Maiatza

Lehen mendean, gosete handi bat izan zen «mundu guztian» eta kristauek ere honen ondorioak jasan zituzten. Ziur gurasoak kezkatuta egongo zirela familia nola elikatuko zuten pentsatuz. Eta zer egingo zuten gehiago predikatzeko asmoa zuten gazteek? Euren helburuak atzeratu beharko zituztela pentsatuko ote zuten? Beraien egoera zein zen inporta gabe, kristauak egokitu egin ziren. Predikatzen jarraitu zuten ahal zuten moduan, eta Judeako anai-arrebekin beraien gauza guztiak pozik konpartitu zituzten (Eg. 11:29, 30). Laguntza jaso zutenek Jehobaren eskua ikusi zuten (Mat. 6:31-33). Lagundu zieten anai-arrebengandik gertuago sentituko ziren. Bestalde, laguntza eskaini zutenek ere, bai dohaintzen bidez, baita laguntza lanetan parte hartuz ere, emateak dakarren zoriontasuna sentitu zuten (Eg. 20:35). w23.04 16 ¶12-13

Batzuetan, Jehobak bera zerbitzatzen ez duten pertsonak motibatu ditzake bere zerbitzari leialen otoitzak erantzuteko. Adibidez, hori da Artaxerxes erregearekin egin zuena. Nehemiasek Jerusalemera itzultzeko baimena eskatu zion hiria berreraiki ahal izateko, eta erregeak eskaera hau onartu zuen (Neh. 2:3-6). Gaur egun ere, Jehobak bera zerbitzatzen ez dutenak erabili ditzake beharra dugunean gu laguntzeko. Jehobak ez ditu beti gure otoitzak modu ikusgarri batean erantzuten. Baina jasotzen ditugun erantzunak justu behar ditugunak dira berari leial mantentzeko. Beraz, adi egon Jehobak zure otoitzak nola erantzuten dituen ikusteko eta hartu, noizbehinka, hau nola egiten duen hausnartzeko tarte bat (Sal. 66:19, 20). Jehobari otoitz egiteaz gain, gure otoitzen erantzunak onartu behar ditugu, nola erantzuten digun axola gabe. Horrela, fedea erakusten dugu (Heb. 11:6). w23.05 12 ¶13, 15; 13 ¶16

Geure burua Jehobari eskaini genionean, Bera adoratu eta bere nahia egingo genuela promestu genion. Boto hau bete behar dugu. Gure eskaintzaren arabera bizitzeak ez du esan nahi eramangaitza den zama denik. Azken finean, Jehobak bere nahia egiteko sortu gintuen (Ap. 4:11). Behar espiritualarekin eta bere irudira sortu gintuen. Ondorioz, berarengana gerturatu gaitezke eta bere nahia egiteaz gozatu dezakegu. Are gehiago, Jainkoaren nahia egitean eta bere Semea imitatzean, «bizitzarako atsedena» lortzen dugu (Mat. 11:28-30). Beraz, Jehobari diozun maitasuna sendotzen jarraitu eman dizkizun gauza on guztietan eta etorkizunean emango dizkizun bedeinkapenetan hausnartuz. Jehoba zenbat eta gehiago maitatu, orduan eta errazagoa egingo zaizu bera obeditzea (1 Joan 5:3). Jesusek Jainkoaren nahia egitea lortu zuen Jehobari otoitzean laguntza eskatu ziolako eta arreta jasoko zuen sarian jarrita zuelako (Heb. 5:7; 12:2, NWT). Jesusek bezala, otoitz egin Jehobari indarra eskatuz eta izan beti gogoan betirako bizitzeko esperantza. w23.08 27-28 ¶4-5

Gutako guztiok asko estimatzen ditugu pazientziadunak diren pertsonak. Pazientziarik galdu gabe itxaroteko prest daudenak baloratzen ditugu. Akatsak egiten ditugunean, asko eskertzen dugu besteek guri pazientzia erakustea. Eta asko estimatzen dugu gure Biblia irakasleak erakutsi zigun pazientzia. Izan ere, Bibliako irakaspen bat ikasi, onartu eta praktikan jartzerakoan zailtasunak izan genituen agian. Baina, bereziki eskertzen duguna, Jehobak guri erakusten digun pazientzia da. Esan bezala, asko eskertzen dugu besteek guri pazientzia erakusten digutenean. Baina, ez da beti erraza izaten norberak ezaugarri hau erakustea. Adibidez, auto-ilara luze baten erdian gaudenean, zaila izan daiteke lasai mantentzea, bereziki berandu bagabiltza. Edo, beharbada, azkar haserretzen gara besteek probokatzen gaituztenean. Eta Jehobaren mundu berriko promesan itxaroten jarraitzea zaila dela sentitu dezakegu batzuetan. Hala ere, kasu hauetan guztietan, pazientzia gehiago izan behar dugu. w23.08 20 ¶1-2

