Ekaina

Jehobak lehen mendeko kristauak bedeinkatu zituen egoera aldakorretara moldatu zirelako. Pertsegituak izan ziren askotan, eta, batzuetan, gutxien espero zutenean. Aztertu dezagun zer gertatu zitzaien Bernabe eta Paulori Listra inguruan predikatzen ari zirenean. Hasiera batean, ongietorri beroa eman zieten bertakoek. Baina, beranduago, aurkari batzuek herriko jendea beraien alde jarriz, Paulo harrikatu zuten eta hiritik kanpora atera zuten hilda zegoela pentsatuz (Eg. 14:19). Baina Bernabe eta Paulok predikatzen jarraitu zuten beste toki batean. Ondorioz, «ikasle asko» egin zituzten eta, euren hitz eta ekintzei esker, anai-arreben fedea sendotu egin zen (Eg. 14:21, 22). Bernabe eta Paulok ez zuten amore eman bat-bateko pertsekuzioa jasatean. Hau oso lagungarria izan zen askorentzat. Era berean, amore eman gabe Jehobak eskatu diguna egiten jarraitzen badugu, bedeinkapenak jasoko ditugu. w23.04 16-17 ¶13-14

Dabid erregeak bere bizitzan zehar etsai arriskutsu asko izan zituen eta, sarritan, Jehobari laguntza eskatu zion. Dabid ziur zegoen Jehobak bere otoitzak entzun eta erantzun zituela. Zuk ere konfiantza bera izan dezakezu. Jehobak irauteko behar dugun jakinduria eta indarra eman ahal dizkigula ziurtatzen digu Bibliak. Gainera, gure familia espirituala edo bera zerbitzatzen ez dutenak erabili ditzake gu laguntzeko. Nahiz eta Jehobak gure otoitzak ez dituen beti guk espero dugun moduan erantzuten, badakigu erantzungo dituela. Berak justu behar duguna eta justu behar dugunean emango digu. Beraz, jarraitu fede osoz otoitz egiten eta ziur egon Jehobak orain zainduko zaituela eta iristear dagoen mundu berrian «izaki bizidun guztien desioa asetuko duela» (Sal. 145:16, NWT). w23.05 8 ¶4; 13 ¶17-18

Helburu bat lortzearen bedeinkapenetan arreta jartzea ona da. Zer bedeinkapenetan jarri dezakezu arreta? Zure helburua Biblia irakurtzea edo otoitzak hobetzea bada, pentsatu honek nola sendotu dezakeen Jehobarekin duzun harremana (Sal. 145:18, 19). Edo zure helburua kristau ezaugarri bat lantzea bada, pentsatu helburu horrek nola lagundu ahal dizun besteekin dituzun harremanak hobetzen (Kol. 3:14). Zergatik ez duzu helburua betetzeko dituzun arrazoien zerrenda bat egiten eta erregularki berrikusten? Horrez gain, denbora pasa helburua betetzera animatuko zaituztenekin (Esa. 13:20). Batzuetan ez dugu gure helburua betetzeko motibaziorik izango. Esan nahi al du honek ezingo dugula gure helburua bete? Ez. Lanean jarraitu behar dugu motibatuta ez egon arren. Noski, hau egitea ez da erraza izango, baina zein pozik sentituko garen gure helburua betetzean. w23.05 27-28 ¶5-8

Gure erabakien erantzule garela jakiteak honakoa egitera bultzatu ahal digu: bekatuak aitortzera, akatsak zuzentzera eta hauek berriro ez errepikatzera. Gauza hauek egiteak bizirako lasterketan jarraitzen lagundu gaitzake. Zer egin dezakezu erabaki txar bat hartu baduzu? Onartu ezin duzula iragana aldatu. Beraz, ez galdu denbora eta indarra zure burua zuritzen edo errua besteei botatzen. Horren ordez, onartu zure akatsak eta zure onena eman orain duzun egoeran. Egin duzun zerbaitengatik errudun sentitzen bazara, jo apalki Jehobarengana otoitzean, onartu zure errua eta bere barkamena eskatu (Sal. 25:11; 51:5, 6 [51:3, 4, NWT]). Mindu dituzunei barkamena eskatu eta, beharrezkoa bada, bilatu adindunen laguntza (St. 5:14, 15). Zure akatsetatik ikasi, eta saiatu hauek ez errepikatzen. Hau guztia egiten baduzu, ziur egon zaitezke Jehobak errukia erakutsi eta behar duzun laguntza emango dizula (Sal. 103:8-13). w23.08 28-29 ¶8-9

