Yésu a bo abuiñ mekengha

Yésu a nga so a si naa a zu kare mbemba fuèñ ye Édjié Nzame. Vedaa, Jehôva a nga ve ñe nfufup nsisim, naa a bo mekengha nfa ye naa a lere é mam a ye bo éyong a ye djié. Éfônan é ne naa, a mbe sèñ akoan meval mesese. A mbe naa, é vôm sese a ke, minkôkoan mia zu kuane ñe naa mia yi avole, éde a mbe é ve naa besese be let. Mindzidzim mi nga bera yen, mindôndokh mi nga wokh, mimbôbokh mi nga bera wulu, ya naa, mbimbia minsisim mi nga kôrô bôr ô ñuu. Ya ke kuiñ naa, môr a mbe let é name-name étôp Yésu. Bôr be mbe bé béé Yésu mevôm mese a mbe é ke. Aa mbe ki é tsirane môr ézing, ntoone éyong a mbe é kômô tobe étam.

Éyong ézing be nga soo mbômbokh é nda Yésu a mbe. Ve, amu é nga neman abuiñ bôr, béé mbe ki ñii a ñe a nda été. Éde be nga wiè ndziii ngura nfa, ya sii nkôkoan naa Yésu a yen wô. Ane Yésu a nga ndzô mbômbokh té naa : “Tebeghe ya wulu.” É nga bira bo bôr éyaghan, éyong be nga yen ane môr té a wulu.

Éyong éfe, Yésu a mbe é siène dzaa ézing, éde awôm bôr be mbe bé koan zam, be nga yônane be tele ôyap naa : “Yésu voleghe bia !” Metam meté, be mbe bé kîlî é bôr ba koan zam naa be yir bôr bébéñ. Yésu a nga lôm be naa be ke a templo, aval Atsing Jehôva é nga dzô naa, é môr asese a let ôkoan zam a yiène bo. A kuè be ngen a zen, ane be nga mane let. Niène mboo ye été a nga yen naa a ntoo nlerran, éde a nga bulan ô mvus naa a zu ve Yésu akiba, ya ve Nzame duma. A bôr awôm ayôp, fave ve môr té éñe a nga zu ve Yésu akiba.

Minenga ézing, a kuè naa ave a koan é ntoo mimbu 12, a mbe é dzeng meval mese naa a sèban. Ya dzam té, nfa ye a yir Yésu bébéñ, a nga ñii a bôr été, ya name étôp dèñ. Étéñ té ébién, éde a nga let. Éyong dzam té é bobaneyang, éde Yésu a nga sili naa : « Za a va name ma ? » Amben minenga a mbe é bira ko wong, ve a nga ke ébe Yésu, ye mane ñe kare asese. Yésu a nga sili ñe n’nem ôsi ya dzô ñe naa : “A ngoan dzam, kele mvoa.”

Ntebe ôsu ézing a too éyôla naa Jairo nge ki Jaïrus, a nga dzaa Yésu ya ngu’u naa : “Éngôngoo, za é nda dzam ! É moan minenga wom a ne édedaa nkôkoan.” Ve, kaa naa Yésu a ke kuiñ é nda Jairo, ane moan a nga wu. Éyong Yésu a nga siène, a nga kuane abuiñ bôr be nga so, naa ba zu tobe ya nda-bôr té. Ane Yésu a nga dzô be naa : “Mine taa yi ; a ne fave ôyô.” Éyong té éde Yésu a nga biñ mong énam ye dzô naa : « A moan, tebeye ! » Ane mong a nga tebe étéñ té ébién, éde Yésu a nga dzô bebyèñ béñ naa, be ve ñe ôyôm dzôm ya dzi. Tame siman aval bebyèñ bèñ be nga wôran !