Jonatán a ne ngengèè ya sôsôe

Ntôô moan kéza Saúl ô mbe éyôla naa, Jonatán, a mbe mbo-aluman a mbe ngengèè. David a nga dzô naa Jonatán a mbe avôô a lôr nduiñ, ya naa a mbe ngu’u a lôr mbuémbuém. Môs ézing, Jonatán a nga yen bezima Befilisteos 20 a moan nkôô ayôp. Éde a nga dzô é môr a mbe a baghe ñe ében ya é biôm melumane bièñ naa : “Bia ye ke lumane ya bo nge Jehôva a ven bia ndem. Nge Befilisteos be dzô bia naa, bereghan, bia ye yem naa bi ne ke yiran.” Befilisteos be nga yônane naa : “Bereghan ô né, mi zu yiran !” Éyong té éde Jonatán ya é môr a mbe a baghe ñe ében be nga bet nkôô ye wun fe bezima 20 beté.

Amu Jonatán éñe a mbe Saúl ntôô moan, éñe a mbe naa a yiane tebe ane kéza éyong ésaa a nga ye wu. Ve, Jonatán a mbe é yem naa Jehôva a nga top David, naa a bo é kéza a ye wulu ya Israel, aa nga bo ki ñe asum. Vedaa, Jonatán ba David be nga bo édedèè mbemba memvuiñ. Be nga kiaghane naa ba ye kaman ya volan, mboo ya éñi mboo. Ane ndem ye angom deba, Jonatán a nga kee David étôp dèñ, ôkeng wèñ, élèñ dèñ nge ki mban wèñ, ya é kana dèñ.

Éyong David a nga ke a tup Saúl, Jonatán a nga ke ñe yen, éde a nga dzô ñe naa : “Wa yiane bo ngu’u ya ngengèè. Jehôva a va top wa naa, ô tebe ane kéza. A ke kuiñ ésaa wom a yem de.” Ye ô ne dzing wa bele mbemba angom ane Jonatán ?

Jonatán a mbe nkoghan abuiñ biyong naa, a dzimle éning dèñ nfa ye naa a vole é mvuiñ dzèñ. A mbe é yem naa ésaa wèñ, kéza Saúl, a mbe é kômô wiñ David. Ya dzam té, éde a nga dzô ñe naa : “Nge ô wiñ David wa ye bo nsem, amu naa aa dzi bo é dzam ézing é ne abé.” Saúl a nga bira yèè a Jonatán. Ôyôm mimbu ôsu, Saúl ba Jonatán be nga wu nsama aluman.

Niène Jonatán a nga wu, David a nga dzeng Mefibóset, éñi a mbe é moan Jonatán. Éyong a nga yen ñe, éde David a nga dzô ñe naa : “Ma ye wa kale éning ése duè amu ésua a mbe é mbemba mvuiñ dzam. Wa ye ning é nda kéza dzam, wa ye fe dzi é tebele dzam.” David aa dzi ki vuèn é mvuiñ dzèñ Jonatán môs ézing.