Joiadak eragin ona izan zuen Joax erregearengan. Horri esker, errege gazte honek Jehoba poztu nahi izan zuen. Baina Joiada hil ondoren, Joaxek buruzagi edo printze apostatak entzun zituen (2 Kro. 24:4, 17, 18). Jehobak, zeharo minduta, «profetak bidali zizkien beregana itzularazteko; baina, [...] ez zieten entzun». Ez zuten Joiadaren semea zen Zakarias bera ere entzun. Zakarias Jehobaren profeta eta apaiz nagusia izateaz gain, Joaxen lehengusua ere bazen. Izan ere, Joaxek Zakarias hiltzea agindu zuen (2 Kro. 22:11; 24:19-22). Joaxek Jehobari errespetu handia izateari utzi zion. Jehobak hau esan zuen: «Gutxiesten nautenak, [...] beheratu egingo ditut» (1 Sam. 2:30). Beranduago, Siriako gudaroste txiki batek Joaxen «gudaroste handia» garaitu zuen eta «larriki zauritua utzi zuten» erregea (2 Kro. 24:24, 25). Joaxen zerbitzariek bera hil egin zuten, aurretik Zakarias hiltzea agindu zuelako. w23.06 18 ¶16-17

Paulo apostoluak denbora dexente pasa zuen Efeson, predikatzen eta berri onak irakasten (Eg. 19:1, 8-10; 20:20, 21). Anai-arrebak asko maite zituen eta Jehobari leial mantentzen lagundu nahi zien. Efesoarrek, lehen, erlijio faltsuaren ideia eta superstizioetan sinesten zuten. Efeso ezaguna zen bertan zegoen moralgabekeria eta jarrera lotsagabeagatik. Hiriko antzerki eta ospakizun erlijioso asko sexuarekin lotuta zeuden (Efe. 5:3). Hiritar askok euren «zentzu morala galdurik» zuten. «Zentzu morala galdu» esamoldeak literalki «mina sentitzeari utzi» esan nahi du (Efe. 4:17-19). Efesoarrek ondo eta gaizki zegoena bereizten ikasi aurretik, gaizki jokatzen zutenean euren kontzientziak ez zien minik egiten. Horregatik, Paulok honela deskribatu zuen euren egoera: «Adimena ilundua dute; Jainkoaren bizitzatik urruti bizi dira». Hala ere, efesoar batzuk ez ziren ilunpetan geratu. w24.03 20 ¶2, 4; 21 ¶5-6

Gedeonek esfortzu fisiko handiak egin behar izan zituen epaile bezala bere eginkizuna betetzeko. Gaueko batailan zehar, madiandarrak ihes egin zuten eta Gedeonek Izreelgo haranetik Jordan ibairaino pertsegitu zituen (Ep. 7:22). Jordanen gelditu al zen Gedeon? Ez noski! Leher eginda egon arren, Gedeon eta bere 300 gizonek amaiera arte pertsegitzen jarraitu zituzten. Azkenean, madiandarrak harrapatu eta menderatu zituzten (Ep. 8:4-12). Gedeon ziur zegoen Jehobak indartuko zuela; eta Jehobak ez zion huts egin (Ep. 6:14, 34). Behin, Madiango bi erregeak gameluz ihesean zihoazela, Gedeon eta bere gizonek oinez pertsegitzen hasi zituzten (Ep. 8:12, 21). Jainkoaren laguntzarekin, israeldar ausart hauek etsaiak harrapatu eta bataila irabazi zuten. Era berean, adindunek Jehobarengan konfiantza osoa jarri dezakete. Izan ere, bera «ez da nekatzen, ez akitzen». Jehobak behar dutenean indarra emango die (Is. 40:28, 29). w23.06 6 ¶14; 7 ¶16

Zein zailtasun ditugun axola gabe, bihotz sendoa izan dezakegu. Beraz, izan konfiantza Jehobarengan. Barakek Jehobaren gidan konfiantza izan zuenez, arrakasta izan zuen. Aztertu dezagun nola. Garai hartan Israelen ez zegoen babeski eta lantza bat bera ere. Hala ere, Sisera buruzagi kanaandarraren eta ondo prestatutako bere gudarostearen aurka borrokatzeko agindu zion Jehobak (Ep. 5:8). Sisera eta bere 900 guda-gurdien aurka borrokatzeko, Debora profetisak menditik jaisteko esan zion Baraki. Guda-gurdiek eremu lauean abantaila handia izan arren, Barakek obeditu egin zuen. Soldaduak Tabor menditik jaitsi ahala, Jehobak euri zaparrada handia eragin zuen. Siseraren guda-gurdiak lokatzetan trabatu egin ziren eta Jehobak garaipena eman zion Baraki (Ep. 4:1-7, 10, 13-16). Era berean, Jehobak guri ere garaipena emango digu Berarengan eta bere erakundeak ematen duen gidan konfiantza badugu. w23.07 19 ¶17-18

