Juan nge ki Jean a kôman é zen Yésu

Niène Juan, é moan Zacarías ya Elisabet a nga vem, Jehôva a nga top ñe ane nkulu medzô. A nga belane ñe nfa ye naa, a kar bôr naa Mesías a nkuna so. Ve, ndaane naa a kanghle bekisoan nge ki besinagogas, éñe a nga kanghle éyang été. Abuiñ bôr be ya Jerusalén ya minfa mise mi ya Judea be nga so naa ba zu ñe bèè. A mbe é yaghle bôr naa, nfa ye naa be ve Nzame n’nem mbeng, ba yiène dzoghe naa ba bo é mam me ne abé. Dzam té é nga ve naa abuiñ bôr be dzôbane minsem mieba, ya naa Juan a du be ôshuiñ Jordán.

Juan a mbe é ning moan éning. Bitôp bièñ bi mbe mboane ya zeng camello nge ki Chameau, ye naa, a mbe é dzi bitanda ya wiñ ye afan. Bôr be mbe bé kômô yem é môr a mbe. Ye naa, bingung bi-bôr ane Befariseos ya Besaduceos nge ki Bepharisien ya Besadducéen baa fe, be nga ke ñe yen. Juan a nga dzô be naa : “Mia yiène dzôban ya tsen mezen menan. Mi taa tem naa mi ne édedèè éban fave amu mia dzô naa mi ne é boan Abrahán. Amu dzam té daa yili ki naa mi ne é boan Nzame.”

Abuiñ bôr be nga zu yen Juan, ya sili ñe naa : “Za dzam bia yiène bo naa bi ve Nzame n’nem mbeng ?” Éde, Juan a nga dzô Bejudíos naa : “Nge mi bele bitôp bibèñ, vaane é môr a yi, daa.” Ye wa yem amu dzé a nga dzô be dzam té ? A ne amu a mbe é kômô naa beyeghe bèñ be yem naa, nge ba kômô ve Nzame n’nem mbeng, ba yiène dzing é bôr bevoo.

Juan a nga dzô beñong nfong-si naa : “Tobeghane sôsôe, ya naa, mine taa ki dukh môr ézing.” A nga dzô bizima naa : “Mi taa yebe ébuale-zee, nge ki a kobe minaa.”

Befara ya Belevitas be nga ke fe ñe yen, éde be nga dzô ñe naa : “Ô ne faa za ? Bôr besese ba kômô yem.” Éde Juan a nga yalane bo naa : “Me ne é king é ne éyang été, da lere bôr é zen Jehôva, aval ane nkulu medzô Esaïe a nga dzô de.”

Bôr be nga bira dzing ba wokh é mam Juan a mbe é yeghle bo. Abuiñ bôr befe be mbe bé kômô yem nge Juan faa éñe a mbe Mesías. Éde Juan a nga dzô be naa : “É môr a bele ngu’u a dang ma, a nkuna so. Maa yiène ñe suare-suare minkoo mi ye mengôp mèñ. Ma du mina ya mendzim, ve ñe a ye mina du ya nfufup nsisim.”