Ye Jehôva a ye yalane meyaghlane mam ?

1-2. Amu dzé bi ne simane biyong bizing naa, Jehôva aa yalane ki meyaghlane mèè ?

« YENEGHE é bôra mevakh muè ébe Jehôva, éde a ye dzale mekômgha me ye n’nem wiè » (Bya 37:4). Za mbemba ngiagh ! Ve, ye bia yiène yane naa, Jehôva a ve bia é dzôm bia sili ñe étéñ ébién bia sili ñe de ? Amu dzé bi ne sili nsili té ? N’yeneghane bifônane bia zu bi. É kal dzèè é ne n’kuèñ a yaghlane naa, a ke é Sikôlô bekar fuèñ be y’Édjié Nzame. Ve, abuiñ mimbu mia lôt kaa naa ba bane ñe. Étong moadzang a yaghlane Jehôva naa, a vèè ñe ôkoan wa ve naa a taa bira sèñ ékôan été. Ve, aa let ki. Bebyèñ be ne bekristen, ba yaghlane naa é moan wôba a tsini naa a tobe a bebela été. Ve, é moan wôba a kigh naa, aa sèhane ki fe Jehôva.

² Éyong ézing mina fe mi dzaayang Jehôva dzam ézing, ve kaa mina de ve. Asughlan, mi ne kigh naa Jehôva a yalane meyaghlan mézing ve, se ki éé menan. Nge ki mi ne simane naa, mi va yiène bo mbimbia dzam ézing. Kal dzèè ézing a too éyôla naa Janiceb, a nga wôrane dzam té. Éñe ya n’nôm be nga yaghlan akal nkômane wôba ya ke sèñ a Bethel. A dzô naa : « Me mbe me bele ndzi-n’nem naa, ba ye bia dzigha luè a Bethel. » Ve mengoan me nga venghane mimbu, kaa naa ba luè be. Janice a dzô naa : « Me mbe éwiñ ya nzaman. Me nga sili é dzam me nga bo naa, me ve Jehôva n’nem abé. Me nga bira yaghlan naa me ke a Bethel. Amu dzé éé dzi ki yalane meyaghlane mam ? »

3. Za dzam bia ye yen ayeghle di été ?

³ Biyong bizing, bi ne sili nge Jehôva a bèè meyaghlane mèè. Amben besôsôe be-bo biséñ Jehôva be ye ô mvus, baa fe be nga sili aval nsili té (Job 30:20 ; Bya 22:2 ; Habac. 1:2). Dzé é ne wô ve ndzi-n’nem naa, Jehôva a ye yalane meyaghlane muè ? (Bya 65:2) Naa bi bele éyalan ébe nsili té, bia ye tare yen é mam melal ma zu ma : (1) Za dzam Jehôva a ye bo ? (2) Za dzam Jehôva a kômô naa bi bo ? (3) Amu dzé bia yaghlane ki akal dzam afe ?

ZA DZAM JEHÔVA A YE BO ?

4. Aval ane bia lang de nten Jérémie 29:12, za dzam Jehôva a kiagh naa a ye bo ?

⁴ Jehôva a kiagh naa, a ye bèè meyaghlane mèè (A lang Jérémie 29:12). É Nzame wèè a dzing besôsôe be-bo biséñ bèñ, aa ye ki vaghle dzip melo ébe meyaghlane meba (Bya 10:17 ; 37:28). Ve, daa yili ki naa, a ye bia ve é dzam ésese bia sili ñe. Éyong ézing, bia ye yane ya ke kuiñ nféféñ éning, naa bi bele é mam mézing bia sili ñe.

5. Za dzam Jehôva a fas éyong a bèè meyaghlane mèè ? Vakh ayilgha.

⁵ Jehôva a fas aval é mam bia sili ñe me ne élat ya nkômane wèñ (Esaïe 55:8, 9). Dzam dèè ye nkômane wèñ, é ne a dzale si ya befam ya binenga be ne élat ya mevakh édjiè dèñ asi. Ve, Satan a dzô naa, da ye dang bo mbeng naa, boan be bôt be djié bebién (Atar. 3:1-5). Nfa y’a lere naa, é mam Satan a dzô me ne minèè, Jehôva a nga likh naa, boan be bôt be djié bebién. Ve, édjiè moan môt éde é nga so abuiñ minzukh bia tubane mio ému (Eccl. 8:9). Bia wokh amu dzé Jehôva aa vèè ki minzukh misese bia tubane mio metam ma. Nge a nga bo de, bôt bézing be mbe kikh naa, édjiè moan môt da wule mbeng ye naa, é ne mane kôm minzukh misese boan be bôt.