Pazientzia ezinbestekoa da betirako bizia izateko. Iraganeko zerbitzari leialek bezala, guk ere pazientziaz itxaron behar dugu Jainkoak bere promesak bete arte (Heb. 6:11, 12, NWT). Bibliak gure egoera nekazari batenarekin konparatzen du (St. 5:7, 8). Nekazari batek lurra lantzeko eta hazia ureztatzeko gogor lan egin behar duen arren, ez daki zehazki landatutakoa noiz haziko den. Hala ere, pazientziaz itxaroten du, badakielako uzta bilduko duela. Era berean, gu jarduera espiritualetan lanpetuta mantentzen gara, nahiz eta ez jakin «zein egunetan etorriko den [...] Jauna» (Mat. 24:42). Pazientziaz itxaroten dugu, Jehobak promestutako guztia une egokian beteko duela dakigulako. Pazientzia galduko bagenu, itxaroteaz kantsatu eta, ondorioz, pixkanaka-pixkanaka Jehobarengandik urruntzen hasiko ginateke. Gainera, momentu bateko zoriontasuna ematen diguten gauzen bila hasi gintezke. Baina, pazientzia badugu, amaiera arte iraun eta betirako bizia lortuko dugu (Mik. 7:7, NWT). w23.08 22 ¶7

Daniel 2:41-43​ko profezia hau Daniel eta Apokalipsia liburuetako beste profezia batzuekin konparatzean, honako ondoriora iritsi gaitezke: oinek Angloamerikar aliantza, gaur egungo munduko potentzia nagusia, irudikatzen dutela. Danielek munduko potentzia hau «neurri batean sendoa eta neurri batean ahula» izango zela esan zuen. Zergatik neurri batean ahul? Buztin biguna bezalakoa den jende arruntak, erreinu honek burdina bezain sendo jokatzeko duen ahalmena ahultzen duelako. Egia garrantzitsu asko ikasi ditzakegu Danielek deskribatutako iruditik. Lehenik, Angloamerikar potentziak hainbat modutan indartsua dela erakutsi du. Adibidez, Angloamerikar potentziak eta bere aliatuek bi Mundu Gerrak irabazi zituzten. Hala ere, munduko potentzia hau bere herritarren arteko gatazken eraginez ahuldu egin da, eta ahultzen jarraituko du. Bigarrenik, Jainkoaren Erreinuak giza gobernu guztiak suntsitu aurretik, Angloamerikar potentzia izango da munduan aginduko duen azken potentzia. w23.08 10-11 ¶12-13

Dabid batzuetan arazo eta zailtasunen aurrean larrituta sentitu zen (Sal. 18:5, 6 [18:4, 5, NWT]). Egoera horietan Jehobak goxotasunez maite eta zaindu egin zuen, bera indarberrituz. Neka-neka eginda zegoenean, Jehobak «larre guritan» etzanarazi eta «ur baretara» eraman zuen Dabid. Ondorioz, indarrak berreskuratuta, aurrera jarraitzeko gai izan zen (Sal. 18:29-33 [18:28-32, NWT]; 23:2). Gaur egun ere, arazo eta zailtasunei aurre egin arren, «Jehobaren maitasun leialagatik ez da gure amaiera iritsi» (Neg. 3:22, NWT; Kol. 1:11). Dabid askotan arriskuan egon zen, eta etsai boteretsu asko izan zituen. Hala ere, Jehobaren maitasunari esker, seguru eta babestuta sentitu zen. Dabidek Jehoba une oro berarekin zegoela sentitu ahal zuen, eta honek asko lasaitu zuen. Horregatik, honakoa abestu ahal izan zuen: «[Jehobak] beldur guztietatik libratu ninduen» (Sal. 34:4). Dabiden beldurrak errealak izan ziren. Baina Jehobaren maitasuna bere beldurrak baino boteretsuagoa izan zen. w24.01 30 ¶15-17

