Ba vakh dzam ézing nkôô Carmelo

Édjié é mbe é bele awôm meyong ya Israel, é nga bele abuiñ mbia bekéza, ve Acab a mbe mboo ye é ba be nga dang abé. A nga lughane ya mbia minenga, éñi a mbe é lughu évus nzame be mbe be luè naa Baal. Minenga té a mbe éyôla naa Jezabel. Acab ba Jezabel be nga likh naa abuiñ bôr be lughu Baal, be nga wiñ fe abuiñ be kulu-medzô Jehôva. Za dzam Jehôva a nga bo ? A nga lôm nkulu-medzô Elías nge ki Élie naa a ke kar Acab fuèñ.

Elías a nga dzô Kéza Acab naa mveng daa ye ki nong Israel. Amu naa a mbe mbia kéza, tang mimbu milal dzôm ézing déé dzi ki faa mefup, ya dzam té éde bôr be nga bira wokh abuiñ zèñ. ôsu vèè, Jehôva a nga lôm nkulu-medzô Elías naa a bera ke kobe ya Acab. Kéza Acab a nga dzô Elías naa : “Wa wa so mintsiè misese mi, wa ô bele bidzô ébe é dzam ésese da lôr !” Éde Elías a nga yalane ñe naa : “Se ki ma me ne bidzô nge mveng daa nong ki. Nkôt ô ne amu naa wa lughu Baal. Maneghe kôan ayong, ya bekulu-medzô Baal nkôô Carmelo naa bi tame vakh dzam ézing.”

Ayong é nga mane kôane nkôô ayôp. Éde Elías a nga dzô be naa : “Mia yiane ñong nkighane. Nge Jehôva éñe a ne é Nzame a ne bebela, bééghane ñe. Ve, nge a ne Baal, bééghane ñe. N’tamane vakh dzam té. Bekulu-medzô 450 Baal ba yiane kômane metungha, béé luè fe é nzame wôba, ma ma ye fe kômane metungha mam, méé luè Jehôva. Éñi a ye yalan é lôm nduan a dzôp été éñe a ne é Nzame a ne bebela.” Ane ayong é nga yebe.

Éyong té éde bekulu-medzô Baal be nga kômane atungha deba. Be nga lôr ngura nté môs béé luè é nzame wôba : « A Baal, yebeghe bia ! » Ve, amu Baal aa nga yebe ki, éde Elías a nga sum naa a pogho bekulu-medzô bèñ naa : “Luèghane ñe ya é ngu’u denan ese. A ne bo naa a ne ôyô é yane naa môr a véé ñe.” A ke kuiñ alu, bekulu-medzô Baal be nga tsini naa ba luè ñe, vedaa môr ézing aa dzi yebe.

Elías a nga furu metungha mèñ altar, ye shuii mendzim ayôp. Éyong té, éde a nga yaghlane naa : “A Jehôva, vaa naa ayong é yen naa wa ô ne é Nzame a ne bebela !” Étéñ té ébién, éde Jehôva a nga lôm nduan a dzôp été naa é zu mane dzighi metungha. Ane bôr be nga yônane bé dzô naa : « Jehôva éñe a ne é Nzame a ne bebela ! » Éyong té Elías a nga dzô be naa : “Mi taa likh naa nkulu-medzô Baal ézing a tup !” Môs té, be nga wiñ bekulu-medzô Baal 450.

Éyong moan nkut a nga tebe a mang ayôp, éde Elías a nga dzô Acab naa : “Mura mveng éde alé da zu. Kômaneghe é carro nge ki char wiè, ô ken fe é nda duè.” Dzôp é nga mane dzèñ ya minsut minkut, nfongha ô nga vumu ngu’u, ane mveng é nga sum naa da nong. Ane nkôt ô nga man. Acab a nga duru é carro dzèñ édedaa avôô. Ve, Jehôva a nga ve Elías ngu’u naa a dang mbara avôô a lôr carro té ! Ve ye a ke kuè mindzukh mise Elías mi manang ? Bia zu da yen.