6. Amu dzé bia yiène bele ndzi-n’nem naa, éyong ésese éde Jehôva a ye bo é dzam é ne édzing ye sôsôe ?

⁶ Jehôva a ne yalan é dzam bia sili ñe abuiñ meval. Éfônan, éyong kéza Ezequías a mbe nkôkoan, a nga dzaa Jehôva naa, a vole ñe a let. Jehôva a nga yalane ñe, éé ve naa a let (2 Bed. 20:1-6). Nfa mboo, éyong ntôl Pablo nge ki Paul a nga dzaa Jehôva naa, a vèè ñe « éyo é mbe é beme ñe nsôn » éyong ézing ôkoan, Jehôva éé dzi ki vèè ndzukh té (2 Becor. 12:7-9). N’yenane fe bifônane ntôl Santiago nge ki Jacques ya Pedro nge ki Pierre. Bebèñ be nga ye wu émo Kéza Herodes. Ékôan é nga yaghlane akal Pedro, éyong ézing ye fe akal Santiago nge ki Jacques. Ve, be nga wiñ Santiago nge ki Jacques, atoo naa, Pedro nge ki Pierre a nga tobe nkôran ngalane akengha (Bisè mintôl 12:1-11). Bi ne sili naa : ‘Amu dzé Jehôva a nga kôre Pedro nge ki Pierre, ve, a kaa kôre Santiago nge ki Jacques ?’ Bible aa ve ki éyalan ye nsili téc. É dzam bi ne tobe de ndzi-n’nem é ne naa, mezen Jehôva « méé se ki vaghle tobe ékoar-koat » (Deut. 32:4). Bia yem fe naa, Pedro nge ki Pierre ya Santiago nge ki Jacques, be mbe be bele ayebe Jehôva (Mel. 21:14). Biyong bizing, Jehôva a ne yalane meyaghlane mèè aval bii va yane ki de. Ve, amu bi bele ndzi-n’nem naa, aval Jehôva a ye yalane meyaghlane mèè, da ye tobe ndzalane y’édzing ye sôsôe éyong ésese, éde biaa ye ki vaghle kè ébe aval a top naa a yalane bia—Job 33:13.

7. Za dzam bia dzeng naa bi saalé, amu dzé ki ?

⁷ Bia dzeng naa bi saale fulu ya vaghan étéñ dèè y’édi é bôt bevoo. Éfônan, bi ne dzaa Jehôva naa a vole bia ngura aval ézing, ve a kaa de bo. Ôsu vèè, bia wokh naa môt nfe, a nga dzaa fe aval dzam té ve, da yene ane Jehôva a nga bo é dzam a nga dzaa ñe. Kal dzèè a too éyôla naa Anna, a nga tubane aval dzam té. A nga yaghlane naa, n’nôm, Matthieu, a let é cancer a mbe a bele. Étéñ té évoo, bekal bèè bebèñ be ntoo min’nôm, be mbe fe béé yirane ya cancer. Anna a nga bira yaghlane akal Matthieu ya bekal bèè beté. Bekal bèè be nga let, ve Matthieu a nga wu. Ôsusua, Anna a nga sili nge bekal bèè beté, be nga let amu Jehôva a nga bo dzam. Nge é ne aval té, amu dzé éé dzi ki yalane meyaghlane mèñ naa, n’nôm a let ? Bebela a ne naa, bii se ki dzô amu dzé bekal bèè bebèñ beté be nga let. É dzam bia yem é ne naa, Jehôva a ne mane vèè minzukh misese miè, ye naa a kômô wômô memvuiñ mèñ me man-hang wu—Job 14:15.

8. (a) Aval ane bia lang de nten Esaïe 43:2, aval avé Jehôva a sukh bia asi ? (b) Aval avé meyaghlane me ne bia vole éyong bi tele minzukh été ? (A daghe éngengeng La oración nos ayuda a seguir adelante nge ki La prière peut nous aider à endurer une épreuve).

⁸ Éyong ésese éde Jehôva a ye bia sukh asi. Amu a ne Ésaa waa a ne édzing, Jehôva aa ñeghe ki a yen ane bia dzukh (Esaïe 63:9). Ve, aa kame ki bia ébe minzukh misese bia tubane mie, émi bi ne fônane mio y’ashuiñ ye minkaba mi nduan (A lang Esaïe 43:2). Ve, a kiagh naa, a ye bia vole « a mane dang » mam mesese meté. Aa ye ki likh naa, minzukh mi name bia aval éé se ki kôm. Jehôva a ye fe bia ve é ngu’u nsisim wèñ naa, éé vole bia a zôme (Luc 11:13 ; Beph. 4:13). Asughlan, bi ne tobe ndzi-n’nem naa, éyong ésese éde bia ye bele é dzam ébién bia yi nfa ya zôme ye k’ôsu ya sèhane ñe ye sôsôed.