Ikasi Joaxen erabaki txarretatik. Joiada apaiz nagusia hil ondoren, Joaxek lagun txarrak aukeratu zituen (2 Kro. 24:17, 18). Jehoba maite ez zuten Judako buruzagiei kasu egitea erabaki zuen. Joaxek hauengandik aldendu behar zuen, arazoak bakarrik ez zizkiotelako ekarriko. Baina, horren ordez, beraien aholku txarrak entzun zituen. Are gehiago, bere lehengusua Zakarias bera zuzentzen saiatu zenean, Joaxek hiltzea agindu zuen (2 Kro. 24:20, 21; Mat. 23:35). Hau bai erabaki txarra. Penagarria benetan! Joaxek gauzak ondo egin zituen bere bizitzaren hasieran. Baina, tamalez, apostata eta hiltzailea izatera iritsi zen. Azkenean, bere zerbitzari propioek hil zuten (2 Kro. 24:22-25). Jehoba eta bera maite dutenak entzuten jarraitu izan balu, bere bizitza zeharo desberdina izango zen. w23.09 9 ¶6

Jesusek bazekien Pedro apostolua leial mantendu ahal zela. Horregatik esan zion goxotasunez: «Ez beldurtu». Jesusek Pedrorengan konfiantza izan zuen, eta honek eragin handia izan zuen Pedroren bizitzan. Ondoren, Pedrok eta bere anaia Andresek beraien arrantza negozioa utzi eta Mesias denbora osoz jarraitzen hasi ziren. Ondorioz, Jehobak modu askotan bedeinkatu zituen (Mar. 1:16-18). Pedrok bizipen paregabe asko izan zituen Jesu Kristoren jarraitzaile bezala. Jesusek gaixoak sendatu, deabruak bota eta hildakoak berpiztu zituenean, Pedro hauen testigu izan zen (Mat. 8:14-17; Mar. 5:37, 41, 42). Gainera, ikuskari batean, etorkizunean Jesus Jainkoaren Erreinuko errege bezala ikusi zuen, eta ez zuen gertakari hau inoiz ahaztu (Mar. 9:1-8; 2 Ped. 1:16-18). Hala da, Pedrok inoiz espero ez zituen gauzak ikusi zituen. Ziur oso pozik egongo zela izandako sentimendu negatiboak gainditzeagatik eta bizitako bedeinkapenak ez galtzeagatik. w23.09 21 ¶4-5

Bere lehen gutunean, Pedro apostoluak honako esamoldea erabili zuen: maitasun «bizi-bizi[a]». Maitasun mota honek «bekatu asko» barkatzen ditu, ez gutxi batzuk bakarrik (1 Ped. 4:8). Jesusek urte batzuk lehenago barkamenari buruz irakatsi ziona gogoratu zuen ziurrenik. Momentu hartan, Pedrok eskuzabala zela pentsatzen zuen bere anai-arrebak «zazpi aldiraino» barkatzeko prest egongo zela esan zuelako. Baina Jesusek, bai berari baita gu guztioi ere, honakoa irakatsi zigun: «hirurogeita hamazazpi» aldiz barkatu beharko genukeela, hau da, mugarik gabe (Mat. 18:21, Ur). Aholku hau praktikan jartzea zaila egiten bazaizu, ez desanimatu! Jehobaren zerbitzari guztiontzat izan da zaila barkatzea noizbait. Garrantzitsuena, anai-arrebak barkatzeko eta beraiekin bakean egoteko ahal duzun guztia egitea da. w23.09 29 ¶12

Arrainaren sabelean, Jonas ziur zegoen Jehobak bere otoitz apala entzungo zuela eta lagunduko ziola. Jehobak Jonas salbatu zuen eta, beranduago, bere eginkizun berria betetzeko prest egon zen (Jns. 2:11-3:4 [2:10-3:4, NWT]). Zailtasun baten aurrean larritasuna sentitzeagatik, kostatu al zaizu inoiz Jehobari otoitz egitea? Edo ikasteko indarrik ez duzula sentitu al duzu noizbait? Gogoratu Jehobak zure egoera primeran ulertzen duela. Beraz, otoitz sinple bat bakarrik egin arren, ziur egon zaitezke Jehobak zehazki behar duzuna emango dizula (Efe. 3:20). Gaixorik, nekatuta edo larrituta sentitzeagatik zaila egiten bazaizu Biblia irakurtzea eta aztertzea, Bibliaren edo gure argitalpenen audio grabaketak entzun ditzakezu. Gure kantetako bat entzun edo jw.org webguneko bideo bat ere ikusi dezakezu. Jehoba gu sendotzeko irrikan dago. Baina, horretarako, Berari otoitz egin eta ematen dizkigun laguntza espiritualetan bilatu behar dugu bere erantzuna. w23.10 13 ¶6; 14 ¶9

