Vughane besôsôe bangele

1-2. (a) Minfa mivé bia selane ye bangele ? (b) Minfa mivé ki bia fônane bangele ?

ÉYONG Jehôva a va so mia a bebela été, a va bane mia naa mi bo môr mboo ye é nda-bôr dzèñ, bia lang été bobedzang ye bekal bèè be ya si ése ngura, ya fe bakuru bangele (Dan. 7:9, 10). Éyong bia tem bangele, bi ne simane nté mbé ba selane ya bia. Éfônan, bangele ébe be nga tare sum ning kaa naa bia, bi ning (Job 38:4, 7). Ba lôr fe bia nfa ngu’u. Be ne kaa ékop minfa misese, atoo naa bia, bi ne bôr a minsem (Luc 9:26).

² Vedèè, amben bia selane ya be, bia fônane fe bangele minfa mizing. Éfônan, ane bangele, bi ne vu é mbemba mefulu Jehôva. Bi bele fe fili ya top ane be. Bia fe, bi bele biyôla ye abuiñ mefulu ma selane bia bevoo ya éba bevoo, ya fe meyem abuiñ meval. Ane bangele, bi bele fe nkômane ya lughu Mvele wèè (1 Pierre 1:12).

3. Za mam bi ne yeghe ébe besôsôe bangele ?

³ Amu bia fônane be abuiñ minfa, é mbemba éfônane bangele é ne bia saghe, ye ve fe bia abuiñ meyeghle me ne édedèè éban. Ayeghle di été, bia ye yen aval bi ne vu é fulu asili ñuu besôsôe bangele, édzing deba akal boan be-bôt, ôdzibi wôba, ye mengu’u ba ve naa ékôan é tobe nfuban.

BANGELE BE NE ASILI ÑUU

4. (a) Aval avé bangele ba lere naa be ne asili ñuu ? (b) Amu dzé bangele be ne asili ñuu ? (Bya 89:7).

⁴ Besôsôe bangele be ne asili ñuu. Afiang bo naa be ning-hang édedèè ayap, naa be ne édedèè ngu’u, ye akeng, ba bo melepgha Jehôva mewokh (Bya 103:20). Éyong Jehôva a dzô be naa be bo dzam ézing, baa vaghle ki bo éngung, ye naa, baa vaghle ki belan é ngu’u deba naa ba ve bebién duma. Ba dzale ya mevakh nkômane Nzame, amben éyong dzam té daa so ki be ôlughua (Atar. 32:24, 29 ; 2 Bed. 19:35). Baa ñong ki é duma Jehôva a yiène de. Amu dzé bangele be ne aval asili ñuu té ? Amu naa, ba dzing Jehôva, ye bele édoa ngang ya ñe (a lang Bya 89:7).

5. Aval avé angele ézing a nga lere asili ñuu, éyong a nga bame ntôô Juan nge ki Jean ? (A daghe fe évaghle).

⁵ Ntamane yen nlang ézing ya Bible wa lere asili ñuu bangele. Étun mbu 96 ye melu mèè, angele ézing, Bible a ne kaa tu éyôla, a nga ve naa ntôô Juan nge ki Jean a yen môra éyeyem (Mel. 1:1). Za dzam Juan a nga bo éyong a nga yen de ? A nga dzeng naa, a kur angele té mebong asu. Ve, sôsôe angele té a nga dzigha ñe sim, ye dzô ñe naa : « Boghe nkee ! Ô taa de bo ! Me ne fave mbo-ésèñ ane wa, akal duè ye bobeñong [. . .] Kanghe Nzame ! » (Mel. 19:10). Kiéé, za éyalan é mbe ndzalane ye asili ñuu ! Angele té éé mbe ki é kômô ñong é duma da yiène Nzame. Ya dzam té, étéñ té ébién, ane a nga simane Juan naa, a yiène kang fave Jehôva Nzame. Tame té fe, angele té éé dzi ki lere Juan naa a mbe ôyap yô a lôr ñe. Amben abong té a sèhaneyang Jehôva édedèè ayap, ye naa, a mbe é lôr Juan nfa ngu’u, a nga kobe ntôô té ye asili ñuu, ane mbo-ésèñ ane ñe. Amben angele té a nga bame Juan, éé dzi ki yèè ñe nge ki a kobe ñe ya abian. Ndaane naa a bo de, angele a nga kobe ñe ye mbemba bifiè. A nga yiène wokh naa, nge Juan a nga kômô kur mebong ôsi a mbe fave amu, é dzam a nga yen é nga lôr ñe nkông.