Jehobak eskatu bezala, Gedeonek bere armada % 99 baino gehiago murriztu zuen. Berak pentsatu ahal zuen: «Benetan beharrezkoa al da aldaketa hau? Ondo aterako ote da?». Dena dela, Gedeonek obeditu egin zuen. Adindunek Gedeon imitatzen dute erakundeak gauza batzuk beste modu batera egiteko eskatzen dienean (Heb. 13:17). Beldurra eduki eta egin beharrekoa arriskutsua izan arren, Gedeonek Jehoba obeditu zuen (Ep. 9:17). Gedeon ziur zegoen honetaz: Jainkoaren laguntza jasoko zuela bere herria babesteko. Gure lana debekatuta dagoen tokietan bizi diren adindunek Gedeon imitatzen dute. Nola? Ausardiaz bileretan eta predikazioan aurrea eramanez, nahiz eta atxilotzeko, lana galtzeko, edo galdeketak edo biolentzia jasateko mehatxuak jaso. Larrialdi handian, adindunek ausardia beharko dute jasoko dituzten jarraibideak obeditzeko, hauek jarraitzea arriskutsua izan arren. w23.06 5-6 ¶12-13

Jehobak Joiada apaiz nagusiari gertatutakoa gure ikaspenerako Biblian idatzia utzi zuen (Erm. 15:4). Eta hil zenean, honako ohore paregabea jaso zuen: «Daviden Hirian lur eman zioten, erregeen ondoan, on handia egin baitzuen Israelen, Jainkoaren eta tenpluaren alde» (2 Kro. 24:15, 16). Joiadaren bizipenak asko lagundu gaitzake gutako guztioi Jehobari diogun errespetu handia lantzen. Adindunek Joiada imitatu dezakete erne segiz eta leialtasunez Jainkoaren artaldea babestuz (Eg. 20:28). Adinekoek ere asko ikasi dezakete Joiadaren eredutik. Jehobari errespetu handia izatean eta leial mantentzean, Jehobak bere nahia betetzeko erabili ditzake. Bestalde, gazteek Jehoba imitatu dezakete Joiada bezalako adineko anai-arrebak duintasunez eta errespetuz tratatuz; bereziki urte askotan Jehoba leialtasunez zerbitzatu dutenak (Esa. 16:31, NWT). Azkenik, leialtasunez lagundu ditzagun aurrea hartzen dutenak beraiek obedituz (Heb. 13:17, NWT). w23.06 17 ¶14-15

Bileretan, izan zaitez zentzuduna eskua zenbat aldiz altxatuko duzun erabakitzean. Eskua gehiegitan altxatzen badugu, nola sentitu daiteke ikasketa zuzentzen ari dena? Agian zuri komentarioak behin eta berriz emateko presioa sentitu dezake, nahiz eta beste batzuk oraindik komentario bat eman gabe egon. Honek besteak desanimatu ditzake eta zailagoa egingo zaie eskua altxatzea (Ekl. [Koh.] 3:7). Eskua askok altxatzen dutenean, ikasketa zuzentzen duenak agian ezin digu guk nahi bezainbeste komentario eman. Batzuetan, beharbada, bat bera ere ez. Hau desanimagarria izan daiteke, baina saiatu ez gaizki hartzen (Ekl. [Koh.] 7:9). Zer egin dezakegu ez badugu nahi bezainbeste komentatzen? Besteen iruzkinak adi-adi entzun eta bilera amaitzean zoriondu. Anai-arrebak zoriontzen dituzunean, ziur egon oso animatuak sentituko direla, zure iruzkinekin bezainbeste. w23.04 23-24 ¶14-16

Aztertu Jainkoaren Hitza eta honetan hausnartu. Sustrai sakonak dituen zuhaitza sendo mantendu daiteke. Antzera, gu ere sendo mantendu gaitezke gure fedea Jainkoaren Hitzean oinarritzen bada. Zuhaitza hazi ahala, bere sustraiak sakonagoak dira eta gehiago zabaltzen dira. Guk ere Biblia aztertu eta honetan hausnartzen dugunean, fedea sendotzen dugu eta gero eta argiago ikusten dugu Jainkoaren arauak onenak direla (Kol. 2:6, 7). Jehobaren gidak, aholkuak eta babesak bere iraganeko zerbitzariei lagundu zien moduan hausnartu. Adibidez, Ezekielek arreta handia jarri zuen izandako ikuskari batean. Bertan, aingeru batek kontu handiz hartu zituen ikuskariko tenpluaren neurriak. Ikuskari honek Ezekiel sendotu zuen. Baina, horretaz gain, Jehobak adorazio garbirako jarri dituen baldintzen alde guk nola egin dezakegun irakasten digu (Eze. 40:1-4; 43:10-12). Jainkoaren Hitzeko gauza sakonak aztertu eta hauetan hausnartzeko denbora hartzen dugunean, guk ere emaitza onak lortzen ditugu. Bihotz sendo bat izan dezakegu Jehobarengan konfiantza osoa badugu (Sal. 112:7, Ke). w23.07 18 ¶15-16