Tabernakulua eta beranduago Jerusalemen eraiki ziren tenpluak oso antzekoak ziren barrutik. Barnean, bordatutako kortina batek banatzen zituen bi gela zeuden: «toki santua» eta «toki santu-santua» (Heb. 9:2-5; Irt. 26:31-33). Santuaren barruan, urrezko argimutil bat, intsentsua erretzeko aldare bat eta mahai bat, Jehobari eskainiriko ogiarekin, zeuden. Gantzututako apaizak bakarrik sartu ahal ziren santuan apaiz lanak egiteko (Zen. 3:3, 7, 10). Santu-santuan, Jehobaren presentzia irudikatzen zuen urrezko itun-kutxa zegoen (Irt. 25:21, 22). Kortina zeharkatuz santu-santuan sartu ahal zen bakarra apaiz nagusia zen. Hau urtean behin soilik gertatzen zen, Barkamen Egunean (Leb. 16:2, 17, NWT). Animalien odolarekin sartzen zen, bere buruaren eta nazio osoaren bekatuen barkamena eskatzeko. Denborarekin, Jehobak, tabernakuluaren atal hauek zer esanahi zuten argitu zuen (Heb. 9:6, 7). w23.10 27 ¶12

Jainkoaren Hitzean, behin eta berriz aurkitzen dugu elkar maitatzearen agindua (Joan 15:12; Erm. 13:8; 1 Tes. 4:9; 1 Ped. 1:22; 1 Joan 4:11). Hala ere, maitasuna gure barneko sentimendu bat da, eta besteek ezin dute gure bihotzean dagoena ikusi. Orduan, nola lortu dezakegu besteei diegun maitasuna begi bistan egotea? Gure hitz eta ekintzen bitartez. Modu askotan erakutsi ahal diegu maitasuna anai-arrebei. Hona hemen adibide batzuk: «Esan egia lagun hurkoari» (Zak. 8:16). «Zaudete elkarrekin bakean» (Mar. 9:50). «Aurrea hartu batak besteari ohorea erakustean» (Erm. 12:10). «Egiozue harrera ona elkarri» (Erm. 15:7, NWT). «Barkatu batak besteari» (Kol. 3:13). «Lagundu batak besteari elkarren zamak eramaten» (Gal. 6:2). «Jarraitu elkar kontsolatzen» (1 Tes. 4:18, NWT). «Segi [...] batak bestea sendotzen» (1 Tes. 5:11, NWT). «Egin otoitz elkarren alde» (St. 5:16). w23.11 9 ¶7-8

Egunero erabaki asko hartzen ditugu. Adibidez, lagunak, entretenimendua, ezkontza, seme-alabak, hezkuntza eta lanarekin lotutakoak. Erabaki hauek hartzean, fede sendoa izatea beharrezkoa da. Horregatik, galdetu zeure buruari: «Erakusten al dute nire erabakiek sistema hau denbora batekoa dela eta laster Jainkoak mundu berriarekin ordezkatuko duela? Ala betiko bizitzea espero ez dutenak bezala bizi naiz?» (Mat. 6:19, 20; Luk. 12:16-21). Beraz, sendotu dezagun gure fedea. Horrela, mundu berria ate joka dagoela argi ikusiko dugu eta erabaki onenak hartuko ditugu. Gainera, zailtasun asko izan ditzakegu; esaterako, pertsekuzioa, gaixotasun kroniko bat, edo desanimatu gaitzaketen beste gauza batzuk. Zailtasun hauei aurre egiteko, fede sendoa izatea beharrezkoa da. Hasiera batean, gure zailtasunari aurre egiteko gai garela sentitu dezakegu. Baina, askotan gertatzen den bezala, egoera hau denboran zehar luzatu daiteke. Horregatik, gure fedea sendotu beharko dugu zailtasunen aurrean irauteko eta Jehoba poztasunez zerbitzatzen jarraitzeko (1 Ped. 1:6, 7). w23.04 27 ¶4-5

Jehobak gure otoitzekin bat egitea espero du. Adibidez, anaia batek Jehobari lurralde biltzarrera joateko egun libreak lortzeko laguntza eskatu ahal dio. Nola erantzun dezake Jehobak otoitz hori? Anaiari bere nagusiarekin hitz egiteko ausardia eman ahal dio. Baina bere otoitzarekin bat egiteko, anaiak zerbait gehiago egin beharko du. Adibidez, nagusiarekin behin baino gehiagotan hitz egin beharko du beharbada, edo beste lankide bati lan-txanda aldatzea eskatu ahal dio. Edo agian hartzen dituen egun libreak ordainduak ez izatea eskaini ahal dio nagusiari. Jehobak gure kezkei buruz etengabe otoitz egitea espero du. Jesusen arabera, gure eskaera batzuk ez dira segituan beteko (Luk. 11:9, NWT). Beraz, ez amorerik eman! Gogotsu eta etengabe otoitz egin (Luk. 18:1-7). Hala egiten dugunean, guretzat benetan garrantzitsua dela erakusten diogu Jehobari. Gainera, gu laguntzeko duen gaitasunean fedea dugula adierazten dugu. w23.11 22 ¶10-11

