Ana a yaghlane naa a byèñ moan fam

Moan Israelita ézing a mbe éyôla naa Elcaná. A mbe a bele binenga bebèñ, Ana ya Peniná, ve a nga dang dzing Ana. Peniná a mbe é pogho Ana éyong ésese amu Ana éé mbe ki a bele boan, atoo naa Peniná ñe a mbe a bele abuiñ boan. Kada mbu, Elcaná a mbe é ke a Siló ya é nda-bôr dzèñ, naa be ke kang Jehôva a tabernáculo. Éyong ézing, atoo naa be mbe wéñ, Elcaná a nga yen naa, Ana, ndzidzing minenga wèñ a mbe édedèè éwiñ. Éde a nga dzô ñe naa : “Éngôngoo Ana, ô taa yi. Ô bele ma. Ma dzing wa.”

Ôsu vèè, Ana a nga ke étam naa a ke yaghlan. Éé mbe ki sim naa a yi, nté a mbe é dzaa Jehôva naa a vole ñe. A nga kiagh ñe naa : “A Jehôva, nge ô ve ma moan, moan fam, ma ye wô ñe ve, ye naa a ye sèhane wa éning ése dèñ.”

Elí, é Fara n’nen, a nga yen Ana é yi, éde a nga tem naa a mbe fièn. Ana a nga yalane naa : “Kaa, a nti wom, méé se ki fièn. Môra ndzukh a bele ma, éde me va kobe a Jehôva ébe adzô té.” Elí a nga yen naa a nga ku, éde a nga dzô ñe naa : “Nzame a vakh wa é dzam wa kômô.” Ana a nga wôrane mvèñ ye tsini é zen dèñ. Kaa naa mbu mboo ô lôt, ane Ana a nga byèñ moan fam ye yô ñe naa, Samuel. Ye ô ne simane nté mbé Ana a mbe wôrane mevakh ?

Ana éé dzi ki vuène é ngiagh a nga bo Jehôva. Niène a nga kîlî Samuel abéñ, ane a nga ke a ñe naa a ke sèñ a templo. A nga dzô Elí naa : ‘É moan fam me nga yaghlane naa me bele é ñi. Ma kôlô ñe Jehôva éning sese dèñ. Elcaná ba Ana be mbe bé ke yen Samuel kada mbu ye ke a ñe nféféñ étôp é ne kaa binam. Jehôva a nga ve Ana bendôma belal befe ya bengoan bebèñ.