Biblia anaia gazteek imitatu ditzaketen eredu onez beteta dago. Iraganeko gizon hauek Jainkoa maitatzeaz gain, bere herria hainbat modutan zaindu zuten. Zure familian eta kongregazioko kristau helduen artean eredu onak ere aurkitu ditzakezu (Heb. 13:7, NWT). Eta, noski, Jesu Kristoren eredu perfektua ere baduzu (1 Ped. 2:21). Eredu hauek arretaz aztertzen dituzun heinean, pentsatu gizon hauen ezaugarri bikainetan (Heb. 12:1, 2). Ondoren, nola imitatuko dituzun erabaki. Pentsatzeko gaitasuna duen anaiak bere aukerak arretaz aztertzen ditu ezer erabaki aurretik. Beraz, gogor lan egin abilezia hau izateko eta mantentzeko. Hasteko, Biblia printzipioak ezagutu eta hauek lagungarriak zergatik diren pentsatu. Ondoren, ikasitakoa Jehoba poztuko duten erabakiak hartzeko erabili (Sal. 119:9). Honek izugarri lagunduko dizu kristau heldu izatera iristen (Esa. 2:11, 12; Heb. 5:14, NWT). w23.12 24-25 ¶4-5

Gurasoek euren seme-alabei modu lasaian erantzuten irakatsi ahal diete beraien sinesmenei buruz galdetzen dietenean (St. 3:13). Guraso batzuek trebakuntza saioak egiten dituzte familia adorazioan. Hasteko, eskolan aipatu daitezkeen gaiei buruz hitz egiten dute. Ondoren, hauei erantzuna nola eman aztertu eta entseiatzen dute. Gainera, euren seme-alabei modu lasai eta erakargarrian nola hitz egin irakasten diete. Trebakuntza saio hauek oso lagungarriak izan daitezke gazteentzat. Beraien sinesmenez konbentzituta egoten laguntzeaz gain, besteei hauek azaltzen ikasi dezakete. JW.ORG webgunean, «Los jóvenes preguntan» artikulu saila eta «Ponlo por escrito» atala daude. Atal honek gazteei euren sinesmenak sendotzen laguntzen die, baita euren hitzetan erantzunak prestatzen ere. Artikulu sail hau familian aztertuz, guztiok gure fedea modu lasai eta erakargarrian defendatzen ikasi dezakegu. w23.09 17 ¶10; 18 ¶15-16

Jarri al duzu inoiz betetzea asko kostatu zaizun helburu espiritualen bat? Hala bada, ez zara bakarra. Adibidez, Philip-ek gehiagotan egin nahi zuen otoitz eta bere otoitzak hobetu nahi zituen, baina zaila egiten zitzaion denbora topatzea. Erikaren kasuan, bere helburua predikatzeko bileretara garaiz iristea zen. Hala ere, ia bilera guztietara berandu iristen jarraitzen zuen. Helburu sinpleek ere denbora eta lan handia eskatzen dute. Horregatik, ez zaitez desanimatu helbururen bat betetzea lortu ez baduzu. Oraindik helburu hori bete nahi izateak Jehobarekin duzun harremana estimatzen duzula eta onena eman nahi diozula erakusten du. Gainera, berak zure esfortzuak baloratzen ditu. Noski, berak ez du zugandik eman dezakezuna baino gehiago espero (Sal. 103:14; Mik. 6:8). Beraz, izan zaitez arrazoitsua eta bete ditzakezun helburuak bakarrik jarri. w23.05 26 ¶1-2

Pertsona ausartek beldurra sentitu dezakete, baina honek ez die ondo dagoena egitea eragozten. Daniel gaztea oso ausarta izan zen. Berak Jainkoaren profetek idatzitakoa aztertu zuen, Jeremiasen profeziak barne. Ikerketa honi esker, denbora luzez gatibu izan ziren juduak laster Babiloniatik aske aterako zirela ulertu zuen (Dan. 9:2). Bibliako profeziak bete zirela ikusteak dudarik gabe Jehobarengan zuen konfiantza sendotu zuen. Gainera, Jainkoarengan konfiantza sendoa dutenak benetan ausartak izan daitezkeela ikusi zuen (Konparatu Erromatarrei 8:32, 37-39). Are garrantzitsuagoa dena, Danielek askotan egin zion otoitz bere zeruko Aitari (Dan. 6:11 [6:10, NWT]). Jehobari bere bekatuak aitortu zizkion, eta bere bihotza ireki eta laguntza erregutu zion (Dan. 9:4, 5, 19). Daniel, gu bezala, ez zen ausardiarekin jaio. Ezaugarri hau Idazkiak aztertuz, otoitz eginez eta Jehobarengan konfiantza izanez garatu zuen. w23.08 3 ¶4; 4 ¶7

