida, sewa nẽbʉra o panʉne wa ne drʉa panʉne? (Leadua Mateo 18:15-17). Jesuba jarasida ne ũbea poya oɗida:
Bãduɓa panʉne ibiaɗeba quẽãdua (Acʉɗadua dji caibea 15).
Waɗi ara oẽ́ ɓʉbʉrʉ ẽberãda aɓa wa umé idjimaa ededua (Acʉɗadua dji caibea 16).
Waɗi ara oẽ́ ɓʉbʉrʉ maʉ̃ne djabarã wagabadarãra ãbaa trʉ̃peɗa ãdjirãa maʉ̃nebemada jaradua (Acʉɗadua dji caibea 17).
Bio biara ɓʉda ara oɗida jũma ne cadjirua mãwãnara dadji djabarãme ley quĩrãpita wãi naẽna, ¿cãrẽã? Ley quĩrãpita wãbʉrʉɗe dadji djabarãme jãʉ̃gʉba carebaẽ́da congregacioʉ̃ra, maʉ̃ cãyãbara ẽberãrãba biẽ́ poya beɗeaɗida Jeowaɗebemada (1 Corinto 6:1-8). Baribʉrʉ eɗauɗe ley quĩrãpita wãnida panʉa, ne jara ɓʉ quĩrãca: carta mĩã amainebemada diabʉrʉɗe, cawai carea dji warrada caime poya ɓaida, õgo obi carea dji zezeba ne jũma diaɗi carea idji warrara, eroɓeaɗi carea parata seguroɗeba idjaɓa testamento eroɓeaɗi carea. Aɓaʉ critianoba ley quĩrãpita wãibʉrʉ jãʉ̃gʉ carea bia o ɓʉda.
Aɓaʉba ne cadjirua oibʉrʉ, ejemploda, cadjirua oibʉrʉ dji wẽrãda wa caibearã, zocãrã ne drʉa ɓʉbʉrʉ idjaɓa djãrã bea ɓʉbʉrʉ, critianoba ley quĩrãpita poya jaraida, jãʉ̃gʉra cadjirua oẽ́da.
a 455ɗeba D.E.N. aɓa 1ɗe D.E.N ɓʉda 454 poaga, poa 1ɗeba D.E.N. aɓa poa 1ɗe D.E. ɓʉda 1 poaga, (poa cero neẽ́ ɓʉ bẽrã). Poa 1ɗeba D.E. aɓa 29ɗe ɓʉda 28 poaga. Jãʉ̃da juachaɗibʉrʉ 483 poaga dia ɓʉda.