Jehobak bere lagun Abrahami bere ondorengotzaren bitartez lurreko herri guztiak bedeinkatuak izango zirela promestu zion (Has. 15:5; 22:18). Abrahamek Jainkoarengan fede sendoa zuenez, ziur zegoen promes hura bete egingo zela. Hala ere, Abrahamek 100 urte eta bere emazteak 90 urte zituztela, bikote leial honek oraindik ez zuen semerik izan (Has. 21:1-7). Baina Bibliak honakoa dio: «Esperantzan oinarrituta, Abrahamek herri askoren aita izatera iritsiko zen fedea izan zuen esan zenaren arabera» (Erm. 4:18, NWT). Badakigu Abrahamen itxaropena bete egin zela, eta seme bat izan zuen: Isaak. Zergatik zegoen Abraham ziur Jainkoaren promesa beteko zela? Jehobarekin zuen harreman estuarengatik, Abraham «erabat ziur» zegoen promestutakoa beteko zuela (Erm. 4:21). Abrahamek fedea erakutsi zuenez, Jehobak bere aprobazioa eman zion eta pertsona zuzentzat hartu zuen (St. 2:23). w23.12 8 ¶1-2

Fidagarria den anaia gazte batek bere eginkizun guztiak arduraz betetzen ditu. Azter dezagun Jesusen eredu perfektua. Berak ez zuen inoiz axolagabekeriaz edo arduragabekeriaz jokatu. Horren ordez, Jehobak eman zizkion eginkizun guztiak bete zituen, nahiz eta hauetako batzuk zailak izan. Pertsonak maitatu zituen, batez ere bere dizipuluak, eta beraien alde bizia emateko prest egon zen (Joan 13:1). Beraz, imitatu Jesus eta gogor lan egin ematen dizuten edozein eginkizun betetzeko. Ez bazaude ziur eman dizuten arduraren bat nola bete behar duzun, izan apala eta eskatu laguntza anaia helduei. Eta ez zaitez inoiz konformatu ahalegin minimoa egitearekin (Erm. 12:11). Alderantziz, bete zure eginkizuna «Jaunarentzat bezala eta ez gizakientzat» (Kol. 3:23). Noski, ez zara perfektua. Beraz, modestia erakutsi eta egiten duzun edozein akats onartu (Esa. 11:2, NWT). w23.12 26 ¶8

Oso pozgarria da bataiatzea eta Jehobaren familiaren parte izatera iristea. Ohore horretaz gozatzen dutenak Dabid salmogileak esandakoarekin ados daude: «Zorionekoa zuk [Jehobak] aukeratu eta gonbidatzen duzuna zeure atarietan bizitzera» (Sal. 65:5; oharra [65:4, NWT]). Zer pertsona mota erakartzen ditu Jehobak bere atarietara? Jehobak berarekin adiskidetasun estua izan nahi dutela erakusten dutenenak aukeratzen ditu (St. 4:8). Jehobari zeure burua eskaini eta bataiatzen zarenean, ziur egon zaitezke bataiatu ondoren berak «bedeinkazioa ugari isur[iko]» dizula, ezeren faltarik izan gabe (Mal. 3:10; Jer. 17:8). Bataioa hasiera baino ez da. Zure eskaintza botoaren arabera bizitzeko ahal duzun guztia egin nahiko duzu, nahiz eta tentazioak izan edo zure fedea probapean egon (Ekl. [Koh.] 5:3, 4 [5:4, 5, NWT]). Bestalde, Jesusen dizipulu bezala, bere eredua eta arauak ahalik eta hoberen jarraituko dituzu (Mat. 28:19, 20; 1 Ped. 2:21). w24.03 8 ¶1-3

