É kéza ôsua ya Israel

Jehôva a nga ve Bisraelitas bekighe minsang naa be wulu ya bo. Ve, Bisraelitas be nga kômô bele kéza. Be nga dzô Samuel naa : “Meyong mesese, me ne bia minfeng, me bele bekéza. Bia fe bia yi é kéza waa.” Samuel a nga yen naa, é dzam be nga dzaa alé, é mbe évus. Éde a nga yaghlane Jehôva ébe adzô té. Jehôva a nga dzô ñe naa : “Ayong déé dzi ki wô tep. Ma alé ba tep. Dzôghe be naa, be ne bele kéza, vedaa, ba yiène yem naa kéza a ye be sili naa be bo abuiñ mam akal dèñ.” Amben naa té, ayong é nga dzô naa : “Biaa bis. Bia yi kéza !”

Jehôva a nga dzô Samuel naa é môr ba luè naa Saúl éñe a ye bo é kéza ôsua. Éyong Saúl a nga ke fep Samuel a Ramá, éde Samuel a nga waa Saúl ane Kéza é shuii ñe mboan nlô.

Ôsu, Samuel a nga kôane Bisraelitas naa a lere be nféféñ kéza wôba. Vedaa, béé nga kuane ki Saúl vôm ézing. Ye wa yem amu dzé ? Amu naa a nga ke sobo mimbaghe été. Éyong be nga sughlane ñe yen, éde be nga so ñe, ye tele ñe ézizang ayong été. Saúl a mbe ayap a dang môr ase, ye naa, a mbe fe édedaa mbemba ndôman. Samuel a nga dzô naa : “Daghan, é môr Jehôva a va top.” Éde ayong é nga sum dzô naa : « Ayap éning ya kéza ! »

Mesumgha, kéza Saúl a mbe é bèè Samuel ye bo Jehôva mewokh. Ve ôsu, éde a nga tsen. Éfônan, Kéza éé nga yiène ki ve metungha. Ve, môs ézing, Samuel a nga dzô Saúl naa a yane naa a so, ve, Samuel éé dzi ki so avôô. Éde Saúl a nga ñong nkighane naa émién a ve metungha. Za dzam Samuel a nga bo ? A nga dzô ñe naa : “Wéé va yiène ki bo Jehôva melo.” Ye Saúl a nga ñong ayeghle ébe évus dèñ ?

Ôsu, éyong Saúl a nga ke aluman ya Bamalequitas, ane Samuel a nga dzô ñe naa, a taa likh mboo ézing ye été ya éning. Vedaa, Saúl a nga kikh naa aa wiñ ki kéza Agag. Jehôva a nga dzô Samuel naa : “Saúl a ligheyang ma, ye naa, aa bo ki fe ma mewokh.” Samuel a mbe édedaa éwiñ, éde a nga dzô Saúl naa : “Jehôva a ye top kéza nfe amu naa waa bo ki fe ñe mewokh.” Niène Samuel a nga bo naa a nga ke-yang, éde Saúl a nga biñ ñe, éyong té étôp Samuel a mbe a baghe ayô, é nga ñabe. Éde Samuel a nga dzô Saúl naa : “Jehôva a vaayang wô édjié a mo été.” Jehôva a nga ye ve édjié, é mo é môr a nga ye ñe dzing ye bo ñe mewokh.