Agintariei obeditzen diegunean, emaitza onak jasotzen ditugu, bai guk, baita besteek ere. Nola? Alde batetik, legeak desobeditzeak dakarren zigorra saihesten dugu (Erm. 13:1, 4). Bestalde, agintariei obeditzen diegunean, Jehobaren lekukoak hiritar onak garela erakusten diegu. Honen harira, ikus dezagun duela hamarkada batzuk Nigeriako bilera areto batean gertatu zena. Anai-arrebak bileran zeudela, soldadu batzuk aretora sartu ziren zergak ordaintzearen aurka zeuden pertsonen bila. Baina, soldaduen kargu zegoen ofizialak hauei aretotik ateratzeko agindu zien, honakoa esanez: «Jehobaren lekukoek beti ordaintzen dituzte zergak». Beraz, legea obeditzen duzun bakoitzean, Jehobaren lekukoen izen ona mantentzen laguntzen duzu. Eta baliteke egunen batean izen on honek anai-arrebak babestea. w23.10 9 ¶13

Jehobaren zerbitzari leial batzuk denbora luzez egon dira sistema honen amaiera ikusteko zain. Gizakion ikuspuntutik, Jehobaren promesa atzeratzen ari dela eman dezake. Baina Jehobak badaki bere zerbitzariok nola sentitzen garen. Izan ere, honakoa ziurtatu zion Habakuk profetari: «Ikuskari hau ez da beteko, epea burutu arte, baina badoa helbururantz, ez du huts egingo. Luzatzen bada, zuk itxaron, iritsiko baita, berandu gabe iritsi ere» (Hab. 2:3). Habakuken onerako bakarrik izan al ziren Jainkoaren hitz hauek? Noski ezetz. Guk ere hitz hauetatik probetxu handia atera dezakegu. Jehobak Paulo apostoluari hitz hauek kristauentzat ere bazirela esan zion. Izan ere, kristauak mundu berria iristeko irrikitan daude (Heb. 10:37). Zer ziurtasun dugu Jehobaren promesa atzeratzen ari dela iruditzen bazaigu? Jehobak honakoa ziurtatzen digu: «Luzatzen bada, zuk itxaron, iritsiko baita. Berandu gabe iritsi ere». w23.04 30 ¶16

Jehoba Moises bere ordezkari bezala erabiltzen ari zen froga argiak egon arren, israeldarrek ez zituzten froga hauek onartu (Zen. 14:10, 11). Izan ere, Moises behin eta berriz baztertu zuten, ez baitzuten onartzen Jehoba Moises erabiltzen ari zenik. Ondorioz, Jehobak ez zion israeldar belaunaldi horri promestutako lurraldean sartzen utzi (Zen. 14:30). Hala ere, israeldar batzuek Jehobaren gida jarraitu zuten. Adibidez, honakoa esan zuen Jehobak: «Kaleb [...] guztiz leiala izan zait» (Zen. 14:24). Jainkoak Kaleb saritu zuen, eta promestutako lurraldean non bizi nahi zuen erabakitzen utzi zion (Jos. 14:12-14). Israeldarren hurrengo belaunaldiak ere eredu ona jarri zuen Jehobaren gida jarraitzerako orduan. Josue israeldarren buruzagi izendatua izan zenean, israeldarrek «Moisesi bizitza osoan begirune izana zioten bezala» errespetatu zuten (Jos. 4:14). Ondorioz, Jehobak promestutako lurraldea emanez bedeinkatu zituen (Jos. 21:43, 44). w24.02 21 ¶6-7

Medikuak pultsua aztertzen digunean, gure bihotza nola dagoen jakin dezake. Era berean, besteei diegun maitasuna zer-nolakoa den aztertzen dugunean, Jainkoari diogun maitasuna zein sendoa den jakingo dugu. Anai-arrebei diegun maitasuna nolabait ahuldu dela konturatzen bagara, Jainkoari diogun maitasuna ere ahuldu den seinale izan daiteke. Alderantziz, anai-arrebei maitasuna erregularki erakusten diegunean, Jainkoari diogun maitasuna sendo dagoen seinale da. Anai-arrebei diegun maitasuna ahultzen ari bada, arazo larri bat dugu. Zergatik? Jehobarekin dugun adiskidetasuna galtzeko arriskuan gaudelako. Joan apostoluak ideia hau argi utzi zuen ondorengoa gogoraraziz: «Ikusten duen senidea maite ez duenak ezin du maite ikusten ez duen Jainkoa» (1 Joan 4:20). Zer ikasten dugu? Jehoba gurekin pozik egoteko, behar-beharrezkoa dela elkar maitatzea (1 Joan 4:7-9, 11). w23.11 8 ¶3; 9 ¶5-6