6. Aval avé bi ne vu éfônan asili ñuu bangele ?

⁶ Aval avé bi ne vu éfônan asili ñuu bangele ? Bia fe, bi ne dzale meyem mèè kaa bo éngung, kaa ki dzeng naa bi ñong duma ye é mam bia bo (1 Becor. 4:7). Ye naa, biaa yiène ki wôrane naa, bia dang é bôr bevoo, amu ave bia sèhane Jehôva é ntoo ayap a lôr ébe, nge ki faa, amu bi bele meyem mézing. A ne-ne naa, éyong bi bele abuiñ meyem, dzam té da yiène bia ve naa, bi yen bia bebién avitsang a lôr é bôr bevoo (Luc 9:48). Ane bangele, bia kômô sèhane é bôr bevoo. Ye mimboane miè, biaa kômô ki ve é bôr bevoo naa be tem naa, bia dang be.

7. Aval avé bi ne lere fulu asili ñuu, éyong bia yiène bame môt nge ki a ve ñe melepgha ?

⁷ Bia kômô fe lere asili ñuu éyong bia kômô bame nge ki a ve môr melepgha, a ne bo moadzang nge ki kal dzèè, a ne fe bo é moan wèè. Éyong bia ve ñe melepgha meté, bia yiène ñe bame aval da yiène. Vedèè, ane é angele a nga bame Juan ye mbemba bifiè, bi ne bame môr aval da yiène, kaa ve naa a tobe éwiñ, nge ki naa a sili mo ôsi. Nge biaa tem ki naa, bia dang é bôr bevoo, bia ye ve melepgha me ne tsîn a Biblia été, aval é ne ngang ye n’nem éngôngoo (Becol. 4:6).

BANGELE BA DZING BOAN BE-BÔT

8. (a) Aval ane bia lang de nten Luc 15:10, aval avé bangele ba lere naa ba dzing boan be-bôt ? (b) Aval avé bangele ba vole bia ésèñ minkanghle été ? (A daghe fe évaghle é ne ).

⁸ Bangele baa dzime ki é mam ma biaane boan be-bôt, ye naa, baa vaghle ki tem naa bi ne kaa éban. Ndaane de, ba bira bia dzing. Ba yen mevakh éyong mbo-nsem a dzôban, da yili naa, éyong ntôma ô va dzimi wa bulan ébe Jehôva, nge ki faa, éyong moan môr a tsen mboane mam wèñ ô ne abé, ye ñii a bebela été (a lang Luc 15:10). Bangele ba vole fe bia ye ayông ésese, éyong bia bo ésèñ minkanghle (Mel. 14:6). Amben baa ke ki kobe ye bôt, be ne wulu nkare fuèñ ézing naa, be lere ñe é môr a kômô yeghe a yem Jehôva. É ne été, bii se ki ban naa, bangele ébe be va lere bia ngura môr ézing. Amu naa, Jehôva a ne fe belane mam mefe, ane nfufup nsisim wèñ naa a vole bôt, nge ki a wulu bebo bisèñ bèñ (Bisè mintôl 16:6, 7). Vedèè, ébe abuiñ biyong, a belane bangele. Ye dzam té, éyong bia kanghle mbemba fuèñ, bi ne bele ndzi-n’nem naa, bangele be ne vèè naa ba vole bia (A daghe nkaale « A nga yalane meyaghlane mebab »).