ZA DZAM JEHÔVA A KÔMÔ NAA BI BO ?

9. Aval avé nten Jacques 1:6, 7 wa lere bia amu dzé bi ne tobe ndzi-n’nem naa, Jehôva a ye bia vole ?

⁹ Jehôva a kômô naa bi tobe ñe mebun (Behéb. 11:6). Biyong bizing, minzukh bia tubane mie, mi ne yene ane miaa ye ki vaghle kômbane môs ézing. Bi ne fe sum sôô naa, Jehôva a ye bia vole. Ve, Biblia a bane bia naa, ngalan é ngu’u Nzame a ve bia, bi ne « dang nfim » (Bya 18:29). Ndaane a likh naa, bisô bité bi tsini ôsu, bia yiène yaghlane ya mebun mesese, bi too ndzi-n’nem naa, Jehôva a ye yalane meyaghlane mèè—A lang Jacques 1:6, 7.

10. Vakh éfônane da lere mengu’u bia yiène ve, niène bia mane yaghlane Jehôva naa a vole bia akal dzam ézing.

¹⁰ Jehôva a yane naa, bi bo é ngap dzaa niène bia mane yaghlane ñe akal dzam ézing. Éfônan, moadzang waa a ne sili Jehôva naa, a vole ñe a bele mewaghan ésèñ nfa ya tobe ésesang melu melal. Aval avé Jehôva a ne yalane meyaghlane mèñ ? A ne ve moadzang té ayokh naa a ke kobe ya é masa wèñ. Ve moadzang té, a yiène ke yen é masa wèñ ye dzaa ñe é dzam a kômô. Éyong ézing, a yiène fe sili dzam té abuiñ biyong. A ne fe woghan ya mbo-ésèñ mboo naa, be tsen mewala m’ésèñ. Nge da yiène, a ne fe dzaa mewaghan kaa naa ba yaane ñe me.

11. Amu dzé bia yiène bo mban a dzaa é mam me tsii bia a min’nem ?

¹¹ Jehôva a yane naa bi bo mban a dzaa ñe é mam me tsii bia min’nem (1 Beth. 5:17). Yésu a nga lere naa, é mam mézing bia dzaa, biaa ye ki me bele étéñ té ébién (Luc 11:9). Éde, mi taa sili mo ôsi ! Boghane mban a yaghlane ya n’nem ôsese (Luc 18:1-7). Éyong bi ne mban a yaghlane ya n’nem ôsese, bia lere Jehôva naa é dzam bia sili ñe déé se ki zeze dzam. Bia lere fe mebun bi bele ébe Jehôva naa, a ne bia vole.

AMU DZÉ BIAA YAGHLANE KI AKAL DZAM AFE ?

12. (a) Za nsili bi ne sili bia bebién nfa é mam bia dzaa Nzame, amu dzé ki ? (b) Aval avé bi ne yem nge meyaghlane mèè, ma lere é ngang bi bele akal Jehôva ? (A daghe nkaalé « Ye é mam ma dzaa, ma lere é ngang me bele akal Jehôva ? »)

¹² Ng’a kuiñ naa, bii bele ki éyalan ébe é dzam bi va sili Nzame meyaghlane été, bi ne sili bia bebién minsili milal. Nsili ôsua ô ne naa, ‘Ye ma yaghlan akal é dzam da yiène ?’ Abuiñ biyong, bia simane naa bia yem é dzam é ne mbeng akal dèè. Ve, é dzam bia sili, é ne bo kaa so bia abuan melu ma zu. Nge bia yaghlan akal nzukh ézing, éyalane da dang mbeng ébe é dzam bi va sili é ne. Ye naa, é mam mézing bia sili me ne bo kaa wule nsama ye nkômane Jehôva (1 Jean 5:14). N’yenan éfônan bebyéñ bi va tu ôyôp. Be nga dzaa Jehôva naa, a baghle é moan wôba a bebela été. É dzam ba sili alé da yene ane da yiène. Ve, Jehôva éé se ki bia yemle naa, bi sèhane ñe. A kômô naa, bia besese, amben é boan bèè, bi top naa bia sèhane ñe (Deut. 10:12, 13 ; 30:19, 20). É dzam bebyèñ be ne sili é ne naa, Jehôva a vole be a name n’nem é moan wôba naa a kômô dzing Jehôva ye bo mvuiñ dzèñ—Mink. 22:6 ; Beéph. 6:4.