Zer gertatzen da ez baduzue elkarrekin pasatzen duzuen denboraz gozatzen? Zer egin dezakezue? Gogoratu suaren adibidea. Sua ez da segituan pizten. Pixkanaka egur zati handiagoak botatzea beharrezkoa da. Era berean, egunero denbora tartetxoak pasatzen hasi zaitezkete elkarrekin. Ziurtatu bioi gustatzen zaizuen zerbait egiten duzuela (St. 3:18). Gauza txikiekin hasten bazarete, zuen maitasuna berriro piztu daiteke. Errespetua ezinbestekoa da ezkon bizitzan. Su bat piztuta mantentzeko behar den oxigenoa bezalakoa da. Oxigenorik gabe, sua azkar itzali daiteke. Era berean, errespeturik gabe, bikote baten maitasuna azkar itzali daiteke. Baina elkar errespetatzean, euren maitasuna bizirik mantentzen arituko dira. Hala ere, kontuan izan inportanteena ez dela zuk errespetua erakusten duzula pentsatzea, zure ezkontidea errespetatua sentitzea baizik. w23.05 22 ¶9; 24 ¶14-15

Biblian, etsai edo presioen erruz larrituta eta ikaratuta sentitu ziren Jainkoaren zerbitzari leial batzuei buruz hitz egiten da (Sal. 18:5 [18:4, NWT]; 55:2, 6 [55:1, 5, NWT]). Antzera, guk ere eskolan, lanean, familiarengandik edo agintariengandik oposizioa jasan dezakegu. Edo beharbada osasun arazo baten erruz hilko garen beldur izan gaitezke. Egoera horietan, babesgabe sentitu gaitezke, haurtxo txiki bat bezala. Nola laguntzen gaitu Jehobak hauek bezalako egoeratan? Berak kontsolatzen gaitu. Beraz, pasa denbora erregularki Jehobarekin, berari otoitz eginez eta bere Hitza irakurriz (Sal. 77:2, 13-15 [77:1, 12-14, NWT]). Horrela, estresa sentitzen duzunean, egingo duzun lehenengo gauza, seguruenik, zure zeruko Aitarengana jotzea izango da. Kontatu Jehobari zer beldur eta kezka dituzun. Ondoren, entzun bere erantzuna Biblia irakurriz, eta ikusi nola kontsolatzen zaituen (Sal. 119:28). w24.01 24-25 ¶14-16

Motibazioa ezinbestekoa da helburu espiritualak lortzeko. Motibatua dagoen norbaitek lan egiteko desio handia du bere helburua bete nahi duelako. Gainera, zenbat eta motibazio handiagoa izan, orduan eta errazagoa izango da helburuak lortzea. Beraz, zer egin dezakezu motibazioa handitzeko? Otoitz egin motibazio handiagoa eskatuz. Jehobak gure helburuak betetzera motibatu gaitzake bere espirituaren bidez. Batzuetan, helburu bat jartzen dugu hori egin behar dugula dakigulako; eta hori ondo dago. Baina, agian, helburu hori betetzeko desioa falta zaigu. Beraz, hausnartu Jehobak zuregatik egin duen guztian (Sal. 143:5). Paulok Jehobak erakutsi zion onginahian hausnartu zuen eta honek Jehobarentzat gogor lan egitera motibatu zuen (1 Ko. 15:9, 10; 1 Tim. 1:12-14). Era berean, Jehobak zure alde egin duen guztian hausnartzen jarraitzen baduzu, zure helburua betetzeko duzun motibazioa handitzen joango da (Sal. 116:12). w23.05 27 ¶3-5

Gure zeruko Aita pozten dugu bere izena goresten dugunean (Sal. 119:108). Baina esan nahi al du honek Jainko ahalguztidunak, gizaki inperfektuen antzera, besteen gorespena behar duela seguru sentitzeko? Ez. Gure zeruko Aita goresten dugunean, guregan zuzenki eragina duen beste gezur bat faltsua dela frogatzen laguntzen dugu. Satanasek honakoa aldarrikatzen du: ez dagoela Jainkoaren izena leialki defendatuko duen gizakirik. Probapean egonez gero, Jainkoari leial izateari utziko diogula dio Satanasek, baita Jainkoaren aurka jarriko garela hau egitea gure onerako dela pentsatzen badugu ere (Job 1:9-11; 2:4). Baina Job leial mantendu zen eta Satanas gezurtia zela frogatu zuen. Eta gu? Mantenduko al gara leial Jehobari? Gutako bakoitzak Jainkoaren izena defendatzea eta bere integritateari eutsiz Jehoba poztea erabaki dezake (Esa. 27:11). Hau egitea izugarrizko ohorea da guretzat. w24.02 8-9 ¶3-5