9. Aval avé bi ne vu éfônan édzing bangele be bele akal boan be-bôt ?

⁹ Aval avé bi ne vu éfônan édzing bangele be bele akal boan be-bôt ? Éyong bia wokh fuèñ naa be bereya ñinghle moadzang nge ki kal dzèè ézing ékôan été, bi ne tobe mevakh été, aval ane bangele ba bo de. Bi ne ñe ke ve mbemba nsohane ye ban ñe édzing bi bele akal dèñ (Luc 15:4-7 ; 2 Becor. 2:6-8). Bi ne fe vu bangele éyong bia ve mengu’u mesese mèè ésèñ minkanghle (Eccl. 11:6). Ya fe naa, aval ane bangele ba sukh bia asi éyong bi ne minkanghle, aval dèè fe, bi ne dzeng meval abuiñ bi ne sukh bobedzang ye bekal bèè asi, ésèñ minkanghle deba. Éfônan, ye bi ne ve mengu’u naa, bi kanghle ye é môr a ndaghe bo nkare fuèñ ? Ye bi ne vole bobedzang ye bekal bèè be ntoo beñabôrô, nge ki faa é bôr be bele biyem, nfa ye naa, be ñong fe ngap ésèñ minkanghle ?

10. Za dzam bi ne yeghe ye nlang Sara ?

¹⁰ Za dzam bi ne bo nge étéñ dèè daa likh ki bia naa bi bo abim bia kômô bo ? Bi ne dzeng meval mefe bi ne sèñ nsama ye bangele ésèñ minkanghle été. Ntamane ñong éfônane Sarac, kal dzèè ézing ye India. Niène a nga tobe mpwaghe mefan bébéñ mimbu 20, ane Sara, a nga bira koan, ye naa, éé mbe ki fe kôrô énong dèñ ayô ye wulu. Dzam té é nga ve ñe naa, a tobe édedèè éwiñ. Ve, ye avole mindzidzing bobeñang bèñ be ya nsisim, ye fulu ya lang Biblia mban, ôtetak-ôtetak, Sara a nga bera bele mbemba mesiman. É ne été, a nga yiène tsen aval a mbe é bo ésèñ minkanghle dèñ. Amu éé mbe ki tobe naa a tsili bekalare, a mbe kanghle fave ngalane teléfono. Éde a nga luè nkoo bisuakh, é bôr a nga yiène bera ke fep minkanghle, éde baa fe, be nga lere ñe é bôr befe be mbe kômô yeghe Biblia. Asughlan é mbe yè ? Ébe ayôm mengoan, Sara a nga bele beyeghe Biblia 70, a lôr-lôt abim meyeghe Biblia a mbe wule de ! Éde a nga ke a kap bôr befe be ye ékôan, abim meyeghe me ye été. Abuiñ beyeghe Biblia bevoo be ye été, be nga sohang so bisulan. Bangele ba wôrane bura mevakh, éyong ba sèñ nsama ye bobedzang ye bekal bèè ba ve mengu’u meba mesese nfa ya dzale ésèñ minkanghle deba !

BANGELE BA LERE FULU ÔDZIBI

11. Aval avé é bangele be ne sôsôe, be nga lere môra ôdzibi ?

¹¹ Besôsôe bangele be ne bura bifônane nfa ya lere ôdzibi. Be nga dzibi ékoar-koat ye abé Jehôva a nga zôme tang abuiñ betoyini a mimbu, ye naa, dzam té é nga name fe be. Be nga yen ane Satan ye abuiñ mbia minsisim mi nga tare sèñ ye be, be nga ke Jehôva é ngam ayat (Atar. 3:1 ; 6:1, 2 ; Jude 6). Biblia a kobe bia adzô sôsôe angele ézing, a nga lumane ye mbimbia nsisim tang abuiñ melu (Dan. 10:13). Ye fe naa, atéé ye é tam Adán ba Eva, bangele be yenang fave édedèè avitsang bôr bé top naa ba sèhane Jehôva. Amben aval té, besôsôe bangele ba tsini naa ba sèhane Jehôva ye ayông ye fe mevakh été. Ba yem naa, éyong mbemba tam da ye kuiñ, Jehôva a ye mane vèè ékoar-koat ésese.

