Rut ya Noemí

É tam mura zèñ a mbe a Israel, minenga Israelita a too éyôla naa Noemí, a nga ke tobe é si Moab ba n’nôm, ya bendôma bebèñ beba. Ôsu vèè, ane n’nôm Noemí a nga wu. Bendôma bèñ be nga lukh Rut ye Orpá, be mbe bengoan Bemoabitas. Édi é ne éngôngoo é ne naa, ôsu vèè, ane bendôma Noemí baa fe, be nga wu.

Éyong Noemí a nga wokh naa, zèñ é manang a Israel, éde a nga kikh naa a dughan é si dzèñ. Ruth ba Orpá be nga ke ya ñe, ve nté sese be mbe a zen, Noemí a mbe é dzô be naa : “Mi mbe mbemba beyèè akal bendôma bam ye mbemba mimbom akal dam. Ma kômô naa mina bebèñ mi bera ke melukh. Bulughan a Moab.” Binenga bebèñ beté be nga yalane ñe naa : “Bia dzing wa ! Biaa kômô ki wô likh.” Noemí a nga ke ôsu ye dzô be naa be ke. Asughlan, éde Orpá a nga dughan, ve Rut a nga lighi. Noemí a nga dzô ñe naa : “Orpá a dughaneyang ébe ayong dèñ ye benzame bèñ. Dughane ya ñe, ya ke é nda ñua.” Ve, Rut a nga dzô naa : “Maa ye ki wô likh. Ayong duè da ye bo ayong dam, é Nzame wiè a ye bo é Nzame wom.” Wa tem naa Noemí a nga wôrane yè éyong Rut a nga dzô de ?

Rut ba Noemí be nga kuiñ a Israel éyong é tam be mbe bé sum naa ba sap Cebada nge ki Orge. Môs ézing, Rut a nga ke wôlô mefes me cebada ma ku, afup fam ézing é too éyôla naa, Boaz, éñi a mbe é ndôma Rahab. Boaz a nga wokh bé dzô naa Rut a mbe é ngoan Moabita é nga tobe sôsôe ya Noemi, é tsini fe naa a tobe ya ñe. A nga dzô bebo-bisèñ bèñ naa, be bera koghle mefes me Cebada ma ku afup été, naa Rut a wôlô me.

Ngogho té, Noemí a nga sili Rut naa : “Afup za ô va sèñ été, ému ? Rut a nga yalane ñe naa : Afup fam ézing é ne éyôla naa, Boaz.” Noemi a nga dzô ñe naa : “Boaz a ne môr ye é nda-bôr n’nôm wom. Keng ôsu ya sèñ afup dèñ été ya bitong binenga bevoo. Wa ye tobe nkamane wéñ.”

Rut a nga tsini naa a sèñ afup Boaz ya ke kuiñ tam mesap é nga man. Boaz a nga yen naa, Rut a mbe é sèñ ngu’u, ye naa, a mbe édedèè mbemba minenga. Metam meté, nge môr a mbe é wu kaa naa a byèñ moan fam, môr ye é mvong dzèñ a mbe é lukh nkus wèñ. Akal té, éde Boaz a nga lukh Rut. Be nga byèñ moan fam a too éyôla naa Obed, éñi a nga sughlane bo é mvam kéza David. Memvuiñ Noemí me mbe mesan. Be nga dzô ñe naa : “Ôsusua, Jehôva a nga ve wa Rut, éñi a nga lere wa édedèè mbemba n’nem, éde, éndagha ô mbele ndèñ. Duma ébe Jehôva.”