Gaztea zenean, Joax erregeak erabaki on bat hartu zuen. Bere aita hiltzean, Joiada apaiz nagusiak hezi zuen eta Jehobari buruz irakatsi zion. Joiadaren gida jarraituz, Joaxek Jehoba zerbitzatzea eta besteei gauza bera egiten laguntzea erabaki zuen. Gainera, Jehobaren tenplua konpondua izateaz ziurtatu zen (2 Kro. 24:1, 2, 4, 13, 14). Agian zure gurasoek Jehoba maitatzen eta bere arauen arabera bizitzen irakasten ari dizute. Hala bada, opari oso baliotsua jaso duzu (Esa. 2:1, 10-12). Gurasoek modu desberdinetan lagundu zaitzakete. Zure gurasoengandik jasotzen dituzun Biblian oinarritutako aholkuak jarraitzen badituzu, asko poztuko dituzu. Are garrantzitsuagoa, Jainkoa poztu eta berarekin duzun harremana sendotuko duzu (Esa. 22:6; 23:15, 24). Hauek arrazoi onak dira Joaxek gaztetan jarri zuen eredua imitatzeko. w23.09 8-9 ¶3-5

Jehobak gure otoitzak entzungo dituela promesten du. Gure Jainkoak bere zerbitzari leialak maite dituenez, beraien otoitzak arretaz entzuten ditu beti (Sal. 10:17; 37:28). Baina honek ez du esan nahi eskatzen dugun guztia emango digunik. Baliteke mundu berria heldu arte itxaron behar izatea eskatzen ditugun gauza horietako batzuk jasotzeko. Jehobak bere helburua kontuan hartzen du gure otoitzak entzutean (Is. 55:8, 9). Bere helburuaren barne, lurra bere agintaritzapean gizaki elkartu eta zoriontsuez betetzea dago. Baina Satanasek honakoa aldarrikatzen du: gizakiek beraien burua agintzen badute, zoriontsuagoak izango direla (Has. 3:1-5). Deabruak esandakoa gezurra dela frogatzeko, Jehobak gizakiei beraien kabuz agintzen utzi die. Ondorioz, giza agintaritzak gaur egun ditugun arazo asko sortu ditu (Ekl. [Koh.] 8:9). Badakigu Jehobak ez dituela arazo hauek guztiak orain konponduko. w23.11 21 ¶4-5

Jehobak Abrahamen bitartez herri asko bedeinkatuak izango zirela promestu zuen. Baina Abrahamek 100 urte zituen eta Sarak 90, eta oraindik ez zuten semerik izan. Beraz, giza ikuspuntutik ezinezkoa zirudien Abrahamek eta Sarak semerik izatea. Hau benetako proba izan zen Abrahamentzat. Hala ere, «esperantzan oinarrituta, Abrahamek herri askoren aita izatera iritsiko zen fedea izan zuen» (Erm. 4:18, 19, NWT). Eta, azkenean, Abrahamen esperantza bete zen. Isaak izan zuten, hainbeste itxarondako semea (Erm. 4:20-22). Guk ere, Abrahamek bezala, Jainkoaren onespena jasotzea eta bere lagunak izatea lortu dezakegu. Hauxe bera azpimarratu zuen Paulok honakoa idaztean: «Baina Liburu Santuak ez du hori harengatik bakarrik esaten, guregatik ere badio; gu ere, Jesus gure Jauna hildakoen artetik piztu zuenarengan sinesten dugunok, sinesmenari esker onartuko baikaitu Jainkoak» (Erm. 4:23, 24). Abrahamen antzera, fedea izateaz eta ekintzak egiteaz gain, esperantza ere izan behar dugu. w23.12 7 ¶16-17

