Yésu a top mintôô awôm ya mibèñ

Niène ngum mbu ya étun ô nga lôt ave Yésu a nga sum ésèñ minkanghle, éde a nga yiène ñong mura nkighan. Beza a nga ye top naa be sèñ nsama ya ñe ? Beza a nga ye kômane nfa ye naa be bo betebe ôsu be ye ékôan bekristen ? Ve, kaa naa Yésu a ñong nkighan té, a nga tare yi naa Jehôva a lere ñe zen. Éde a nga ke nkôô émién étam, é vôm a nga lôr ngum nté alu é yaghlan. Niène kiri é nga lene, éde Yésu a nga kôan beyeghe béñ bézing ya top mintôô 12. Ye wa yem be biyôla ? Be mbe biyôla naa, Pedro, Andrés, Santiago nge ki Jacques, Juan, Felipe, Bartolomé, Tomás, Mateo, Santiago nge ki Jacques é moan Alfeo, Tadeo, Simón ya Judas Iscariote.

Mintôô awôm ya mibèñ mité, mi mbe mi wulu nsama ya Yésu. Éde a nge ke a lere bo aval ba yiène kanghle. Asughlan, ane a nga lôm be étam, naa baa fe, be ke kanghle. Jehôva a nga ve fe be ngu’u naa be vaa mbia minsisim ye lerre minkôkoan.

Yésu a mbe é yen mintôô ane mengom mèñ, a mbe fe a too be mebun. Befariseos be mbe bé ñong bo ane é bôr be mbe kaa yem sikôlô, ya kaa éban. Ve Yésu éé mbe ki é yen be aval té, éde a nga tugha be yeme kômane nfa ye naa be bo ésèñ dèñ. Ébe fe be mbe naa ba tobe ya Yésu, bura metam me ye éning dèñ, ane a lôr tam ya ñe kaa naa a wu, ya niène a nga ye wômô. Abuiñ be ye mintôô awôm ya mibèñ, be mbe bôr be ya Galilea ane Yésu. Bevoo be ye été be mbe minlughan.

Mintôô mi mbe fe bôr a bikop. Éyong ézing be nga kobe kaa tare fas ye fe a ñong mbia minkighan. Se ki éyong ésese éde be nga lere ôdzibi. Ya ke kuiñ be nga wômane naa be yem é môr a dang ôyap ôyôp. Vedaa, be mbe mbemba be-bôt, bé dzing fe Jehôva. Be nga ye bo tsîn ye ékôan bekristen, éyong Yésu a nga ye ke.