Yésu a kanghle fuèñ ye Édjié Nzame

Ôyôm tam ôsu niène Yésu a nga duban, éde a nga sum naa a kanghle naa : “Édjié Nzame é ntoo bébéñ.” Beyeghe béñ be mbe bé ke nsama ya ñe minfa mise mi ye Galilea, ya Judea. Éyong Yésu a nga bulan é dzaa dèñ a Nazareth, ane a nga ke a sinagoga, ye kuu mvighlan kalare Esaïe, ane a nga lang ôyap yôp naa : “Jehôva a va ve ma nfufup nsisim naa me kanghle mbemba fuéñ.” Dzam té é nga yili ya ? É nga yili naa, amben bôr be mbe bé kumu yen ane Yésu a bo mekengha, ve akalgha ôsua be nga ve ñe nfufup nsisim, é ne naa a kanghle mbemba fuéñ. Ôsu vaa, éde a nga dzô é bôr be nga bèè ñe naa : “Ému, nkulan adzô wi ô dzalbaneyang.”

Ôsu vaa, ane Yésu a nga ke nfa mang ya Galilea, ya kôane beyeghe béñ beñii, éba be mbe beyop bekoas. Éde a nga bane bo, é dzô naa : “Bééghane ma, ma ye mina ve naa mi yop bôt.” A mbe Pedro, André, Santiago nge ki Jacques, ya Juan. Éyong té ébiéñ, éde be nga likh ôkira ya yop bekoas wôba, ye béé ñe. Be nga mane tubane minfa mise mi ya Galilea, ya ke ba kanghle mam me ye Édjié Jehôva. Be mbe bé kanghle besinagogas, bemakit ya bisala. Abuiñ bôt be mbe bé tông bo é vôm ôse ba ke. Mefuéñ me mbe mé tsinane Yésu, me mbe mé kuiñ minfa mise, ya ke kuiñ mevôm me ne ôyap ane Siria.

Ya tam, Yésu a nga ve beyeghe bézing ngu’u naa be lerre minkôkoan ya vèè mbia minsisim. Éba bevoo be nga béé ñe, nté a nga ke a kanghle bekisoan-bikisoan ya mèè-mèè. Besôsôe binenga be mbe bé vole Yésu ya beyeghe béñ, ba be mbe fe nsama té été. Ébe nsama besôsôe binenga beté bia lang, María Magdalena, Jeanne, Susana, ya éba bevoo.

Niène Yésu a nga mane kômane beyeghe béñ, éde a nga lôm be naa be ke kanghle. Nté be nga ke ba kanghle a Galilea, abuiñ bôt befe be nga tobe fe beyeghe ya duban. Abuiñ bôt be mbe bé kumu tông Yésu, éde a nga fônane be ane afup be ntoo sap bidzi. Éde a nga dzô naa : “Dzaaghane Jehôva mban naa a lôm bebo-bisèñ naa be ke sap bidzi afup.” Niène tam é nga lôt, ane a nga bera top beyeghe 70, ye lôm be bebèñ-bebèñ naa be ke ba kanghle minfa mise mi ya Judea. Be nga yeghle meval me-bôr besese naa Édjié Nzame é ntoo bébéñ. Éyong beyeghe be nga bulan, be mbe bé kumu dzigha kat Yésu ane mam me nga wulu bo. Debele éé mbe ki bo dzam ézing nfa ye naa minkanghle mi sim.

Yésu a nga yem mane taa mam, naa beyeghe béñ be tsini naa ba bo ésèñ da dang éban, niène a ye bere a dzôp été. A nga dzô be naa : “Kanghlane mbemba fuéñ a si ése ngura. Yeghlane bôr Éfiè Nzame, ye du bo.”