Édjié é ne ane mura élé

Alu ézing, Nabucodonosor a nga yen biyeyem bi nga ve naa a bira ko wong. A nga luè beyem-mam nfa ye naa be kane ñe ayilgha ye biyeyem bité. Ve, mboo ézing éé mbe ki ñe da kane. Asughlan, kéza a nga kobe ya Daniel.

Nabucodonosor a nga dzô Daniel naa : “Biyeyem biam, me va yen élé. Édi é nga vem a ke kuiñ a dzôp. Be mbe da yen minfa misese mi ye a si. É mbe é bele mbemba mekièñ ya bibuma. Betsit be mbe bé wèèghan ébe avuèñ dèñ asi. Anoan daa é nga long fe beduma bieba mintem mièñ. Éyong té, éde angele a nga so a dzôp été. A nga yônane naa : « Kighane élé, vaane fe do mintem mièñ. Vedaa, lighane moan nkum ya mindzii, mi kakh fe do ya bekana bikièñ ya cobre ô ñuu. N’nem élé té wa ye tsen. Waa ye ki fa bo n’nem môr, ve a ye bo n’nem tsit. Metam zangbwa ma ye fa lôt. Bôr bese ba ye ñu tang naa, Nzame éñe a ne Ndjié, ya naa, émién a ne kee é môr émién a kumu, édjié té. »”

Jehôva a nga dzô Daniel é dzam biyeyem bia yili. Éyong Daniel a nga wokh ayilgha ye biyeyem, éde a nga sighan. Éyong té a nga dzô naa : “A kéza, é mba bo mbeng naa é dzam ô va yen biyeyem é lôr ya minzizing muè, ve da ye lôr a wamièn. Wamièn ô ne é mura élé be va kikh. Wa ye dzimle édjié duè, wa ye fe dzi biloa ane tsit ya afan. Ve, angele a ve dzô naa, ba ye likh étun nkum wèñ ya mindzii mièñ, dzam té da yili naa wa ye bera bo kéza.”

Ngura mbu ôsu, Nabucodonosor a mbe é wulu a nda kéza dzèñ été, é bira dzing a yen Babilonia. Ane a nga dzô naa : “Abaalé mbemba kisoan me va long. Ma, ma dang ôyap yôp !” Nté a mbe é dzô dzam té, ane king é nga dzô ñe a dzôp été dé dzô naa : “Nabucodonosor ! Ô dzimleyang édjié duè.”

Tam té, éde Nabucodonosor a nga zaman, a sum fe naa a bo mam ane tsit ya afan. Éde be nga tsirane ñe a nda kéza été, a sum fe naa a ning ya betsit be ya afan. Ésii Nabucodonosor é nga vem édedaa abuiñ naa é nga fônane bindeng benduiñ, é bièñ bi ye ô mo ya mebo mèñ, bia bi nga bo fe édedaa ayap ane é bièñ ônoan.

Niène mimbu zangbwa mi nga lôt, Nabucodonosor a nga bera tobe mvoa. Éde Jehôva a nga bera ñe noman ane kéza ya Babilonia. Éyong té Nabucodonosor a nga dzô naa : “Ma ve Jehôva duma, kéza ya dzôp été. A sili ôsi, é bôr be ne éngung. Éndagha, me yemang faa naa Jehôva éñe a ne Ndjié. Ye naa a ne kee é môr émién a kumu, édjié.”