Beldurtzen zaituen zailtasun baten aurrean zaudenean, gogoratu Jehoba zuk duzun zailtasunaz ohartzen dela, baita zailtasun honek nola sentiarazten dizun ere. Adibidez, israeldarrek Egipton jaso zituzten tratu txarrak ezagutzeaz gain, Jehoba «haien oinazeaz» ere ohartu zen (Irt. 3:7). Beldurgarria den zailtasun baten aurrean bazaude, agian zaila egiten zaizu Jehoba zutaz nola arduratzen ari den konturatzea. Beraz, bere babesa ikusten laguntzeko eskatu (2 Err. 6:15-17). Ondoren, pentsatu honetan: Sendotu al zaitu bileran entzundako hitzaldi edo komentarioren batek? Animatu al zaitu argitalpen, bideo edo abestiren batek? Konpartitu al du norbaitek zurekin indarberritu zaituen ideia edo aipurik? Baliteke anai-arreben artean dugun maitasuna eta jasotzen dugun janari espirituala normaltzat hartzea. Baina gogoan izan behar dugu Jehobaren opari baliotsuak direla (Is. 65:13; Mar. 10:29, 30). Izan ere, gauza hauek bera gutaz arduratzen den seinale dira (Is. 49:14-16). Eta Jehobak gure konfiantza merezi duela frogatzen dute. w24.01 4-5 ¶9-10

Justu zerura bueltatu aurretik, Jesusek bere jarraitzaileei jaso zuten eginkizuna gogoratu zien: testigantza «Jerusalemen, Judea osoan, Samarian eta lurraren bazterreraino» ematea (Eg. 1:8; Luk. 24:46-48). Handik gutxira, judutarren erlijio buruek Pedro eta Joan apostoluak atxilotu eta Sanedrinera eraman zituzten. Bertan, predikatzeari uzteko esateaz gain, mehatxatu egin zituzten (Eg. 4:18, 21). Begira zein izan zen Pedro eta Joanen erantzuna: «Zeuek ikusi Jainkoarentzat zuzena ote den guk zuen esana egitea harena egin ordez. Guk ezin dugu, inola ere, entzun eta ikusi duguna isilik gorde» (Eg. 4:19, 20). Pedro eta Joan aske utzi zituztenean, jarraitzaileek otoitz egin zioten Jehobari bere nahia egiteko laguntza eskatuz. Jehobak bihotzez egindako otoitz hura erantzun zuen (Eg. 4:31). w23.05 5 ¶11-12

Milioika eta milioika urtez, Jehobak eta bere Seme maiteak beraien arteko maitasun lotura sendotu dute. Beraiena da unibertsoan dagoen harremanik zaharrena. Gaurko aipuan azaltzen den moduan, Jehobak argi erakutsi zuen Jesus maite zuela. Jehobak besterik gabe honakoa bakarrik esan ahal zuen: «Oso pozik nago berarekin». Baina Jesus zenbat maite zuen erakutsi nahi zigun, eta horregatik «nire Seme kuttuna» deitu zion. Jehoba bere Semeaz eta egitear zegoenaz harro zegoen (Efe. 1:7). Jesusek ez zuen bere Aitak maite zuela zalantzan jarri. Bera maite zuen ziurtasun osoa zuen; bere barne sakonean sentitu ahal zuen. Horregatik, behin eta berriro ziurtatu zuen Jehobak bera maite zuela (Joan 3:35; 10:17; 17:24). w24.01 28 ¶8

Pentsatu hurrengo egoera honetan: Estimatzen duzun norbaitek itsusia den zerbait esan du zuri buruz. Esandakoa gezurra den arren, batzuek sinetsi egiten dute. Are gehiago, gezur hori errepikatzen hasten dira eta beste asko ere sinestera iristen dira. Nola sentituko zinateke? Seguruenik, zuri buruz esandako gezurrak gaizki sentiaraziko dizu, ezta? Egoera honek Jehoba bere izen ona zikindua izan zenean nola sentitu zen ulertzen laguntzen digu. Aingeru batek Ebari Jehobari buruz gezurrak esan zizkion, eta Ebak sinetsi egin zituen. Ondorioz, Adam eta Eba Jehobaren aurka jarri ziren, bekatua eta heriotza beraien ondorengoei zabalduz (Has. 3:1-6; Erm. 5:12). Munduan ikusten ditugun arazo guztiak, heriotza, gerrak eta sufrimendua Satanasek esan dituen gezurren ondorioz gertatzen dira. Sufritzen ari al da Jehoba gezur horien eta hauek eragindakoaren ondorioz? Dudarik gabe, bai. Hala ere, Jehoba ez dago erresuminduta. Izan ere, «Jainko zoriontsua» izaten jarraitzen du (1 Tim. 1:11). w24.02 8 ¶1-2

