Étong Yésu

José ba María be mbe be too a Nazaret ya Yésu, ya fe é boan befe be mbe be bele. José a nga bo ésèñ kapina naa a baghle é nda-bôr dzèñ. A yeghle fe bo nfa Jehôva, ya Atsing dèñ. Mvong bôr té é mbe é bele fulu naa da bo dé ke a Sinagoga naa ba ke lughu Nzame, ya fe naa ba ke a Jerusalén naa ba ke dzemle fet Pascua mimbu misese.

Éyong Yésu a mbe a bele mimbu 12, é mvong dzèñ é nga bo môra ékena naa, da ke a Jerusalén aval ane é mbe bo fulu. Kisoan té é mbe ndzalane ya bôt, éba baa be nga ke fe naa, ba ke dzemle Pascua. Niène fet é nga man, José ba María be nga sum ékena naa ba dughan é nda dzeba, bé bunu naa Yésu a mbe ézizang mevong me-bôr meba. Ve, niène be nga dzeng ñe angôs bôr té été, béé dzi ki kuane ñe.

Ya dzam té, éde be nga bulan a Jerusalén. Be nga lôr melu melal bé dzeng ndôma dzeba. Asughlan, be nga kuane ñe a templo. Éñe Yésu a mbe wéñ, a too ézizang beyeghle, é bèè bo ya akeng, é bo fe bo minsili. Beyeghle be nga bira yaghan é mam Yésu a nga dzô, ya dzam té, baa be nga sum fe naa ba bo ñe minsili. Be nga bira fe kam biyalane bièñ. Éde be nga ñu tang naa a mbe é tugha yem wokh Atsing Jehôva mbeng.

José ba María be nga bira yep. María a nga dzô ñe naa : “A ndôma dzam, bi va ke bia dzeng wa minfa misese ! Ô mbaa vôm mbé ?” Yésu a nga yalane ñe naa : “Ye naa mii ve yem ki naa, ma yiane tobe é nda Ésaa wom ?”

Yésu a nga bulane ya bebyèn bèñ a Nazaret. Ô wéñ, José a nga yeghle Yésu ésèñ kapina. Wa tem naa Yésu a mbe aval avé éyong a mbe étong ? Yésu a nga tsini naa a vem, é bo fe édedaa n’yeman. Ya dzam té, Nzame ya boan be-bôt, be nga dzing ñe.