Jehôva a kobe a Samuel

Elí, é fara n’nen, a mbe a bele bendôma bebèñ be mbe bé sèñ ane befara a tabernáculo. Be mbe biyôla naa, Hofní ya Finehás. Béé mbe ki bé bo metsing Jehôva mewokh, ye naa, be mbe bé bira tsible bôt. Éyong Bisraelitas be mbe bé zu ve metungha akal Jehôva, Hofní ba Finehás be mbe bé ñong mefus metsit me nga dang mvèñ akal bébién. Elí a nga wokh é mam bôr be mbe bé dzô nfa bendôma bèñ, ve, éé dzi ki bo dzam ézing naa a songhane be. Ye Jehôva a nga ye likh naa dzam té é tsini ôsu ?

Afang faa bo naa, Samuel a mbe édedèè mong ye Hofní ya Finehás, éé dzi ki be vu. Jehôva a mbe é yen Samuel mvèñ. Alu ézing, atoo naa a mbe a bôô ôyô, Samuel a nga wokh king da luè ñe. A nga tebe, ye mare ébe Elí ye dzô ñe naa : “Ma ñi !” Ve, Elí a nga dzô naa : « Méé dzi ki wô luè. Bulan a ke ke ôyô. » Samuel a nga bulan a ke dzogbe ôsi. Ane dzam té é nga bera boban éyong éfe. Éyong Samuel a nga wokh king té éyong lal, éde Elí a nga wokh naa Jehôva éñe a mbe é luè Samuel. A nga dzô Samuel naa nge a bera wokh king té, a yiène dzô naa : “Kobeghe a Jehôva. Mbo-ésèñ wiè a bèè.”

Samuel a nga bulan a ke dzogbe ôsi. Ane a nga bera wokh bé luè ñe naa : “Samuel ! Samuel !’ Éde a nga yalane naa : “Kobeghe, mbo-ésèñ wiè a bèè.” Jehôva a nga dzô ñe naa : “Dzôghe Elí naa, ma ye ve éñe, ya é nda-bôr dzèñ akira. A yem naa bendôma bèñ ba bo mbia be-mam a tabernáculo wom été, ve aa bo ki dzam nfa té.” Kikiri ye é môs ô nga berane vèè, Samuel a nga wiè mimbèñ mi ya tabernáculo, aval a mbe a bele fulu naa a bo de. A mbe é ko wong naa a dzô é fara n’nen é dzam Jehôva a nga dzô. Ve, Elí a nga luè ñe ye sili ñe naa : “A ndôma dzam, Jehôva a va dzô wa za dzam ? Maneghe me kar asese.” Ane Samuel a nga mane kar Elí é dzam sese Jehôva a nga dzô ñe.

Nté Samuel a mbe é vem, Jehôva a nga tsini naa a tobe ya ñe. Atéé ye ngum nfa si, ya ke kuiñ nfa mboo ye si, Bisraelitas besese be mbe bé yem naa Jehôva a nga top Samuel naa a bo nkulu medzô wéñ, ya fe nkighe minsang.