Nola jokatu dezakezu Josek bezala? Tentaldiaren aurrean zer egingo duzun orain erabakiz. Ikasi Jehobak gorroto dituen gauzak segituan baztertzen, eta ez ezazu gauza hauetan pentsatu ere egin (Sal. 97:10; 119:165). Horrela, tentazioaren aurrean ez duzu zalantzarik egingo. Agian argi duzu egia aurkitu duzula eta Jehoba bihotz-bihotzez zerbitzatu nahi duzula. Hala ere, eskaintza eta bataiorako prest ez zaudela sentitu dezakezu. Hala bada, Dabid erregearen eredua jarraitu dezakezu, Jehobari honakoa erregutuz: «Oi Jainko, iker nazazu eta ezagutu nire bihotza, proba nazazu eta ezagutu nire ardurak. Ikusi galbidetik ote nabilen, gidatu ni zeure betiko bidetik» (Sal. 139:23, 24). Eskaintza eta bataioaren helburua lortzeko egiten dituzun ahaleginek Jehoba «gogotsu bilatzen» ari zarela erakusten dute, eta Jehobak hau egiten dutenak bedeinkatzen ditu (Heb. 11:6, NWT). w24.03 6 ¶13-15

Apaiz nagusia herriaren ordezkaria zen Jainkoaren aurrean. Tabernakulua erabiltzen hasi zirenean, Jainkoak Israelgo lehen apaiz nagusi bezala Aaron izendatu zuen. Hala ere, Paulo apostoluak azaldu zuen moduan, «apaiz lebitarrak asko ziren, ezin baitzuten iraun, hil egiten zirelako» (Heb. 7:23-26). Gainera, gizaki inperfektuak zirenez, apaiz nagusiek beraien bekatuen alde ere eskaini behar zituzten sakrifizioak. Hau da Israelgo apaiz nagusien eta Apaiz Nagusi handia den Jesu Kristoren arteko alde nabarmen bat. Jesu Kristok, gure Apaiz Nagusi bezala, «apaiz-zerbitzua Jainkoak egindako benetako santutegian betetzen du, eta ez gizakiek egindako itun-etxolan» (Heb. 8:1, 2). «Jesusek [...] beti irauten duenez, inoiz amaituko ez den apaizgoa» duela azaldu zuen Paulok. Gainera, Jesus «kutsugabea, bekatariengandik bereizia» zela eta bere bekatuengatik «ez du[ela], beste apaiz nagusiek bezala, [...] egunero opariak eskaini beharrik» esan zuen. w23.10 26 ¶8-9

«Lehenengo zerua» Satanas eta bere deabruen eraginpean dauden gobernuak dira (Mat. 4:8, 9; 1 Joan 5:19). Biblian, «lur» hitzaz hitz egitean, gizakiari egin ohi zaio erreferentzia (Has. 11:1, NWT; Sal. 96:1). Beraz, «lehenengo lurra» gaur egungo gizarte gaiztoa da. Jehobak ez ditu oraingo «zerua» eta «lurra» besterik gabe birmoldatu edo konponduko. Horren ordez, guztiz ezabatuko ditu, hauek ordezkatuz. Oraingo zerua eta oraingo lurra «zeru berri [...] eta lur berri» batzuekin ordezkatuko ditu, hau da, gobernu berri eta gizarte berri batekin. Zer zentzutan egingo ditu berri Jehobak lurra eta gizakiak? Hauek egoera perfektu batera eramanez. Isaiasek aurresan bezala, Jehobak lur osoa lorategi bihurtuko du, Edengoa bezalakoa. Gainera, gutako bakoitza erabat sendatuz egingo gaitu berri. Herrenak, itsuak eta gorrak sendatuko ditu, eta hildakoak ere berpiztu egingo ditu (Is. 25:8; 35:1-7). w23.11 4 ¶9-10

«Larrialdi handia» bat-batean hasiko da (Mat. 24:21). Baina beste hondamendiek ez bezala, larrialdi handiak ez gaitu guztioi ustekabean harrapatuko. Izan ere, duela 2.000 urte, Jesusek egun honetarako prest egon behar zutela ohartarazi zien bere jarraitzaileei. Prest bagaude, errazagoa izango da guretzat garai zail hori gainditzea eta besteei gauza bera egiten laguntzea (Luk. 21:36). Iraupena beharko dugu Jehoba obeditzeko, bere babesean konfiantza izanez. Zer egingo genuke anai-arrebek gauza material batzuk edo guztiak galduko balituzte? (Hab. 3:17, 18). Errukia beharko dugu, behar duten laguntza emateko. Nola erreakzionatuko genuke, nazio koalizio baten erasoaren ondorioz, denbora batez anai-arrebekin toki txiki batean elkarrekin bizi beharko bagenu? (Eze. 38:10-12). Besteenganako maitasun sendoa beharko dugu garai zail hori gainditu ahal izateko. w23.07 2 ¶2-3

