Ntsili ô ne nfim

Ya tam, Beltsasar a nga bo kéza ya Babilonia. Alu ézing, a nga bo fet akal bizukh bi bôt a nga bane. A mbe é bôr be nga dang éban é si dzèñ. A nga lôm bebo-bisèñ naa be vèè bilas bikông Nabucodonosor a nga so a bio é templo Jehôva. Beltsasar ya é bôr a nga bane, be nga belane bilas bité naa ba ñu, ane be nga sum fe naa ba ve benzame beba duma. Étéñ té ébién, ane énam, édi é nga fônan édi moan môr, é nga sum naa da tsili bifiè bi mbe ndzukh a yem, nfim é nda be nga bo fet.

Beltsasar a nga bira sighan. A nga luè beyem-mam, éde a nga kiagh be naa : “É mor a ye kar ayilgha bifiè bi, ma ye ñe ve naa, a bo é môr lal a dang bele ngu’u a Babilonia”. Éde be nga vakh do, ve môr ézing éé dzi ki wun naa a kar ayilgha bifiè bité. Éyong té, éde ñia kéza a nga siane, éde a nga dzô ñe naa : “Môr ézing a ne éyôla naa Daniel, éñe a nga bo é kare Nabucudonosor biyeyem ya é mam me ne meshuèñ. A ne wa kar ayilgha ye bifiè bi”.

Daniel a nga zu yen kéza. Niène a nga siane, Beltsazar a nga dzô ñe naa : “Nge ô ne lang ya kane ma bifiè bi, ma ye wa kee nkoo kông, ma ye fe ve naa ô bo é môr lal a dang bele ngu’u a Babilonia”. Daniel a nga yalane ñe naa : “Maa kumu ki bedas buè, vedaa ma ye wa dzô ayilgha ye bifiè bi. Ésaa wiè Nabucodonosor a mbe éngung, éde Jehôva a nga ve ñe ayeghle asili ñuu. Ô va yem é dzam ésese é nga lôrane ñe, ve amben édo, wéé dzi ki kang Jehôva. Ô va belane bilas bi ya é templo Nzame naa wa ñu vino été. Éde, Nzame a tsili bifiè bi nfim : Mené, Mené, Tequel, ya Parsín. Dzam té da yili naa Bemedos ya Bepersas ba ye ñong Babilonia, waa ye ki fe bo kéza.”

É nga fônane naa môr ézing éé mbe ki ñong Babilonia. Kisoan té é mbe é bele môra ôngôô ô nga kame wô, ya fe môra ôshuiñ. Ve, alu té ébién, Bemedos ya Bepersas be nga ke lumane ya Babilonia. Kéza ye a Persia, Ciro a nga saalé mendzim me ye ôshuiñ nfa ye naa nsama bita wèñ, ô kuiñ mimbèñ mi ya kisoan. Niène be nga siane, be nga koane naa mimbèñ mi ya kisoan mi mbe mi yoo ! Ane bezima be nga sum aluman étéñ té ébién, be nga ñong kisoan, be wiñ fe kéza. Tam té éde Ciro a nga bo ndjié ya Babilonia.

Ébe mbu, Ciro a nga dzô naa : “Jehôva a va dzô me naa me bera long é templo dzèñ a Jerusalén. Bejudíos ba kumu vole ésèñ melong té be ne ke.” Ya dzam té, fave ane Jehôva a nga kiagh de, abuiñ Bejudíos be nga bera bulan a Jerusalén a kuane naa mimbu 70 mi lôrang ave be nga tsam kisoan té. Nfa mboo, Ciro a nga bera fe dughan bilas bikông ya miang, ya é biôm bisese bi ya Templo Nabucodonosor a nga ke a bio. Ye ô va yen aval Jehôva a nga belane Ciro naa a vole ayong dèñ ?