13. Aval ane bia lang de nten Behébreu 4:16, éyong évé Jehôva a ye bia vole ? Vakh ayilgha.

¹³ Nsili bèè bi ne sili ô ne naa, ‘Ye tam é kui-hang naa Jehôva a yalane meyaghlane mam ?’ Bi ne wôrane naa, bia yi éyalane ye meyaghlane maa étéñ ébién bia bo de. Bebela a ne naa, Jehôva a yem é tam da yiène naa a vole bia (A lang Behébreu 4:16). Éyong bii bele ki éyalan ébe é dzam bi va sili étéñ té ébién, bi ne simane naa éyalane Jehôva a ve é ne ‘kaa’. Ve, éyalane dèñ é ne bo, ‘Tam daa be ki kuiñ.’ Éfônan, simghane étong moadzang a nga yaghlane naa Nzame a séñ ñe ôkoan wèñ. Nge Jehôva a nga séñ ñe y’akengha, Satan a mbe dzô naa, moadzang té a k’ôsu ye sèhane Jehôva, fave amu a nga let (Job 1:9-11 ; 2:4). Ye fe naa, Jehôva a kighang é tam a ye mane séñ akoan ésese (Esaïe 33:24 ; Mel. 21:3, 4). Nté dzam té daa be ki kuiñ, bii se ki yane naa bi mane let y’akengha. Éde, moadzang té a mbe sili Jehôva ngu’u ye mvoa ya nsisim nfa ye naa, a zôme ôkoan wèñ, ye k’ôsu ye sèhane Ñe ya sôsôe—Bya 29:11.

14. Za ayeghle bia ñong ya éfônane Janice ?

¹⁴ Simghane éfônane Janice, éñi a nga yeghlane amu a kômô ke sèñ ô Bethel. Mimbu mitan mi nga lôt kaa naa a wokh aval Jehôva a nga yalane meyaghlane mèñ. A dzô naa : « Jehôva a nga belane tam té naa, a yeghle ma ye songhane ma. Mebun mam ébe ñe me nga yiène vem. Me nga yiène fe songhane mefulu nfa ayeghle dam mamièn. Ye naa, mevakh mam méé nga yiène ki so ébe bitéñ me tele. » Ôsu vèè, be nga bane, Janice ba n’nôm naa be sèñ ane bedeghe bikôan. Éyong a daghe é mam me nga lôt ô mvus, Janice a dzô naa : « Jehôva a nga yalane meyaghlane mam ve, se ki aval me nga simane de. É nga ñong ma abuiñ tam naa me yen é mbemba éyalan a nga ve ma, ve, ma bira ñe ve akiba amu a va lere ma édzing dèñ ya é mbemba fulu dèñ. »

15. Amu dzé biaa yiène ki bembe fave ébe dzam dèè meyaghlane mèè été ? (A daghe fe bivaghle).

¹⁵ Nsili lal ô ne naa, ‘Ye ma yiène yaghlan akal dzam afe ?’ Amben biyong bizing é ne mbeng naa, bi dzô Jehôva é dzam ébién bia kômô, bia yiène bili nkômane Jehôva akal dèè, bii likh naa Jehôva a yalane bia abuiñ meval. N’ñonghan éfônan kal dzèè a ne nkuèñ a nga dzaa Jehôva naa, a kômô ke Sikôlô akal bekar fuèñ be y’Édjié Nzame. A kômô ke sikôlô té, naa a ke vole é vôm ba yi abuiñ bekar fuèñ. Éde, nté a tsini naa a yaghlan akal dzam té, a ne fe sili Jehôva naa, a vole ñe a yen bitéñ bife bi ne ve naa, a dzale nkômane wèñ té (Bisè mintôl 16:9, 10). Ôsu vèè, niène a mane yaghlane akal dzam té, a ne dzaa ndeghe bikôan nge ékôan ézing é ne bébéñ da yi avole nfa bempwaghe-mefan. Nge ki, a ne fe tsili ntem ékôan naa a yem é vôm ba yi abuiñ bekar fuèñ be ye Édjiè Nzamee.

16. Za dzam bi ne tobe de ndzi-n’nem ?

¹⁶ Ane bi va yeghe de, bi ne tobe ndzi-n’nem naa, Jehôva a ye yalane meyaghlane mèè aval é ne édzing ya sôsôe (Bya 4:3 ; Esaïe 30:18). Biyong bizing bi ne bele éyalan bii va yane ki. Ve, Jehôva aa ye ki vaghle dzip melo ébe meyaghlane mèè. A bira bia dzing, ye naa, aa ye ki bia lame môs ézing (Bya 9:10). Éde, tsinighane naa, mia ve « mebun menan ébe ñe éyong ésese » ye yoo ñe min’nem mienan meyaghlane été—Bya 62:8.