Moises eta Josueren garaiaren ondoren, Jehobak bere herria gidatzeko epaileak izendatu zituen eta, ondoren, erregeen garaian, profetak. Errege leialek profeten aholkuak jarraitu zituzten. Adibidez, Natan profetak Dabid erregea zuzendu zuenean, hau apala izan zen esandakoa onartuz (2 Sam. 12:7, 13; 1 Kro. 17:3, 4). Josafat erregeak Jahaziel profetaren gidan konfiantza izan zuen. Gainera, erregeak Jainkoaren profetengan fedea izatera animatu zuen Judako herria (2 Kro. 20:14, 15). Larrialdi garaian, Ezekias erregeak Isaias profetarengana jo zuen (Is. 37:1-6). Erregeek Jehobaren gida jarraitu zuten bakoitzean, bedeinkapenak jaso zituzten eta nazioa babestua izan zen (2 Kro. 20:29, 30; 32:22). Beraz, argi eta garbi zegoen Jehoba profetak erabiltzen ari zela bere herria gidatzeko. w24.02 21 ¶8

Pertsona batzuek Jehobaren arauak obeditzea zaildu ahal digute. Satanasek guk horrelako lagunak izatea nahi du. Gaur egun, gure denbora besteekin aurrez aurre pasatzeaz gain, sare sozialen bidez ere pasa dezakegula gogoratu behar dugu. Mundu honek jarrera moralgabea onargarria dela pentsatzen du. Guk, aldiz, hori gezurra dela dakigunez, ideia horren aurka borrokatu behar dugu (Efe. 4:19, 20). Galdetu zeure buruari: «Kontuz ibiltzen al naiz lankide, klasekide edo Jehobaren arau zuzenak errespetatzen ez dituztenekin, beraiekin beharrezkoa den denbora baino gehiago ez pasatuz? Defendatzen al ditut ausardiaz Jehobaren arauak, batzuek intolerantea naizela esaten badidate ere?». 2 Timoteori 2:20-22 aipuak dioen moduan, kongregazio barnean ere gure lagun minak kontuz aukeratu behar ditugu. Gogoan izan behar dugu batzuek beharbada ez digutela Jehobari leial izaten lagunduko. w24.03 22-23 ¶11-12

Imajinatu al duzu inoiz zer itxura duen Jehobak? Jehoba ikusezina den arren, Bibliak hainbat modutan deskribatzen du. Adibidez, «eguzki eta babeski» eta «su kiskalgarri» bat dela dio (Sal. 84:12 [84:11, NWT]; Heb. 12:29). Ezekielek zafiro harri, metal distiratsu eta ostadar argitsu bat bezala deskribatu zuen ikuskari batean (Eze. 1:26-28). Ezinezkoa denez Jehoba ikustea, zaila egin ahal zaigu berak maite gaituela sinestea. Batzuek, iraganean izandako bizipenengatik, Jehobak ez dituela sekula maitatuko pentsatzen dute. Jehobak sentimendu hauek ulertzen ditu eta badaki zer eragin duten guregan. Horregatik, gu laguntzeko, Bibliaren bidez bere ezaugarri ederrak azaltzen dizkigu. Jehoba hoberen deskribatzen duen hitza maitasuna da. Are gehiago, Bibliak dioen moduan, Jehoba «maitasuna [da]» (1 Joan 4:8). Gainera, berak egiten duen guztian du eragina. Bere maitasuna hain goxoa eta boteretsua da, non bera maite ez dutenei ere erakusten dien (Mat. 5:44, 45). w24.01 26 ¶1-3

Jehobak Moises izendatu zuen Israel Egiptotik ateratzeko, eta froga argi bezala, laino-zutabe bat eta gauez su-zutabe bat eman zien (Irt. 13:21). Moisesek, zutabe hauek jarraituz, herri osoa Itsaso Gorriraino eraman zuen. Baina, orduan, Egiptoko armada israeldarrak pertsegitzen hasi zen. Israeldarrak Egiptoko armada eta Itsaso Gorriaren artean ihes egin ezinik zeudela konturatzean, izugarri ikaratu ziren. Baina ez zen akats bat izan. Moises erabiliz, Jehobak bere herria leku hartara nahita gidatu zuen (Irt. 14:2). Orduan, Jehobak modu harrigarri batean salbatu zituen israeldarrak (Irt. 14:26-28).Hurrengo 40 urteetan, Jehobak bere herria laino-zutabe baten bitartez gidatu zuen basamortutik. Moisesek gida honetan konfiantza izaten jarraitu zuen (Irt. 33:7, 9, 10). Jehobak zutabetik hitz egiten zion Moisesi, eta berak Jehobak esandakoa azaltzen zien israeldarrei. Beraz, israeldarrek argi eta garbi ikusi zezaketen Jehoba Moises erabiltzen ari zela beraiek gidatzeko. w24.02 21 ¶4-5