Bikoteek asko ikasi dezakete Akila eta Priszilaren eredutik. Lehen mendeko kristau askok bihotzez estimatzen zituzten (Erm. 16:3, 4). Elkarrekin lan egin eta predikatzen zuten, eta besteak elkarrekin laguntzen zituzten (Eg. 18:2, 3, 24-26). Izan ere, Bibliak Akila eta Priszilari buruz hitz egitean, beti elkarrekin aipatzen ditu. Nola imitatu ditzakete bikoteek? Pentsatu zu eta zure ezkontideak egin behar dituzuen gauza guztietan. Egin al ditzakezue hauetako batzuk elkarrekin, bakoitzak bere kabuz egin beharrean? Adibidez, Akila eta Priszilak elkarrekin predikatzen zuten. Zuek ere, elkarrekin predikatzeko ohitura al duzue? Akilak eta Priszilak elkarrekin egiten zuten lan. Agian ez duzue aukera hau, baina zergatik ez duzue etxeko lanak elkarrekin egiteko aprobetxatzen? (Ekl. [Koh.] 4:9). Zerbait egiterakoan elkarri laguntzean, ekipo bat zaretela sentituko duzue eta, gainera, hitz egiteko aukerak izango dituzue. w23.05 22-23 ¶10-12

Guztiok sentitu dugu beldurra noizbait. Adibidez, Saul erregea Dabid hil nahian ibili zenean, Dabidek filistearren Gat hirira ihes egitea erabaki zuen. Gateko Akix erregeak Dabidek «hamar mila» filistear garaitu zituela jakin zuenean, Dabidek «beldur handia» sentitu zuen (1 Sam. 21:11-13 [21:10-12, NWT]). Dabid kezkatuta zegoen, ez baitzekien zer egingo zuen Akixek berarekin. Nola gainditu zituen Dabidek bere beldurrak? 56. Salmoan, Dabidek Gaten izan zituen sentimenduez hitz egiten du. Zergatik zen beldur argi azaltzeaz gain, beldur horiek gainditzen zerk lagundu zion ere adierazi zuen. Beldurra sentitu zuenean, Jehobarengan jarri zuen konfiantza (Sal. 56:2-4, 12 [56:1-3, 11, NWT]). Berak konfiantza hori izateko arrazoi onak zituen. Jehobaren laguntzarekin, Dabidek oso arraroa zen zerbait egitea erabaki zuen: Zoro itxurak egin zituen! Akixek ez zuen Dabid mehatxu bat bezala ikusten, eta bertatik alde egitea besterik ez zuen nahi. Horrela, Dabidek ihes egin ahal izan zuen (1 Sam. 21:14-22:1 [21:13-22:1, NWT]). w24.01 2 ¶1-3

Nortzuk dira gaurko aipuan aipatutakoak? Berpiztutako gantzutuak. Beraz, larrialdi handiaren amaiera aldera azken gantzutuak zerura bilduak izatean jasoko duten lehen eginkizunetako bat borrokatzea izango da. Zerura bilduak izan ondoren, Kristo eta bere aingeruekin batera, Jainkoaren etsaien aurkako azken borrokan parte hartuko dute. Pentsatu honetan: Lurrean dauden kristau gantzutu batzuk adinekoak dira. Baina zeruan berpiztuak izan ondoren, izaki espiritual boteretsu eta hilezkorrak izango dira, eta Jesu Kristo Errege Gerlariarekin batera borroka egingo dute. Harmagedon gerran borrokatu ondoren, gizakiak perfekziora eramaten lagunduko dituzte. Dudarik gabe, gantzutuek gizaki inperfektu bezala asko egiten ari diren arren, zeruan egonda askoz ere gehiago egingo dute lurrean dauden beraien anai-arreba kuttunen alde! w24.02 6-7 ¶15-16

Eskaintza eta bataiorako prest dauden batzuek zalantzak izan ditzakete. Beharbada, honakoa galdetzen diote euren buruari: «Eta bekatu larri batean erori eta kanporatua banaiz?». Beldur hori baduzu, ziur egon zaitezke Jehobak behar duzun guztia emango dizula berari «zor zaion bezala bizi[tzeko] [...], atsegin duen guztia eginez» (Kol. 1:10). Zuzena dena egiteko indarrak ere emango dizkizu. Izan ere, beste askori hau lortzen lagundu die dagoeneko (1 Ko. 10:13). Hau da kongregazioetan hain kanporatu gutxi egotearen arrazoietako bat. Jehobak bere herriari leial mantentzeko laguntzak ematen dizkio. Gizaki guztiok inperfektuak garenez, gaizki dagoena egiteko joera dugu (St. 1:14). Hala ere, tentaldiaren aurrean egingo duzuna zure erabakia da. Izan ere, azken batean, zuk duzu zure bizitzaren kontrola. Eta batzuek kontrakoa esan arren, zure desira txarrak kontrolatzen ikasi ahal duzu. w24.03 5 ¶11-12