12. Dzé é ne bia vole naa bi bo ôdzibi ?

¹² Aval avé bi ne vu é fulu ôdzibi bangele ? Ane bangele, bi ne yen bikoar-koat bi-mam, nge ki a tubane bitsible. Ve, ane be, bi bele ndzi-n’nem naa, é tam da yiène, Jehôva a ye mane vèè abé ésese. Ya dzam té, ane besôsôe bangele, biaa « sim ki naa bia bo é dzam é ne mvèñ » (Begal. 6:9). Nzame a kiagh fe bia naa, a ye bia vole a bo ôdzibi (1 Becor. 10:13). Bi ne yaghlane Jehôva naa, a ve bia nsisim wèñ, éwi wa ye bia vole a bo ôdzibi ye bele mevakh (Begal. 5:22 ; Becol. 1:11). Za dzam mi ne bo nge mia tubane bitsible ? Tobeghane Jehôva mebun ya n’nem ôsese, mi kaa ki ko wong. Jehôva a ye mia sukh asi, ye ve mia ngu’u éyong ésese (Behéb. 13:6).

BANGELE BA VOLE BIA A BAGHLE ÉKÔAN NFUBAN

13. Za ngura aval ayem bangele be bele melu me ye asughlane ma ? (Matthieu 13:47-49).

¹³ Melu me ye asughlane ma, Jehôva a va kee bangele ngura aval ayem (a lang Matthieu 13:47-49). Bizukh bi-bôr be ye mevôm mesese me ya si, ba dzing ba wokh mbemba fuèñ. Bevoo be ye été, ba bo é dzam ésese da yiène, naa be tobe beña bekristen, éba bevoo ki, baa bo ki de. Be nga kee bangele ayem naa « be kane mbia be-bôt ye mbemba be-bôt ». Dzam té da yili naa, ba yiène vole a kamane ékôan naa é tobe nfuban. Daa yili ki naa é bôr besese ba sim naa ba kôane ye bia, a bo mekalgha mesese be bele, béé se ki bera so, nge ki naa, môr ézing aa ye ki fe vaghle bera bo é dzam é ne abé ékôan été. Ve, bi ne bele ndzi-n’nem naa, bangele ba sèñ ngu’u naa be vole ékôan nfa ye naa é tobe nfuban.

14-15. Aval avé bi ne vu éfônane bangele, ye lere naa, bia kômô naa ékôan é tobe nfuban ? (A daghe fe bivaghle).

¹⁴ Aval avé bi ne vu éfônane bangele, ye lere naa bia kômô baghle ékôan nfuban ? Bia bo de, éyong bia bo é ngap dèè, nfa ye naa ékôan é tobe nfuban ôtemgha été ye nfa ye ôsiman. Naa bi bo de, bia ve mengu’u naa bi kamane n’nem wèè, bi top mbemba mengom, bi tep ki é mam mesese me ne bia pôô a nsem (Bya 101:3). Bi ne fe vole é bobedzang bevoo naa be tobe sôsôe ya Jehôva. Éfônan, bia yiène bo yè nge bi wokh naa, moadzang ézing a va bo nsem ônen ? Amu édzing bi bele akal moadzang té, bia ye ñe saghe naa a ke de kobe bemvene. Nge a bo kaa de bo, bia bebién bia ye de ke kare bemvene. Bia kômô naa, é kristen sese a koan nfa ya nsisim, a dzigha bele avole da yiène ! (Jacq. 5:14, 15).

¹⁵ É dzam é ne éngôngoo é ne naa, ba yiène vaa bôr bézing ba bo nsem ônen, ékôan été. Éyong dzam té é bohang, bia « sim naa bia wulu » ye bôr betéd (1 Becor. 5:9-13). Ntaane mam té wa vole naa, ékôan é tobe nfuban. Ye fe naa, éyong bia top naa, biaa wulu ki fe ye é bôr be va vaa ékôan été, bia lere be mbemba n’nem. Mboane wèè té, ô ne be vole naa, be bera sum yen mam aval da yiène. Nge be bo de, dzam té da ye ve naa, Jehôva, é bangele béñ, ye bia, bi tobe mevakh (Luc 15:7).

16. Minfa mivé bia ye ve mengu’u naa bia vu éfônane bangele ?

¹⁶ Jehôva a ve bia môra maa, naa bi yeghe a yem bangele ye sèñ nsama ya be ! N’vughan é mbemba mefulu meba ane : asili ñuu deba, édzing deba akal boan be-bôt, ôdzibi wôba, ya fe, mengu’u ba ve naa be ve ékôan nfuban, nfa ye ôtemgha ye nfa ya nsisim. Nge bi vuu bangele, bia fe, bi ne bo bôr be ye é nda-bôr Jehôva mbèmbèè.