Minenga étam mendzim

Éyong ézing, niène Pascua a nga lôt, éde Yésu ya beyeghe bèñ be nga bulan a Galilea. Nté be nga bo ékena té, be nga ke lôt a Samaria, ya siène bébéñ kisoan Sicar nge ki Sychar, é vôm be nga luè naa, étam mendzim Jacob. Yésu a nga lighi a too étam mendzim nfeng, nté beyeghe bèñ be nga ke kus bidzi a kisoan.

Éyong té éde minenga a nga so naa a zu lap mendzim. Éde Yésu a nga dzô ñe naa : « Vakh ma mendzim. » Éde minenga té a nga yalane naa : “Amu dzé wa kobe ya ma ? Me ne Samaritana. Bejudíos baa kobe ki ya Besamaritanos.” Yésu a nga dzô ñe naa : “Ng’a bo naa wa yem é môr me ne, nge wa, wa dzaa ma mendzim, éde ma, me nga ye wô ve mendzim ye éning.” Éde minenga a nga sili naa : “Wa kômô dzô yè ? Amu naa wéé bele ki ôlôm ô ne lap wô mendzim.” Yésu a nga yalane ñe naa : “É môr a ye ñu mendzim ma ye ñe ve, aa ye ki bera wokh évéé tam ézing.” Minenga a nga yalane naa : « Vakh ma mendzim meté, a Nti. »

Yésu a nga dzô ñe naa : “Kele a dzô ñu n’nôm naa a zu.” Minenga a nga yalane ñe naa : “Maa bele ki n’nôm.” Yésu ñe a yalane naa : “É ne bebela. Amu naa, ô lughaneyang biyong bitan, ve éndagha ô too ya é fam mina ñe mii se ki nlughan.” Ane minenga a nga dzô ñe naa : “Me taa naa ô ne nkulu medzô. Ayong dam da bunu naa éñe bia yiène ve Nzame ékang nkôô wi, ve, Bejudíos ba dzô naa, fave a Jerusalén éñe ba yiène ke ve Nzame ékang. Ma bunu naa, éyong Mesías a ye so, a ye bia tugha lere aval bia yiène ve Nzame ékang.” Ane Yésu a nga dzô ñe é dzam aa be ki tare dzô môr nfe : “Ma me ne Mesías.”

Ane minenga té a nga ke mbii é kisoan dzèñ ye dzô Besamaritanos naa : “Ma tem naa, me yenang Mesías. A yem éning ésese dam. Zaane, mi yen !” Ane bôr beté be nga ke nsama ya minenga té étam mendzim naa ba ke bèè meyeghle Yésu.

Ane Besamaritanos be nga dzaa Yésu naa a lôr tam ya bo. Yésu a nga lôr melu mebèñ kisoan té, ye naa a nga yeghle bo abuiñ mam, éde abuiñ ye été be nga bele mebun ébe ñe. Asughlan, be nga dzô minenga Samaritana naa : “Niène bi va wokh môr té é kobe, éde bi va bele dzi n’nem naa, bebela ya bebela, éñe faa a ne nkôrô ye éning.”